Commonwealth Games 2026: ਰਾਸ਼ਟਰਮੰਡਲ ਖੇਡਾਂ 2026, ਭਾਰਤ ਨੇ ਛੇਵੇਂ ਦਿਨ ਦੋ ਚਾਂਦੀ ਦੇ ਤਗਮੇ ਜਿੱਤੇ

12 ਤਗਮਿਆਂ ਨਾਲ ਤਗਮਾ ਸੂਚੀ ’ਚ ਨੌਵੇਂ ਸਥਾਨ ’ਤੇ

By Khushdeep Singh

Published On Jul 29, 2026 03:39 PM IST

ਨਵੀਂ ਦਿੱਲੀ (ਸੱਚ ਕਹੂੰ ਨਿਊਜ਼/ਹਿੰ.ਸ.)। ਰਾਸ਼ਟਰਮੰਡਲ ਖੇਡਾਂ 2026 ਦੇ ਛੇਵੇਂ ਦਿਨ, ਭਾਰਤ ਨੇ ਆਪਣੇ ਤਗਮਿਆਂ ਦੀ ਗਿਣਤੀ ’ਚ ਦੋ ਹੋਰ ਚਾਂਦੀ ਦੇ ਤਗਮੇ ਜੋੜੇ, ਜਿਸ ਨਾਲ ਉਸਦੇ ਕੁੱਲ ਤਗਮਿਆਂ ਦੀ ਗਿਣਤੀ 12 ਹੋ ਗਈ ਹੈ। ਐਥਲੈਟਿਕਸ ’ਚ, ਗੁਲਵੀਰ ਸਿੰਘ ਨੇ ਪੁਰਸ਼ਾਂ ਦੀ 10,000 ਮੀਟਰ ਦੌੜ ’ਚ ਇਤਿਹਾਸਕ ਚਾਂਦੀ ਦਾ ਤਗਮਾ ਆਪਣੇ ਨਾਂਅ ਕੀਤਾ, ਜਦੋਂ ਕਿ ਹਰਜਿੰਦਰ ਕੌਰ ਨੇ ਔਰਤਾਂ ਦੇ 69 ਕਿਲੋਗ੍ਰਾਮ ਵਰਗ ਵੇਟਲਿਫਟਿੰਗ ’ਚ ਕੁੱਲ 227 ਕਿਲੋਗ੍ਰਾਮ ਭਾਰ ਚੁੱਕ ਕੇ ਆਪਣਾ ਦੂਜਾ ਚਾਂਦੀ ਦਾ ਤਗਮਾ ਜਿੱਤਿਆ। ਇਨ੍ਹਾਂ ਦੋ ਪ੍ਰਾਪਤੀਆਂ ਨਾਲ, ਭਾਰਤ ਦੇ ਤਗਮਿਆਂ ਦੀ ਗਿਣਤੀ ਹੁਣ 12 ਹੋ ਗਈ ਹੈ, ਜਿਸ ’ਚ 2 ਸੋਨ, 7 ਚਾਂਦੀ ਤੇ 3 ਕਾਂਸੀ ਸ਼ਾਮਲ ਹਨ। ਭਾਰਤੀ ਦਲ ਤਗਮਿਆਂ ਦੀ ਸੂਚੀ ’ਚ ਨੌਵੇਂ ਸਥਾਨ ’ਤੇ ਬਣਿਆ ਹੋਇਆ ਹੈ।

ਮੈਡਲ ਟੇਬਲ ’ਤੇ ਅਸਟਰੇਲੀਆ ਅਜੇ ਵੀ ਦਬਦਬਾ ਬਣਾਈ ਬੈਠਾ ਹੈ। ਅਸਟਰੇਲੀਆ ਨੇ 35 ਸੋਨ, 18 ਚਾਂਦੀ ਤੇ 27 ਕਾਂਸੀ ਸਮੇਤ ਕੁੱਲ 80 ਤਗਮਿਆਂ ਨਾਲ ਆਪਣਾ ਪਹਿਲਾ ਸਥਾਨ ਮਜ਼ਬੂਤ ਕਰ ਲਿਆ ਹੈ। ਕੈਨੇਡਾ 13 ਸੋਨ, 10 ਚਾਂਦੀ ਤੇ 12 ਕਾਂਸੀ ਸਮੇਤ 35 ਤਗਮਿਆਂ ਨਾਲ ਦੂਜੇ ਸਥਾਨ ’ਤੇ ਹੈ, ਜਦੋਂ ਕਿ ਇੰਗਲੈਂਡ 10 ਸੋਨ, 18 ਚਾਂਦੀ ਤੇ 15 ਕਾਂਸੀ ਸਮੇਤ 43 ਤਗਮਿਆਂ ਨਾਲ ਤੀਜੇ ਸਥਾਨ ’ਤੇ ਹੈ। ਮੇਜ਼ਬਾਨ ਸਕਾਟਲੈਂਡ ਸੱਤ ਸੋਨ ਤਗਮਿਆਂ ਨਾਲ ਚੌਥੇ ਸਥਾਨ ’ਤੇ ਹੈ, ਉਸ ਤੋਂ ਬਾਅਦ ਪੰਜਵੇਂ ਸਥਾਨ ’ਤੇ ਨਾਈਜੀਰੀਆ, ਛੇਵੇਂ ਸਥਾਨ ’ਤੇ ਮਲੇਸ਼ੀਆ, ਸੱਤਵੇਂ ਸਥਾਨ ’ਤੇ ਦੱਖਣੀ ਅਫਰੀਕਾ ਤੇ ਅੱਠਵੇਂ ਸਥਾਨ ’ਤੇ ਨਿਊਜ਼ੀਲੈਂਡ ਹੈ। ਭਾਰਤ ਨੌਵੇਂ ਸਥਾਨ ’ਤੇ ਹੈ, ਜਦੋਂ ਕਿ ਜਮੈਕਾ ਦਸਵੇਂ ਸਥਾਨ ’ਤੇ ਹੈ। ਭਾਰਤ ਹੁਣ ਅਥਲੈਟਿਕਸ ਤੇ ਮੁੱਕੇਬਾਜ਼ੀ ਸਮੇਤ ਆਉਣ ਵਾਲੇ ਮੁਕਾਬਲਿਆਂ ’ਚ ਤਗਮਿਆਂ ਦੀ ਉਮੀਦ ਕਰੇਗਾ, ਜੋ ਤਗਮਾ ਸੂਚੀ ’ਚ ਆਪਣੀ ਸਥਿਤੀ ਨੂੰ ਹੋਰ ਮਜ਼ਬੂਤ ਕਰ ਸਕਦਾ ਹੈ।