ਸਪੋਰਟਸ ਡੈਸਕ। IND vs PAK: ਭਾਰਤ ਤੇ ਪਾਕਿਸਤਾਨ ਵਿਚਕਾਰ ਏਸ਼ੀਆ ਕੱਪ ਸੁਪਰ 4 ਮੈਚ ਵੀ ਵਿਵਾਦਾਂ ਨਾਲ ਘਿਰਿਆ ਰਿਹਾ। ਮੈਚ ਦੌਰਾਨ ਸ਼ੁਭਮਨ ਗਿੱਲ ਤੇ ਅਭਿਸ਼ੇਕ ਸ਼ਰਮਾ ਦੀ ਓਪਨਿੰਗ ਜੋੜੀ ਦੀ ਪਾਕਿਸਤਾਨ ਦੇ ਸ਼ਾਹੀਨ ਸ਼ਾਹ ਅਫਰੀਦੀ ਤੇ ਹੈਰਿਸ ਰਾਊਫ ਨਾਲ ਬਹਿਸ ਹੋ ਗਈ। ਭਾਰਤੀ ਓਪਨਿੰਗ ਜੋੜੀ ਨੇ ਤੇਜ਼ ਸ਼ੁਰੂਆਤ ਨਾਲ ਵਿਰੋਧੀ ਟੀਮ ’ਤੇ ਦਬਾਅ ਬਣਾਇਆ, ਜਿਸ ਨੂੰ ਪਾਕਿਸਤਾਨੀ ਖਿਡਾਰੀ ਬਰਦਾਸ਼ਤ ਨਹੀਂ ਕਰ ਸਕੇ, ਜਿਸ ਕਾਰਨ ਮੈਦਾਨ ’ਤੇ ਬਹਿਸ ਹੋ ਗਈ। ਖੱਬੇ ਹੱਥ ਦੇ ਬੱਲੇਬਾਜ਼ ਅਭਿਸ਼ੇਕ ਨੇ ਹੁਣ ਇਸ ਘਟਨਾ ਦਾ ਜਵਾਬ ਦਿੱਤਾ ਹੈ।
ਇਹ ਖਬਰ ਵੀ ਪੜ੍ਹੋ : Indian Railways News: ਤਿਉਹਾਰਾਂ ਦੌਰਾਨ ਰੇਲਵੇ ਨੇ ਕੀਤਾ ਵੱਡਾ ਬਦਲਾਅ, ਨਵੇਂ ਨਿਯਮ ਲਾਗੂ
ਅਭਿਸ਼ੇਕ-ਗਿੱਲ ਦੀ ਸ਼ਾਨਦਾਰ ਸਾਂਝੇਦਾਰੀ | IND vs PAK
ਪਾਕਿਸਤਾਨ ਵਿਰੁੱਧ ਟੀਚੇ ਦਾ ਪਿੱਛਾ ਕਰਦੇ ਹੋਏ, ਅਭਿਸ਼ੇਕ ਤੇ ਗਿੱਲ ਨੇ ਭਾਰਤ ਨੂੰ ਤੇਜ਼ ਸ਼ੁਰੂਆਤ ਦਿੱਤੀ। ਪਾਵਰਪਲੇ ਦੌਰਾਨ ਭਾਰਤ ਨੇ ਬਿਨਾਂ ਕਿਸੇ ਨੁਕਸਾਨ ਦੇ 69 ਦੌੜਾਂ ਬਣਾਈਆਂ ਸਨ। ਪਾਵਰਪਲੇ ਦੌਰਾਨ, ਭਾਰਤੀ ਤੇ ਪਾਕਿਸਤਾਨੀ ਖਿਡਾਰੀਆਂ ਵਿਚਕਾਰ ਹੋਈ ਬਹਿਸ ਨੇ ਮੈਦਾਨ ’ਤੇ ਮਾਹੌਲ ਗਰਮ ਕਰ ਦਿੱਤਾ। ਸ਼ਾਹੀਨ ਅਫਰੀਦੀ ਭਾਰਤ ਦੀ ਪਾਰੀ ਦਾ ਚੌਥਾ ਓਵਰ ਸੁੱਟਣ ਲਈ ਆਇਆ, ਤੇ ਗਿੱਲ ਨੇ ਦੋ ਚੌਕੇ ਲਾਏ। ਇਸ ਨਾਲ ਸ਼ਾਹੀਨ ਤੇ ਗਿੱਲ ਵਿਚਕਾਰ ਬਹਿਸ ਹੋ ਗਈ, ਜਿਸ ਤੋਂ ਬਾਅਦ ਗਿੱਲ ਨੇ ਸ਼ਾਹੀਨ ਨੂੰ ਜਾਣ ਦਾ ਸੰਕੇਤ ਦਿੱਤਾ।
ਅੰਪਾਇਰ ਨੇ ਕੀਤਾ ਬਚਾਅ
ਹਰੀਸ ਰਾਊਫ ਫਿਰ ਅਗਲਾ ਓਵਰ ਸੁੱਟਣ ਲਈ ਆਇਆ। ਗਿੱਲ ਨੇ ਫਿਰ ਆਖਰੀ ਗੇਂਦ ’ਤੇ ਚੌਕਾ ਮਾਰਿਆ, ਜਿਸ ਨਾਲ ਅਭਿਸ਼ੇਕ ਤੇ ਰਊਫ ਵਿਚਕਾਰ ਗਰਮਾ-ਗਰਮ ਬਹਿਸ ਹੋ ਗਈ। ਸਥਿਤੀ ਨੂੰ ਵਿਗੜਦੀ ਵੇਖ ਕੇ, ਅੰਪਾਇਰ ਗਾਜ਼ੀ ਸੋਹੇਲ ਨੇ ਬਚਾਅ ਕੀਤਾ ਤੇ ਦੋਵਾਂ ਨੂੰ ਵੱਖ ਕੀਤਾ।
