Pathankot Chhapra Special Train: ਪਠਾਨਕੋਟ-ਛਪਰਾ ਹਫ਼ਤਾਵਾਰੀ ਸਪੈਸ਼ਲ ਰੇਲਗੱਡੀ 30 ਸਤੰਬਰ ਤੱਕ ਚੱਲੇਗੀ

Pathankot Chhapra Special Train: ਪਠਾਨਕੋਟ (ਸੱਚ ਕਹੂੰ ਨਿਊਜ਼/ਹਿੰ.ਸ.)। ਯਾਤਰੀਆਂ ਦੀ ਵੱਧ ਰਹੀ ਮੰਗ, ਗਰਮੀਆਂ ਦੇ ਸੀਜ਼ਨ ਤੇ ਆਉਣ ਵਾਲੇ ਤਿਉਹਾਰਾਂ ਦੌਰਾਨ ਹੋਣ ਵਾਲੀ ਵਾਧੂ ਭੀੜ ਨੂੰ ਧਿਆਨ ਵਿੱਚ ਰੱਖਦਿਆਂ ਉੱਤਰ ਰੇਲਵੇ ਦੇ ਜੰਮੂ ਮੰਡਲ ਨੇ ਪਠਾਨਕੋਟ-ਛਪਰਾ ਹਫ਼ਤਾਵਾਰੀ ਸਪੈਸ਼ਲ ਰੇਲਗੱਡੀ ਦੀ ਸੇਵਾ 30 ਸਤੰਬਰ ਤੱਕ ਵਧਾਉਣ ਦਾ ਫੈਸਲਾ ਕੀਤਾ ਹੈ। ਇਸ ਨਾਲ ਬਿਹਾਰ, ਉੱਤਰ ਪ੍ਰਦੇਸ਼ ਤੇ ਪੰਜਾਬ ਵਿਚਾਲੇ ਯਾਤਰਾ ਕਰਨ ਵਾਲੇ ਯਾਤਰੀਆਂ ਨੂੰ ਵੱਡੀ ਸਹੂਲਤ ਮਿਲੇਗੀ। ਰੇਲਵੇ ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ, ਰੇਲਗੱਡੀ ਨੰਬਰ 05193 ਛਪਰਾ-ਪਠਾਨਕੋਟ ਤੇ ਰੇਲਗੱਡੀ ਨੰਬਰ 05194 ਪਠਾਨਕੋਟ-ਛਪਰਾ ਹਫ਼ਤਾਵਾਰੀ ਸਪੈਸ਼ਲ ਰੇਲਗੱਡੀਆਂ ਦੇ ਫੇਰਿਆਂ ’ਚ ਵਾਧਾ ਕੀਤਾ ਗਿਆ ਹੈ। ਮੰਡਲ ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਫੈਸਲਾ ਯਾਤਰੀਆਂ ਨੂੰ ਬਿਹਤਰ ਕਨੈਕਟੀਵਿਟੀ ਤੇ ਸੁਵਿਧਾਜਨਕ ਯਾਤਰਾ ਮੁਹੱਈਆ ਕਰਵਾਉਣ ਦੇ ਮਕਸਦ ਨਾਲ ਲਿਆ ਗਿਆ ਹੈ।

ਰੇਲਗੱਡੀ ਨੰਬਰ 05193 ਛਪਰਾ-ਪਠਾਨਕੋਟ ਸਪੈਸ਼ਲ, ਜੋ ਹਰ ਸੋਮਵਾਰ ਚੱਲਦੀ ਹੈ, ਪਹਿਲਾਂ 13 ਜੁਲਾਈ ਤੱਕ ਚਲਣੀ ਸੀ। ਹੁਣ ਇਸ ਦਾ ਸੰਚਾਲਨ 28 ਸਤੰਬਰ ਤੱਕ ਵਧਾ ਦਿੱਤਾ ਗਿਆ ਹੈ ਤੇ ਇਸ ਦੌਰਾਨ ਇਹ ਕੁੱਲ 11 ਫੇਰੇ ਲਗਾਏਗੀ। ਇਹ ਰੇਲਗੱਡੀ ਹਰ ਸੋਮਵਾਰ ਦੁਪਹਿਰ 2 ਵਜੇ ਛਪਰਾ ਜੰਕਸ਼ਨ ਤੋਂ ਰਵਾਨਾ ਹੋ ਕੇ ਛਪਰਾ ਕਚਹਿਰੀ, ਦੀਘਵਾ ਦੁਬੌਲੀ, ਥਾਵੇ, ਤਮਕੁਹੀ ਰੋਡ, ਪਡਰੌਨਾ, ਕਪਤਾਨਗੰਜ, ਗੋਰਖਪੁਰ, ਬਸਤੀ, ਗੋਂਡਾ, ਸੀਤਾਪੁਰ, ਸ਼ਾਹਜਹਾਂਪੁਰ, ਬਰੇਲੀ, ਮੁਰਾਦਾਬਾਦ, ਲਕਸਰ, ਰੁੜਕੀ, ਸਹਾਰਨਪੁਰ, ਯਮੁਨਾਨਗਰ-ਜਗਾਧਰੀ, ਅੰਬਾਲਾ ਕੈਂਟ, ਲੁਧਿਆਣਾ ਤੇ ਜਲੰਧਰ ਕੈਂਟ ਰਾਹੀਂ ਅਗਲੇ ਦਿਨ ਰਾਤ 10:15 ਵਜੇ ਪਠਾਨਕੋਟ ਪਹੁੰਚੇਗੀ। ਵਾਪਸੀ ’ਚ ਰੇਲਗੱਡੀ ਨੰਬਰ 05194 ਪਠਾਨਕੋਟ-ਛਪਰਾ ਸਪੈਸ਼ਲ, ਜੋ ਹਰ ਬੁੱਧਵਾਰ ਚੱਲਦੀ ਹੈ, ਪਹਿਲਾਂ 15 ਜੁਲਾਈ ਤੱਕ ਚਲਣੀ ਸੀ। ਹੁਣ ਇਸ ਦਾ ਸੰਚਾਲਨ 30 ਸਤੰਬਰ ਤੱਕ ਵਧਾ ਦਿੱਤਾ ਗਿਆ ਹੈ ਤੇ ਇਹ ਵੀ ਕੁੱਲ 11 ਫੇਰੇ ਲਗਾਏਗੀ।

