Health Tips: ਹਿੰਗ ਇੱਕ ਅਜਿਹਾ ਮਸਾਲਾ ਹੈ, ਜੋ ਸੁਆਦੀ ਤੇ ਸਿਹਤ ਦਾ ਖਜ਼ਾਨਾ ਹੈ। ਇਹ ਰਵਾਇਤੀ ਘਰੇਲੂ ਇਲਾਜਾਂ ’ਚ ਇੱਕ ਪ੍ਰਮੁੱਖ ਸਥਾਨ ਰੱਖਦਾ ਹੈ। ਭਾਵੇਂ ਇਹ ਪੇਟ ਦਰਦ ਹੋਵੇ ਜਾਂ ਦੰਦਾਂ ਦਾ ਦਰਦ, ਇੱਕ ਚੁਟਕੀ ਹਿੰਗ ਤੁਰੰਤ ਰਾਹਤ ਦਿੰਦੀ ਹੈ। ਆਯੁਰਵੇਦ ’ਚ ਇਸ ਨੂੰ ਫੇਰੂਲਾ ਹਿੰਗ ਦੇ ਨਾਂਅ ਨਾਲ ਜਾਣਿਆ ਜਾਂਦਾ ਹੈ, ਇੱਕ ਰੁੱਖ ਜੋ ਦੱਖਣੀ ਭਾਰਤ ਦੇ ਹਿੱਸੇ ਵਿੱਚ ਪਾਇਆ ਜਾਂਦਾ ਹੈ ਤੇ ਮੁੱਖ ਤੌਰ ’ਤੇ ਅਫਗਾਨਿਸਤਾਨ, ਉਜ਼ਬੇਕਿਸਤਾਨ ਤੇ ਇਰਾਨ ਤੋਂ ਆਯਾਤ ਹੁੰਦੀ ਹੈ।
ਔਸ਼ੁਧੀ ਗੁਣਾਂ ਨਾਲ ਭਰਪੂਰ | Health Tips
ਨੈਸ਼ਨਲ ਲਾਇਬ੍ਰੇਰੀ ਆਫ਼ ਮੈਡੀਸਨ ਅਨੁਸਾਰ ਹਿੰਗ ਦੀ ਵਰਤੋਂ ਕਾਲੀ ਖੰਘ, ਦਮਾ, ਅਲਸਰ, ਮਿਰਗੀ, ਬ੍ਰੌਂਕਾਇਟਿਸ, ਅੰਤੜੀਆਂ ਦੀ ਲਾਗ, ਜਕੜਨ, ਕਮਜ਼ੋਰ ਹਾਜ਼ਮਾ ਤੇ ਇਨਫਲੂਐਂਜ਼ਾ ਵਰਗੀਆਂ ਸਥਿਤੀਆਂ ਦੇ ਇਲਾਜ ਲਈ ਕੀਤੀ ਜਾਂਦੀ ਹੈ। ਇਸ ਵਿੱਚ ਕੂਮਰਿਨ, ਫੇਰੂਲਿਕ ਐਸਿਡ ਅਤੇ ਸਲਫਰ ਮਿਸ਼ਰਣ ਵਰਗੇ ਤੱਤ ਹੁੰਦੇ ਹਨ ਜੋ ਸਰੀਰ ਨੂੰ ਬਿਮਾਰੀਆਂ ਨਾਲ ਲੜਨ ਵਿੱਚ ਮਦਦ ਕਰਦੇ ਹਨ।
ਪਾਚਨ ਪ੍ਰਣਾਲੀ ਦੀ ਰੱਖਿਅਕ
