Team India: ਕੀ ਗੌਤਮ ਗੰਭੀਰ ਸਪੋਰਟ ਸਟਾਫ ’ਤੇ ਹੋਵੇਗੀ ਕਾਰਵਾਈ? ਬੀਸੀਸੀਆਈ ਅਗਸਤ ’ਚ ਖਰਾਬ ਪ੍ਰਦਰਸ਼ਨ ਦੀ ਕਰ ਸਕਦਾ ਹੈ ਸਮੀਖਿਆ

Team India: ਸਪੋਰਟਸ ਡੈਸਕ। ਭਾਰਤੀ ਕ੍ਰਿਕੇਟ ਕੰਟਰੋਲ ਬੋਰਡ (ਬੀਸੀਸੀਆਈ) ਅਗਲੇ ਮਹੀਨੇ ਦੇ ਸ਼ੁਰੂ ’ਚ ਆਇਰਲੈਂਡ, ਇੰਗਲੈਂਡ ਤੇ ਜ਼ਿੰਬਾਬਵੇ ਦੇ ਦੌਰਿਆਂ ’ਤੇ ਟੀਮ ਇੰਡੀਆ ਦੇ ਪ੍ਰਦਰਸ਼ਨ ਦਾ ਮੁਲਾਂਕਣ ਕਰਨ ਲਈ ਇੱਕ ਸਮੀਖਿਆ ਮੀਟਿੰਗ ਕਰੇਗਾ। ਮੀਡੀਆ ਰਿਪੋਰਟਾਂ ਅਨੁਸਾਰ, ਇਸ ਮੀਟਿੰਗ ’ਚ ਮੁੱਖ ਕੋਚ ਗੌਤਮ ਗੰਭੀਰ ਦੇ ਸਹਾਇਕ ਸਟਾਫ ਦੇ ਕੁਝ ਮੈਂਬਰਾਂ ਦੇ ਭਵਿੱਖ ’ਤੇ ਵੀ ਚਰਚਾ ਕੀਤੀ ਜਾਵੇਗੀ। ਬੀਸੀਸੀਆਈ ਸਕੱਤਰ ਦੇਵਜੀਤ ਸੈਕੀਆ ਨੇ ਪੁਸ਼ਟੀ ਕਰਦੇ ਹੋਏ ਕਿਹਾ, ‘ਅਸੀਂ ਅਗਸਤ ’ਚ ਇੱਕ ਸਮੀਖਿਆ ਮੀਟਿੰਗ ਕਰਾਂਗੇ।’

ਆਇਰਲੈਂਡ ਤੇ ਇੰਗਲੈਂਡ ਦੇ ਦੌਰੇ ਕਰਕੇ ਚਿੰਤਾ

ਸ਼੍ਰੇਅਸ ਅਈਅਰ ਦੀ ਕਪਤਾਨੀ ਹੇਠ, ਭਾਰਤ ਆਇਰਲੈਂਡ ਵਿਰੁੱਧ ਦੋ ਮੈਚਾਂ ਦੀ ਲੜੀ 2-0 ਨਾਲ ਹਾਰ ਗਿਆ। ਇਸ ਤੋਂ ਬਾਅਦ ਇੰਗਲੈਂਡ ਨੇ ਪੰਜ ਮੈਚਾਂ ਦੀ ਲੜੀ ’ਚ ਭਾਰਤ ਨੂੰ 4-0 ਨਾਲ ਕਲੀਨ ਸਵੀਪ ਕਰ ਦਿੱਤਾ। ਹਾਲਾਂਕਿ, ਟੀਮ ਨੇ ਜ਼ਿੰਬਾਬਵੇ ਲੜੀ ਜਿੱਤ ਕੇ ਵਾਪਸੀ ਜ਼ਰੂਰ ਕਰ ਲਈ ਹੈ, ਜੋ ਕਿ ਕਪਤਾਨ ਵਜੋਂ ਅਈਅਰ ਦੀ ਪਹਿਲੀ ਲੜੀ ਜਿੱਤ ਹੈ। ਇਹਨਾਂ ਲਗਾਤਾਰ ਹਾਰਾਂ ਨੇ ਟੀਮ ਦੇ ਪ੍ਰਦਰਸ਼ਨ ’ਤੇ ਸਵਾਲ ਖੜ੍ਹੇ ਕੀਤੇ ਹਨ, ਜਿਸ ਨਾਲ ਬੀਸੀਸੀਆਈ ਨੇ ਸਥਿਤੀ ਦੀ ਵਿਸਤ੍ਰਿਤ ਸਮੀਖਿਆ ਕੀਤੀ।

Read Also : Crime News: ਮੋਹਾਲੀ ਪੁਲਿਸ ਤੇ ਨਸ਼ਾ ਤਸਕਰਾਂ ਵਿਚਕਾਰ ਮੁਕਾਬਲਾ, ਦੋ ਮੁਲਜ਼ਮ ਜਖ਼ਮੀ

