Punjab
ਸਰਸਾ (ਸੱਚ ਕਹੂੰ ਨਿਊਜ਼)। ਜੀਵਨ ਭਰ ਮਨੁੱਖਤਾ, ਸੇਵਾ ਅਤੇ ਪਰਉਪਕਾਰ ਦੇ ਰਾਹ ’ਤੇ ਚੱਲਣ ਵਾਲੇ ਸ਼ਾਹ ਸਤਿਨਾਮ ਜੀ ਨਗਰ ਵਾਸੀ ਸੱਚੀ ਨਿਮਰ ਸੇਵਾਦਾਰ ਭੈਣ ਸੁਸ਼ੀਲਾ ਇੰਸਾਂ (61) ਸ਼ੁੱਕਰਵਾਰ ਰਾਤ ਹਾਰਟ ਅਟੈਕ ਕਾਰਨ ਸੱਚਖੰਡ ਜਾ ਬਿਰਾਜੇ, ਪਰ ਦੁਨੀਆਂ ਤੋਂ ਜਾਂਦੇ-ਜਾਂਦੇ ਵੀ ਉਨ੍ਹਾਂ ਨੇ ਇੱਕ ਅਜਿਹਾ ਪ੍ਰੇਰਣਾਦਾਇਕ ਕੰਮ ਕਰ ਦਿੱਤਾ ਜਿਸ ਨੇ ਹਰ ਅੱਖ ਨੂੰ ਨਮ ਕਰ ਦਿੱਤਾ ਅਤੇ ਹਿਰਦੇ ਨੂੰ ਮਾਣ ਨਾਲ ਭਰ ਦਿੱਤਾ।
ਉਨ੍ਹਾਂ ਦੇ ਮਰਨ ਉਪਰੰਤ ਉਨ੍ਹਾਂ ਦੇ ਪਰਿਵਾਰ ਵਾਲਿਆਂ ਨੇ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਵੱਲੋਂ ਦਿੱਤੀਆਂ ਇਨਸਾਨੀਅਤ ਤੇ ਭਲਾਈ ਦੀਆਂ ਸਿੱਖਿਆਵਾਂ ’ਤੇ ਚੱਲਦਿਆਂ ਡੇਰਾ ਸੱਚਾ ਸੌਦਾ ਦੀ ਅਮਰ ਸੇਵਾ ਮੁਹਿੰਮ ਤਹਿਤ ਉਨ੍ਹਾਂ ਦੀ ਮ੍ਰਿਤਕ ਦੇਹ ਮੈਡੀਕਲ ਖੋਜ ਕਾਰਜਾਂ ਲਈ ਵਰਲਡ ਕਾਲਜ ਆਫ਼ ਮੈਡੀਕਲ ਸਾਇੰਸਿਜ਼ ਐਂਡ ਹਸਪਤਾਲ, ਝੱਜਰ ਨੂੰ ਦਾਨ ਕਰ ਦਿੱਤੀ। ਸਰੀਰਦਾਨ ਦੇ ਇਸ ਫੈਸਲੇ ਨੇ ਸੁਸ਼ੀਲਾ ਇੰਸਾਂ ਨੂੰ ਮੌਤ ਤੋਂ ਬਾਅਦ ਵੀ ਮਾਨਵਤਾ ਦੀ ਸੇਵਾ ਨਾਲ ਜੋੜਦਿਆਂ ਅਮਰ ਕਰ ਦਿੱਤਾ ਹੈ। ਅੰਤਿਮ ਵਿਦਾਈ ਦੇ ਮੌਕੇ ’ਤੇ ਡੇਰਾ ਸੱਚਾ ਸੌਦਾ ਦੇ ਸੀਨੀਅਰ ਵਾਈਸ ਚੇਅਰਮੈਨ ਪੀਆਰ ਨੈਣ, ਨਵੀਨ ਇੰਸਾਂ ਸਮੇਤ ਵੱਖ-ਵੱਖ ਰਾਜਾਂ ਤੋਂ ਪਹੁੰਚੇ ਸੱਚੇ ਨਿਮਰ ਸੇਵਾਦਾਰਾਂ ਨੇ ਉਨ੍ਹਾਂ ਨੂੰ ਸ਼ਰਧਾ ਦੇ ਫੁੱਲ ਭੇਂਟ ਕੀਤੇ।
