Immigration Bill: ਅਸੀਂ ਦੇਸ਼ ਨੂੰ ਨੁਕਸਾਨ ਪਹੁੰਚਾਉਣ ਦਾ ਇਰਾਦਾ ਰੱਖਣ ਵਾਲਿਆਂ ਨਾਲ ਸਖ਼ਤੀ ਨਾਲ ਪੇਸ਼ ਆਵਾਂਗੇ : ਗ੍ਰਹਿ ਮੰਤਰੀ ਸ਼ਾਹ
- ਕਿਹਾ, ਵਿਦੇਸ਼ੀਆਂ ਦੀ ਪੂਰੀ ਜਾਣਕਾਰੀ ਲਈ ਨੀਤੀ ਬਣਾਈ ਜਾਵੇਗੀ : Immigration Bill
Immigration Bill: ਨਵੀਂ ਦਿੱਲੀ (ਏਜੰਸੀ) ਇੰਮੀਗ੍ਰੇਸ਼ਨ ਬਿੱਲ, 2025 ਵੀਰਵਾਰ ਨੂੰ ਲੋਕ ਸਭਾ ਵਿੱਚ ਪਾਸ ਹੋ ਗਿਆ। ਬਿੱਲ ’ਤੇ ਚਰਚਾ ਦਾ ਜਵਾਬ ਦਿੰਦੇ ਹੋਏ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਕਿਹਾ ਕਿ ਭਾਵੇਂ ਰੋਹਿੰਗਿਆ ਹੋਵੇ ਜਾਂ ਬੰਗਲਾਦੇਸ਼ੀ, ਜੇਕਰ ਉਹ ਭਾਰਤ ਨੂੰ ਨੁਕਸਾਨ ਪਹੁੰਚਾਉਣ ਦੀ ਮਾਨਸਿਕਤਾ ਨਾਲ ਆਉਂਦੇ ਹਨ, ਤਾਂ ਉਨ੍ਹਾਂ ਨਾਲ ਸਖ਼ਤੀ ਨਾਲ ਨਜਿੱਠਿਆ ਜਾਵੇਗਾ। ਜੇਕਰ ਕੋਈ ਯੋਗਦਾਨ ਪਾਉਣ ਲਈ ਅੱਗੇ ਆਉਂਦਾ ਹੈ, ਤਾਂ ਉਸ ਦਾ ਸੁਆਗਤ ਹੈ। ਇਸ ਨੀਤੀ ਲਈ ਉਦਾਰਤਾ ਅਤੇ ਸਖ਼ਤੀ ਦੋਵਾਂ ਦੀ ਲੋੜ ਹੈ।
Read Also : ਪੰਜਾਬ ਵਿੱਚ 341 ਬੱਚਿਆਂ ਨੂੰ ਮੁਫ਼ਤ ਦਿਲ ਦੀਆਂ ਸਰਜਰੀਆਂ ਨਾਲ ਦਿੱਤਾ ਨਵਾਂ ਜੀਵਨ
ਉਨ੍ਹਾਂ ਕਿਹਾ ਕਿ ਇਸ ਬਿੱਲ ਤਹਿਤ ਭਾਰਤ ਆਉਣ ਵਾਲੇ ਸਾਰੇ ਵਿਦੇਸ਼ੀ ਨਾਗਰਿਕਾਂ ਦੇ ਅਪਡੇਟ ਰੱਖੇ ਜਾਣਗੇ। ਉਹ ਕਿਸ ਪਾਸੇ ਤੋਂ ਆ ਰਹੇ ਹਨ? ਤੁਸੀਂ ਕਿੱਥੇ ਰਹਿ ਰਹੇ ਹੋ? ਕੀ ਕਰ ਰਹੇ ਹੋ, ਇਸ ਬਾਰੇ ਜਾਣਕਾਰੀ ਅੱਪਡੇਟ ਕੀਤੀ ਜਾਵੇਗੀ। ਦੱਸ ਦੇਈਏ ਕਿ ਇਹ ਬਿੱਲ 11 ਮਾਰਚ ਨੂੰ ਲੋਕ ਸਭਾ ਵਿੱਚ ਪੇਸ਼ ਕੀਤਾ ਗਿਆ ਸੀ। ਸੱਤਾਧਾਰੀ ਅਤੇ ਵਿਰੋਧੀ ਪਾਰਟੀਆਂ ਦੇ 30 ਸੰਸਦ ਮੈਂਬਰਾਂ ਨੇ ਇਸ ’ਤੇ ਆਪਣੇ ਵਿਚਾਰ ਪ੍ਰਗਟ ਕੀਤੇ।
