(ਏਜੰਸੀ) ਅਹਿਮਦਾਬਾਦ। DC Vs GT ਇੰਡੀਅਨ ਪ੍ਰੀਮੀਅਰ ਲੀਗ IPL-2024 ਦੇ 32ਵੇਂ ਮੈਚ ਵਿੱਚ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ‘ਚ ਅੱਜ ਗੁਜਰਾਤ ਟਾਈਟਨਸ ਦਾ ਸਾਹਮਣਾ ਦਿੱਲੀ ਕੈਪੀਟਲਜ਼ ਨਾਲ ਹੋਵੇਗਾ। ਇਹ ਮੈਚ ਸ਼ਾਮ 7:30 ਵਜੇ ਤੋਂ ਖੇਡਿਆ ਜਾਵੇਗਾ। ਟਾਸ ਸ਼ਾਮ 7 ਵਜੇ ਹੋਵੇਗਾ। ਦੋਵੇਂ ਟੀਮਾਂ ਇਸ ਮੈਚ ’ਚ ਬਿਹਤਰ ਪ੍ਰਦਰਸ਼ਨ ਕਰਨ ਤੇ ਇੱਕ-ਦੂਜੇ ਨੂੰ ਹਰਾਉਣ ਦੇ ਇਰਾਦੇ ਨਾਲ ਮੈਦਾਨ ’ਚ ਉੱਤਰਨਗੀਆਂ।
ਗੁਜਰਾਤ ਟਾਈਟਨਸ ਕੋਲ ਵਾਪਸੀ ਕਰਨ ਦਾ ਮੌਕਾ (DC Vs GT)
ਪਿਛਲੇ ਦੋ ਗੇੜਾਂ ਵਾਂਗ ਗੁਜਰਾਤ ਟਾਈਟਨਸ ਅਜੇ ਤੱਕ ਵਧੀਆ ਪ੍ਰਦਰਸ਼ਨ ਨਹੀਂ ਕਰ ਸਕੀ ਹੈ, ਹਾਲਾਂਕਿ ਉਨ੍ਹਾਂ ਕੋਲ ਆਪਣੀਆਂ ਕਮੀਆਂ ਨੂੰ ਦੂਰ ਕਰਨ ਲਈ ਅਜੇ ਕਾਫੀ ਸਮਾਂ ਹੈ। ਗੁਜਰਾਤ ਟਾਈਟਨਜ਼ ਨੇ 10 ਅਪਰੈਲ ਨੂੰ ਟੇਬਲ ’ਤੇ ਚੋਟੀ ’ਤੇ ਰਹਿਣ ਵਾਲੀ ਰਾਜਸਥਾਨ ਰਾਇਲਜ਼ ਖਿਲਾਫ ਆਖਰੀ ਗੇਂਦ ’ਤੇ ਜਿੱਤ ਦਰਜ ਕੀਤੀ ਸੀ ਅਤੇ ਜੇਕਰ ਉਹ ਆਪਣੀ ਮੁਹਿੰਮ ਨੂੰ ਮੁੜ-ਸੁਰਜੀਤ ਕਰਨਾ ਚਾਹੁੰਦੇ ਹਨ ਤਾਂ ਉਸ ਨੂੰ ਅਜਿਹਾ ਹੀ ਪ੍ਰਦਰਸ਼ਨ ਕਰਨਾ ਹੋਵੇਗਾ। ਟੀਮ ਨੇ ਆਪਣੇ ਪਹਿਲੇ ਛੇ ਮੈਚਾਂ ’ਚੋਂ ਸਿਰਫ਼ ਤਿੰਨ ਹੀ ਜਿੱਤੇ ਹਨ ਅਤੇ ਅੱਠ ਮੈਚ ਬਾਕੀ ਹਨ।
ਸ਼ੁਭਮਨ ਗਿੱਲ ਦੀ ਅਗਵਾਈ ਵਾਲੀ ਟੀਮ ਕੋਲ ਚੀਜ਼ਾਂ ਨੂੰ ਮੋੜਨ ਲਈ ਕਾਫ਼ੀ ਸਮਾਂ ਹੈ। ਗੇਂਦਬਾਜ਼ ਉਮੇਸ਼ ਯਾਦਵ ਨੇ ਹੁਣ ਤੱਕ ਸੱਤ ਵਿਕਟਾਂ ਲਈਆਂ ਹਨ ਪਰ ਉਸ ਨੇ ਪ੍ਰਤੀ ਓਵਰ 10 ਤੋਂ ਵੱਧ ਦੌੜਾਂ ਦਿੱਤੀਆਂ ਹਨ। ਉਸ ਦੇ ਨਵੇਂ ਗੇਂਦਬਾਜ਼ ਸਪੈਂਸਰ ਜੌਹਨਸਨ ਅਤੇ ਤਜ਼ਰਬੇਕਾਰ ਮੋਹਿਤ ਸ਼ਰਮਾ ਵੀ ਆਪਣੀਆਂ ਆਰਥਿਕ ਦਰਾਂ ਨੂੰ ਸੁਧਾਰ ਸਕਦੇ ਹਨ। ਸਟਾਰ ਸਪਿੱਨਰ ਰਾਸ਼ਿਦ ਖਾਨ ਨੇ ਆਪਣੀ ਬਿਹਤਰੀਨ ਗੇਂਦਬਾਜ਼ੀ ਕੀਤੀ ਹੈ ਪਰ ਉਹ ਆਪਣੇ ਖਾਤੇ ’ਚ ਹੋਰ ਵਿਕਟਾਂ ਜੋੜਨਾ ਚਾਹੇਗਾ। DC Vs GT
