ਅੱਗ ਲੱਗਣ ਕਾਰਨ ਝੋਨੇ ਨਾਲ ਭਰਿਆ ਟਰੱਕ ਹੋਇਆ ਤਬਾਹ
ਸੱਤਪਾਲ ਥਿੰਦ, ਫ਼ਿਰੋਜ਼ਪੁਰ
ਜ਼ੀਰਾ ਰੋਡ ‘ਤੇ ਪੈਂਦੇ ਪਿੰਡ ਲੋਹਗੜ੍ਹ ਨਜ਼ਦੀਕ ਅੱਜ ਸਵੇਰ ਵੇਲੇ ਦੋ ਟਰੱਕਾਂ ਦਰਮਿਆਨ ਹੋਈ ਜ਼ਬਰਦਸਤ ਟੱਕਰ ਕਾਰਨ ਇੱਕ ਟਰੱਕ ਨੂੰ ਅੱਗ ਲੱਗ ਗਈ ਜਿਸਦੇ ਡਰਾਈਵਰ ਦੀ ਸੜਨ ਕਾਰਨ ਮੌਤ ਹੋ ਗਈ| ਜਾਣਕਾਰੀ ਅਨੁਸਾਰ ਡਰਾਈਵਰ ਸੁਰਜੀਤ ਸਿੰਘ (35) ਪੁੱਤਰ ਹਦੈਤ ਸਿੰਘ ਵਾਸੀ ਮਮਦੋਟ ਝੋਨੇ ਦੀਆਂ ਬੋਰੀਆਂ ਨਾਲ ਭਰਿਆ ਟਰੱਕ (ਪੀ ਬੀ 06 9941) ਜ਼ੀਰਾ ਸਾਈਡ ਨੂੰ ਲਿਜਾ ਰਿਹਾ ਸੀ ਇਸੇ ਦੌਰਾਨ ਜਦੋਂ ਉਹ ਪਿੰਡ ਲੋਹਗੜ੍ਹ ਕੋਲ ਪਹੁੰਚਿਆਂ ਤਾਂ ਜ਼ੀਰਾ ਸਾਈਡ ਤੋਂ ਆ ਰਹੇ ਬੱਜਰੀ ਨਾਲ ਭਰੇ ਟਰੱਕ (ਪੀ ਬੀ 35 ਕਿਊ 3559) ਦੀ ਉਸ ਨਾਲ ਟੱਕਰ ਹੋ ਗਈ|
ਟੱਕਰ ਇੰਨੀ ਭਿਆਨਕ ਸੀ ਕਿ ਦੋਵਾਂ ਟਰੱਕਾਂ ਦੇ ਪਰਖੱਚੇ ਉੱਡ ਗਏ ਤੇ ਸੁਰਜੀਤ ਸਿੰਘ ਵਾਲੇ ਟਰੱਕ ਨੂੰ ਅੱਗ ਲੱਗ ਗਈ| ਵੇਖਦੇ ਹੀ ਵੇਖਦਿਆਂ ਅੱਗ ਭਾਂਬੜ ਬਣ ਉੱਠੀ ਅਤੇ ਅੱਗ ਦੀ ਲਪੇਟ ‘ਚ ਆਉਣ ਕਾਰਨ ਸੁਰਜੀਤ ਸਿੰਘ ਜ਼ਿੰਦਾ ਸੜ ਗਿਆ ਤੇ ਉਸ ਦੀ ਮੌਤ ਹੋ ਗਈ। ਫਾਇਰ ਬ੍ਰਿਗੇਡ ਦੀ ਮੱਦਦ ਨਾਲ ਅੱਗ ‘ਤੇ ਕਾਬੂ ਪਾਇਆ ਤੇ ਟਰੱਕ ਵਿਚਲਾ ਕਾਫੀ ਝੋਨਾ ਵੀ ਤਬਾਹ ਹੋ ਗਿਆ। ਹਾਦਸੇ ‘ਚ ਬੱਜਰੀ ਨਾਲ ਭਰੇ ਟਰੱਕ ਡਰਾਈਵਰ ਵੀ ਗੰਭੀਰ ਜ਼ਖਮੀ ਹੋ ਗਿਆ, ਜਿਸ ਨੂੰ ਮੁੱਢਲੀ ਸਹਾਇਤਾ ਦਿੱਤੀ ਗਈ। ਮੌਕੇ ‘ਤੇ ਪਹੁੰਚੀ ਥਾਣਾ ਕੁੱਲਗੜੀ ਪੁਲਿਸ ਵੱਲੋਂ ਕਾਰਵਾਈ ਕੀਤੀ ਜਾ ਰਹੀ ਹੈ।
Punjabi News ਨਾਲ ਜੁੜੇ ਹੋਰ ਅਪਡੇਟ ਹਾਸਲ ਕਰਨ ਲਈ ਸਾਨੂੰ Facebook ਅਤੇ Twitter ‘ਤੇ ਫਾਲੋ ਕਰੋ।
