ਮੇਲੀਆਂ ਨੂੰ ਯਾਦ ਰਹੇਗਾ ਵਿਰਾਸਤੀ ਪਿੰਡ ਜੈਪਾਲਗੜ੍ਹ ‘ਚ ਆਉਣਾ

ਮੇਲੇ ਦੇ ਆਖਰੀ ਦਿਨ ਪੁਸਤਕਾਂ ਨੇ ਲੁੱਟਿਆ ਮੇਲਾ | Bathinda News

ਬਠਿੰਡਾ (ਅਸ਼ੋਕ ਵਰਮਾ)। ਮਾਲਵਾ ਹੈਰੀਟੇਜ਼ ਅਤੇ ਸੱਭਿਆਚਕ ਫਾਊਂਡੇਸ਼ਨ ਵੱਲੋਂ ਕਰਵਾਏ ਜਾ ਰਹੇ ਬਠਿੰਡਾ ਵਿਰਾਸਤੀ ਮੇਲੇ ਦੇ ਆਖਰੀ ਦਿਨ ਵਿਰਾਸਤੀ ਪਿੰਡ ਜੈਪਾਲਗੜ੍ਹ ‘ਚ ਭੀੜ ਭੜੱਕਾ ਰਿਹਾ ਐਤਵਾਰ ਦਾ ਦਿਨ ਹੋਣ ਕਰਕੇ ਅੱਜ ਸ਼ਹਿਰੀ ਲੋਕਾਂ  ਨੇ ਪੇਂਡੂ ਵਿਰਾਸਤ ਨੂੰ ਨੇੜਿਓਂ ਤੱਕਿਆ ਵਿਰਾਸਤੀ ਪਿੰਡ ‘ਚ ਲੱਗਿਆ ਪੁਸਤਕ ਮੇਲਾ ਅੱਜ ਆਮ ਲੋਕਾਂ ਨੂੰ ਖਿੱਚਣ ਵਿਚ ਸਫਲ ਰਿਹਾ ਵੱਡੀ ਗਿਣਤੀ ਲੋਕਾਂ ਨੇ ਅੱਜ ਪੁਸਤਕਾਂ  ਵਾਲੇ ਹਾਲ ‘ਚ ਪੁਸਤਕਾਂ ਖਰੀਦੀਆਂ ਜਿਸ ਨਾਲ ਪਬਲਿਸ਼ਰਾਂ ਨੂੰ ਧਰਵਾਸ ਬੱਝਿਆ ਅੰਤਮ ਦਿਨ ਹੋਣ ਕਰਕੇ ਕੁਝ ਪਬਲਿਸ਼ਰਾਂ ਨੇ ਪੁਸਤਕ ਪ੍ਰੇਮੀਆਂ ਨੂੰ ਰਿਆਇਤ ਵੀ ਦਿੱਤੀ ਤਾਂ ਜੋ ਕਿਤਾਬਾਂ ਨੂੰ ਵਾਪਿਸ ਲਿਜਾਣ ਦੇ ਝੰਜਟ ਤੋਂ ਬਚਿਆ ਜਾ ਸਕੇ ਵਿਰਾਸਤੀ ਪਿੰਡ ‘ਚ ਜਿੱਥੇ ਕਾਫੀ ਕੁੱਝ ਸਿੱਖਣ ਵਾਲਾ ਸੀ ਉਥੇ ਕਾਫੀ ਗੱਲਾਂ ਲੋਕਾਂ ਨੂੰ ਰੜਕੀਆਂ ਵੀ ਦੂਰ ਦੁਰਾਡੇ ਦੇ ਸ਼ਹਿਰਾਂ ਤੋਂ ਵੱਡੀ ਗਿਣਤੀ ਲੋਕ ਅੱਜ ਜੈਪਾਲਗੜ੍ਹ ‘ਚ ਪੁੱਜੇ ਹੋਏ ਸਨ। (Bathinda News)

