ਪੰਜਾਬ ’ਚ ਸਿਰਫ਼ 42 ਨੌਜਵਾਨ ਹੀ ਬੇਰੁਜ਼ਗਾਰ, ਕੈਪਟਨ ਸਰਕਾਰ ਦੇ ਹੈਰਾਨ ਕਰਨ ਵਾਲੇ ਸਰਕਾਰੀ ਅੰਕੜੇ 

ਅਸ਼ਵਨੀ ਚਾਵਲਾ, ਚੰਡੀਗੜ੍ਹ। ਪੰਜਾਬ ਦੀਆਂ ਸੜਕਾਂ ’ਤੇ ਰੋਜ਼ਾਨਾ ਪੁਲਿਸ ਤੋਂ ਡਾਂਗਾਂ ਖਾਣਾ ਵਾਲੇ ਨੌਜਵਾਨ ਸ਼ਾਇਦ ਕਿਸੇ ਗਲਤ ਫਹਿਮੀ ਦਾ ਸ਼ਿਕਾਰ ਹੋ ਗਏ ਹਨ ਕਿ ਉਹ ਬੇਰੁਜ਼ਗਾਰ ਹਨ ਅਤੇ ਸਰਕਾਰ ਤੋਂ ਨੌਕਰੀ ਮੰਗਣ ਲਈ ਰੋਜ਼ਾਨਾ ਉਨਾਂ ਨੂੰ ਡਾਂਗਾਂ ਖਾਣੀ ਪੈ ਰਹੀਆਂ ਹਨ, ਕਿਉਂਕਿ ਪੰਜਾਬ ਸਰਕਾਰ ਦੇ ਆਕੜੀਆਂ ਵਿੱਚ ਸਿਰਫ 42 ਹੀ ਪੰਜਾਬ ਵਿੱਚ ਬੇਰੁਜ਼ਗਾਰ ਨੌਜਵਾਨ ਬਚੇ ਹਨ, ਬਾਕੀਆਂ ਸਾਰੇ ਪੰਜਾਬ ਦੇ ਨੌਜਵਾਨਾਂ ਨੂੰ ਰੁਜ਼ਗਾਰ ਮਿਲ ਚੁੱਕਿਆ ਹੈ ਤਾਂ ਹੀ ਪੰਜਾਬ ਸਰਕਾਰ ਹਰ ਮਹੀਨੇ 42 ਨੌਜਵਾਨਾ ਨੂੰ ਬੇਰੁਜ਼ਗਾਰੀ ਭੱਤਾ ਦੇ ਰਹੀ ਹੈ। ਇਨਾਂ 42 ਬੇਰੁਜ਼ਗਾਰ ਨੌਜਵਾਨਾਂ ਦੀ ਵੀ ਲਾਟਰੀ ਲੱਗੀ ਹੋਈ ਹੈ ਕਿਉਂਕਿ ਕੋਈ ਥੋੜਾ ਮੋਟਾ ਨਹੀਂ ਸਗੋਂ ਸਰਕਾਰ ਵਲੋਂ ਲਗਭਗ 106 ਰੁਪਏ ਪ੍ਰਤੀ ਮਹੀਨਾ ਦਿੱਤਾ ਜਾ ਰਿਹਾ ਹੈ। ਇਹ 106 ਰੁਪਏ ਇਨਾਂ ਬੇਰੁਜ਼ਗਾਰ ਨੌਜਵਾਨਾਂ ਦੀ ਹਰ ਜਰੂਰਤ ਨੂੰ ਪੂਰਾ ਵੀ ਕਰ ਰਹੇ ਹੋਣਗੇ, ਕਿਉਂਕਿ 106 ਰੁਪਏ ਕਾਫ਼ੀ ਵੱਡੀ ਰਕਮ ਹੁੰਦੀ ਹੈ।

