Punjab
World Health Day: ਵਿਸ਼ਵ ਸਿਹਤ ਦਿਵਸ ਹਰ ਸਾਲ 7 ਅਪਰੈਲ ਨੂੰ ਜਨਤਕ ਸਿਹਤ ਵੱਲ ਧਿਆਨ ਕੇਂਦਰਤ ਕਰਨ ਲਈ ਵਿਸ਼ਵ ਸਿਹਤ ਸੰਗਠਨ ਸਥਾਪਨਾ ਵਰ੍ਹੇਗੰਢ ਨੂੰ ਮੁੱਖ ਰੱਖਦੇ ਹੋਏ ਮਨਾਇਆ ਜਾਂਦਾ ਹੈ। ਸਾਲ 2026 ਲਈ ਡਬਲਯੂਐੱਚਓ ਨੇ ਸਿਹਤ ਲਈ ਇੱਕਜੁਟ ਹੋਣ ਦਾ ਨਾਅਰਾ ਦਿੱਤਾ ਹੈ। ‘ਵਿਗਿਆਨ ਦੇ ਨਾਲ ਖੜ੍ਹੇ ਰਹੋ’ ਥੀਮ ਦਾ ਐਲਾਨ ਕੀਤਾ ਹੈ। ਇਸ ਸਾਲ ਦੀ ਮੁਹਿੰਮ ਦਾ ਮਕਸਦ ਲੋਕਾਂ, ਜਾਨਵਰਾਂ, ਪੌਦਿਆਂ ਤੇ ਗ੍ਰਹਿ ਦੀ ਸਿਹਤ ਦੀ ਰੱਖਿਆ ਕਰਨਾ ਹੈ। ਜੇਕਰ ਮਨੁੱਖਾਂ ਦੀ ਸਿਹਤ ਦੀ ਗੱਲ ਕਰੀਏ ਤਾਂ ਦੁਨੀਆ ਭਰ ਵਿੱਚ ਲੱਖਾਂ ਲੋਕਾਂ ਦੀ ਸਿਹਤ ਦਾ ਪੱਧਰ ਲਗਾਤਾਰ ਖ਼ਤਰੇ ਵਿੱਚ ਆ ਰਿਹਾ ਹੈ ਲਗਾਤਾਰ ਬਦਲ ਰਹੀ ਜੀਵਨ ਸ਼ੈਲੀ, ਸਿਹਤ ਦੇ ਬਿਗਾੜ ਦਾ ਇੱਕ ਵੱਡਾ ਕਾਰਨ ਬਣ ਰਹੀ ਹੈ ਸਾਡੀਆਂ ਗਲਤ ਆਦਤਾਂ ਹੀ ਸਾਡੀ ਸਿਹਤ ਦੀਆਂ ਦੁਸ਼ਮਣ ਬਣ ਕੇ ਸਾਡੇ ਜੀਵਨ ਵਿੱਚ ਬਿਮਾਰੀਆਂ ਨੂੰ ਸੱਦਾ ਦੇ ਰਹੀਆਂ ਹਨ।
Also Read : Punjab ਦੇ ਪੁਲਿਸਿੰਗ ਮਾਡਲ ਤੇ ਇੱਕ ਝਾਤ ਜਿਸ ਕਰਕੇ ਪੰਜਾਬ ਦੇਸ਼ ਭਰ ਦੇ 'ਚ ਨਸ਼ਿਆਂ ਸੰਬੰਧੀ ਗ੍ਰਿਫਤਾਰੀਆਂ ਹੈ 'ਚ ਮੋਹਰੀ
