Australia Weather: ਸਤੰਬਰ ਦੀ ਸ਼ੁਰੂਆਤ ’ਚ ਵੀ ਤਪ ਰਿਹਾ ਅਸਟਰੇਲੀਆ

ਸਿਡਨੀ (ਏਜੰਸੀ)। ਅਸਟਰੇਲੀਆ ਦੇ ਪੂਰਬੀ ਹਿੱਸੇ ’ਚ ਗਰਮੀ ਤੋਂ ਹੁਣ ਵੀ ਲੋਕ ਬੇਹਾਲ ਹਨ ਸਤੰਬਰ ਦੀ ਸ਼ੁਰੂਆਤ ਵੀ ਅਸਾਧਾਰਨ ਗਰਮੀ ਨਾਲ ਹੋਈ ਹੈ। ਬ੍ਰਿਸਬੇਨ ਵਿੱਚ ਤਾਪਮਾਨ 34 ਡਿਗਰੀ ਸੈਲਸੀਅਸ ਤੱਕ ਪਹੁੰਚਣ ਦੀ ਉਮੀਦ ਹੈ। ਮੌਸਮ ਵਿਭਾਗ ਅਨੁਸਾਰ ਐਲ ਨੀਨੋ ਪ੍ਰਭਾਵ ਨੇ ਵੀ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਮੌਸਮ ਵਿਗਿਆਨ ਬਿਊਰੋ (ਬੀਓਐੱਮ) ਅਨੁਸਾਰ ਦੱਖਣ-ਪੂਰਬੀ ਕਵੀਂਸਲੈਂਡ ਅਤੇ ਉੱਤਰ-ਪੂਰਬੀ ਨਿਊ ਸਾਊਥ ਵੇਲਜ਼ ਵਿੱਚ ਤਾਪਮਾਨ ਆਮ ਨਾਲੋਂ ਕਈ ਡਿਗਰੀ ਵੱਧ ਹੈ। ਬ੍ਰਿਸਬੇਨ ਵਿੱਚ ਸਵੇਰੇ 31.6 ਡਿਗਰੀ ਸੈਲਸੀਅਸ ਦਾ ਤਾਪਮਾਨ ਦਰਜ ਕੀਤਾ ਗਿਆ, ਜਦੋਂ ਕਿ ਇਪਸਵਿਚ ਦੇ ਅੰਬਰਲੇ ’ਚ ਪਾਰਾ 35.7 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ। ਇਸ ਅਸਾਧਾਰਨ ਗਰਮੀ ਦਾ ਪ੍ਰਭਾਵ ਤਾਪਮਾਨ ਤੱਕ ਸੀਮਿਤ ਨਹੀਂ ਹੈ। ਕਵੀਂਸਲੈਂਡ ਦੇ ਇਪਸਵਿਚ ਅਤੇ ਲਾਕਰ ਵੈਲੀ ’ਚ ਫਾਇਰ ਬੈਨ ਲਾਗੂ ਕੀਤਾ ਗਿਆ ਹੈ ਗਰਮ ਅਤੇ ਖੁਸ਼ਕ ਮੌਸਮ ਦੇ ਨਾਲ ਤੇਜ਼ ਹਵਾਵਾਂ ਨੇ ਜੰਗਲੀ ਅੱਗਾਂ ਦੇ ਖ਼ਤਰੇ ਨੂੰ ਵਧਾ ਦਿੱਤਾ ਹੈ। Australia Weather

