ਸ਼ੁਭਮਨ ਦੇ ਨਿਸ਼ਾਨੇ ’ਤੇ 3 ਵੱਡੇ ਰਿਕਾਰਡ | IND vs ENG
ਸਪੋਰਟਸ ਡੈਸਕ। IND vs ENG: ਭਾਰਤ ਤੇ ਇੰਗਲੈਂਡ ਵਿਚਕਾਰ ਐਂਡਰਸਨ-ਤੇਂਦੁਲਕਰ ਟਰਾਫੀ ਦਾ ਪੰਜਵਾਂ ਤੇ ਆਖਰੀ ਟੈਸਟ 31 ਜੁਲਾਈ ਤੋਂ ਖੇਡਿਆ ਜਾਵੇਗਾ। ਇਹ ਮੈਚ ਲੰਡਨ ਦੇ ਓਵਲ ਸਟੇਡੀਅਮ ’ਚ ਹੋਵੇਗਾ, ਜਿਸ ਲਈ ਦੋਵੇਂ ਟੀਮਾਂ ਲੰਡਨ ਪਹੁੰਚੀਆਂ ਹਨ। ਭਾਰਤ ਨੇ ਇੱਥੇ 15 ਟੈਸਟ ਖੇਡੇ ਤੇ ਸਿਰਫ਼ 2 ਜਿੱਤੇ। ਹਾਲਾਂਕਿ, ਆਖਰੀ ਜਿੱਤ 2021 ’ਚ ਹੀ ਸੀ। ਜੇਕਰ ਭਾਰਤ ਓਵਲ ਟੈਸਟ ਜਿੱਤਦਾ ਹੈ, ਤਾਂ ਟੀਮ ਸੀਰੀਜ਼ 2-2 ਨਾਲ ਬਰਾਬਰ ਕਰ ਲਵੇਗੀ। ਦੂਜੇ ਪਾਸੇ, ਜੇਕਰ ਮੈਚ ਡਰਾਅ ਹੁੰਦਾ ਹੈ ਜਾਂ ਇੰਗਲੈਂਡ ਜਿੱਤਦਾ ਹੈ, ਤਾਂ ਸੀਰੀਜ਼ ਵੀ ਘਰੇਲੂ ਟੀਮ ਦੇ ਨਾਂਅ ਹੋਵੇਗੀ। ਪੰਜਵੇਂ ਟੈਸਟ ’ਚ, ਭਾਰਤੀ ਕਪਤਾਨ ਸ਼ੁਭਮਨ ਗਿੱਲ ਕੋਲ ਵੀ 3 ਵੱਡੇ ਰਿਕਾਰਡ ਬਣਾਉਣ ਦਾ ਮੌਕਾ ਹੈ।
ਇਹ ਖਬਰ ਵੀ ਪੜ੍ਹੋ : Ayushman Card News: ਆਯੂਸ਼ਮਾਨ ਕਾਰਡ ਧਾਰਕਾਂ ਲਈ ਵੱਡੀ ਖਬਰ, ਇਸ ਤਰੀਕ ਤੋਂ ਬਾਅਦ ਨਹੀਂ ਹੋਵੇਗਾ ਇਲਾਜ, ਜਾਣੋ ਕਾਰਨ
ਭਾਰਤ ਨੇ ਓਵਲ ’ਚ 2 ਟੈਸਟ ਜਿੱਤੇ | IND vs ENG
ਭਾਰਤ ਨੇ 1936 ਵਿੱਚ ਲੰਡਨ ਦੇ ਓਵਲ ਸਟੇਡੀਅਮ ’ਚ ਪਹਿਲਾ ਟੈਸਟ ਖੇਡਿਆ ਸੀ, ਫਿਰ ਟੀਮ 9 ਵਿਕਟਾਂ ਨਾਲ ਹਾਰ ਗਈ। ਟੀਮ ਨੂੰ ਇਸ ਮੈਦਾਨ ’ਤੇ ਪਹਿਲਾ ਟੈਸਟ ਜਿੱਤਣ ’ਚ 35 ਸਾਲ ਲੱਗੇ। ਭਾਰਤ ਨੇ ਅਜੀਤ ਵਾਡੇਕਰ ਦੀ ਕਪਤਾਨੀ ’ਚ 1971 ਵਿੱਚ ਇੰਗਲੈਂਡ ਨੂੰ 4 ਵਿਕਟਾਂ ਨਾਲ ਹਰਾਇਆ ਸੀ। 