Agricultural Waste: ਬਾਇਓ-ਬਿਟੂਮਨ ਦੀ ਵਪਾਰਕ ਪੈਦਾਵਾਰ ਵਾਲਾ ਪਹਿਲਾ ਦੇਸ਼ ਬਣਿਆ ਭਾਰਤ
- ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਨੇ ਕੀਤਾ ਐਲਾਨ
Agricultural Waste: ਨਵੀਂ ਦਿੱਲੀ (ਏਜੰਸੀ)। ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਬੁੱਧਵਾਰ ਨੂੰ ਕਿਹਾ ਕਿ ਭਾਰਤ ਵਪਾਰਕ ਤੌਰ ’ਤੇ ਬਾਇਓ-ਬਿਟੂਮਨ ਪੈਦਾ ਕਰਨ ਵਾਲਾ ਦੁਨੀਆ ਦਾ ਪਹਿਲਾ ਦੇਸ਼ ਬਣ ਗਿਆ ਹੈ। ਵਿਗਿਆਨਕ ਅਤੇ ਉਦਯੋਗਿਕ ਖੋਜ ਪ੍ਰੀਸ਼ਦ ਦੇ ਤਕਨਾਲੋਜੀ ਟਰਾਂਸਫਰ ਪ੍ਰੋਗਰਾਮ, ‘ਫਰਾਮ ਫਾਰਮ ਰੇਜ਼ਿਡਊ ਟੂ ਰੋਡ: ਪਾਈਰੋਲਿਸਿਸ ਰਾਹੀਂ ਬਾਇਓ-ਬਿਟੂਮਨ’ ਨੂੰ ਸੰਬੋਧਨ ਕਰਦੇ ਹੋਏ ਗਡਕਰੀ ਨੇ ਕਿਹਾ ਕਿ ਜੇਕਰ ਭਾਰਤ ਦੁਨੀਆ ਦੀ ਤੀਜੀ ਸਭ ਤੋਂ ਵੱਡੀ ਅਰਥਵਿਵਸਥਾ ਬਣਨਾ ਚਾਹੁੰਦਾ ਹੈ, ਤਾਂ ਇਸ ਨੂੰ ਆਯਾਤ ਘਟਾਉਣ ਅਤੇ ਨਿਰਯਾਤ ਵਧਾਉਣ ’ਤੇ ਧਿਆਨ ਕੇਂਦਰਿਤ ਕਰਨਾ ਚਾਹੀਦਾ ਹੈ।
ਕੇਂਦਰੀ ਮੰਤਰੀ ਗਡਕਰੀ ਨੇ ਦੱਸਿਆ ਕਿ ਖੇਤੀਬਾੜੀ ਰਹਿੰਦ-ਖੂੰਹਦ ਨੂੰ ਇੱਕ ਕੀਮਤੀ ਰਾਸ਼ਟਰੀ ਸਰੋਤ ਵਿੱਚ ਕਿਵੇਂ ਬਦਲਿਆ ਜਾ ਸਕਦਾ ਹੈ। ਸੜਕ ਆਵਾਜਾਈ ਮੰਤਰੀ ਨੇ ਕਿਹਾ ਕਿ ਖੇਤੀਬਾੜੀ ਰਹਿੰਦ-ਖੂੰਹਦ ਦੀ ਵਰਤੋਂ ਫਸਲਾਂ ਦੀ ਰਹਿੰਦ-ਖੂੰਹਦ ਨੂੰ ਸਾੜਨ ਕਾਰਨ ਹੋਣ ਵਾਲੇ ਪ੍ਰਦੂਸ਼ਣ ਨੂੰ ਘਟਾਉਂਦੀ ਹੈ ਅਤੇ ਸਰਕੂਲਰ ਅਰਥਵਿਵਸਥਾ ਨੂੰ ਵੀ ਮਜ਼ਬੂਤ ਕਰਦੀ ਹੈ। ਉਨ੍ਹਾਂ ਕਿਹਾ ਕਿ 15 ਫੀਸਦੀ ਮਿਸ਼ਰਣ ਦੇਸ਼ ਨੂੰ ਲੱਗਭੱਗ 4,500 ਕਰੋੜ ਰੁਪਏ ਵਿਦੇਸ਼ੀ ਮੁਦਰਾ ਦੀ ਬਚਤ ਕਰ ਸਕਦਾ ਹੈ ਅਤੇ ਆਯਾਤ ਕੀਤੇ ਕੱਚੇ ਤੇਲ ’ਤੇ ਨਿਰਭਰਤਾ ਨੂੰ ਕਾਫ਼ੀ ਹੱਦ ਤੱਕ ਘਟਾ ਸਕਦਾ ਹੈ। ਮੰਤਰੀ ਅਨੁਸਾਰ ਇਹ ਪਹਿਲ ਕਿਸਾਨਾਂ ਨੂੰ ਸਸ਼ਕਤ ਬਣਾਵੇਗੀ, ਪੇਂਡੂ ਖੇਤਰਾਂ ਵਿੱਚ ਰੋਜ਼ੀ-ਰੋਟੀ ਦੇ ਨਵੇਂ ਮੌਕੇ ਪੈਦਾ ਕਰੇਗੀ ਅਤੇ ਪੇਂਡੂ ਅਰਥਵਿਵਸਥਾ ਨੂੰ ਹੁਲਾਰਾ ਦੇਵੇਗੀ।
