IND vs ENG ਤੀਜਾ ਟੈਸਟ ਅੱਜ ਤੋਂ, ਬੁਮਰਾਹ ਦਾ ਖੇਡਣਾ ਤੈਅ, ਕੀ ਕੁਲਦੀਪ ਨੂੰ ਮਿਲੇਗਾ ਮੌਕਾ?

ਇੰਗਲੈਂਡ ਦੀ ਟੀਮ ’ਚ ਆਰਚਰ ਦੀ 4 ਸਾਲਾਂ ਬਾਅਦ ਵਾਪਸੀ

• ਜੇਕਰ ਕੁਲਦੀਪ ਨੂੰ ਮਿਲਿਆ ਮੌਕਾ ਤਾਂ ਕਿਹੜਾ ਖਿਡਾਰੀ ਹੋਵੇਗਾ ਬਾਹਰ?

IND vs ENG: ਸਪੋਰਟਸ ਡੈਸਕ। ਭਾਰਤ ਤੇ ਇੰਗਲੈਂਡ ਵਿਚਕਾਰ ਐਂਡਰਸਨ-ਤੇਂਦੁਲਕਰ ਟਰਾਫੀ ਦਾ ਤੀਜਾ ਟੈਸਟ ਅੱਜ ਤੋਂ ਲਾਰਡਜ਼ ਕ੍ਰਿਕੇਟ ਗਰਾਊਂਡ ’ਤੇ ਖੇਡਿਆ ਜਾਵੇਗਾ। ਲਾਰਡਜ਼ ਸਟੇਡੀਅਮ ’ਤੇ ਭਾਰਤ ਦਾ ਪ੍ਰਦਰਸ਼ਨ ਬਹੁਤ ਵਧੀਆ ਨਹੀਂ ਸੀ, ਪਰ ਟੀਮ ਨੇ ਇੰਗਲੈਂਡ ਦੇ ਹੋਰ ਸਥਾਨਾਂ ਦੇ ਮੁਕਾਬਲੇ ਇੱਥੇ ਸਭ ਤੋਂ ਵੱਧ ਮੈਚ ਜਿੱਤੇ ਹਨ। ਭਾਰਤ ਨੇ ਇੱਥੇ 19 ਟੈਸਟ ਖੇਡੇ, 3 ਜਿੱਤੇ ਤੇ 12 ਹਾਰੇ। ਇਸ ਦੌਰਾਨ 4 ਮੈਚ ਡਰਾਅ ਵੀ ਹੋਏ। 5 ਟੈਸਟਾਂ ਦੀ ਲੜੀ 1-1 ਨਾਲ ਬਰਾਬਰ ਹੈ। ਇੰਗਲੈਂਡ ਨੇ ਪਹਿਲਾ ਮੈਚ 5 ਵਿਕਟਾਂ ਨਾਲ ਜਿੱਤਿਆ। ਇਸ ਦੇ ਨਾਲ ਹੀ ਭਾਰਤ ਨੇ ਦੂਜਾ ਟੈਸਟ 336 ਦੌੜਾਂ ਨਾਲ ਜਿੱਤਿਆ। ਇੰਗਲੈਂਡ ਨੇ ਤੀਜੇ ਟੈਸਟ ਤੋਂ ਇੱਕ ਦਿਨ ਪਹਿਲਾਂ ਬੁੱਧਵਾਰ ਨੂੰ ਆਪਣੀ ਪਲੇਇੰਗ-11 ਜਾਰੀ ਕੀਤੀ। ਤੇਜ਼ ਗੇਂਦਬਾਜ਼ ਜੋਫਰਾ ਆਰਚਰ 4 ਸਾਲਾਂ ਬਾਅਦ ਟੈਸਟ ’ਚ ਵਾਪਸੀ ਕਰਨਗੇ। ਉਨ੍ਹਾਂ ਆਪਣਾ ਆਖਰੀ ਟੈਸਟ ਫਰਵਰੀ 2021 ’ਚ ਖੇਡਿਆ ਸੀ। IND vs ENG

ਮੈਚ ਸਬੰਧੀ ਜਾਣਕਾਰੀ | IND vs ENG

• ਟੂਰਨਾਮੈਂਟ : 5 ਮੈਚਾਂ ਦੀ ਟੈਸਟ ਸੀਰੀਜ਼
• ਟੀਮਾਂ : ਭਾਰਤ ਬਨਾਮ ਇੰਗਲੈਂਡ
• ਮੈਚ : ਤੀਜਾ ਟੈਸਟ ਮੈਚ
• ਮਿਤੀ : 10 ਤੋਂ 14 ਜੁਲਾਈ 2025
• ਸਟੇਡੀਅਮ : ਲਾਰਡਜ਼ ਕ੍ਰਿਕੇਟ ਗਰਾਊਂਡ, ਲੰਡਨ
• ਸਮਾਂ : ਟਾਸ, ਦੁਪਹਿਰ 3:00 ਵਜੇ, ਮੈਚ ਸ਼ੁਰੂ : ਦੁਪਹਿਰ 3:30 ਵਜੇ

