Nepal Flood: ਭਾਰਤ ਨੇ ਟੈਕਨੀਕਲ, ਫੋਰੈਂਸਿਕ, ਡੀਐਨਏ ਮਾਹਿਰਾਂ ਸਮੇਤ ਚੌਥੀ ਵਾਰ ਨੇਪਾਲ ਨੂੰ ਭੇਜੀ ਰਾਹਤ ਸਮੱਗਰੀ

ਨੇਪਾਲ ’ਚ ਹੜ੍ਹ ਕਾਰਨ ਹੋਈ ਹੈ ਭਾਰੀ ਤਬਾਹੀ

By Khushdeep Singh

Published On Aug 30, 2026 10:09 AM IST

ਕਾਠਮੰਡੂ (ਸੱਚ ਕਹੂੰ ਨਿਊਜ਼/ਹਿੰ.ਸ.)। ਭਾਰਤ ਨੇ ਨੇਪਾਲ ਦੇ ਹੜ੍ਹ ਪੀੜਤਾਂ ਲਈ ਚੌਥੀ ਵਾਰ ਰਾਹਤ ਸਮੱਗਰੀ ਭੇਜੀ ਹੈ। ਭਾਰਤ ਦੇ ਵਿਦੇਸ਼ ਮੰਤਰੀ ਐਸ. ਜੈਸ਼ੰਕਰ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ, 11 ਟਨ ਰਾਹਤ ਸਮੱਗਰੀ ਲੈ ਕੇ ਜਾਣ ਵਾਲਾ ਸੀ-130 ਫੌਜੀ ਜਹਾਜ਼ ਸ਼ਨਿੱਚਰਵਾਰ ਰਾਤ ਨੂੰ ਨੇਪਾਲ ਭੇਜਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਇਸ ਖੇਪ ’ਚ ਖੋਜ ਤੇ ਬਚਾਅ ਲਈ ਉਪਕਰਣਾਂ ਨਾਲ ਲੈਸ ਟਨਲ ਟੈਕਨੀਕਲ ਟੀਮ, ਫੋਰੈਂਸਿਕ ਉਪਕਰਣਾਂ ਦੇ ਨਾਲ ਡੀਐਨਏ ਵਿਸ਼ਲੇਸ਼ਣ ਲਈ ਫੋਰੈਂਸਿਕ ਮਾਹਿਰਾਂ ਦੀ ਟੀਮ, ਕੰਬਲ, ਸਲੀਪਿੰਗ ਬੈਗ, ਤਰਪਾਲ, ਪਲਾਸਟਿਕ ਸ਼ੀਟਾਂ ਤੇ ਹਾਇਜ਼ੀਨ ਕਿੱਟਾਂ ਸਮੇਤ ਹੋਰ ਰਾਹਤ ਸਮੱਗਰੀ ਸ਼ਾਮਲ ਹੈ। ਇਸ ਤੋਂ ਇਲਾਵਾ, 230 ਫੁੱਟ ਲੰਬੇ ਸਿੰਗਲ-ਲੇਨ ਮਾਡਿਊਲਰ ਸਟੀਲ ਪੁਲ ਲਈ ਲੋੜੀਂਦੇ ਉਪਕਰਣਾਂ ਨੂੰ ਲੈ ਕੇ 16 ਟਰੱਕ ਵੀ ਨੇਪਾਲ ਪਹੁੰਚ ਗਏ ਹਨ। ਭਾਰਤੀ ਵਿਦੇਸ਼ ਮੰਤਰੀ ਜੈਸ਼ੰਕਰ ਅਨੁਸਾਰ, ਭਾਰਤ ਨੇ ਹੁਣ ਤੱਕ ਕੁੱਲ 68.5 ਟਨ ਰਾਹਤ ਸਮੱਗਰੀ ਕਾਠਮੰਡੂ ਪਹੁੰਚਾਈ ਹੈ, ਜਿਸ ’ਚ ਦਵਾਈਆਂ, ਪੋਰਟੇਬਲ ਜਨਰੇਟਰ ਸੈੱਟ, ਭੋਜਨ ਪੈਕੇਟ, ਪਾਣੀ ਸ਼ੁੱਧੀਕਰਨ ਗੋਲੀਆਂ ਤੇ ਤਕਨੀਕੀ ਉਪਕਰਣ ਸ਼ਾਮਲ ਹਨ। ਭਾਰਤ ਨੇ ਕਿਹਾ ਹੈ ਕਿ ਉਹ ਨੇਪਾਲ ਸਰਕਾਰ ਵੱਲੋਂ ਬੇਨਤੀ ਕੀਤੀ ਗਈ ਕੋਈ ਵੀ ਸਹਾਇਤਾ ਪ੍ਰਦਾਨ ਕਰਨ ਲਈ ਤਿਆਰ ਹੈ। ਜਿਵੇਂ ਹੀ ਨੇਪਾਲ ਸਰਕਾਰ ਤੋਂ ਬੇਨਤੀਆਂ ਪ੍ਰਾਪਤ ਹੁੰਦੀਆਂ ਹਨ, ਉਨ੍ਹਾਂ ’ਤੇ ਤੁਰੰਤ ਅਮਲ ਕੀਤਾ ਜਾ ਰਿਹਾ ਹੈ। Nepal Flood

ਇਹ ਵੀ ਪੜ੍ਹੋ : Marine Engineering: ਮਰੀਨ ਇੰਜੀਨੀਅਰਿੰਗ ’ਚ ਸੁਨਹਿਰਾ ਭਵਿੱਖ ਬਣਾਉਣ ਨੌਜਵਾਨ