ਸਪੋਰਟਸ ਡੈਸਕ। IND vs ENG: ਭਾਰਤ ਤੇ ਇੰਗਲੈਂਡ ਵਿਚਕਾਰ ਪੰਜ ਮੈਚਾਂ ਦੀ ਟੈਸਟ ਸੀਰੀਜ਼ ਦਾ ਚੌਥਾ ਮੈਚ 23 ਜੁਲਾਈ ਤੋਂ ਮੈਨਚੈਸਟਰ ’ਚ ਖੇਡਿਆ ਜਾਵੇਗਾ। ਭਾਰਤੀ ਟੀਮ ਨੂੰ ਲਾਰਡਜ਼ ਟੈਸਟ ’ਚ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ ਤੇ ਉਹ ਇਸ ਸਮੇਂ ਸੀਰੀਜ਼ ’ਚ 1-2 ਨਾਲ ਪਿੱਛੇ ਹੈ। ਭਾਰਤੀ ਟੀਮ ਵਾਪਸੀ ਦੇ ਇਰਾਦੇ ਨਾਲ ਸੀਰੀਜ਼ ’ਚ ਪ੍ਰਵੇਸ਼ ਕਰੇਗੀ, ਉੱਥੇ ਹੀ ਵਿਕਟਕੀਪਰ ਬੱਲੇਬਾਜ਼ ਰਿਸ਼ਭ ਪੰਤ ਕੋਲ ਸਾਬਕਾ ਕਪਤਾਨ ਰੋਹਿਤ ਸ਼ਰਮਾ ਨੂੰ ਪਛਾੜਨ ਦਾ ਮੌਕਾ ਹੋਵੇਗਾ।
ਇਹ ਖਬਰ ਵੀ ਪੜ੍ਹੋ : 10 Rupee Coins: 10 ਰੁਪਏ ਦੇ ਸਿੱਕੇ ਸਬੰਧੀ ਜ਼ਰੂਰੀ ਖਬਰ, ਵੇਖੋ
ਡਬਲਯੂਟੀਸੀ ’ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਭਾਰਤੀ ਬੱਲੇਬਾਜ਼
ਪੰਤ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ (ਡਬਲਯੂਟੀਸੀ) ਦੇ ਇਤਿਹਾਸ ’ਚ ਭਾਰਤ ਲਈ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਬੱਲੇਬਾਜ਼ ਬਣਨ ਲਈ ਰੋਹਿਤ ਨੂੰ ਪਛਾੜ ਸਕਦਾ ਹੈ। ਪੰਤ ਨੇ ਇਸ ਸਮੇਂ ਡਬਲਯੂਟੀਸੀ ’ਚ 2677 ਦੌੜਾਂ ਬਣਾਈਆਂ ਹਨ, ਜਦੋਂ ਕਿ ਰੋਹਿਤ ਨੇ ਇਸ ਚੈਂਪੀਅਨਸ਼ਿਪ ’ਚ 2716 ਦੌੜਾਂ ਬਣਾਈਆਂ ਹਨ। ਭਾਵ ਕਿ ਰੋਹਿਤ ਨੂੰ ਪਛਾੜਨ ਲਈ ਪੰਤ ਨੂੰ 40 ਹੋਰ ਦੌੜਾਂ ਬਣਾਉਣ ਦੀ ਜ਼ਰੂਰਤ ਹੈ। ਪੰਤ ਕੋਲ ਚੌਥੇ ਟੈਸਟ ਦੌਰਾਨ ਇਹ ਉਪਲਬਧੀ ਹਾਸਲ ਕਰਨ ਦਾ ਸੁਨਹਿਰੀ ਮੌਕਾ ਹੋਵੇਗਾ।
