ਫਿਲੀਪੀਂਸ ’ਚ ਚੋਣਾਂ ਵਾਲੇ ਦਿਨ ਗੋਲੀਬਾਰੀ ’ਚ ਤਿੰਨ ਦੀ ਮੌਤ
(ਏਜੰਸੀ) ਮਨੀਲਾ । ਫਿਲੀਪੀਂਸ ਦੇ ਦੱਖਣੀ ਸੂਬੇ ਮੈਗੁਇਡਾਨਾਓ ’ਚ ਸੋਮਵਾਰ ਨੂੰ ਇੱਕ ਪੋਲਿੰਗ ਸਟੇਸ਼ਨ ਨੇੜੇ ਗੋਲੀਬਾਰੀ ’ਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਤੇ ਇੱਕ ਜਖ਼ਮੀ ਹੋ ਗਿਆ। ਫੌਜ ਨੇ ਕਿਹਾ ਕਿ ਦੋ ਵੈਨਾਂ ਵਿੱਚ ਸਵਾਰ ਹਮਲਾਵਰਾਂ ਨੇ ਸਵੇਰੇ 7:25 ਵਜੇ (ਸਥਾਨਕ ਸਮੇਂ) ’ਤੇ ਬੁਲੁਆਨ ਸ਼ਹਿਰ ਵਿੱਚ ਵੋਟਿੰਗ ਪ੍ਰਕਿਰਿਆ ਵਿੱਚ ਸਹਾਇਤਾ ਕਰ ਰਹੇ ਸ਼ਾਂਤੀ ਰੱਖਿਅਕਾਂ ’ਤੇ ਗੋਲੀਬਾਰੀ ਕੀਤੀ। ਫੌਜ ਅਨੁਸਾਰ, ਪੀੜਤ ਸ਼ਹਿਰ ਵਿੱਚ ਮੇਅਰ ਦੇ ਅਹੁਦੇ ਲਈ ਚੋਣ ਲੜ ਰਹੇ ਇੱਕ ਸਥਾਨਕ ਸਿਆਸੀ ਆਗੂ ਦੇ ਸਮੱਰਥਕ ਸਨ।
ਚੋਣ ਕਮਿਸ਼ਨ ਨੇ ਸੋਮਵਾਰ ਸਵੇਰੇ ਦੱਖਣੀ ਫਿਲੀਪੀਨਜ ਦੇ ਬਾਸੀਲਾਨ ਸੂਬੇ ਦੇ ਸੁਮਿਸਿਪ ਸ਼ਹਿਰ ਵਿੱਚ ਗੋਲੀਬਾਰੀ ਦੀ ਇੱਕ ਹੋਰ ਘਟਨਾ ਦੀ ਸੂਚਨਾ ਦਿੱਤੀ। ਕਮਿਸ਼ਨ ਨੇ ਕਿਹਾ ਕਿ ਹਮਲੇ ’ਚ ਕੋਈ ਜਖ਼ਮੀ ਨਹੀਂ ਹੋਇਆ ਹੈ। ਇਸ ਤੋਂ ਪਹਿਲਾਂ ਸੋਮਵਾਰ ਨੂੰ, ਪੁਲਿਸ ਨੇ ਕਿਹਾ ਕਿ ਵੋਟਿੰਗ ਦੀ ਪੂਰਬਲੀ ਸ਼ਾਮ ’ਤੇ ਐਤਵਾਰ ਰਾਤ ਨੂੰ ਮੈਗੁਇਡਾਨਾਓ ਸੂਬੇ ਵਿਚ ਇੱਕ ਗ੍ਰਨੇਡ ਧਮਾਕੇ ਵਿਚ ਘੱਟੋ-ਘੱਟ ਅੱਠ ਲੋਕ ਜ਼ਖ਼ਮੀ ਹੋ ਗਏ। ਪੁਲਿਸ ਨੇ ਦੱਸਿਆ ਕਿ ਧਮਾਕਾ ਦਾਤੂ ਅਨਸੇ ਕਸਬੇ ਵਿੱਚ ਹੋਇਆ, ਜਦੋਂਕਿ ਦੂਜਾ ਧਮਾਕਾ ਸਰੀਫ਼ ਅਗੁਆਕ ਕਸਬੇ ਕੋਲ ਹੋਇਆ।
ਕਿਸੇ ਵੀ ਸਮੂਹ ਨੇ ਧਮਾਕਿਆਂ ਦੀ ਜਿੰਮੇਵਾਰੀ ਨਹੀਂ ਲਈ ਹੈ। ਪੁਲਿਸ ‘ਹਾਟ ਸਪਾਟ’ ਵਜੋਂ ਨਿਸ਼ਾਨਦੇਹ ਖੇਤਰਾਂ ਵਿੱਚ ਹਮਲਿਆਂ ਦੀ ਜਾਂਚ ਕਰ ਰਹੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਇਨ੍ਹਾਂ ਖੇਤਰਾਂ ਵਿੱਚ ਹਿੰਸਾ ਕਾਰਨ ਪੋਲਿੰਗ ਪ੍ਰਕਿਰਿਆ ਵਿੱਚ ਕੋਈ ਰੁਕਾਵਟ ਨਹੀਂ ਆਈ। ਦੇਸ਼ ਦੇ 65.7 ਮਿਲੀਅਨ ਤੋਂ ਵੱਧ ਲੋਕ ਸੋਮਵਾਰ ਨੂੰ ਨਵੇਂ ਰਾਸ਼ਟਰਪਤੀ, ਇੱਕ ਨਵੇਂ ਉਪ ਪ੍ਰਧਾਨ, 12 ਸੈਨੇਟਰ, ਪ੍ਰਤੀਨਿਧੀ ਸਭਾ ਦੇ 300 ਤੋਂ ਵੱਧ ਮੈਂਬਰਾਂ ਤੇ 17,000 ਤੋਂ ਵੱਧ ਸਥਾਨਕ ਅਧਿਕਾਰੀਆਂ ਦੀ ਚੋਣ ਕਰਨ ਲਈ ਵੋਟ ਪਾਉਣਗੇ।
ਹੋਰ ਅਪਡੇਟ ਹਾਸਲ ਕਰਨ ਲਈ ਸਾਨੂੰ Facebook ਅਤੇ Twitter,Instagram, Linkedin , YouTube‘ਤੇ ਫਾਲੋ ਕਰੋ