1971 ਤੋਂ ਬਾਅਦ, ਭਾਰਤ ਨੇ ਓਵਲ ਵਿਖੇ 5 ਟੈਸਟ ਡਰਾਅ ਕੀਤੇ, ਜਦੋਂ ਕਿ 3 ਹਾਰੇ। ਟੀਮ ਨੂੰ ਵਿਰਾਟ ਕੋਹਲੀ ਦੀ ਕਪਤਾਨੀ ਹੇਠ 2021 ’ਚ ਇਸ ਮੈਦਾਨ ’ਤੇ ਆਪਣੀ ਦੂਜੀ ਜਿੱਤ ਮਿਲੀ। ਉਨ੍ਹਾਂ ਨੇ ਟੀਮ ਨੂੰ 157 ਦੌੜਾਂ ਨਾਲ ਜਿੱਤ ਦਿਵਾਈ। ਭਾਰਤ ਨੇ ਇਸ ਮੈਦਾਨ ’ਤੇ ਇੰਗਲੈਂਡ ਵਿਰੁੱਧ 14 ਟੈਸਟ ਖੇਡੇ, 2 ਜਿੱਤੇ ਤੇ 5 ਹਾਰੇ। ਇਸ ਦੌਰਾਨ 7 ਮੈਚ ਵੀ ਡਰਾਅ ਹੋਏ।
ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦਾ ਫਾਈਨਲ ਵੀ ਇੱਥੇ ਹੀ ਗੁਆਇਆ
ਭਾਰਤ ਨੇ 2023 ’ਚ ਕੰਗਾਰੂਆਂ ਖਿਲਾਫ਼ ਓਵਲ ਵਿਖੇ ਆਖਰੀ ਟੈਸਟ ਖੇਡਿਆ ਸੀ। ਇਹ ਵਿਸ਼ਵ ਟੈਸਟ ਚੈਂਪੀਅਨਸ਼ਿਪ ਦਾ ਫਾਈਨਲ ਸੀ, ਜਿਸ ’ਚ ਭਾਰਤ ਨੂੰ 209 ਦੌੜਾਂ ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਰੋਹਿਤ ਸ਼ਰਮਾ ਟੀਮ ਇੰਡੀਆ ਦੇ ਕਪਤਾਨ ਸਨ, ਜਿਨ੍ਹਾਂ ਨੇ ਇੰਗਲੈਂਡ ਵਿਰੁੱਧ ਲੜੀ ਲਈ ਟੀਮ ਦਾ ਐਲਾਨ ਹੋਣ ਤੋਂ ਪਹਿਲਾਂ ਹੀ ਇਸ ਫਾਰਮੈਟ ਨੂੰ ਅਲਵਿਦਾ ਕਹਿ ਦਿੱਤਾ ਸੀ।
ਇੰਗਲੈਂਡ ਨੇ ਓਵਲ ਸਟੇਡੀਅਮ ਵਿਖੇ 43 ਫੀਸਦੀ ਟੈਸਟ ਜਿੱਤੇ
ਇੰਗਲੈਂਡ ਨੇ ਓਵਲ ਸਟੇਡੀਅਮ ਵਿਖੇ 106 ਟੈਸਟ ਖੇਡੇ। ਟੀਮ ਨੇ 45 ਜਿੱਤੇ ਤੇ ਸਿਰਫ਼ 24 ਹਾਰੇ। ਇਸ ਦੌਰਾਨ, 37 ਮੈਚ ਵੀ ਡਰਾਅ ਹੋਏ। ਹਾਲਾਂਕਿ, ਇੰਗਲੈਂਡ ਵੀ ਇੱਥੇ 52 ਦੌੜਾਂ ’ਤੇ ਆਲ ਆਊਟ ਹੋ ਗਿਆ ਹੈ। ਟੀਮ 1948 ’ਚ ਕੰਗਾਰੂਆਂ ਵਿਰੁੱਧ ਇਸ ਸਕੋਰ ’ਤੇ ਆਊਟ ਹੋ ਗਈ ਸੀ। ਭਾਰਤ ਵਿਰੁੱਧ, 1971 ’ਚ ਇਸ ਮੈਦਾਨ ’ਤੇ ਟੀਮ 101 ’ਤੇ ਸਿਮਟ ਗਈ ਸੀ।