ਭਾਰਤੀ ਬੱਲੇਬਾਜ਼ਾਂ ’ਚ, ਰੋਹਿਤ ਨੇ ਡਬਲਯੂਟੀਸੀ ਇਤਿਹਾਸ ’ਚ 69 ਪਾਰੀਆਂ ’ਚ 2716 ਦੌੜਾਂ ਬਣਾਈਆਂ ਹਨ। ਪੰਤ 67 ਪਾਰੀਆਂ ’ਚ 2677 ਦੌੜਾਂ ਬਣਾ ਕੇ ਦੂਜੇ ਸਥਾਨ ’ਤੇ ਹੈ। ਵਿਰਾਟ ਕੋਹਲੀ 79 ਪਾਰੀਆਂ ’ਚ 2617 ਦੌੜਾਂ ਨਾਲ ਇਸ ਸੂਚੀ ’ਚ ਤੀਜੇ ਸਥਾਨ ’ਤੇ ਹਨ। ਇਸ ਦੇ ਨਾਲ ਹੀ, ਕਪਤਾਨ ਸ਼ੁਭਮਨ ਗਿੱਲ ਨੇ ਡਬਲਯੂਟੀਸੀ ਇਤਿਹਾਸ ’ਚ 65 ਪਾਰੀਆਂ ’ਚ 2500 ਦੌੜਾਂ ਬਣਾਈਆਂ ਹਨ, ਜਦੋਂ ਕਿ ਰਵਿੰਦਰ ਜਡੇਜਾ ਨੇ 64 ਪਾਰੀਆਂ ’ਚ 2212 ਦੌੜਾਂ ਬਣਾਈਆਂ ਹਨ ਤੇ ਉਹ ਚੋਟੀ ਦੇ ਪੰਜ ਬੱਲੇਬਾਜ਼ਾਂ ’ਚ ਸ਼ਾਮਲ ਹਨ।
ਪੰਤ ਦੀ ਉਪਲਬਧਤਾ ’ਤੇ ਸ਼ੱਕ | IND vs ENG
ਚੌਥੇ ਟੈਸਟ ’ਚ ਪੰਤ ਦੀ ਉਪਲਬਧਤਾ ’ਤੇ ਵੀ ਸ਼ੱਕ ਹੈ। ਪੰਤ ਤੀਜੇ ਟੈਸਟ ਮੈਚ ’ਚ ਵਿਕਟਕੀਪਿੰਗ ਕਰਦੇ ਸਮੇਂ ਜ਼ਖਮੀ ਹੋ ਗਏ ਸਨ ਤੇ ਉਹ ਵਿਕਟ ਦੇ ਪਿੱਛੇ ਜ਼ਿੰਮੇਵਾਰੀ ਨਹੀਂ ਨਿਭਾ ਰਹੇ ਸਨ। ਧਰੁਵ ਜੁਰੇਲ ਪੰਤ ਦੀ ਜਗ੍ਹਾ ਵਿਕਟਕੀਪਿੰਗ ਲਈ ਆਏ ਸਨ। ਮੀਡੀਆ ਰਿਪੋਰਟਾਂ ਅਨੁਸਾਰ, ਪੰਤ ਨੂੰ ਮੈਨਚੈਸਟਰ ’ਚ ਚੌਥੇ ਟੈਸਟ ’ਚ ਖੇਡਣ ਲਈ ਫਿੱਟ ਘੋਸ਼ਿਤ ਕੀਤਾ ਗਿਆ ਹੈ। ਤੀਜੇ ਟੈਸਟ ਮੈਚ ਤੋਂ ਬਾਅਦ, ਗਿੱਲ ਨੇ ਪੰਤ ਦੀ ਫਿਟਨੈਸ ਬਾਰੇ ਕਿਹਾ ਸੀ।
ਪੰਤ ਸਕੈਨ ਲਈ ਗਏ ਹਨ ਤੇ ਸੱਟ ਬਹੁਤ ਗੰਭੀਰ ਨਹੀਂ ਹੈ ਇਸ ਲਈ ਉਹ ਚੌਥੇ ਟੈਸਟ ਤੋਂ ਪਹਿਲਾਂ ਫਿੱਟ ਹੋ ਜਾਣਗੇ। ਭਾਰਤੀ ਟੀਮ ਲਈ ਲੜੀ ’ਚ ਬਣੇ ਰਹਿਣ ਲਈ ਚੌਥਾ ਟੈਸਟ ਜਿੱਤਣਾ ਬਹੁਤ ਜ਼ਰੂਰੀ ਹੈ। ਜੇਕਰ ਭਾਰਤ ਅਗਲਾ ਮੈਚ ਹਾਰ ਜਾਂਦਾ ਹੈ, ਤਾਂ ਉਹ ਸੀਰੀਜ਼ ਗੁਆ ਦੇਵੇਗਾ। ਪੰਤ ਇਸ ਲੜੀ ’ਚ ਚੰਗੀ ਫਾਰਮ ’ਚ ਹਨ ਤੇ ਉਸ ਤੋਂ ਚੌਥੇ ਟੈਸਟ ਮੈਚ ’ਚ ਵੀ ਚੰਗੇ ਪ੍ਰਦਰਸ਼ਨ ਦੀ ਉਮੀਦ ਕੀਤੀ ਜਾਵੇਗੀ।