ਚੰਗੀ ਸਿਹਤ ਦਾ ਮੂਲ ਅਧਾਰ ਸਾਡੀ ਚੰਗੀ ਖੁਰਾਕ ਹੈ, ਅਸੀਂ ਸਾਰਿਆਂ ਨੇ ਸੰਤੁਲਿਤ ਭੋਜਨ ਬਾਰੇ ਪੜਿ੍ਹਆ ਜਰੂਰ ਹੈ ਪਰ ਬਹੁਤੇ ਲੋਕ ਚੰਗਾ, ਸਾਫ਼ ਤੇ ਸੰਤੁਲਿਤ ਭੋਜਨ ਲੈਂਦੇ ਹੀ ਨਹੀਂ ਅਸੀਂ ਪੰਜਾਬ ਦੇ ਖੁੱਲ੍ਹੀਆਂ ਖੁਰਾਕਾਂ ਖਾਣ ਵਾਲੇ ਪੰਜਾਬੀ, ਦੁੱਧ, ਦਹੀਂ, ਲੱਸੀ ਦੀ ਥਾਂ ਬਰਗਰ, ਪੀਜੇ ਖਾਣ ਲੱਗ ਪਏ ਹਾਂ ਫਾਸਟ ਫੂਡ ਜਦੋਂ ਦਾ ਸਾਡੀ ਪਹਿਲੀ ਪਸੰਦ ਬਣ ਗਿਆ ਹੈ ਤਦੋਂ ਦਾ ਬੱਚਿਆਂ ਵਿੱਚ ਸਹੀ ਵਾਧਾ ਤੇ ਵਿਕਾਸ ਰੁਕਿਆ ਹੈ ਮਾੜੀ ਸਿਹਤ ਦੇ ਵਾਧੇ ’ਚ ਜਿੱਥੇ ਮਾੜੀ ਖੁਰਾਕ ਕਾਰਨ ਹੈ, ਉੱਥੇ ਕੰਮ ਦਾ ਵਾਧੂ ਬੋਝ, ਹਰ ਸਮੇਂ ਮਾਨਸਿਕ ਤਣਾਓ ਤੇ ਬੇਲੋੜੀ ਭੱਜ-ਨੱਠ ਵੀ ਸਿਹਤ ਨੂੰ ਨੁਕਸਾਨ ਪਹੁੰਚਾ ਰਹੀ ਹੈ। ਇਸ ਤੋਂ ਬਾਅਦ ਵਾਤਾਵਰਨ ਦਾ ਪ੍ਰਦੂਸ਼ਿਤ ਹੋਣਾ ਵੀ ਸਿਹਤ ਸਮੱਸਿਆ ਦਾ ਕਾਰਨ ਹੈ।
ਵਧ ਰਹੀ ਅਬਾਦੀ, ਆਵਾਜਾਈ ਦੇ ਸਾਧਨਾਂ ਦੀ ਭੀੜ, ਇੰਜਣਾਂ, ਫੈਕਟਰੀਆਂ ’ਚੋਂ ਨਿੱਕਲਦਾ ਧੂੰਆਂ ਜਲਵਾਯੂ ਸੰਕਟ ਨੂੰ ਵਧਾ ਰਿਹਾ ਹੈ ਤੇ ਸਾਫ਼ ਹਵਾ ਵਿੱਚ ਸਾਹ ਲੈਣ ਦੇ ਸਾਡੇ ਅਧਿਕਾਰ ਨੂੰ ਖੋਹ ਰਿਹਾ ਹੈ ਡਬਲਯੂਐੱਚਓ ਕੌਂਸਲ ਆਨ ਦਾ ਇਕਨਾਮਿਕਸ ਆਫ਼ ਹੈਲਥ ਫਾਰ ਆਲ ਨੇ ਪਾਇਆ ਹੈ ਕਿ ਘੱਟੋ-ਘੱਟ 140 ਦੇਸ਼ਾਂ ਨੇ ਆਪਣੇ ਸੰਵਿਧਾਨ ਵਿੱਚ ਸਿਹਤ ਨੂੰ ਮਨੁੱਖੀ ਅਧਿਕਾਰ ਵਜੋਂ ਮਾਨਤਾ ਦਿੱਤੀ ਹੈ। ਮਨੁੱਖੀ ਸਿਹਤ ਸਬੰਧੀ ਦਿਨੋਂ-ਦਿਨ ਖਰਾਬ ਹੋ ਰਹੇ ਹਾਲਾਤ ਭਾਵੇਂ ਸਾਡੇ ਹੱਥ ਵਿੱਚ ਨਹੀਂ ਹਨ ਪਰ ਸਾਡੀ ਆਪਣੀ ਸਿਹਤ ਸੰਭਾਲ ਸਾਡੇ ਹੱਥ ਵਿੱਚ ਹੈ ਅੱਜ ਵਿਸ਼ਵ ਸਿਹਤ ਦਿਵਸ ’ਤੇ ਅਸੀਂ ਆਪਣੀ ਸ਼ੈਲੀ ਵਿੱਚ ਥੋੜ੍ਹਾ ਜਿਹਾ ਬਦਲਾਅ ਕਰਕੇ ਆਪਣੇ-ਆਪ ਨੂੰ ਤੰਦਰੁਸਤ ਰੱਖ ਸਕਦੇ ਹਾਂ ਸਵਾਲ ਇਹ ਵੀ ਹੈ ਕਿ ਆਖਰ ਕੌਣ ਕਰ ਰਿਹੈ ਸਾਡੀ ਸਿਹਤ ਨਾਲ ਖਿਲਵਾੜ? ਪਹਿਲਾਂ ਅਸੀਂ ਜੋ ਬਿਨਾਂ ਪਰਖੇ, ਬਿਨਾਂ ਸੋਚੇ ਖਾ-ਪੀ ਰਹੇ ਹਾਂ।
ਜਗ੍ਹਾ-ਜਗ੍ਹਾ ਕੂੜਾ-ਕਰਕਟ ਸਿੱਟ ਰਹੇ ਹਾਂ, ਬੇਲੋੜਾ ਪ੍ਰਦੂਸ਼ਣ ਫੈਲਾ ਰਹੇ ਹਾਂ, ਰੁੱਖ ਲਾ ਨਹੀਂ ਰਹੇ ਤੇ ਉਜਾੜ ਰਹੇ ਹਾਂ, ਮਿਲਾਵਟਖੋਰਾਂ ਖਿਲਾਫ਼ ਚੁੱਪ ਹਾਂ, ਦੂਸਰੇ ਉਹ ਲੋਕ ਜੋ ਮੁਨਾਫ਼ੇ ਦੇ ਲਾਲਚ ਵਿੱਚ ਨਕਲੀ ਦੁੱਧ, ਘਿਓ, ਮਿਲਾਵਟੀ ਰਾਸ਼ਨ ਤੇ ਸਿੰਥੈਟਿਕ ਖਾਣਾ ਪਰੋਸ ਰਹੇ ਹਨ, ਤੇ ਰੁੱਖਾਂ ਨੂੰ ਕੱਟਣ ਸਮੇਤ ਵੱਖ-ਵੱਖ ਤਰੀਕਿਆਂ ਨਾਲ ਵਾਤਾਵਰਨ ਖਰਾਬ ਕਰ ਰਹੇ ਹਨ, ਸਾਨੂੰ ਆਪਣੇ-ਆਪ ਨੂੰ ਬਦਲਣਾ ਪੈਣਾ ਹੈ ਸਭ ਤੋਂ ਪਹਿਲਾਂ ਸਾਨੂੰ ਇਹ ਮੰਨਣਾ ਹੋਵੇਗਾ ਕੇ ਖਾਣਾ ਅਸੀਂ ਸਿਰਫ ਪੇਟ ਦੀ ਭੁੱਖ ਮਿਟਾਉਣ ਲਈ ਨਹੀਂ, ਸਗੋਂ ਸਰੀਰ ਦੀ ਤਾਕਤ ਤੇ ਜਰੂਰੀ ਤੱਤ ਲੈਣ ਲਈ ਵੀ ਖਾਣਾ ਹੈ ਸਾਡੀ ਪਹਿਲ ਸਾਫ਼, ਤਾਜ਼ਾ ਵਿਟਾਮਿਨ, ਕੈਲਰੀ ਭਰਭੂਰ ਖਾਣਾ, ਫ਼ਲ ਤੇ ਸਬਜ਼ੀਆਂ ਹੋਣੀਆਂ ਚਾਹੀਦੀਆਂ ਹਨ।
