Team India Support Staff: ਭਾਰਤੀ ਟੀਮ ਦੇ ਸਪੋਰਟ ਸਟਾਫ ’ਚ ਬਦਲਾਅ ਦੀ ਤਿਆਰੀ

ਸ਼੍ਰੀਲੰਕਾ ਟੈਸਟ ਸੀਰੀਜ਼ ਤੋਂ ਬਾਅਦ ਫਿਜ਼ੀਓ ਤੇ ਡਾਕਟਰ ਦੀ ਭੂਮਿਕਾ ’ਤੇ ਹੋ ਸਕਦੈ ਫੈਸਲਾ

By Khushdeep Singh

Published On Aug 03, 2026 08:54 PM IST

BCCI: ਸਪੋਰਟਸ ਡੈਸਕ। ਭਾਰਤੀ ਕ੍ਰਿਕੇਟ ਕੰਟਰੋਲ ਬੋਰਡ (ਬੀਸੀਸੀਆਈ) ਖਿਡਾਰੀਆਂ ਦੀਆਂ ਸੱਟਾਂ ਦੀ ਵੱਧਦੀ ਗਿਣਤੀ ਨੂੰ ਲੈ ਕੇ ਚਿੰਤਤ ਹੋ ਗਿਆ ਹੈ। ਬੋਰਡ ਜਲਦੀ ਹੀ ਟੀਮ ਦੇ ਮੁੱਖ ਫਿਜ਼ੀਓ, ਕਮਲੇਸ਼ ਜੈਨ ਦੇ ਕੰਮ ਦੀ ਸਮੀਖਿਆ ਕਰੇਗਾ। ਕਮਲੇਸ਼ ਨੇ 2022 ’ਚ ਨਿਤਿਨ ਪਟੇਲ ਦੀ ਜਗ੍ਹਾ ਭਾਰਤੀ ਟੀਮ ਦੇ ਮੁੱਖ ਫਿਜ਼ੀਓ ਵਜੋਂ ਸ਼ਾਮਲ ਹੋਏ ਸਨ। ਹਾਲ ਹੀ ਦੇ ਮਹੀਨਿਆਂ ’ਚ ਕਈ ਮੁੱਖ ਖਿਡਾਰੀ ਜ਼ਖਮੀ ਹੋਏ ਹਨ। ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਇਸ ਸੂਚੀ ’ਚ ਸ਼ਾਮਲ ਹੋਣ ਵਾਲੇ ਨਵੀਨਤਮ ਹਨ। ਬੁਮਰਾਹ ਤੋਂ ਇਲਾਵਾ, ਹਰਸ਼ਿਤ ਰਾਣਾ ਤੇ ਨਿਤੀਸ਼ ਕੁਮਾਰ ਰੈਡੀ ਵੀ ਸੱਟ ਕਾਰਨ ਚੋਣ ਲਈ ਉਪਲਬਧ ਨਹੀਂ ਸਨ। ਵਾਸ਼ਿੰਗਟਨ ਸੁੰਦਰ ਪਹਿਲੇ ਟੈਸਟ ਤੋਂ ਖੁੰਝ ਗਏ ਤੇ ਦੂਜੇ ਟੈਸਟ ’ਚ ਉਨ੍ਹਾਂ ਦੀ ਭਾਗੀਦਾਰੀ ਵੀ ਸ਼ੱਕੀ ਹੈ। ਬੀਸੀਸੀਆਈ ਦੇ ਸੈਂਟਰ ਆਫ਼ ਐਕਸੀਲੈਂਸ ਤੋਂ ਫਿਟਨੈਸ ਕਲੀਅਰੈਂਸ ਮਿਲਣ ਤੋਂ ਬਾਅਦ ਹੀ ਸਾਈ ਸੁਦਰਸ਼ਨ ਨੂੰ ਵੀ ਟੀਮ ’ਚ ਸ਼ਾਮਲ ਕੀਤਾ ਗਿਆ।

ਕਪਤਾਨ ਤੇ ਕੋਚ ਨਾਖੁਸ਼ | Team India Support Staff

ਇੰਗਲੈਂਡ ’ਚ ਹਾਲ ਹੀ ’ਚ ਹੋਈ ਵ੍ਹਾਈਟ-ਬਾਲ ਸੀਰੀਜ਼ ਦੌਰਾਨ ਇਸ ਮੁੱਦੇ ’ਤੇ ਕਈ ਵਾਰ ਚਰਚਾ ਹੋਈ ਹੈ। ਕਪਤਾਨ ਸ਼ੁਭਮਨ ਗਿੱਲ ਤੇ ਕੋਚ ਗੌਤਮ ਗੰਭੀਰ ਖਿਡਾਰੀਆਂ ਨੂੰ ਹੋਣ ਵਾਲੀਆਂ ਵਾਰ-ਵਾਰ ਸੱਟਾਂ ਤੋਂ ਨਾਖੁਸ਼ ਹਨ। ਇਹ ਸਮਾਂ ਦੋਵਾਂ ਲਈ ਨਿਰਾਸ਼ਾਜਨਕ ਰਿਹਾ ਹੈ, ਕਿਉਂਕਿ ਉਨ੍ਹਾਂ ਨੂੰ ਫਿਟਨੈਸ ਮੁੱਦਿਆਂ ਕਾਰਨ ਆਪਣੀ ਪਹਿਲੀ ਪਸੰਦ ਦੀ ਟੀਮ ਨਾਲ ਖੇਡਣ ਦਾ ਮੌਕਾ ਨਹੀਂ ਮਿਲਿਆ ਹੈ। ਲਾਰਡਜ਼ ’ਚ ਹਾਰ ਤੋਂ ਬਾਅਦ, ਗਿੱਲ ਨੇ ਕਿਹਾ ਕਿ ਸਵੇਰੇ ਮੈਦਾਨ ’ਤੇ ਪਹੁੰਚਣਾ ਤੇ ਇਹ ਪਤਾ ਲਾਉਣਾ ਮੁਸ਼ਕਲ ਹੈ ਕਿ ਕੋਈ ਖਿਡਾਰੀ ਜ਼ਖਮੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਕੋਈ ਖਿਡਾਰੀ 80 ਫੀਸਦੀ ਫਿੱਟ ਹੈ ਤੇ ਤੁਸੀਂ ਪੰਜ ਗੇਂਦਬਾਜ਼ਾਂ ਨਾਲ ਖੇਡ ਰਹੇ ਹੋ, ਤਾਂ ਜੇਕਰ ਉਹ ਖਿਡਾਰੀ ਪੰਜ ਓਵਰਾਂ ਤੋਂ ਬਾਅਦ ਬਾਹਰ ਹੈ ਤਾਂ ਕੌਣ ਗੇਂਦਬਾਜ਼ੀ ਕਰੇਗਾ? ਉਨ੍ਹਾਂ ਮੰਨਿਆ ਕਿ ਟੀਮ ਨੂੰ ਆਪਣੀ ਫਿਟਨੈਸ ’ਚ ਸੁਧਾਰ ਕਰਨ ਦੀ ਲੋੜ ਹੈ।