ਇਸ ਤੋਂ ਪਹਿਲਾਂ ਸ਼ਾਹ ਸਤਿਨਾਮ ਜੀ ਨਗਰ ਸਥਿਤ ਐੱਮਐੱਸਜੀ ਡੇਰਾ ਸੱਚਾ ਸੌਦਾ ਅਤੇ ਮਾਨਵਤਾ ਭਲਾਈ ਕੇਂਦਰ ਵਿਚ ਸਾਧ-ਸੰਗਤ, ਪਰਿਵਾਰਕ ਮੈਂਬਰਾਂ ਅਤੇ ਰਿਸ਼ਤੇਦਾਰਾਂ ਨੇ ਅਰਦਾਸ ਦਾ ਸ਼ਬਦ ਬੋਲਿਆ। ਇਸ ਤੋਂ ਬਾਅਦ ਮਾਨਵਤਾ ਭਲਾਈ ਕੇਂਦਰ ਤੋਂ ਸ਼ਾਹ ਮਸਤਾਨਾ ਜੀ-ਸ਼ਾਹ ਸਤਿਨਾਮ ਜੀ ਧਾਮ ਡੇਰਾ ਸੱਚਾ ਸੌਦਾ ਸਰਸਾ ਤੱਕ ਅੰਤਿਮ ਵਿਦਾਈ ਯਾਤਰਾ ਕੱਢੀ ਗਈ। ਅੰਤਿਮ ਯਾਤਰਾ ਦੌਰਾਨ ‘ਜਦ ਤੱਕ ਸੂਰਜ ਚਾਂਦ ਰਹੇਗਾ, ਸਰੀਰਦਾਨੀ ਸੁਸ਼ੀਲਾ ਇੰਸਾਂ ਤੇਰਾ ਨਾਮ ਰਹੇਗਾ, ਸਰੀਰਦਾਨੀ ਸੁਸ਼ੀਲਾ ਇੰਸਾਂ ਅਮਰ ਰਹੇ’ ਦੇ ਨਾਅਰਿਆਂ ਨਾਲ ਪੂਰਾ ਵਾਤਾਵਰਨ ਗੂੰਜ ਉੱਠਿਆ।
ਹਰ ਅੱਖ ਨਮ ਸੀ, ਹਰ ਚਿਹਰਾ ਭਾਵੁਕ ਸੀ ਅਤੇ ਹਰ ਦਿਲ ਇਹੀ ਆਖ ਰਿਹਾ ਸੀ ਕਿ ਸੇਵਾ ਦਾ ਇਹ ਜੀਵਨ ਸੱਚਮੁੱਚ ਧੰਨ ਹੋ ਗਿਆ। ਬਾਅਦ ਵਿਚ ਉਨ੍ਹਾਂ ਦੀ ਮ੍ਰਿਤਕ ਦੇਹ ਨੂੰ ਫੁੱਲਾਂ ਨਾਲ ਸੱਜੀ ਐਂਬੂਲੈਂਸ ਵਿਚ ਰੱਖ ਕੇ ਮੈਡੀਕਲ ਕਾਲਜ ਝੱਜਰ ਲਈ ਰਵਾਨਾ ਕੀਤਾ ਗਿਆ। ਐਂਬੂਲੈਂਸ ਦੇ ਚੱਲਦਿਆਂ ਹੀ ਮਾਹੌਲ ਬਹੁਤ ਭਾਵੁਕ ਹੋ ਗਿਆ ਤੇ ਹਾਜ਼ਰ ਲੋਕਾਂ ਨੇ ਨਮ ਅੱਖਾਂ ਨਾਲ ਇਲਾਹੀ ਨਾਅਰਾ ਬੋਲ ਕੇ ਭੈਣ ਸੁਸ਼ੀਲਾ ਇੰਸਾਂ ਨੂੰ ਅੰਤਿਮ ਵਿਦਾਈ ਦਿੱਤੀ।