ਸੜਕ ਨਿਰਮਾਣ ਲਈ ਵਿਦੇਸ਼ਾਂ ’ਤੇ ਨਿਰਭਰਤਾ ਘਟੇਗੀ | Agricultural Waste
ਬਾਇਓ-ਬਿਟੂਮੇਨ ਪੈਦਾ ਕਰਨ ਦੀ ਲਾਗਤ ਰਵਾਇਤੀ ਬਿਟੂਮਨ ਨਾਲੋਂ ਘੱਟ ਹੋ ਸਕਦੀ ਹੈ ਅਤੇ ਇਹ ਵਾਤਾਵਰਨ ਅਨੁਕੂਲ ਵੀ ਹੈ। ਦੇਸ਼ ਦਾ ਸੜਕੀ ਨੈੱਟਵਰਕ 63 ਲੱਖ ਕਿਲੋਮੀਟਰ ਤੋਂ ਵੱਧ ਫੈਲਿਆ ਹੋਇਆ ਹੈ, ਜੋ ਕਿ ਦੁਨੀਆ ਵਿੱਚ ਦੂਜਾ ਸਭ ਤੋਂ ਵੱਡਾ ਹੈ ਅਤੇ ਦੇਸ਼ ਦੀਆਂ ਲੱਗਭੱਗ 90 ਫੀਸਦੀ ਸੜਕਾਂ ’ਚ ਬਿਟੂਮਨ ਦੀ ਵਰਤੋਂ ਹੁੰਦੀ ਹੈ ਵਰਤਮਾਨ ਵਿੱਚ ਦੇਸ਼ 88 ਲੱਖ ਟਨ ਬਿਟੂਮਨ ਦੀ ਖਪਤ ਕਰਦਾ ਹੈ, ਜੋ ਕਿ ਭਵਿੱਖ ਵਿੱਚ 10 ਮਿਲੀਅਨ ਟਨ ਤੱਕ ਵਧਣ ਦੀ ਉਮੀਦ ਹੈ। ਇਸ ਵਿੱਚੋਂ, 40 ਤੋਂ 50 ਫੀਸਦੀ ਆਯਾਤ ਕੀਤਾ ਜਾਂਦਾ ਹੈ, ਜਿਸ ਦੀ ਸਾਲਾਨਾ ਲਾਗਤ 25,000 ਤੋਂ 30,000 ਕਰੋੜ ਰੁਪਏ ਹੈ।
ਕੀ ਹੈ ਬਾਇਓ-ਬਿਟੂਮਨ?
ਬਾਇਓ-ਬਿਟੂਮਨ ਇੱਕ ਨਵਿਆਉਣਯੋਗ, ਪੈਟਰੋਲੀਅਮ-ਮੁਕਤ ਸਮੱਗਰੀ ਹੈ ਜਿਸ ਵਿੱਚ ਚਿਪਕਣ ਵਾਲੇ ਗੁਣ ਹਨ ਅਤੇ ਇਸ ਨੂੰ ਸੜਕ ਨਿਰਮਾਣ ਅਤੇ ਵਾਟਰਪਰੂਫਿੰਗ ਵਿੱਚ ਵਰਤਿਆ ਜਾਂਦਾ ਹੈ। ਇਹ ਖੇਤੀਬਾੜੀ ਜੈਵਿਕ ਰਹਿੰਦ-ਖੂੰਹਦ ਜਿਵੇਂ ਕਿ ਫਸਲਾਂ ਦੀ ਪਰਾਲੀ, ਐਲਗੀ, ਲਿਗਨਿਨ (ਪੌਦਿਆਂ ਦਾ ਇੱਕ ਹਿੱਸਾ), ਅਤੇ ਬਨਸਪਤੀ ਤੇਲਾਂ ਤੋਂ ਪੈਦਾ ਹੁੰਦਾ ਹੈ, ਅਤੇ ਇਹ ਰਵਾਇਤੀ ਬਿਟੂਮਨ ਦਾ ਬਦਲ ਹੈ। ਇਹ ਸੜਕਾਂ ਅਤੇ ਹੋਰ ਬੁਨਿਆਦੀ ਢਾਂਚੇ ਦੇ ਨਿਰਮਾਣ ਵਿੱਚ ਜੈਵਿਕ ਇੰਧਨ ’ਤੇ ਨਿਰਭਰਤਾ ਨੂੰ ਘਟਾਉਂਦਾ ਹੈ ਅਤੇ ਕਾਰਬਨ ਨਿਕਾਸ ਨੂੰ ਘਟਾਉਂਦਾ ਹੈ। ਇਸ ਨੂੰ ਬਾਇਓ-ਡਾਮਰ ਵੀ ਕਿਹਾ ਜਾਂਦਾ ਹੈ ਅਤੇ ਇਹ ਖੇਤੀਬਾੜੀ ਰਹਿੰਦ-ਖੂੰਹਦ ਜਿਵੇਂ ਕਿ ਤੂੜੀ (ਫਸਲਾਂ ਦੀ ਰਹਿੰਦ-ਖੂੰਹਦ) ਤੋਂ ਪੈਦਾ ਹੁੰਦਾ ਹੈ, ਜੋ ਪਰਾਲੀ ਸਾੜਨ ਦੀ ਸਮੱਸਿਆ ਦਾ ਹੱਲ ਪ੍ਰਦਾਨ ਕਰਦਾ ਹੈ।
Read Also : ਪੰਜਾਬ ਸਰਕਾਰ ਨੇ ਗੈਰ-ਕਾਨੂੰਨੀ ਮਾਈਨਿੰਗ ‘ਤੇ ਰੋਕ ਲਾਉਣ ਲਈ ਮਾਈਨਿੰਗ ਸੈਕਟਰ ‘ਚ ਕੀਤੇ ਸੁਧਾਰ