ਦੋਵਾਂ ਟੀਮਾਂ ਵਿਚਕਾਰ 139ਵਾਂ ਟੈਸਟ | IND vs ENG

ਭਾਰਤ ਨੇ 1932 ’ਚ ਇੰਗਲੈਂਡ ’ਚ ਆਪਣਾ ਸਫ਼ਰ ਸ਼ੁਰੂ ਕੀਤਾ ਸੀ। ਉਦੋਂ ਤੋਂ, ਦੋਵਾਂ ਟੀਮਾਂ ਵਿਚਕਾਰ 138 ਟੈਸਟ ਖੇਡੇ ਗਏ ਹਨ। ਇੰਗਲੈਂਡ ਨੇ 52 ਜਿੱਤੇ, ਜਦੋਂ ਕਿ ਟੀਮ ਇੰਡੀਆ ਨੇ 36 ਮੈਚ ਜਿੱਤੇ। 50 ਟੈਸਟ ਦੋਵਾਂ ਟੀਮਾਂ ਵਿਚਕਾਰ ਡਰਾਅ ਰਹੇ ਹਨ। ਭਾਰਤ ਨੇ ਇੰਗਲੈਂਡ ’ਚ 69 ਟੈਸਟ ਖੇਡੇ। 9 ਜਿੱਤੇ, ਪਰ 37 ਹਾਰੇ। ਇਸ ਸਮੇਂ ਦੌਰਾਨ, 22 ਮੈਚ ਵੀ ਡਰਾਅ ਹੋਏ। ਦੋਵਾਂ ਟੀਮਾਂ ਵਿਚਕਾਰ 36 ਟੈਸਟ ਸੀਰੀਜ਼ ਖੇਡੀਆਂ ਗਈਆਂ। ਇੰਗਲੈਂਡ ਨੇ 19 ਜਿੱਤੀਆਂ ਤੇ ਟੀਮ ਇੰਡੀਆ ਨੇ 12 ਜਿੱਤੀਆਂ।

ਜਦੋਂ ਕਿ 5 ਡਰਾਅ ਹੋਏ। 1932 ਤੋਂ 2025 ਤੱਕ 94 ਸਾਲਾਂ ’ਚ, ਟੀਮ ਇੰਡੀਆ ਨੇ ਇੰਗਲੈਂਡ ’ਚ 19 ਟੈਸਟ ਸੀਰੀਜ਼ ਖੇਡੀਆਂ। ਭਾਰਤ ਨੇ 3 ਜਿੱਤੀਆਂ, ਜਦੋਂ ਕਿ 2 ਡਰਾਅ ਹੋਈਆਂ। ਇਸ ਦੇ ਨਾਲ ਹੀ ਟੀਮ ਨੂੰ 14 ’ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਭਾਰਤ ਨੇ ਆਖਰੀ ਵਾਰ ਇੰਗਲੈਂਡ ’ਚ ਸਾਲ 2007 ’ਚ ਟੈਸਟ ਸੀਰੀਜ਼ ਜਿੱਤੀ ਸੀ। ਇਹ ਸੀਰੀਜ਼ ਰਾਹੁਲ ਦ੍ਰਾਵਿੜ ਦੀ ਕਪਤਾਨੀ ’ਚ ਜਿੱਤੀ ਸੀ। ਟੀਮ ਨੇ ਆਖਰੀ ਸੀਰੀਜ਼ 2022 ’ਚ ਵਿਰਾਟ ਕੋਹਲੀ ਦੀ ਕਪਤਾਨੀ ’ਚ 2-2 ਨਾਲ ਡਰਾਅ ਕੀਤੀ ਸੀ।

ਪਿਚ ਬਾਰੇ ਜਾਣਕਾਰੀ | IND vs ENG

ਲਾਰਡਜ਼ ਕ੍ਰਿਕੇਟ ਗਰਾਊਂਡ ਦੀ ਪਿੱਚ ਨੂੰ ਗੇਂਦਬਾਜ਼ੀ ਲਈ ਅਨੁਕੂਲ ਮੰਨਿਆ ਜਾਂਦਾ ਹੈ, ਪਰ ਬੇਨ ਸਟੋਕਸ ਦੀ ਕਪਤਾਨੀ ’ਚ ਇੰਗਲੈਂਡ ਦੀਆਂ ਸਾਰੀਆਂ ਪਿੱਚਾਂ ਨੂੰ ਬੱਲੇਬਾਜ਼ਾਂ ਲਈ ਮਦਦਗਾਰ ਬਣਾਇਆ ਗਿਆ ਸੀ। ਸੋਸ਼ਲ ਮੀਡੀਆ ’ਤੇ ਸਾਹਮਣੇ ਆਈ ਤਸਵੀਰ ’ਚ, ਪਿੱਚ ’ਤੇ ਹਲਕੀ ਘਾਹ ਦਿਖਾਈ ਦੇ ਰਹੀ ਹੈ, ਪਰ ਪਹਿਲੇ ਦਿਨ ਦੀ ਬੱਲੇਬਾਜ਼ੀ ਤੋਂ ਬਾਅਦ ਇੱਥੇ ਵੀ ਆਸਾਨ ਹੋ ਜਾਵੇਗੀ। ਲਾਰਡਜ਼ ਸਟੇਡੀਅਮ ’ਚ ਹੁਣ ਤੱਕ 148 ਟੈਸਟ ਖੇਡੇ ਜਾ ਚੁੱਕੇ ਹਨ, ਪਹਿਲਾਂ ਬੱਲੇਬਾਜ਼ੀ ਕਰਨ ਵਾਲੀਆਂ ਟੀਮਾਂ ਨੇ 53 ਜਿੱਤੇ ਤੇ ਪਹਿਲਾਂ ਗੇਂਦਬਾਜ਼ੀ ਕਰਨ ਵਾਲੀਆਂ ਟੀਮਾਂ ਨੇ 44 ਮੈਚ ਜਿੱਤੇ। ਜਦੋਂ ਕਿ 51 ਮੈਚ ਡਰਾਅ ’ਤੇ ਸਮਾਪਤ ਹੋਏ ਹਨ।

ਮੌਸਮ ਰਿਪੋਰਟ | IND vs ENG

ਲਾਰਡਜ਼ ਟੈਸਟ ਦੌਰਾਨ ਮੌਸਮ ਰਲਵਾਂ-ਮਿਲਵਾਂ ਰਹੇਗਾ। 10 ਤੇ 11 ਜੁਲਾਈ ਨੂੰ ਲੰਡਨ ਵਿੱਚ ਤਾਪਮਾਨ 31 ਡਿਗਰੀ ਤੱਕ ਰਹੇਗਾ, ਧੁੱਪ ਨਾਲ ਹਲਕੇ ਬੱਦਲ ਛਾਏ ਰਹਿਣਗੇ। 12 ਜੁਲਾਈ ਨੂੰ ਵੀ ਅਜਿਹਾ ਹੀ ਮੌਸਮ ਰਹੇਗਾ। 13 ਤੇ 14 ਜੁਲਾਈ ਨੂੰ ਤਾਪਮਾਨ ਵੀ 31 ਡਿਗਰੀ ਤੱਕ ਜਾਵੇਗਾ ਤੇ ਹਲਕੇ ਬੱਦਲ ਛਾਏ ਰਹਿਣਗੇ। ਮੈਚ ਦੇ ਸਾਰੇ ਦਿਨਾਂ ’ਚ ਮੀਂਹ ਪੈਣ ਦੀ ਸੰਭਾਵਨਾ ਘੱਟ ਹੈ।

ਭਾਰਤ ਦੀ ਸੰਭਾਵਿਤ ਪਲੇਇੰਗ-11

ਸ਼ੁਭਮਨ ਗਿੱਲ (ਕਪਤਾਨ), ਯਸ਼ਸਵੀ ਜਾਇਸਵਾਲ, ਕੇਐਲ ਰਾਹੁਲ, ਕਰੁਣ ਨਾਇਰ/ਸਾਈ ਸੁਦਰਸ਼ਨ, ਰਿਸ਼ਭ ਪੰਤ (ਉਪ ਕਪਤਾਨ ਤੇ ਵਿਕਟਕੀਪਰ), ਰਵਿੰਦਰ ਜਡੇਜਾ, ਵਾਸ਼ਿੰਗਟਨ ਸੁੰਦਰ, ਸ਼ਾਰਦੁਲ ਠਾਕੁਰ/ਨਿਤੀਸ਼ ਰੈਡੀ, ਆਕਾਸ਼ ਦੀਪ, ਮੁਹੰਮਦ ਸਿਰਾਜ, ਜਸਪ੍ਰੀਤ ਬੁਮਰਾਹ।

ਇੰਗਲੈਂਡ ਦੀ ਪਲੇਇੰਗ-11

ਬੇਨ ਸਟੋਕਸ (ਕਪਤਾਨ), ਜੈਕ ਕਰੌਲੀ, ਬੇਨ ਡਕੇਟ, ਓਲੀ ਪੋਪ, ਜੋ ਰੂਟ, ਹੈਰੀ ਬਰੂਕ, ਜੈਮੀ ਸਮਿਥ (ਵਿਕਟਕੀਪਰ), ਕ੍ਰਿਸ ਵੋਕਸ, ਬ੍ਰਾਈਡਨ ਕਾਰਸੇ, ਜੋਫਰਾ ਆਰਚਰ ਤੇ ਸ਼ੋਏਬ ਬਸ਼ੀਰ।