Faridkot Viral News: (ਗੁਰਪ੍ਰੀਤ ਪੱਕਾ) ਫ਼ਰੀਦਕੋਟ। ਅਮਰੀਕਾ ਸਮੇਤ ਵੱਖ-ਵੱਖ ਦੇਸ਼ਾਂ ਤੋਂ ਅਣ ਅਧਿਕਾਰਤ ਤੌਰ ’ਤੇ ਗਏ ਪੰਜਾਬ ਦੇ ਨੌਜਵਾਨ ਲੜਕੇ-ਲੜਕੀਆਂ ਨੂੰ ਵਾਪਸ ਭੇਜਣ ਅਤੇ ਸਰਕਾਰ ਵੱਲੋਂ ਅਣ ਅਧਿਕਾਰਤ ਏਜੰਟਾਂ ਖਿਲਾਫ ਵੱਡੇ ਪੱਧਰ ’ਤੇ ਕਾਰਵਾਈ ਕਰਨ ਦੇ ਬਾਵਜ਼ੂਦ ਵੀ ਭੋਲੇ-ਭਾਲੇ ਬੇਰੁਜ਼ਗਾਰ ਲੜਕੇ-ਲੜਕੀਆਂ ਨੂੰ ਵਿਦੇਸ਼ ਦਾ ਝਾਂਸਾ ਦੇ ਕੇ ਠੱਗੀਆਂ ਮਾਰਨ ਦਾ ਸਿਲਸਿਲਾ ਲਗਾਤਾਰ ਜਾਰੀ ਹੈ। ਨੇੜਲੇ ਪਿੰਡ ਪੰਜਗਰਾਈਂ ਕਲਾਂ ਦੀ ਨੌਜਵਾਨ ਲੜਕੀ ਕਰਮਜੀਤ ਕੌਰ ਨੇ ਆਪਣੇ ਦੁੱਖਾਂ ਦੀ ਦਾਸਤਾਨ ਬਿਆਨ ਕਰਦਿਆਂ ਭਾਵੁਕਤਾ ਵਾਲੇ ਮਾਹੌਲ ਵਿੱਚ ਦੱਸਿਆ ਕਿ ਜੇਕਰ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਉਸ ਲਈ ਮਸੀਹਾ ਬਣ ਕੇ ਨਾ ਆਉਂਦੇ ਤਾਂ ਮੈਂ ਆਪਣੀ ਜਿੰਦਗੀ ਤੋਂ ਹੱਥ ਧੋ ਬੈਠਦੀ ਭਾਵ ਖੁਦਕੁਸ਼ੀ ਕਰਨ ਲਈ ਮਜ਼ਬੂਰ ਸੀ।
ਇਹ ਵੀ ਪੜ੍ਹੋ: National Highway News: ਮੁੱਖ ਹਾਈਵੇਅ ਬੰਦ! ਪੰਜਾਬ ’ਚ ਲੱਗਿਆ ਲੰਬਾ ਟ੍ਰੈਫਿਕ ਜਾਮ, ਸਫਰ ਤੋਂ ਪਹਿਲਾਂ ਪੜ੍ਹੋ ਇਹ ਖਬਰ..
ਕਰਮਜੀਤ ਕੌਰ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਮੋਗਾ ਜ਼ਿਲੇ ਦੇ ਪਿੰਡ ਜਲਾਲਾਬਾਦ ਦੀ ਵਸਨੀਕ ਏਜੰਟ ਔਰਤ ਅਮਰਜੀਤ ਕੌਰ ਨੇ 15 ਹਜ਼ਾਰ ਰੁਪਏ ਵਸੂਲ ਕੇ ਉਸਨੂੰ ‘ਮਸਕਟ’ ਵਿਖੇ ਟੂਰਿਸਟ ਵੀਜੇ ’ਤੇ ਇਸ ਸ਼ਰਤ ਨਾਲ ਭੇਜਿਆ ਕਿ ਜੇਕਰ ਉੱਥੇ ਕੰਮ ਪਸੰਦ ਨਾ ਆਵੇ ਤਾਂ ਉਹ ਵਾਪਸ ਆ ਸਕਦੀ ਹੈ। ਉੱਥੇ ਉਸ ਦਾ ਪਾਸਪੋਰਟ ਅਤੇ ਮੋਬਾਇਲ ਫੋਨ ਕਬਜ਼ੇ ਵਿੱਚ ਲੈ ਲਿਆ ਗਿਆ, ਠੱਗੀ ਦੇ ਇਸ ਰੈਕਟ ਉਪਰੋਂ ਪਰਦਾ ਉਦੋਂ ਉਠਿਆ ਜਦੋਂ ਖੁਦ ਦੇਖਿਆ ਕਿ ਇਕ-ਇਕ ਕਮਰੇ ਵਿੱਚ 30-30 ਲੜਕੀਆਂ ਰਾਤ ਕੱਟਣ ਲਈ ਮਜ਼ਬੂਰ ਹਨ, ਜੋ ਬੇਵੱਸੀ ਕਾਰਨ ਕਈ ਵਾਰ ਭੁੱਖੇ ਪਿਆਸੇ ਰਾਤ ਕੱਟਦੀਆਂ ਹਨ, ਉਥੇ ਨੌਕਰੀ ਜਾਂ ਦਿਹਾੜੀ ਮਜ਼ਦੂਰੀ ਲਈ ਖੁਦ ਨੂੰ ਮੁਸਲਮਾਨ ਜਾਂ ਈਸਾਈ ਅਖਵਾਉਣਾ ਪੈਂਦਾ ਹੈ ਅਤੇ ਮਾਪਿਆਂ ਨਾਲ ਫੋਨ ਰਾਹੀਂ ਗੱਲਬਾਤ ਕਰਵਾਉਣ ਮੌਕੇ ਉੱਪਰ ਖੜਦੀ ਪੂਰੀ ਟੀਮ ਵੱਲੋਂ ਨਿਗਰਾਨੀ ਰੱਖੀ ਜਾਂਦੀ ਹੈ।