ਦੂਸਰਾ ਸਾਨੂੰ ਦਿਨ ਭਰ ਵਿੱਚ ਆਪਣੇ ਲਈ ਸਮਾਂ ਕੱਢਣਾ ਪਵੇਗਾ, ਸਵੇਰ ਦੀ ਸੈਰ, ਕਸਰਤ, ਯੋਗ, ਸੰਗੀਤ, ਖੇਡਾਂ ਤੇ ਸਕੂਨ ਦੇਣ ਵਾਲੇ ਪਲ ਕੱਢਣੇ ਚਾਹੀਦੇ ਹਨ ਸਕ੍ਰੀਨ ਟਾਈਮ ਘਟਾ ਕੇ ਚੰਗੀਆਂ ਕਿਤਾਬਾਂ ਤੇ ਦੋਸਤਾਂ ਤੇ ਪਰਿਵਾਰ ਨਾਲ ਸਮਾਂ ਬਿਤਾਉਣਾ ਚਾਹੀਦਾ ਹੈ ਬੇਲੋੜਾ ਤਣਾਓ ਛੱਡ ਕੇ ਨਕਾਰਤਮਕ ਵਿਚਾਰਾਂ ਵਾਲੇ ਲੋਕਾਂ ਤੋਂ ਦੂਰੀ ਬਣਾ ਕੇ ਪਾਜ਼ਿਟਿਵ ਤੇ ਚੜ੍ਹਦੀ ਕਲਾ ਵਾਲੀ ਚਰਚਾ ਵੀ ਜਰੂਰੀ ਹੈ। ਅੱਜ ਵਿਸ਼ਵ ਸਿਹਤ ਦਿਵਸ ਮੌਕੇ ਆਓ! ਸਫ਼ਾਈ ਰੱਖੀਏ, ਕੁਦਰਤ ਨਾਲ ਜੁੜੀਏ।
ਹਰਿਆਲੀ ਪੈਦਾ ਕਰੀਏ ਤੇ ਪੈਦਾ ਹੋਈ ਹਰਿਆਲੀ ਨੂੰ ਸੁਰੱਖਿਅਤ ਰੱਖੀਏ, ਰੁੱਖ ਲਾਈਏ ਤੇ ਬਚਾਈਏ, ਸਧਾਰਨ ਜੀਵਨ, ਸਾਦਾ ਜੀਵਨ ਜਿਉਣ ਵੱਲ ਮੁੜੀਏ, ਵਿਖਾਵੇ ਤੇ ਫੋਕੀ ਟੌਹਰ ਤੋਂ ਪਾਸਾ ਵੱਟੀਏ ਅਤੇ ਆਪਣੀ ਸਿਹਤ ਵੱਲ ਵਧੇਰੇ ਧਿਆਨ ਦੇਈਏ। ਇੱਕ ਕਦਮ ਇਹ ਵੀ ਵਧਾਉਣਾ ਚਾਹੀਦੈ ਕਿ ਮਿਲਾਵਟੀ ਤੇ ਨਕਲੀ ਪਰੋਸਣ ਵਾਲੇ ਸਿਹਤ ਦੇ ਦੁਸ਼ਮਣਾਂ ਖਿਲਾਫ਼ ਆਵਾਜ਼ ਉਠਾਉਣੀ ਤੇ ਵਿਭਾਗ ਦਾ ਸਹਿਯੋਗ ਕਰਨ ਲਈ ਅੱਗੇ ਆਈਏ । ਸਾਡਾ ਫਰਜ਼ ਬਣਦਾ ਹੈ ਕਿ ਅਸੀਂ ਕੁਦਰਤੀ ਸਾਧਨਾਂ ਦੀ ਬੱਚਤ ਕਰਦੇ ਹੋਏ ਆਪਣੀ ਸਿਹਤ ਦਾ ਖੁਦ ਖ਼ਿਆਲ ਰੱਖੀਏ ਅਤੇ ਸਾਡੀ ਸਿਹਤ ਦੇ ਪੱਧਰ ਨੂੰ ਉੱਚਾ ਚੁੱਕਣ ਲਈ ਤੇ ਸਾਡੀਆਂ ਸਿਹਤ ਸਮੱਸਿਆਵਾਂ ਦੇ ਹੱਲ ਲਈ ਯਤਨਸ਼ੀਲ ਸਿਹਤ ਵਿਭਾਗ ਦਾ ਸਹਿਯੋਗ ਕਰੀਏ।
ਪੰਜਗਰਾਈਆਂ, ਮੋ. 94644-42300
ਰਾਜੇਸ਼ ਰਿਖੀ
About The Author