ਇੱਕ ਪਰਵਾਸੀ ਮਹਿਲਾ ਅਮਨਦੀਪ ਕੌਰ ਗਿੱਲ ਜੋ ਕਿ ਆਪਣੇ ਬੱਚਿਆਂ  ਨੂੰ ਵਿਰਾਸਤੀ ਪਿੰਡ ਦਿਖਾ ਰਹੀ ਸੀ, ਦਾ ਕਹਿਣਾ ਸੀ ਕਿ ਪੰਜਾਬੀ ਕਲਚਰ ਦੀ ਨੁਮਾਇਸ਼ ਨੂੰ ਬੱਚਿਆਂ  ਨੇ ਪਸੰਦ ਕੀਤਾ ਹੈ ਪ੍ਰੰਤੂ ਉਡਦੀ ਧੂੜ ਨੇ ਪ੍ਰੇਸ਼ਾਨੀ ਵਧਾਈ ਹੈ ਮਾਨਸਾ ਤੋਂ ਆਏ ਰਮਨਦੀਪ ਸਿੰਘ ਰੰਧਾਵਾ ਅਤੇ ਜੈਦੀਪ ਸਿੰਘ ਬਰਾੜ ਨੇ ਦੱਸਿਆ ਕਿ ਉਹ ਪਹਿਲੀ ਦਫਾ ਵਿਰਾਸਤੀ ਮੇਲਾ ਦੇਖਿਆ ਹੈ ਪੰਜਾਬ ਦੀ ਵਿਰਾਸਤ ਨਾਲ ਜੁੜੇ ਪਹਿਰਾਵੇ ਤਾਂ ਦਿਖਾਈ ਦਿੱਤੇ ਪਰ ਖਾਣ ਪੀਣ ਦੀ ਨੁਮਾਇਸ਼ ਪਿੰਡ ‘ਚ ਕਿਧਰੇ ਨਹੀਂ ਦਿਸੀ। ਉਂਜ  ਜੈਪਾਲਗੜ੍ਹ ‘ਚ ਜੈਲਦਾਰਾਂ  ਦਾ ਵਿਹੜਾ ਖਿੱਚ ਦਾ ਕੇਂਦਰ ਰਿਹਾ। ਮੇਲੇ ਦਾ ਅਖਰੀ ਦਿਨ ਹੋਣ ਕਰਕੇ ਮੇਲਾ ਕਮੇਟੀ ਦੇ ਚੇਅਰਮੈਨ ਚਮਕੌਰ ਸਿੰਘ ਮਾਨ ਅਤੇ ਪ੍ਰਧਾਨ ਹਰਵਿੰਦਰ ਸਿੰਘ ਖਾਲਸਾ ਨੇ ਆਏ ਦਰਸ਼ਕਾਂ ਨੂੰ ਜੀ ਆਇਆਂ ਆਖਿਆ ਤੇ ਪੰਜ ਲੱਖ ਦੀ ਗਰਾਂਟ ਪ੍ਰਤੀ ਵਿੱਤ ਮੰਤਰੀ ਦਾ ਧੰਨਵਾਦ ਕੀਤਾ। (Bathinda News)

ਖਜ਼ਾਨਾ ਮੰਤਰੀ ਨੇ ਖੋਲ੍ਹਿਆ ਖਜਾਨਾ | Bathinda News

ਪੰਜਾਬ ਦੇ ਖਜਾਨਾ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਨੇ ਵਿਰਾਸਤੀ ਮੇਲੇ ਲਈ ਖਜਾਨੇ ਦਾ ਮੂੰਹ ਖੋਲ੍ਹਿਆ ਅਤੇ ਪੰਜ ਲੱਖ ਦੀ ਗਰਾਂਟ ਦਾ ਐਲਾਨ ਕੀਤਾ ਹੈ। ਨਾਲ ਹੀ ਉਨ੍ਹਾਂ ਆਖਿਆ ਕਿ ਅਗਲੇ ਵਰ੍ਹੇ ਪੰਜਾਬੀ ਸੱਭਿਆਚਾਰ ਨੂੰ ਪ੍ਰਫੁੱਲਤ ਕਰਨ ਤੇ ਹੋਰ ਵੀ ਜਿਆਦਾ ਲੋਕਾਂ ਤੱਕ ਲਿਜਾਣ ਵਾਸਤੇ ਖੁੱਲ੍ਹੇ ਗੱਫੇ ਦਿੱਤੇ ਜਾਣਗੇ। ਖਜਾਨਾ ਮੰਤਰੀ ਲੰਘੀ ਦੇਰ ਸ਼ਾਮ ਮੇਲੇ ‘ਚ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਏ ਅਤੇ ਗੀਤੀ ਸੰਗੀਤ ਦਾ ਆਨੰਦ ਮਾਣਿਆ। ਆਪਣੇ ਸ਼ਾਇਰਾਨਾ ਅੰਦਾਜ ‘ਚ ਮਨਪ੍ਰੀਤ ਬਾਦਲ ਨੇ ਆਖਿਆ ਕਿ ਅਗਲੇ ਸਾਲ ਆਉਣ ਵਾਲੇ 15ਵੇਂ ਵਿਰਾਸਤੀ ਮੇਲੇ ਨੂੰ ਟਾਪ ਗੇਅਰ ਵਿੱਚ ਪਾ ਕੇ ਇਤਿਹਾਸਕ ਮੇਲੇ ਵਜੋਂ ਮਨਾਇਆ ਜਾਵੇਗਾ। (Bathinda News)