ਲੜਕੀਆਂ ਨੂੰ ਗੁਲਾਮ ਬਣਾ ਕੇ ਅੱਗੇ ਵੇਚ ਦਿੱਤਾ ਜਾਂਦਾ ਸੀ
‘ਸਿਰਫ ਅਸੀਂ ਇੱਥੇ ਸੌਖੇ ਹਾਂ ਅਤੇ ਵਧੀਆ ਨੌਕਰੀ ਕਰ ਰਹੇ ਹਾਂ’, ਆਦਿ ਹੀ ਆਖਣ ਦੀ ਇਜ਼ਾਜਤ ਸੀ। ਕਰਮਜੀਤ ਕੌਰ ਨੇ ਅੱਖਾਂ ਵਿੱਚੋਂ ਅੱਥਰੂ ਕੇਰਦਿਆਂ ਆਖਿਆ ਕਿ ਪੰਜਾਬ ਤੋਂ ਇਲਾਵਾ ਦੇਸ਼ ਦੇ ਕਈ ਰਾਜਾਂ ਦੀਆਂ ਲੜਕੀਆਂ ਨੂੰ ਗੁੰਮਰਾਹ ਕਰਕੇ ‘ਮਸਕਟ’ ਵਰਗੇ ਮੁਲਕਾਂ ਵਿੱਚ ਭੇਜਿਆ ਜਾਂਦਾ ਹੈ ਤੇ ਫਿਰ ਉਨ੍ਹਾਂ ਨੂੰ ਗੁਲਾਮ ਬਣਾ ਕੇ ਮਰਜ਼ੀ ਦਾ ਕੰਮ ਕਰਵਾਉਣ ਦੇ ਨਾਲ-ਨਾਲ ਕਈ ਲੜਕੀਆਂ ਨੂੰ ਵੇਚ ਵੀ ਦਿੱਤਾ ਜਾਂਦਾ ਹੈ ਤੇ ਮਾਪਿਆਂ ਨੂੰ ਆਪਣੀਆਂ ਧੀਆਂ ਦੀ ਕੋਈ ਉੱਘ-ਸੁੱਘ ਨਹੀਂ ਲੱਗਦੀ। Faridkot Viral News
ਕਰਮਜੀਤ ਕੌਰ ਨੇ ਦੱਸਿਆ ਕਿ ਏਜੰਟ ਵੱਲੋਂ ਹੋਲੀ-ਹੋਲੀ ਇੱਕ ਲੱਖ ਰੁਪਿਆ ਉਸ ਕੋਲੋਂ ਵਸੂਲਿਆ ਗਿਆ, ਸਾਰੀ ਰਕਮ ਪੰਜਾਬ ਦੇ ਹੀ ਬੈਂਕ ਖਾਤਿਆਂ ਵਿੱਚ ਪੁਆਈ ਗਈ। ਕਰਮਜੀਤ ਕੌਰ ਨੇ ਖਦਸ਼ਾ ਪ੍ਰਗਟਾਇਆ ਕਿ ਉਸ ਦੇ ਦਸਤਖਤਾਂ ਵਾਲੇ ਖਾਲੀ ਚੈੱਕ ਅਜੇ ਵੀ ਟ੍ਰੈਵਲ ਏਜੰਟ ਕੋਲ ਹਨ, ਜਿਸਦੀ ਟ੍ਰੈਵਲ ਏਜੰਟ ਵੱਲੋਂ ਦੁਰਵਰਤੋਂ ਕੀਤੀ ਜਾ ਸਕਦੀ ਹੈ। ਕਰਮਜੀਤ ਕੌਰ ਮੁਤਾਬਿਕ ਉਸ ਨੇ ਟੀਮ ਤੋਂ ਚੋਰੀ ਸਪੀਕਰ ਸੰਧਵਾਂ ਨੂੰ ਫੋਨ ਕੀਤਾ ਅਤੇ ਸਪੀਕਰ ਕੁਲਤਾਰ ਸਿੰਘ ਸੰਧਵਾਂ ਨੇ ਮੋਗਾ ਦੇ ਡੀ.ਐਸ.ਪੀ. ਨੂੰ ਫੋਨ ਕੀਤਾ, ਜਿਸ ਕਰਕੇ ਉਸ ਦੇ ਵਾਪਸ ਪਰਤਣ ਦੀ ਆਸ ਬੱਝੀ, ਟਿਕਟ ਸਮੇਤ ਸਾਰਾ ਖਰਚਾ ਸਪੀਕਰ ਸੰਧਵਾਂ ਵੱਲੋਂ ਕੀਤਾ ਗਿਆ, ਜਿਸ ਬਦਲੇ ਉਸ ਦਾ ਸਾਰਾ ਪਰਿਵਾਰ ਸਪੀਕਰ ਸੰਧਵਾਂ ਦਾ ਹਮੇਸ਼ਾ ਰਿਣੀ ਰਹੇਗਾ। Faridkot Viral News