Read Also : Nepal Flood Alert: ਕਾਠਮੰਡੂ ਸਮੇਤ ਨੇਪਾਲ ਦੇ 35 ਜ਼ਿਲ੍ਹਿਆਂ ’ਚ ਹੜ੍ਹ ਦਾ ਖਤਰਾ

ਇਹ ਰੇਲਗੱਡੀ ਹਰ ਬੁੱਧਵਾਰ ਰਾਤ 12:30 ਵਜੇ ਪਠਾਨਕੋਟ ਤੋਂ ਰਵਾਨਾ ਹੋ ਕੇ ਜਲੰਧਰ ਕੈਂਟ, ਲੁਧਿਆਣਾ, ਅੰਬਾਲਾ ਕੈਂਟ, ਸਹਾਰਨਪੁਰ, ਮੁਰਾਦਾਬਾਦ, ਬਰੇਲੀ, ਸੀਤਾਪੁਰ, ਗੋਂਡਾ, ਬਸਤੀ, ਗੋਰਖਪੁਰ, ਕਪਤਾਨਗੰਜ, ਪਡਰੌਨਾ, ਤਮਕੁਹੀ ਰੋਡ, ਥਾਵੇ ਤੇ ਦੀਘਵਾ ਦੁਬੌਲੀ ਰਾਹੀਂ ਅਗਲੇ ਦਿਨ ਸਵੇਰੇ 8:35 ਵਜੇ ਛਪਰਾ ਕਚਹਿਰੀ ਤੇ ਸਵੇਰੇ 9:15 ਵਜੇ ਛਪਰਾ ਜੰਕਸ਼ਨ ਪਹੁੰਚੇਗੀ। ਜੰਮੂ ਮੰਡਲ ਦੇ ਸੀਨੀਅਰ ਮੰਡਲ ਵਪਾਰਕ ਪ੍ਰਬੰਧਕ ਉਚਿਤ ਸਿੰਘਲ ਨੇ ਕਿਹਾ ਕਿ ਯਾਤਰੀਆਂ ਦੀ ਲਗਾਤਾਰ ਮੰਗ ਨੂੰ ਦੇਖਦੇ ਹੋਏ ਇਨ੍ਹਾਂ ਸਪੈਸ਼ਲ ਰੇਲਗੱਡੀਆਂ ਦੇ ਫੇਰਿਆਂ ’ਚ ਵਾਧਾ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਰੇਲਵੇ ਯਾਤਰੀਆਂ ਦੀ ਸਹੂਲਤ ਨੂੰ ਪਹਿਲ ਦੇਂਦਿਆਂ ਸਮੇਂ-ਸਮੇਂ ’ਤੇ ਅਜਿਹੇ ਫੈਸਲੇ ਲੈਂਦਾ ਰਹਿੰਦਾ ਹੈ। ਯਾਤਰੀ ਰੇਲਗੱਡੀ ਦੀ ਸਮਾਂ-ਸਾਰਣੀ ਤੇ ਹੋਰ ਜਾਣਕਾਰੀ ਲਈ ਆਈਆਰਸੀਟੀਸੀ ਦੀ ਵੈੱਬਸਾਈਟ, ਮੋਬਾਈਲ ਐਪ ਜਾਂ ਨਜ਼ਦੀਕੀ ਰਿਜ਼ਰਵੇਸ਼ਨ ਕੇਂਦਰ ਤੋਂ ਜਾਣਕਾਰੀ ਹਾਸਲ ਕਰ ਸਕਦੇ ਹਨ।