ਇਹ ਖਬਰ ਵੀ ਪੜ੍ਹੋ : Supreme Court Judges: ਸੁਪਰੀਮ ਕੋਰਟ ’ਚ ਜੱਜਾਂ ਦੀ ਗਿਣਤੀ ਵਧਾਉਣ ਲਈ ਲੋਕ ਸਭਾ ’ਚ ਬਿੱਲ ਪਾਸ

ਸੀਓਈ ਤੇ ਸਹਾਇਤਾ ਸਟਾਫ ਬਾਰੇ ਸਵਾਲ ਉਠਾਏ ਜਾ ਰਹੇ ਹਨ

ਸੱਟਾਂ ਦੀ ਵੱਧਦੀ ਗਿਣਤੀ ਵਿਚਕਾਰ, ਬੰਗਲੁਰੂ ਸਥਿਤ ਸੈਂਟਰ ਆਫ਼ ਐਕਸੀਲੈਂਸ ਤੇ ਮੈਡੀਕਲ ਸਹਾਇਤਾ ਪ੍ਰਣਾਲੀ ਬਾਰੇ ਸਵਾਲ ਉਠਾਏ ਜਾ ਰਹੇ ਹਨ। ਹਾਸਲ ਹੋਈ ਜਾਣਕਾਰੀ ਮੁਤਾਬਕ, ਕੁਝ ਸੀਨੀਅਰ ਖਿਡਾਰੀ ਇਲਾਜ ਤੇ ਸਲਾਹ ਲਈ ਬੀਸੀਸੀਆਈ ਤੋਂ ਬਾਹਰ ਦੇ ਮਾਹਿਰਾਂ ਨਾਲ ਸੰਪਰਕ ਕਰ ਰਹੇ ਹਨ। ਇਸ ਤੋਂ ਇਲਾਵਾ, ਕੁਝ ਖਿਡਾਰੀ ਐਡਰੀਅਨ ਲੇ ਰੂ ਦੁਆਰਾ ਸਾਬਕਾ ਤਾਕਤ ਤੇ ਕੰਡੀਸ਼ਨਿੰਗ ਕੋਚ ਸੋਹਮ ਦੇਸਾਈ ਦੀ ਥਾਂ ਲੈਣ ਤੋਂ ਬਾਅਦ ਕੀਤੇ ਗਏ ਬਦਲਾਵਾਂ ਨਾਲ ਪੂਰੀ ਤਰ੍ਹਾਂ ਸਹਿਜ ਨਹੀਂ ਹਨ।

ਸ਼੍ਰੀਲੰਕਾ ਸੀਰੀਜ਼ ਤੋਂ ਬਾਅਦ ਵੱਡੇ ਬਦਲਾਅ ਦੇ ਸੰਕੇਤ

ਭਾਰਤ ਦਾ ਕ੍ਰਿਕੇਟ ਕੈਲੰਡਰ ਕਾਫ਼ੀ ਵਿਅਸਤ ਹੈ, ਜਿਸ ’ਚ ਸ਼੍ਰੀਲੰਕਾ ਵਿਰੁੱਧ ਦੋ ਟੈਸਟ ਮੈਚ ਸ਼ਾਮਲ ਹਨ। ਲੜੀ ਖਤਮ ਹੋਣ ਤੋਂ ਬਾਅਦ, ਬੀਸੀਸੀਆਈ ਮੁੱਖ ਫਿਜ਼ੀਓਥੈਰੇਪਿਸਟ ਤੇ ਟੀਮ ਡਾਕਟਰ ਦੇ ਅਹੁਦਿਆਂ ਲਈ ਨਵੇਂ ਨਾਵਾਂ ’ਤੇ ਵਿਚਾਰ ਕਰ ਸਕਦਾ ਹੈ। ਵਰਤਮਾਨ ’ਚ, ਕਮਲੇਸ਼ ਜੈਨ ਤੇ ਡਾ. ਰਿਜ਼ਵਾਨ ਖਾਨ ਇਨ੍ਹਾਂ ਦੋਵਾਂ ਅਹੁਦਿਆਂ ’ਤੇ ਹਨ।