‘ਇਹ ਸਿਰਫ਼ ਇੱਕ ਮਾੜਾ ਪੜਾਅ ਹੈ’ : ਦੇਵਜੀਤ ਸੈਕੀਆ | Team India

ਪਹਿਲਾਂ, ਦੇਵਜੀਤ ਸੈਕੀਆ ਨੇ ਕਿਹਾ ਸੀ ਕਿ ਇੰਗਲੈਂਡ ਤੇ ਆਇਰਲੈਂਡ ਵਿੱਚ ਹਾਰਾਂ ਯਕੀਨੀ ਤੌਰ ’ਤੇ ਚਿੰਤਾਜਨਕ ਸਨ, ਪਰ ਇਸ ਨੂੰ ਅਸਾਧਾਰਨ ਨਹੀਂ ਮੰਨਿਆ ਜਾਣਾ ਚਾਹੀਦਾ। ਉਨ੍ਹਾਂ ਕਿਹਾ, ‘ਟੀਮ ਇੰਡੀਆ ਦਾ ਪ੍ਰਦਰਸ਼ਨ ਉਮੀਦਾਂ ਅਨੁਸਾਰ ਨਹੀਂ ਸੀ, ਪਰ ਅੰਤਰਰਾਸ਼ਟਰੀ ਕ੍ਰਿਕੇਟ ’ਚ ਅਜਿਹੇ ਪੜਾਅ ਆ ਸਕਦੇ ਹਨ। ਅਸੀਂ ਇਸਨੂੰ ਸਿਰਫ਼ ਇੱਕ ਮਾੜਾ ਪੜਾਅ ਮੰਨਦੇ ਹਾਂ।’ ਸੈਕੀਆ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਸਮੀਖਿਆ ਮੀਟਿੰਗ ਦਾ ਮੁੱਖ ਉਦੇਸ਼ ਟੀਮ ਦੇ ਪ੍ਰਦਰਸ਼ਨ ਦਾ ਵਿਸ਼ਲੇਸ਼ਣ ਕਰਨਾ ਤੇ ਸੁਧਾਰ ਕਰਨ ਦੇ ਤਰੀਕੇ ਲੱਭਣਾ ਹੋਵੇਗਾ।

ਗਾਵਸਕਰ ਨੇ ਬੀਸੀਸੀਆਈ ਨੂੰ ਜਲਦਬਾਜ਼ੀ ਵਾਲੇ ਫੈਸਲਿਆਂ ਤੋਂ ਬਚਣ ਦੀ ਦਿੱਤੀ ਸਲਾਹ

ਸਾਬਕਾ ਭਾਰਤੀ ਕਪਤਾਨ ਸੁਨੀਲ ਗਾਵਸਕਰ ਨੇ ਬੀਸੀਸੀਆਈ ਨੂੰ ਕਿਸੇ ਵੀ ਜਲਦਬਾਜ਼ੀ ਵਾਲੇ ਫੈਸਲਿਆਂ ਤੋਂ ਬਚਣ ਦੀ ਸਲਾਹ ਦਿੱਤੀ ਹੈ। ਉਨ੍ਹਾਂ ਨੇ ਸਪੋਰਟਸਸਟਾਰ ਲਈ ਆਪਣੇ ਕਾਲਮ ’ਚ ਲਿਖਿਆ ਹੈ ਕਿ ਸਿਰਫ਼ ਚਾਰ ਮਹੀਨੇ ਪਹਿਲਾਂ, ਇਹੀ ਟੀਮ ਵਿਸ਼ਵ ਚੈਂਪੀਅਨ ਬਣੀ ਸੀ, ਇਸ ਲਈ ਕੁਝ ਹਾਰਾਂ ਦੇ ਆਧਾਰ ’ਤੇ ਵੱਡੇ ਬਦਲਾਅ ਕਰਨਾ ਸਹੀ ਨਹੀਂ ਹੋਵੇਗਾ। ਗਾਵਸਕਰ ਨੇ ਭਾਰਤੀ ਬੱਲੇਬਾਜ਼ਾਂ ਦੀ ਤਕਨੀਕ ’ਤੇ ਵੀ ਸਵਾਲ ਉਠਾਏ। ਉਨ੍ਹਾਂ ਅਨੁਸਾਰ, ਫਲੈਟ ਆਈਪੀਐਲ ਪਿੱਚਾਂ ’ਤੇ ਖੇਡਣ ਕਾਰਨ, ਬੱਲੇਬਾਜ਼ ਛੋਟੀਆਂ ਗੇਂਦਾਂ ਦੇ ਵਿਰੁੱਧ ਤਕਨੀਕੀ ਤੌਰ ’ਤੇ ਕਮਜ਼ੋਰ ਜਾਪਦੇ ਹਨ, ਤੇ ਇਹ ਉਨ੍ਹਾਂ ਦੇ ਹਾਲ ਹੀ ਦੇ ਮਾੜੇ ਪ੍ਰਦਰਸ਼ਨ ਦਾ ਇੱਕ ਵੱਡਾ ਕਾਰਨ ਹੈ।