Forest Fire: ਉਇਸੋਂਗ, (ਆਈਏਐਨਐਸ)। ਦੱਖਣੀ ਕੋਰੀਆ ਵਿੱਚ ਜੰਗਲਾਂ ਦੀ ਭਿਆਨਕ ਅੱਗ ਤਬਾਹੀ ਮਚਾ ਰਹੀ ਹੈ। ਬੁੱਧਵਾਰ ਨੂੰ ਦੱਖਣ-ਪੂਰਬੀ ਕਾਉਂਟੀ ਉਈਸੋਂਗ ਵਿੱਚ ਲੱਗੀ ਭਿਆਨਕ ਅੱਗ ਬੁਝਾਉਣ ਦੀ ਕੋਸ਼ਿਸ਼ ਦੌਰਾਨ ਇੱਕ ਅੱਗ ਬੁਝਾਊ ਹੈਲੀਕਾਪਟਰ ਹਾਦਸਾਗ੍ਰਸਤ ਹੋ ਗਿਆ। ਇਸ ਹਾਦਸੇ ਵਿੱਚ ਪਾਇਲਟ ਦੀ ਮੌਤ ਹੋ ਗਈ। ਕੋਰੀਆ ਜੰਗਲਾਤ ਸੇਵਾ ਦੇ ਅਨੁਸਾਰ, ਹੈਲੀਕਾਪਟਰ ਦੁਪਹਿਰ 12:54 ਵਜੇ ਸਿਓਲ ਤੋਂ ਲਗਭਗ 180 ਕਿਲੋਮੀਟਰ ਦੱਖਣ-ਪੂਰਬ ਵਿੱਚ ਉਈਸੋਂਗ ਵਿੱਚ ਇੱਕ ਪਹਾੜ ਨਾਲ ਟਕਰਾ ਗਿਆ।
ਇਹ ਵੀ ਪੜ੍ਹੋ: Kunal Kamra: ਕੁਨਾਲ ਕਾਮਰਾ ਨੂੰ ਨਹੀਂ ਮਿਲੀ ਰਾਹਤ, ਨਵੇਂ ਸੰਮਨ ਜਾਰੀ
ਯੋਨਹਾਪ ਨਿਊਜ਼ ਏਜੰਸੀ ਦੇ ਅਨੁਸਾਰ, ਅਧਿਕਾਰੀਆਂ ਨੇ ਕਿਹਾ ਕਿ ਹਾਦਸੇ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਦੌਰਾਨ, ਬੁੱਧਵਾਰ ਨੂੰ, ਅਧਿਕਾਰੀਆਂ ਨੇ ਜਾਣਕਾਰੀ ਦਿੱਤੀ ਕਿ ਦੱਖਣ-ਪੂਰਬੀ ਖੇਤਰ ਵਿੱਚ ਲੱਗੀ ਭਿਆਨਕ ਅੱਗ ਵਿੱਚ ਮਰਨ ਵਾਲਿਆਂ ਦੀ ਗਿਣਤੀ 16 ਹੋ ਗਈ ਹੈ, ਜਦੋਂਕਿ 10 ਹੋਰ ਜ਼ਖਮੀ ਹੋ ਗਏ ਹਨ। ਤੇਜ਼ੀ ਨਾਲ ਫੈਲ ਰਹੀ ਅੱਗ ‘ਤੇ ਕਾਬੂ ਪਾਉਣ ਲਈ ਫਾਇਰਫਾਈਟਰਜ਼ ਨੂੰ ਜੱਦੋ-ਜਹਿਦ ਕਰਨੀ ਪੈ ਰਹੀ ਹੈ। ਪਿਛਲੇ ਸ਼ੁੱਕਰਵਾਰ ਨੂੰ ਦੱਖਣੀ ਗਯੋਂਗਸਾਂਗ ਸੂਬੇ ਦੇ ਸਾਂਚਿਓਂਗ ਕਾਉਂਟੀ ਵਿੱਚ ਲੱਗੀ ਅੱਗ ਨੇੜਲੇ ਉਇਸਿਓਂਗ ਵਿੱਚ ਫੈਲ ਗਈ ਹੈ। ਤੇਜ਼ ਅਤੇ ਖੁਸ਼ਕ ਹਵਾਵਾਂ ਕਾਰਨ ਅੱਗ ਗੁਆਂਢੀ ਐਂਡੋਂਗ, ਚੇਓਂਗਸੋਂਗ, ਯਿਓਂਗਯਾਂਗ ਅਤੇ ਯਿਓਂਗਦੇਓਕ ਤੱਕ ਫੈਲ ਗਈ ਹੈ।
ਅਧਿਕਾਰੀਆਂ ਨੇ ਦੱਸਿਆ ਕਿ ਮ੍ਰਿਤਕਾਂ ਵਿੱਚੋਂ ਦੋ ਐਂਡੋਂਗ ਵਿੱਚ, ਤਿੰਨ ਚੇਓਂਗਸੋਂਗ ਵਿੱਚ, ਪੰਜ ਯਿਓਂਗਯਾਂਗ ਵਿੱਚ ਅਤੇ ਛੇ ਯਿਓਂਗਦੇਓਕ ਵਿੱਚ ਮਿਲੇ ਹਨ। ਦਸ ਜ਼ਖਮੀਆਂ ਵਿੱਚੋਂ ਦੋ ਨੂੰ ਗੰਭੀਰ ਸੱਟਾਂ ਲੱਗੀਆਂ। ਉਇਸੋਂਗ ਤੱਕ ਫੈਲੀ ਅੱਗ ਨੇ ਗੌਨ ਮੰਦਰ ਨੂੰ ਤਬਾਹ ਕਰ ਦਿੱਤਾ। ਇਹ ਇੱਕ ਪ੍ਰਾਚੀਨ ਮੰਦਰ ਸੀ। ਪਿਛਲੇ ਸ਼ੁੱਕਰਵਾਰ ਤੋਂ, ਫੌਜ ਨੇ ਦੱਖਣ-ਪੂਰਬੀ ਖੇਤਰ ਵਿੱਚ ਅੱਗ ਨਾਲ ਲੜਨ ਵਿੱਚ ਮੱਦਦ ਲਈ ਲਗਭਗ 5,000 ਫੌਜੀ ਕਰਮਚਾਰੀ ਅਤੇ 146 ਹੈਲੀਕਾਪਟਰ ਤਾਇਨਾਤ ਕੀਤੇ ਹਨ। ਨਿਆਂ ਮੰਤਰਾਲੇ ਨੇ ਕਿਹਾ ਕਿ ਉੱਤਰੀ ਗਯੋਂਗਸਾਂਗ ਸੂਬੇ ਦੀ ਇੱਕ ਜੇਲ੍ਹ ਦੇ ਲਗਭਗ 500 ਕੈਦੀਆਂ ਨੂੰ ਅੱਗ ਤੋਂ ਬਚਣ ਲਈ ਰਾਤੋ-ਰਾਤ ਇੱਕ ਹੋਰ ਥਾਂ ‘ਤੇ ਤਬਦੀਲ ਕਰ ਦਿੱਤਾ ਗਿਆ। ਮੰਤਰਾਲੇ ਨੇ ਸ਼ੁਰੂ ਵਿੱਚ ਖੇਤਰ ਦੀਆਂ ਕਈ ਜੇਲ੍ਹਾਂ ਤੋਂ ਲਗਭਗ 3,500 ਕੈਦੀਆਂ ਨੂੰ ਤਬਦੀਲ ਕਰਨ ਬਾਰੇ ਵਿਚਾਰ ਕੀਤਾ ਸੀ ਪਰ ਅੱਗ ‘ਤੇ ਕੁਝ ਕਾਬੂ ਪਾਉਣ ਤੋਂ ਬਾਅਦ ਗਿਣਤੀ ਘਟਾ ਦਿੱਤੀ ਗਈ। Forest Fire