Immigration Bill
ਸ਼ਾਹ ਨੇ ਕਿਹਾ ਕਿ 2005 ਵਿੱਚ ਪੰਜ ਦੇਸ਼ਾਂ ਨੂੰ ਆਨਲਾਈਨ ਟੂਰਿਸਟ ਵੀਜ਼ਾ ਜਾਰੀ ਕਰਨ ਦੀ ਸਹੂਲਤ ਸ਼ੁਰੂ ਕੀਤੀ ਗਈ ਸੀ। 2010 ਤੱਕ ਇਹ ਸੇਵਾ ਸੱਤ ਦੇਸ਼ਾਂ ਤੱਕ ਅਤੇ 2014 ਤੱਕ 10 ਦੇਸ਼ਾਂ ਤੱਕ ਵਧਾ ਦਿੱਤੀ ਗਈ ਸੀ। ਅਸੀਂ ਇਸ ਨੂੰ 169 ਦੇਸ਼ਾਂ ਵਿੱਚ ਫੈਲਾਉਣ ਦਾ ਕੰਮ ਕੀਤਾ ਹੈ। ਗ੍ਰਹਿ ਮੰਤਰੀ ਨੇ ਕਿਹਾ ਕਿ ਹੁਣ ਤੱਕ ਏਜੰਸੀਆਂ ਵਿਦੇਸ਼ੀਆਂ ਨੂੰ ਬਲੈਕ ਲਿਸਟ ਕਰਦੀਆਂ ਸਨ। ਇਸ ਦਾ ਕੋਈ ਤਰਕ ਨਹੀਂ ਸੀ। ਇਮੀਗ੍ਰੇਸ਼ਨ ਅਤੇ ਵਿਦੇਸ਼ੀ ਬਿੱਲ 2025 ਕਾਨੂੰਨ ਵਿੱਚ 36 ਧਾਰਾਵਾਂ ਹਨ।
ਇਸ ਵਿੱਚ ਪੂਰੀ ਪ੍ਰਕਿਰਿਆ ਨੂੰ ਕਾਨੂੰਨੀ ਰੂਪ ਦਿੱਤਾ ਗਿਆ ਹੈ। ਸਾਰੀਆਂ ਕਾਰਵਾਈਆਂ ਇਸ ਅਨੁਸਾਰ ਹੋਣਗੀਆਂ। ਸ਼ਾਹ ਨੇ ਕਿਹਾ ਕਿ ਸਾਡੀ ਸਰਹੱਦ ’ਤੇ ਕੁਝ ਸੰਵੇਦਨਸ਼ੀਲ ਥਾਵਾਂ ਹਨ, ਫੌਜ ਦੇ ਅੱਡੇ ਹਨ, ਉਨ੍ਹਾਂ ਨੂੰ ਪੂਰੀ ਦੁਨੀਆ ਲਈ ਖੁੱਲ੍ਹਾ ਨਹੀਂ ਛੱਡਿਆ ਜਾ ਸਕਦਾ। ਪਹਿਲਾਂ ਵੀ ਘੁਸਪੈਠੀਆਂ ਨੂੰ ਰੋਕਿਆ ਜਾਂਦਾ ਸੀ, ਪਰ ਉਦੋਂ ਕੋਈ ਨਿਯਮ ਨਹੀਂ ਸੀ। ਸਾਡੇ ਕੋਲ ਨਿਯਮ ਬਣਾ ਕੇ ਇਸ ਨੂੰ ਰੋਕਣ ਦੀ ਹਿੰਮਤ ਹੈ। ਪੂਰੀ ਪ੍ਰਣਾਲੀ ਨੂੰ ਵਿਗਿਆਨਕ ਢੰਗ ਨਾਲ ਇੱਕ ਕਾਨੂੰਨ ਵਿੱਚ ਬੰਨ੍ਹਣ ਦਾ ਕੰਮ ਕੀਤਾ ਗਿਆ ਹੈ।