ਭਾਰਤ ਨੇ ਓਵਲ ’ਤੇ 3 ਵਾਰ 500 ਤੋਂ ਵੱਧ ਦੌੜਾਂ ਬਣਾਈਆਂ
ਭਾਰਤ ਨੇ ਓਵਲ ਸਟੇਡੀਅਮ ’ਤੇ 3 ਵਾਰ 500 ਤੋਂ ਵੱਧ ਦੌੜਾਂ ਬਣਾਈਆਂ, ਤਿੰਨੋਂ ਵਾਰ ਮੈਚ ਡਰਾਅ ਹੋਏ। ਇੱਥੇ ਭਾਰਤ ਦਾ ਸਭ ਤੋਂ ਵੱਧ ਸਕੋਰ 664 ਦੌੜਾਂ ਹੈ, ਜੋ ਟੀਮ ਨੇ 2007 ’ਚ ਇੰਗਲੈਂਡ ਵਿਰੁੱਧ ਬਣਾਇਆ ਸੀ। 2021 ’ਚ, ਭਾਰਤ ਨੇ ਆਪਣੀ ਦੂਜੀ ਪਾਰੀ ’ਚ 466 ਦੌੜਾਂ ਬਣਾ ਕੇ ਮੈਚ ਜਿੱਤਿਆ। ਇਸ ਮੈਦਾਨ ’ਤੇ ਇੰਗਲੈਂਡ ਦਾ ਸਭ ਤੋਂ ਵੱਧ ਸਕੋਰ 903 ਦੌੜਾਂ ਹੈ, ਜੋ ਟੀਮ ਨੇ 1938 ’ਚ ਅਸਟਰੇਲੀਆ ਵਿਰੁੱਧ ਬਣਾਈਆਂ ਸਨ। ਟੀਮ ਨੇ ਇੱਥੇ ਭਾਰਤ ਵਿਰੁੱਧ ਦੋ ਵਾਰ 590 ਤੋਂ ਵੱਧ ਦੌੜਾਂ ਬਣਾਈਆਂ ਹਨ। ਇੰਗਲੈਂਡ ਨੇ 1 ਵਿੱਚ ਜਿੱਤ ਪ੍ਰਾਪਤ ਕੀਤੀ, ਜਦੋਂ ਕਿ ਦੂਜਾ ਮੈਚ ਡਰਾਅ ਰਿਹਾ। ਇੰਗਲੈਂਡ ਨੇ 190 ਪਾਰੀਆਂ ’ਚ 10 ਵਾਰ ਇੱਥੇ 500 ਤੋਂ ਵੱਧ ਦੌੜਾਂ ਬਣਾਈਆਂ ਹਨ।
ਗਿੱਲ ਦੇ ਨਿਸ਼ਾਨੇ ’ਤੇ ਇਹ ਵੱਡੇ ਰਿਕਾਰਡ… | IND vs ENG
ਇੱਕ ਲੜੀ ’ਚ ਸਭ ਤੋਂ ਜਿਆਦਾ ਦੌੜਾਂ ਬਣਾਉਣ ਵਾਲੇ ਭਾਰਤੀ ਬੱਲੇਬਾਜ਼
ਸ਼ੁਭਮਨ ਗਿੱਲ ਨੇ ਲੜੀ ਦੇ 4 ਟੈਸਟਾਂ ਵਿੱਚ 722 ਦੌੜਾਂ ਬਣਾਈਆਂ ਹਨ। ਜਿਵੇਂ ਹੀ ਉਹ ਆਖਰੀ ਟੈਸਟ ’ਚ 53 ਦੌੜਾਂ ਬਣਾਉਂਦੇ ਹਨ, ਉਹ ਇੱਕ ਲੜੀ ’ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਭਾਰਤੀ ਬੱਲੇਬਾਜ਼ ਬਣ ਜਾਣਗੇ। ਇਸ ਮਾਮਲੇ ਵਿੱਚ, ਉਹ ਸੁਨੀਲ ਗਾਵਸਕਰ ਨੂੰ ਪਿੱਛੇ ਛੱਡ ਦੇਣਗੇ, ਜਿਨ੍ਹਾਂ ਦੇ ਨਾਂਅ 774 ਦੌੜਾਂ ਹਨ। ਗਾਵਸਕਰ ਨੇ ਇਹ ਰਿਕਾਰਡ 1971 ’ਚ ਵੈਸਟਇੰਡੀਜ਼ ਵਿਰੁੱਧ ਬਣਾਇਆ ਸੀ।
