ਤੇਜਧਾਰ ਹਥਿਆਰਾਂ ਦੀ ਨੋਕ ‘ਤੇ ਲੁਟੇਰਿਆ ਲੱਖਾਂ ਦੀ ਲੁੱਟ ਦੀ ਘਟਨਾ ਨੂੰ ਦਿੱਤਾ ਅੰਜਾਮ
ਨਾਭਾ (ਤਰੁਣ ਕੁਮਾਰ ਸ਼ਰਮਾ)। ਸਥਾਨਕ ਸਰਕੂਲਰ ਰੋਡ ‘ਤੇ ਸਥਿਤ ਭਾਰਤ ਗੈਸ ਏਜੰਸੀ (Gas Agency) ਵਿਖੇ ਅਣਪਛਾਤੇ ਲੁਟੇਰਿਆ ਨੇ ਲੱਖਾਂ ਦੀ ਲੁੱਟ ਕਰ ਲਈ। ਘਟਨਾ ਬੀਤੀ ਦੇਰ ਸ਼ਾਮ ਦੀ ਹੈ ਜਦੋਂ ਸਥਾਨਕ ਸਰਕੂਲਰ ਰੋਡ ‘ਤੇ ਸਥਿਤ ਦਾਸ ਭਾਰਤ ਗੈਸ ਏਜੰਸੀ ਨਾਮੀ ਗੈਸ ਏਜੰਸੀ ਦੇ ਦਫਤਰ ਵਿਖੇ ਏਜੰਸੀ ਮਾਲਕ ਕੇਵਲ ਦਾਸ ਆਪਣਾ ਕੰਮ ਨਿਬੇੜ ਰਹੇ ਸਨ ਤਾਂ ਅਚਾਨਕ ਦੋ ਨੌਜਵਾਨ ਉਨ੍ਹਾਂ ਦੇ ਦਫਤਰ ‘ਚ ਦਾਖਲ ਹੋਏ। ਲੁਟੇਰਿਆ ਨੇ ਏਜੰਸੀ ਮਾਲਕ ਨੂੰ ਮਾਰੂ ਹਥਿਆਰ ਦਿਖਾ ਕੇ ਡਰਾਇਆ ਅਤੇ ਗੱਲੇ ‘ਚ ਪਏ ਲੱਖਾਂ ਰੁਪਏ ਲੈ ਕੇ ਫਰਾਰ ਹੋ ਗਏ।
ਪੁਸ਼ਟੀ ਕਰਦਿਆਂ ਗੈਸ ਏਜੰਸੀ (Gas Agency) ਮਾਲਕ ਕੇਵਲ ਦਾਸ ਨੇ ਦੱਸਿਆ ਕਿ ਉਹ ਆਪਣੇ ਦਫਤਰ ਵਿਖੇ 09 ਵਜੇ ਤੱਕ ਕੰਮ ਕਰਦੇ ਹਨ। ਸਟਾਫ ਜਾ ਚੁੱਕਾ ਸੀ ਅਤੇ ਉਹ ਵੀ ਚੱਲਣ ਦੀ ਤਿਆਰੀ ‘ਚ ਸਨ ਕਿ ਅਚਾਨਕ 8.30 ਦੇ ਕਰੀਬ ਦੋ ਵਿਅਕਤੀਆਂ (ਜਿਨਾਂ ਆਪਣੇ ਮੂੰਹ ਕੱਪੜਿਆਂ ਬੰਨੇ ਹੋਏ ਸਨ) ਨੇ ਆ ਕੇ ਮਾਰੂ ਹਥਿਆਰ ਦਿਖਾਏ ਅਤੇ ਨਕਦੀ ਦੀ ਮੰਗ ਕੀਤੀ। ਲੁਟੇਰਿਆ ਨੇ ਗੱਲੇ ‘ਚ ਪਏ ਸਾਰੀ ਨਕਦੀ ਲੁੱਟ ਲਈ ਅਤੇ ਫਰਾਰ ਹੋ ਗਏ। ਉਨ੍ਹਾਂ ਦੱਸਿਆ ਕਿ ਲੁਟੇਰਿਆ ਦੇ ਖੋਫ ‘ਚੋ ਨਿਕਲ ਉਨ੍ਹਾਂ ਤੁਰੰਤ ਨਾਭਾ ਪੁਲਿਸ ਨੂੰ ਇਸ ਦੀ ਜਾਣਕਾਰੀ ਦਿੱਤੀ। ਨਾਭਾ ਪੁਲਿਸ ਦੇ ਇੰਸ. ਹੈਰੀ ਬੋਪਾਰਾਏ ਅਤੇ ਹੋਰ ਉੱਚ ਅਧਿਕਾਰੀਆਂ ਨੇ ਮੌਕੇ ਦਾ ਮੁਆਇਨਾ ਕੀਤਾ ਅਤੇ ਤੇਜੀ ਨਾਲ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਖਬਰ ਲਿਖੇ ਜਾਣ ਤੱਕ ਨਾਭਾ ਪੁਲਿਸ ਅਤੇ ਗੈਸ ਏਜੰਸੀ ਮਾਲਕ ਦੋਨੋਂ ਆਸ-ਪਾਸ ਦੇ ਸੀਸੀਟੀਵੀ ਖੰਗਾਲ ਰਹੇ ਸਨ।
