T20 World Cup: ਬੰਗਲਾਦੇਸ਼ ਨੂੰ ਹਰਾਕੇ ਪਾਕਿ ਸੈਮੀਫਾਈਨਲ ’ਚ
ਐਡੀਲੇਡ (ਏਜੰਸੀ)। ਸ਼ਾਹੀਨ ਸ਼ਾਹ ਅਫਰੀਦੀ (22/4) ਦੀ ਸ਼ਾਨਦਾਰ ਗੇਂਦਬਾਜ਼ੀ ਅਤੇ ਮੁਹੰਮਦ ਹੈਰਿਸ ਦੀਆਂ ਧਮਾਕੇਦਾਰ 31 ਦੌੜਾਂ ਦੀ ਮਦਦ ਨਾਲ ਪਾਕਿਸਤਾਨ ਨੇ ਟੀ-20 ਵਿਸ਼ਵ ਕੱਪ 2022 ਦੇ ਸੁਪਰ-12 ਮੈਚ ਵਿੱਚ ਬੰਗਲਾਦੇਸ਼ ਨੂੰ ਛੇ ਵਿਕਟਾਂ ਨਾਲ ਹਰਾ ਕੇ ਟੂਰਨਾਮੈਂਟ ਦੇ ਸੈਮੀਫਾਈਨਲ ਵਿੱਚ ਥਾਂ ਬਣਾਈ। ਬੰਗਲਾਦੇਸ਼ ਨੇ ਗਰੁੱਪ-2 ਦੇ ਮੈਚ ’ਚ ਪਾਕਿਸਤਾਨ ਨੂੰ 128 ਦੌੜਾਂ ਦਾ ਟੀਚਾ ਦਿੱਤਾ, ਜਿਸ ਨੂੰ ਪਾਕਿਸਤਾਨ ਨੇ 11 ਗੇਂਦਾਂ ਬਾਕੀ ਰਹਿੰਦਿਆਂ ਹਾਸਲ ਕਰ ਲਿਆ। ਦਿਨ ਦੇ ਸ਼ੁਰੂਆਤੀ ਮੈਚ ਵਿੱਚ ਦੱਖਣੀ ਅਫਰੀਕਾ ਦੀ ਨੀਦਰਲੈਂਡਜ਼ ਤੋਂ ਹਾਰ ਤੋਂ ਬਾਅਦ ਇਹ ਮੈਚ ਮੂਲ ਰੂਪ ਵਿੱਚ ਕੁਆਰਟਰ ਫਾਈਨਲ ਸੀ ਅਤੇ ਜੇਤੂ ਟੀਮ ਨੂੰ ਸੈਮੀਫਾਈਨਲ ਵਿੱਚ ਪ੍ਰਵੇਸ਼ ਕਰਨਾ ਤੈਅ ਸੀ।
ਸ਼ਾਹੀਨ ਨੇ ਇਸ ਅਹਿਮ ਮੈਚ ’ਚ ਆਪਣੀ ਗਤੀ ਮੁੜ ਹਾਸਲ ਕੀਤੀ, ਸਿਰਫ 22 ਦੌੜਾਂ ’ਤੇ ਚਾਰ ਵਿਕਟਾਂ ਲੈ ਕੇ ਬੰਗਲਾਦੇਸ਼ ਨੂੰ 127 ਦੌੜਾਂ ’ਤੇ ਰੋਕ ਦਿੱਤਾ। ਟੀਚੇ ਦਾ ਪਿੱਛਾ ਕਰਦਿਆਂ ਜਦੋਂ ਹੈਰਿਸ ਬੱਲੇਬਾਜ਼ੀ ਲਈ ਆਇਆ ਤਾਂ ਪਾਕਿਸਤਾਨ ਨੂੰ 52 ਗੇਂਦਾਂ ’ਤੇ 67 ਦੌੜਾਂ ਦੀ ਲੋੜ ਸੀ। ਹੈਰਿਸ ਨੇ 18 ਗੇਂਦਾਂ ਵਿੱਚ ਇੱਕ ਚੌਕੇ ਅਤੇ ਦੋ ਛੱਕਿਆਂ ਦੀ ਮਦਦ ਨਾਲ 31 ਦੌੜਾਂ ਬਣਾ ਕੇ ਆਪਣੀ ਟੀਮ ਲਈ ਸੈਮੀਫਾਈਨਲ ਵਿੱਚ ਪਹੁੰਚਣ ਦਾ ਰਾਹ ਪੱਧਰਾ ਕੀਤਾ। ਇਸ ਜਿੱਤ ਨਾਲ ਪਾਕਿਸਤਾਨ ਗਰੁੱਪ-2 ’ਚ ਭਾਰਤ ਤੋਂ ਬਾਅਦ ਸੈਮੀਫਾਈਨਲ ’ਚ ਪਹੁੰਚਣ ਵਾਲੀ ਦੂਜੀ ਟੀਮ ਬਣ ਗਈ ਹੈ।
ਬੰਗਲਾਦੇਸ਼ ਨੇ ਟਾਸ ਜਿੱਤ ਕੇ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ
ਬੰਗਲਾਦੇਸ਼ ਨੇ ਟਾਸ ਜਿੱਤ ਕੇ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ ਅਤੇ ਪਾਰੀ ਨੂੰ ਸੁਚਾਰੂ ਢੰਗ ਨਾਲ ਅੱਗੇ ਵਧਾਇਆ, ਲਿਟਨ ਦਾਸ (10) ਦਾ ਵਿਕਟ ਜਲਦੀ ਗੁਆ ਦਿੱਤਾ। ਨਜਮੁਲ ਹਸਨ ਸ਼ਾਂਤੋ ਅਤੇ ਸੌਮਿਆ ਸਰਕਾਰ ਨੇ ਦੂਜੀ ਵਿਕਟ ਲਈ 52 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਸ਼ਾਂਤੋ ਨੇ 48 ਗੇਂਦਾਂ ਵਿੱਚ ਸੱਤ ਚੌਕਿਆਂ ਦੀ ਮਦਦ ਨਾਲ 54 ਦੌੜਾਂ ਬਣਾਈਆਂ ਜਦਕਿ ਸੌਮਿਆ ਸਰਕਾਰ ਨੇ 17 ਗੇਂਦਾਂ ਵਿੱਚ 20 ਦੌੜਾਂ ਦਾ ਯੋਗਦਾਨ ਪਾਇਆ।
ਸ਼ਾਂਤੋ-ਸੌਮਿਆ ਇਸ ਸਾਂਝੇਦਾਰੀ ਨਾਲ ਬੰਗਲਾਦੇਸ਼ ਨੂੰ ਵੱਡੇ ਸਕੋਰ ਵੱਲ ਲਿਜਾ ਰਹੇ ਸਨ ਪਰ ਸ਼ਾਦਾਬ ਨੇ 11ਵੇਂ ਓਵਰ ਵਿੱਚ ਸੌਮਿਆ ਅਤੇ ਕਪਤਾਨ ਸ਼ਾਕਿਬ ਅਲ ਹਸਨ ਨੂੰ ਆਊਟ ਕਰਕੇ ਮੈਚ ਦਾ ਰੁਖ ਹੀ ਬਦਲ ਦਿੱਤਾ। ਇੱਥੋਂ ਹੀ ਬੰਗਲਾਦੇਸ਼ ਦੀਆਂ ਵਿਕਟਾਂ ਡਿੱਗਣ ਦਾ ਸਿਲਸਿਲਾ ਸ਼ੁਰੂ ਹੋਇਆ। ਹਾਲਾਂਕਿ ਅਫੀਫ ਹੁਸੈਨ ਨੇ 20 ਗੇਂਦਾਂ ’ਤੇ ਅਜੇਤੂ 24 ਦੌੜਾਂ ਬਣਾਈਆਂ, ਪਰ ਮੱਧਕ੍ਰਮ ਦੇ ਦੂਜੇ ਬੱਲੇਬਾਜ਼ ਦੋਹਰੇ ਅੰਕੜੇ ਨੂੰ ਵੀ ਨਹੀਂ ਛੂਹ ਸਕੇ ਅਤੇ ਬੰਗਲਾਦੇਸ਼ 127/8 ਤੱਕ ਹੀ ਸੀਮਤ ਹੋ ਗਿਆ। ਸ਼ਾਹੀਨ ਨੇ ਚਾਰ ਓਵਰਾਂ ਵਿੱਚ ਸਿਰਫ਼ 22 ਦੌੜਾਂ ਦੇ ਕੇ ਚਾਰ ਵਿਕਟਾਂ ਲਈਆਂ, ਜਦਕਿ ਸ਼ਾਦਾਬ ਨੇ ਚਾਰ ਓਵਰਾਂ ਵਿੱਚ 30 ਦੌੜਾਂ ਦੇ ਕੇ ਦੋ ਵਿਕਟਾਂ ਲਈਆਂ। ਹੈਰਿਸ ਰੌਫ ਅਤੇ ਇਫਤਿਖਾਰ ਅਹਿਮਦ ਨੇ ਇਕ-ਇਕ ਵਿਕਟ ਲਈ।
ਹੋਰ ਅਪਡੇਟ ਹਾਸਲ ਕਰਨ ਲਈ ਸਾਨੂੰ Facebook ਅਤੇ Twitter,Instagram, Linkedin , YouTube‘ਤੇ ਫਾਲੋ ਕਰੋ
 ਦੀ ਸ਼ਾਨਦਾਰ ਗੇਂਦਬਾਜ਼ੀ ਅਤੇ ਮੁਹੰਮਦ ਹੈਰਿਸ ਦੀਆਂ ਧਮਾਕੇਦਾਰ 31 ਦੌੜਾਂ ਦੀ ਮਦਦ ਨਾਲ ਪਾਕਿਸਤਾਨ){kind=link}