ਇੱਕ ਲੜੀ ’ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਕਪਤਾਨ
ਸ਼ੁਭਮਨ ਆਖਰੀ ਮੈਚ ’ਚ 89 ਦੌੜਾਂ ਬਣਾਉਂਦੇ ਹੀ ਇੱਕ ਟੈਸਟ ਲੜੀ ’ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਕਪਤਾਨ ਵੀ ਬਣ ਜਾਣਗੇ। ਇਸ ਮਾਮਲੇ ’ਚ, ਉਹ ਅਸਟਰੇਲੀਆ ਦੇ ਡੋਨਾਲਡ ਬ੍ਰੈਡਮੈਨ ਨੂੰ ਪਿੱਛੇ ਛੱਡ ਦੇਣਗੇ, ਜਿਨ੍ਹਾਂ ਨੇ 1936 ’ਚ ਇੰਗਲੈਂਡ ਵਿਰੁੱਧ 810 ਦੌੜਾਂ ਬਣਾਈਆਂ ਸਨ। ਜਿਵੇਂ ਹੀ ਗਿੱਲ 11 ਦੌੜਾਂ ਬਣਾਉਂਦੇ ਹਨ, ਉਹ ਇੱਕ ਲੜੀ ’ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਭਾਰਤੀ ਕਪਤਾਨ ਵੀ ਬਣ ਜਾਣਗੇ। ਇਸ ਮਾਮਲੇ ’ਚ, ਉਹ ਸੁਨੀਲ ਗਾਵਸਕਰ ਨੂੰ ਪਿੱਛੇ ਛੱਡ ਦੇਣਗੇ, ਜਿਨ੍ਹਾਂ ਨੇ 1978 ਵਿੱਚ ਵੈਸਟਇੰਡੀਜ਼ ਵਿਰੁੱਧ 732 ਦੌੜਾਂ ਬਣਾਈਆਂ ਸਨ।
ਇੱਕ ਲੜੀ ’ਚ ਸਭ ਤੋਂ ਜਿਆਦਾ ਸੈਂਕੜੇ ਜੜਨ ਵਾਲੇ ਕਪਤਾਨ
ਸ਼ੁਭਮਨ ਗਿੱਲ ਨੇ ਲੜੀ ’ਚ 4 ਸੈਂਕੜੇ ਲਗਾਏ ਹਨ। ਗਿੱਲ ਇਸ ਸਮੇਂ ਇੱਕ ਟੈਸਟ ਲੜੀ ਵਿੱਚ ਸਭ ਤੋਂ ਵੱਧ ਸੈਂਕੜੇ ਵਾਲੇ ਕਪਤਾਨਾਂ ਦੀ ਸੂਚੀ ਵਿੱਚ ਡੌਨ ਬ੍ਰੈਡਮੈਨ ਤੇ ਸੁਨੀਲ ਗਾਵਸਕਰ ਦੇ ਬਰਾਬਰ ਹੈ। ਉਹ ਆਖਰੀ ਮੈਚ ’ਚ ਇੱਕ ਹੋਰ ਸੈਂਕੜਾ ਲਗਾਉਂਦੇ ਹੀ ਇਸ ਰਿਕਾਰਡ ਦੇ ਸਿਖਰ ’ਤੇ ਪਹੁੰਚ ਜਾਣਗੇ। ਜੇਕਰ ਗਿੱਲ ਦੋ ਸੈਂਕੜੇ ਜੜਦੇ ਹਨ, ਤਾਂ ਉਹ ਇੱਕ ਲੜੀ ’ਚ ਸਭ ਤੋਂ ਵੱਧ ਸੈਂਕੜੇ ਵਾਲੇ ਖਿਡਾਰੀ ਵੀ ਬਣ ਜਾਣਗੇ। IND vs ENG