ਇਸ ਨਾਲ ਇੱਕ ਦਿਨ ਪਹਿਲਾਂ ਸਿਡਨੀ ਖੇਤਰ ਵਿੱਚ ਅੱਗ ’ਤੇ ਪਾਬੰਦੀ ਵੀ ਲਾਈ ਗਈ ਸੀ। ਸ਼ਨਿੱਚਰਵਾਰ ਨੂੰ ਸਿਡਨੀ ਵਿੱਚ ਤਾਪਮਾਨ 33 ਡਿਗਰੀ ਸੈਲਸੀਅਸ ਤੱਕ ਪਹੁੰਚ ਗਿਆ ਸੀ। ਮੌਸਮ ਵਿਗਿਆਨੀਆਂ ਅਨੁਸਾਰ ਸਤੰਬਰ ਦੇ ਸ਼ੁਰੂ ਵਿੱਚ ਸ਼ਹਿਰ ਦਾ ਵੱਧ ਤੋਂ ਵੱਧ ਤਾਪਮਾਨ ਔਸਤ ਗਰਮੀਆਂ ਦੇ ਪੱਧਰ ਦੇ ਨੇੜੇ ਸੀ, ਜੋ ਕਿ 1858 ਵਿੱਚ ਰਿਕਾਰਡ ਸ਼ੁਰੂ ਹੋਣ ਤੋਂ ਬਾਅਦ ਬਸੰਤ ਰੁੱਤ ਦੇ ਸ਼ੁਰੂ ਵਿੱਚ ਇੱਕ ਅਸਾਧਾਰਨ ਤੌਰ ’ਤੇ ਉੱਚ ਅੰਕੜਾ ਹੈ। ਅਸਟਰੇਲੀਆ ਵਿੱਚ ਇਹ ਪੌਣਪਾਣੀ ’ਚ ਤਬਦੀਲੀ ਅਜਿਹੇ ਸਮੇਂ ਆਈ ਹੈ ਜਦੋਂ ਦੇਸ਼ ਨੇ ਆਪਣਾ ਤੀਜਾ ਸਭ ਤੋਂ ਗਰਮ ਬਸੰਤ ਰੁੱਤ ਦਰਜ ਕੀਤਾ ਹੈ। ਕਵੀਂਸਲੈਂਡ ਵਿੱਚ ਸਰਦੀਆਂ ਦਾ ਔਸਤ ਤਾਪਮਾਨ ਲੰਮੇ ਸਮੇਂ ਦੇ ਔਸਤ ਤੋਂ ਲਗਭਗ 1.8 ਡਿਗਰੀ ਸੈਲਸੀਅਸ ਵੱਧ ਸੀ। ਇਸ ਦੌਰਾਨ ਅਸਟਰੇਲੀਆ ਦੇ ਮੌਸਮ ’ਤੇ ਐਲ ਨੀਨੋ ਦਾ ਪ੍ਰਭਾਵ ਵੀ ਚਿੰਤਾਵਾਂ ਵਧਾ ਰਿਹਾ ਹੈ। ਮੌਸਮ ਵਿਗਿਆਨ ਬਿਊਰੋ ਨੇ ਚਿਤਾਵਨੀ ਦਿੱਤੀ ਹੈ ਕਿ ਮੌਜ਼ੂਦਾ ਐਲ ਨੀਨੋ ਰਿਕਾਰਡ ਵਿੱਚ ਸਭ ਤੋਂ ਮਜ਼ਬੂਤ ਘਟਨਾ ਹੋ ਸਕਦੀ ਹੈ, ਜਿਸ ਨਾਲ ਗਰਮ ਅਤੇ ਖੁਸ਼ਕ ਹਾਲਾਤ ਹੋ ਸਕਦੇ ਹਨ ਅਤੇ ਦੇਸ਼ ਦੇ ਪੂਰਬੀ ਅਤੇ ਦੱਖਣੀ ਹਿੱਸਿਆਂ ਵਿੱਚ ਜੰਗਲੀ ਅੱਗ ਦਾ ਖ਼ਤਰਾ ਵਧ ਸਕਦਾ ਹੈ। Australia Weather

ਇਹ ਵੀ ਪੜ੍ਹੋ : Punjab Weather Update: ਪੰਜਾਬ ’ਚ ਮੀਂਹ ਤੋਂ ਮਿਲੇਗੀ ਰਾਹਤ, ਅੱਜ 14 ਜ਼ਿਲ੍ਹਿਆਂ ’ਚ ਮੀਂਹ ਦੀ ਸੰਭਾਵਨਾ