ਚਰਕ ਸੰਹਿਤਾ ’ਚ ਹਿੰਗ ਨੂੰ ਪਾਚਨ ਸ਼ਕਤੀ ਸੁਧਾਰਕ ਮੰਨਿਆ ਜਾਂਦਾ ਹੈ। ਇਹ ਗੈਸ, ਪੇਟ ਫੁੱਲਣ ਅਤੇ ਬਦਹਜ਼ਮੀ ਤੋਂ ਰਾਹਤ ਦਿੰਦੀ ਹੈ। ਰੋਜ਼ਾਨਾ ਦਾਲ, ਕੜੀ ਜਾਂ ਸਬਜ਼ੀਆਂ ਵਿੱਚ ਹਿੰਗ ਪਾਉਣ ਨਾਲ ਭੋਜਨ ਆਸਾਨੀ ਨਾਲ ਪਚ ਜਾਂਦਾ ਹੈ ਤੇ ਭੁੱਖ ਵਧਦੀ ਹੈ।
ਦੰਦਾਂ ਦੇ ਦਰਦ ਤੇ ਕੰਨ ਦੇ ਦਰਦ ਤੋਂ ਰਾਹਤ
ਦੰਦਾਂ ਦੇ ਦਰਦ ’ਚ ਹਿੰਗ ਤੇ ਕਪੂਰ ਮਿਲਾ ਕੇ ਦਰਦ ਵਾਲੀ ਥਾਂ ’ਤੇ ਲਾਉਣ ਨਾਲ ਰਾਹਤ ਮਿਲਦੀ ਹੈ। ਤਿਲ ਦੇ ਤੇਲ ਵਿੱਚ ਪਕਾਇਆ ਹਿੰਗ ਕੰਨ ’ਚ ਲਾਉਣ ਨਾਲ ਵੀ ਕੰਨ ਦੇ ਦਰਦ ਤੋਂ ਰਾਹਤ ਮਿਲਦੀ ਹੈ।
ਬਲੱਡ ਸ਼ੂਗਰ ਅਤੇ ਦਿਲ ਦੀ ਸਿਹਤ:
ਖੋਜ ਦੱਸਦੀ ਹੈ ਕਿ ਹਿੰਗ ਸਰੀਰ ਵਿੱਚ ਇਨਸੁਲਿਨ ਦੀ ਕਿਰਿਆ ਨੂੰ ਵਧਾ ਕੇ ਬਲੱਡ ਸ਼ੂਗਰ ਨੂੰ ਕੰਟਰੋਲ ਕਰਦੀ ਹੈ। ਇਹ ਟਰਾਈਗਲਿਸਰਾਈਡਸ ਅਤੇ ਕੋਲੈਸਟਰੋਲ ਨੂੰ ਘਟਾ ਕੇ ਹਾਈ ਬਲੱਡ ਪ੍ਰੈਸ਼ਰ ਨੂੰ ਕੰਟਰੋਲ ਕਰਦਾ ਹੈ।
ਗੈਸ, ਹੈਜ਼ਾ ਅਤੇ ਪੇਟ ਦੇ ਦਰਦ ਲਈ ਪ੍ਰਭਾਵਸ਼ਾਲੀ:
ਲੱਸੀ ਜਾਂ ਭੋਜਨ ਨਾਲ ਹਿੰਗ ਦਾ ਸੇਵਨ ਕਰਨ ਨਾਲ ਪੇਟ ਦੀ ਗੈਸ, ਹੈਜ਼ਾ ਤੇ ਦਰਦ ਤੋਂ ਤੁਰੰਤ ਰਾਹਤ ਮਿਲਦੀ ਹੈ। ਜਣੇਪੇ ਤੋਂ ਬਾਅਦ ਇਸ ਨੂੰ ਖਾਣ ਨਾਲ ਬੱਚੇਦਾਨੀ ਸਾਫ਼ ਹੋ ਜਾਂਦੀ ਹੈ ਤੇ ਪੇਟ ਦੀਆਂ ਸਮੱਸਿਆਵਾਂ ਨੂੰ ਦੂਰ ਕਰਦਾ ਹੈ। ਅੱਧਾ ਕੱਪ ਪਾਣੀ ਵਿੱਚ ਹਿੰਗ ਮਿਲਾ ਕੇ ਪੀਣ ਨਾਲ ਮਾਈਗ੍ਰੇਨ ਤੇ ਸਿਰ ਦਰਦ ਤੋਂ ਰਾਹਤ ਮਿਲਦੀ ਹੈ। ਇਹ ਮਨ ਨੂੰ ਵੀ ਸ਼ਾਂਤ ਕਰਦਾ ਹੈ।