ਇਸ ਮੌਕੇ ’ਤੇ ਬਲਾਕ ਸ਼ਾਹ ਸਤਿਨਾਮ ਜੀ ਨਗਰ, ਕਲਿਆਣ ਨਗਰ, ਸਰਸਾ ਸਮੇਤ ਆਸ-ਪਾਸ ਦੇ ਬਲਾਕਾਂ ਦੀਆਂ ਸੱਚੀ ਪ੍ਰੇਮੀ ਸੰਮਤੀਆਂ ਦੇ ਸੇਵਾਦਾਰ, ਸਾਧ-ਸੰਗਤ, ਸੱਚੇ ਨਿਮਰ ਸੇਵਾਦਾਰ ਭਾਈ-ਭੈਣ ਅਤੇ ਡੇਰਾ ਸੱਚਾ ਸੌਦਾ ਦੀ ਪ੍ਰਬੰਧਕੀ ਕਮੇਟੀ ਦੇ ਮੈਂਬਰ ਹਾਜ਼ਰ ਸਨ।
ਬੇਟਾ-ਬੇਟੀ ਇੱਕ ਸਮਾਨ ਦਾ ਭਾਵੁਕ ਦ੍ਰਿਸ਼ ਬਣਿਆ ਪ੍ਰੇਰਣਾ
ਅੰਤਿਮ ਵਿਦਾਈ ਤੋਂ ਪਹਿਲਾਂ ਡੇਰਾ ਸੱਚਾ ਸੌਦਾ ਦੀ ਬੇਟਾ-ਬੇਟੀ ਇੱਕ ਸਮਾਨ ਮੁਹਿੰਮ ਤਹਿਤ ਸਰੀਰਦਾਨੀ ਸੁਸ਼ੀਲਾ ਇੰਸਾਂ ਦੀ ਧੀ ਮਨੀਸ਼ਾ ਇੰਸਾਂ, ਨੂੰਹ ਰੀਨਾ ਇੰਸਾਂ, ਪੋਤੀ ਸਵੀਟਸ਼ਾਈਨ ਤੇ ਪੁੱਤਰ ਪ੍ਰੇਮ ਇੰਸਾਂ ਸਮੇਤ ਹੋਰ ਪਰਿਵਾਰਕ ਮੈਂਬਰਾਂ ਨੇ ਅਰਥੀ ਨੂੰ ਮੋਢਾ ਦੇ ਕੇ ਸਮਾਜ ਨੂੰ ਬਰਾਬਰੀ, ਸੰਸਕਾਰ ਤੇ ਔਰਤ ਸਨਮਾਨ ਦਾ ਪ੍ਰੇਰਣਾਦਾਇਕ ਸੁਨੇਹਾ ਦਿੱਤਾ। ਇਹ ਦ੍ਰਿਸ਼ ਹਾਜ਼ਰ ਲੋਕਾਂ ਲਈ ਬਹੁਤ ਭਾਵੁਕ ਤੇ ਪ੍ਰੇਰਣਾਦਾਇਕ ਰਿਹਾ। ਸੁਸ਼ੀਲਾ ਇੰਸਾਂ ਆਪਣੇ ਪਿੱਛੇ ਪਤੀ ਰਾਮਫਲ ਇੰਸਾਂ, ਦੋ ਧੀਆਂ ਮਨੀਸ਼ਾ ਇੰਸਾਂ ਤੇ ਅਨੁ ਇੰਸਾਂ, ਬੇਟਾ ਪ੍ਰੇਮ ਇੰਸਾਂ, ਜਵਾਈ ਨੀਰਜ ਇੰਸਾਂ ਸਮੇਤ ਭਰਿਆ-ਪੂਰਾ ਪਰਿਵਾਰ ਛੱਡ ਗਏ ਹਨ। ਉਨ੍ਹਾਂ ਦੀ ਇੱਕ ਪੁੱਤਰੀ ਅਨੁ ਇੰਸਾਂ ਡੇਰਾ ਸੱਚਾ ਸੌਦਾ ਵਿਚ ਸੇਵਾਦਾਰ ਵਜੋਂ ਸੇਵਾਵਾਂ ਦੇ ਰਹੀ ਹਨ।
Read Also : ਜੇਕਰ ਤੁਹਾਡਾ ਵੀ ਚੱਲ ਰਿਹੈ ਲਗਾਤਾਰ AC ਤਾਂ ਜ਼ਰੂਰ ਪੜ੍ਹੋ ਇਹ ਖ਼ਬਰ, ਇੱਕ ਗਲਤੀ ਨਾਲ 9 ਜਣਿਆਂ ਦੀ ਮੌਤ
About The Author