ਦਿੱਲੀ ਕੈਪੀਟਲਸ ਕੋਲ ਕਮੀਆਂ ਸੁਧਾਰਨ ਦਾ ਮੌਕਾ
ਦਿੱਲੀ ਕੈਪੀਟਲਸ ਦੀ ਗੱਲ ਕਰੀਏ ਤਾਂ ਟੀਮ ਹੁਣ ਤੱਕ ਫਾਰਮ ਅਤੇ ਫਿਟਨੈੱਸ ਮੁੱਦਿਆਂ ਕਾਰਨ ਆਪਣੇ ਸਰਵੋਤਮ ਪਲੇਇੰਗ ਇਲੈਵਨ ਨੂੰ ਮੈਦਾਨ ’ਚ ਉਤਾਰਨ ’ਚ ਨਾਕਾਮ ਰਹੀ ਹੈ। ਲਖਨਊ ਸੁਪਰ ਜਾਇੰਟਸ ’ਤੇ ਜਿੱਤ ਨੇ ਟੀਮ ਦਾ ਹੌਸਲਾ ਵਧਾਇਆ। ਪਰ ਜੇਕਰ ਉਹ ਪਲੇਆਫ ’ਚ ਜਗ੍ਹਾ ਬਣਾਉਣ ਦੀ ਦੌੜ ’ਚ ਖੁਦ ਨੂੰ ਬਰਕਰਾਰ ਰੱਖਣਾ ਚਾਹੁੰਦੇ ਹਨ ਤਾਂ ਉਨ੍ਹਾਂ ਨੂੰ ਆਪਣੀਆਂ ਕਮੀਆਂ ਨੂੰ ਸੁਧਾਰਨਾ ਹੋਵੇਗਾ ਅਤੇ ਮੈਚ ਜਿੱਤਣੇ ਹੋਣਗੇ।
ਫਿੱਟ ਹੋ ਕੇ ਪਰਤੇ ਕੁਲਦੀਪ ਯਾਦਵ ਦੀ ਮੌਜ਼ੂਦਗੀ ਨੇ ਵੱਡਾ ਬਦਲਾਅ ਕੀਤਾ। ਇਸ ਗੇਂਦਬਾਜ਼ ਨੇ ਤਿੰਨ ਵਿਕਟਾਂ ਲੈ ਕੇ ਲਖਨਊ ਸੁਪਰ ਜਾਇੰਟਸ ਦੀ ਬੱਲੇਬਾਜ਼ੀ ’ਤੇ ਰੋਕ ਲਾ ਦਿੱਤੀ। ਗੁਜਰਾਤ ਟਾਇਟਨਸ ਲਈ ਉਸ ਦਾ ਸਾਹਮਣਾ ਕਰਨਾ ਮੁਸ਼ਕਲ ਹੋ ਸਕਦਾ ਹੈ, ਖਾਸ ਕਰਕੇ ਉਸ ਦੀ ਗੁਗਲੀ। ਦਿੱਲੀ ਕੈਪੀਟਲਜ਼ ਨੂੰ ਜੈਕ ਫਰੇਜ਼ਰ ਮੈਕਗਰਕ ਦੇ ਨਾਲ ਤੀਜੇ ਨੰਬਰ ’ਤੇ ਚੰਗਾ ਖਿਡਾਰੀ ਮਿਲਿਆ ਹੈ ਅਤੇ ਟੀਮ ਨੂੰ ਉਮੀਦ ਹੋਵੇਗੀ ਕਿ ਇਹ ਅਸਟਰੇਲਿਆਈ ਆਪਣੇ ਪਹਿਲੇ ਆਈਪੀਐੱਲ ਮੈਚ ਦੀ ਸਫਲਤਾ ਦੇ ਆਧਾਰ ’ਤੇ ਅੱਗੇ ਵਧੇਗਾ। ਮੁਕੇਸ਼ ਕੁਮਾਰ ਨੇ ਪੰਜ ਮੈਚਾਂ ’ਚ ਪ੍ਰਤੀ ਓਵਰ 10 ਦੌੜਾਂ ਦਿੱਤੀਆਂ ਹਨ ਅਤੇ ਉਹ ਲਖਨਊ ਖਿਲਾਫ ਮੈਚ ਵਿੱਚ ਪ੍ਰਦਰਸ਼ਨ ਠੀਕ-ਠਕਾ ਰਿਹਾ ਸੀ। ਟੀਮ ਲਈ ਸਭ ਤੋਂ ਸਕਾਰਾਤਮਕ ਗੱਲ ਕਪਤਾਨ ਰਿਸ਼ਭ ਪੰਤ ਦੀ ਬੱਲੇਬਾਜ਼ੀ ਰਹੀ ਹੈ ਜੋ ਹਰ ਮੈਚ ਨਾਲ ਬਿਹਤਰ ਹੁੰਦੀ ਜਾ ਰਹੀ ਹੈ।