ਪੰਜਾਬ ਸਰਕਾਰ ਵਲੋਂ ਵਿੱਤੀ ਸਾਲ 2019-20 ਵਿੱਚ 42 ਬੇਰੁਜ਼ਗਾਰਾਂ ਨੂੰ ਕੁਲ 53 ਹਜ਼ਾਰ 550 ਰੁਪਏ ਬੇਰੁਜ਼ਗਾਰੀ ਭੱਤਾ ਦਿੱਤਾ ਗਿਆ ਹੈ, ਜਿਸ ਅਨੁਸਾਰ 1 ਸਾਲ ਦੌਰਾਨ ਇੱਕ ਬੇਰੁਜ਼ਗਾਰ ਨੂੰ 1275 ਰੁਪਏ ਮਿਲੇ ਅਤੇ 1 ਮਹੀਨੇ ਵਿੱਚ ਇਹ ਰਕਮ 106 ਰੁਪਏ 25 ਪੈਸੇ ਬਣਦੀ ਹੈ। ਇਥੇ ਹੀ ਖਾਸ ਗਲ ਇਹ ਹੈ ਕਿ ਸੱਤਾ ਵਿੱਚ ਆਉਣ ਤੋਂ ਪਹਿਲਾਂ ਪੰਜਾਬ ਵਿੱਚ 40 ਲੱਖ ਨੌਜਵਾਨ ਬੇਰੁਜ਼ਗਾਰ ਹੋਣ ਦਾ ਦਾਅਵਾ ਕਰਨ ਵਾਲੀ ਕਾਂਗਰਸ ਨੂੰ ਸੱਤਾ ਸੰਭਾਲਦੇ ਹੀ ਸਿਰਫ਼ 212 ਬੇਰੁਜ਼ਗਾਰ ਹੀ ਮਿਲੇ ਸਨ, ਜਿਸ ਕਾਰਨ ਅਮਰਿੰਦਰ ਸਿੰਘ ਦੀ ਸਰਕਾਰ ਨੇ ਸੱਤਾ ਸੰਭਾਲਣ ਤੋਂ ਬਾਅਦ ਸਾਲ 2017-18 ਵਿੱਚ 212 ਬੇਰੁਜ਼ਗਾਰਾਂ ਨੂੰ ਹਰ ਮਹੀਨੇ ਭੱਤਾ ਦਿੱਤਾ ਗਿਆ ਹੈ, ਜਿਸ ਤੋਂ ਬਾਅਦ ਇਹ ਬੇਰੁਜ਼ਗਾਰ ਲਗਾਤਾਰ ਘਟਦੇ ਹੀ ਜਾ ਰਹੇ ਹਨ।

ਸਾਲ 2017-18 ਵਿੱਚ ਮਿਲਣ ਵਾਲੇ 212 ਬੇਰੁਜ਼ਗਾਰ ਅਗਲੇ ਸਾਲ 2018-19 ਵਿੱਚ ਸਿਰਫ਼ 97 ਰਹਿ ਗਏ ਅਤੇ ਇਸ ਤੋਂ ਬਾਅਦ ਹੁਣ ਇਹ ਬੇਰੁਜ਼ਗਾਰ 42 ਰਹਿ ਗਏ ਹਨ। ਜਿਨਾਂ ਨੂੰ ਕਿ ਬੀਤੇ ਸਾਲ 2019-20 ਵਿੱਚ ਸਰਕਾਰ ਵਲੋਂ ਬੇਰੁਜ਼ਗਾਰੀ ਭੱਤਾ ਦਿੱਤਾ ਗਿਆ ਹੈ। ਅਮਰਿੰਦਰ ਸਿੰਘ ਦੀ ਸਰਕਾਰ ਵਿੱਚ ਬੇਰੁਜ਼ਗਾਰੀ ਭੱਤਾ ਲੈਣ ਵਾਲੇ ਇਹ ਅੰਕੜੇ ਖ਼ੁਦ ਸਰਕਾਰ ਦੇ ਹੀ ਇੱਕ ਅਧਿਕਾਰੀ ਵਲੋਂ ਸੂਚਨਾ ਅਧਿਕਾਰ ਐਕਟ ਦੇ ਤਹਿਤ ਜਾਰੀ ਕੀਤੇ ਗਏ ਹਨ, ਜਿਸ ਤੋਂ ਸਾਫ਼ ਹੁੰਦਾ ਹੈ ਕਿ ਪੰਜਾਬ ਦੀ ਕਾਂਗਰਸ ਸਰਕਾਰ ਵਲੋਂ ਦਾਅਵੇ ਕੁਝ ਹੋਰ ਕੀਤੇ ਜਾ ਰਹੇ ਸਨ ਅਤੇ ਅਸਲ ਵਿੱਚ ਸਚਾਈ ਕੁਝ ਹੋਰ ਹੀ ਹੈ।