ਇਹ ਵੀ ਕਿਹਾ
- ਵਿਦੇਸ਼ੀ ਯਾਤਰੀਆਂ ਦੀ ਸਹੂਲਤ ਲਈ 73% ਇਮੀਗ੍ਰੇਸ਼ਨ ਚੈੱਕਪੁਆਇੰਟ ਵਧਾਏ
- 2024 ’ਚ 8 ਕਰੋੜ 12 ਲੱਖ ਆਵਾਜਾਈ ਹੋਈ
- ਫਾਸਟੈਗ ਇਮੀਗ੍ਰੇਸ਼ਨ ਯਾਤਰੀ ਪ੍ਰੋਗਰਾਮ ਅੱਠ ਹਵਾਈ ਅੱਡਿਆਂ ’ਤੇ ਲਾਗੂ, ਜਿੱਥੇ ਯਾਤਰੀਆਂ ਦੀ ਜਾਂਚ 30 ਸਕਿੰਟ ਲਵੇਗੀ
ਅਮਿਤ ਸ਼ਾਹ ਵਿਰੁੱਧ ਵਿਸ਼ੇਸ਼ ਅਧਿਕਾਰ ਉਲੰਘਣਾ ਪ੍ਰਸਤਾਵ ਦਾ ਨੋਟਿਸ ਰੱਦ
ਨਵੀਂ ਦਿੱਲੀ ਰਾਜ ਸਭਾ ਦੇ ਸਭਾਪਤੀ ਜਗਦੀਪ ਧਨਖੜ ਨੇ ਵੀਰਵਾਰ ਨੂੰ ਕਾਂਗਰਸ ਦੇ ਮੁੱਖ ਵਿ੍ਹਪ ਜੈਰਾਮ ਰਮੇਸ਼ ਵੱਲੋਂ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਖ਼ਿਲਾਫ਼ ਵਿਸ਼ੇਸ਼ ਅਧਿਕਾਰ ਉਲੰਘਣਾ ਮਤੇ ਦੇ ਨੋਟਿਸ ਨੂੰ ਰੱਦ ਕਰ ਦਿੱਤਾ, ਇਹ ਕਹਿੰਦੇ ਹੋਏ ਕਿ ਇਹ ਬਦਨੀਤੀਪੂਰਨ, ਬਦਲਾਖੋਰੀ ਵਾਲਾ ਅਤੇ ਮੀਡੀਆ ਵਿੱਚ ਚਰਚਾ ਪੈਦਾ ਕਰਨ ਦਾ ਉਦੇਸ਼ ਸੀ। ਉਨ੍ਹਾਂ ਕਿਹਾ ਕਿ ਸਦਨ ਨੂੰ ਮੈਂਬਰਾਂ ਦੀ ਸਾਖ ਨੂੰ ਖਰਾਬ ਕਰਨ ਵਾਲਾ ਪਲੇਟਫਾਰਮ ਨਹੀਂ ਬਣਨ ਦਿੱਤਾ ਜਾਵੇਗਾ।
ਸਭਾਪਤੀ ਨੇ ਕਿਹਾ ਕਿ ਨੈਤਿਕਤਾ ਕਮੇਟੀ ਨੂੰ ਮੈਂਬਰਾਂ ਦੇ ਆਚਰਣ ਬਾਰੇ ਨਵੇਂ ਦਿਸ਼ਾ-ਨਿਰਦੇਸ਼ ਤਿਆਰ ਕਰਨ ਦੀ ਲੋੜ ਹੈ। ਇਸ ਤੋਂ ਇਲਾਵਾ ਉਨ੍ਹਾਂ ਕਿਹਾ ਕਿ ਭਾਰਤੀ ਜਨਤਾ ਪਾਰਟੀ ਦੇ ਘਨਸ਼ਿਆਮ ਤਿਵਾੜੀ ਨੂੰ ਨਵੇਂ ਦਿਸ਼ਾ-ਨਿਰਦੇਸ਼ ਤੈਅ ਕਰਨ ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ। ਧਨਖੜ ਨੇ ਕਿਹਾ ਕਿ ਰਮੇਸ਼ ਨੇ ਆਫ਼ਤ ਪ੍ਰਬੰਧਨ ਸੋਧ ਬਿੱਲ ’ਤੇ ਚਰਚਾ ਦੌਰਾਨ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਵੱਲੋਂ ਸ੍ਰੀਮਤੀ ਸੋਨੀਆ ਗਾਂਧੀ ਬਾਰੇ ਦਿੱਤੇ ਗਏ ਬਿਆਨ ’ਤੇ ਇਤਰਾਜ਼ ਜਤਾਇਆ ਹੈ ਅਤੇ ਇਸ ਸਬੰਧੀ ਵਿਸ਼ੇਸ਼ ਅਧਿਕਾਰ ਉਲੰਘਣਾ ਮਤੇ ਦਾ ਨੋਟਿਸ ਦਿੱਤਾ ਹੈ। ਸਭਾਪਤੀ ਨੇ ਕਿਹਾ ਕਿ ਇਹ ਨੋਟਿਸ ਮੀਡੀਆ ਵਿੱਚ ਉਪਲਬਧ ਹੈ।
Immigration Bill
ਇਹ ਸ਼ਾਹ ਦੇ ਅਕਸ ਨੂੰ ਖਰਾਬ ਕਰਨ, ਬਦਲਾ ਲੈਣ ਅਤੇ ਮੀਡੀਆ ਦਾ ਧਿਆਨ ਖਿੱਚਣ ਦਾ ਉਦੇਸ਼ ਜਾਪਦਾ ਹੈ। ਉਨ੍ਹਾਂ ਕਿਹਾ ਕਿ ਸ਼ਾਹ ਨੇ ਆਪਣੇ ਬਿਆਨ ਦੀ ਪੁਸ਼ਟੀ ਲਈ 24 ਜਨਵਰੀ, 1948 ਦੀ ਭਾਰਤ ਸਰਕਾਰ ਦੀ ਪ੍ਰੈਸ ਰਿਲੀਜ਼ ਮੇਜ਼ ’ਤੇ ਰੱਖੀ ਹੈ। ਇਸ ਰਿਲੀਜ਼ ਵਿੱਚ ਪ੍ਰਧਾਨ ਮੰਤਰੀ ਰਾਹਤ ਫੰਡ ਦੇ ਗਠਨ ਦੇ ਵੇਰਵੇ ਸ਼ਾਮਲ ਹਨ। ਪ੍ਰਧਾਨ ਮੰਤਰੀ ਅਤੇ ਕਾਂਗਰਸ ਪ੍ਰਧਾਨ ਫੰਡ ਦੇ ਪ੍ਰਬੰਧਨ ਵਿੱਚ ਸ਼ਾਮਲ ਰਹੇ ਹਨ। ਸਭਾਪਤੀ ਨੇ ਕਿਹਾ ਕਿ ਉਪਲਬਧ ਤੱਥਾਂ ਦੇ ਮੱਦੇਨਜ਼ਰ, ਇਸ ਪ੍ਰਸਤਾਵ ਨੂੰ ਰੱਦ ਕੀਤਾ ਜਾਂਦਾ ਹੈ। ਰਮੇਸ਼ ਨੇ ਬੁੱਧਵਾਰ ਨੂੰ ਰਾਜ ਸਭਾ ਵਿੱਚ ਕਾਰਜ ਪ੍ਰਣਾਲੀ ਅਤੇ ਕਾਰੋਬਾਰ ਦੇ ਸੰਚਾਲਨ ਦੇ ਨਿਯਮਾਂ ਦੇ ਨਿਯਮ 188 ਦੇ ਤਹਿਤ ਸ਼ਾਹ ਵਿਰੁੱਧ ਵਿਸ਼ੇਸ਼ ਅਧਿਕਾਰ ਉਲੰਘਣਾ ਦਾ ਨੋਟਿਸ ਦਿੱਤਾ ਸੀ।