‘ਉਹ ਸਾਡੇ ’ਤੇ ਹਾਵੀ ਹੋਣ ਦੀ ਕੋਸ਼ਿਸ਼ ਕਰ ਰਹੇ ਸਨ’
ਅਭਿਸ਼ੇਕ ਸ਼ਰਮਾ ਨੇ ਮੈਚ ਤੋਂ ਬਾਅਦ ਇਸ ਵਿਵਾਦ ਬਾਰੇ ਗੱਲ ਕੀਤੀ। ਉਨ੍ਹਾਂ ਕਿਹਾ ਕਿ ਅੱਜ ਦਾ ਮੈਚ ਬਹੁਤ ਖਾਸ ਸੀ। ਬੱਲੇਬਾਜ਼ ਨੇ ਕਿਹਾ ਕਿ ਉਨ੍ਹਾਂ ਨੂੰ ਵਿਰੋਧੀ ਟੀਮ ਬਿਨਾਂ ਕਿਸੇ ਕਾਰਨ ਉਸ ’ਤੇ ਹਾਵੀ ਹੋਣ ਦੀ ਕੋਸ਼ਿਸ਼ ਕਰਨ ਦਾ ਤਰੀਕਾ ਪਸੰਦ ਨਹੀਂ ਆਇਆ। ਇਸੇ ਲਈ ਉਨ੍ਹਾਂ ਨੇ ਸਰਗਰਮੀ ਨਾਲ ਜਵਾਬ ਦਿੱਤਾ ਤੇ ਟੀਮ ਲਈ ਮਜ਼ਬੂਤ ਪ੍ਰਦਰਸ਼ਨ ਕੀਤਾ।
ਗਿੱਲ ਨਾਲ ਹੋਈ ਸਾਂਝੇਦਾਰੀ ਦੀ ਵੀ ਕੀਤੀ ਗੱਲ
ਅਭਿਸ਼ੇਕ ਨੇ ਪਾਕਿਸਤਾਨ ਵਿਰੁੱਧ ਉਪ-ਕਪਤਾਨ ਸ਼ੁਭਮਨ ਗਿੱਲ ਨਾਲ ਪਹਿਲੀ ਵਿਕਟ ਲਈ 105 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਇਹ ਮੌਜ਼ੂਦਾ ਟੂਰਨਾਮੈਂਟ ’ਚ ਕਿਸੇ ਵੀ ਟੀਮ ਲਈ ਕਿਸੇ ਵੀ ਵਿਕਟ ਲਈ ਪਹਿਲੀ 100 ਤੋਂ ਵੱਧ ਦੀ ਸਾਂਝੇਦਾਰੀ ਹੈ। ਉਨ੍ਹਾਂ ਇਸ ਸਾਂਝੇਦਾਰੀ ਬਾਰੇ ਕਿਹਾ, ‘ਅਸੀਂ ਸਕੂਲ ਦੇ ਦਿਨਾਂ ਤੋਂ ਇਕੱਠੇ ਖੇਡ ਰਹੇ ਹਾਂ ਤੇ ਇੱਕ-ਦੂਜੇ ਦੀ ਸੰਗਤ ਦਾ ਆਨੰਦ ਮਾਣਦੇ ਹਾਂ। ਅੱਜ ਅਸੀਂ ਟੀਮ ਦਾ ਧਿਆਨ ਰੱਖਣ ਲਈ ਦ੍ਰਿੜ ਸੀ, ਤੇ ਇਹੀ ਹੋਇਆ।’ ਮੈਨੂੰ ਗਿੱਲ ਦੇ ਜਵਾਬ ਦੇਣ ਦੇ ਤਰੀਕੇ ਨੂੰ ਵੇਖਣ ਦਾ ਵੀ ਮਜ਼ਾ ਆਇਆ।’ ਉਸਨੇ ਅੱਗੇ ਕਿਹਾ ਕਿ ਜਦੋਂ ਕੋਈ ਖਿਡਾਰੀ ਇੰਨੇ ਆਤਮਵਿਸ਼ਵਾਸ ਨਾਲ ਖੇਡਦਾ ਹੈ, ਤਾਂ ਇਹ ਟੀਮ ਦੇ ਵਿਸ਼ਵਾਸ ਤੇ ਸਮਰਥਨ ਕਾਰਨ ਹੁੰਦਾ ਹੈ। ‘ਮੈਂ ਆਪਣੀ ਮਿਹਨਤ ਤੇ ਅਭਿਆਸ ’ਤੇ ਪੂਰੀ ਤਰ੍ਹਾਂ ਧਿਆਨ ਕੇਂਦਰਿਤ ਕਰ ਰਿਹਾ ਹਾਂ। ਜਦੋਂ ਵੀ ਮੇਰਾ ਦਿਨ ਹੁੰਦਾ ਹੈ, ਮੈਂ ਟੀਮ ਲਈ ਜਿੱਤਣ ਲਈ ਪੂਰੀ ਤਰ੍ਹਾਂ ਵਚਨਬੱਧ ਹੁੰਦਾ ਹਾਂ।’
ਭਾਰਤ ਦਾ ਜੇਤੂ ਅਭਿਆਨ ਜਾਰੀ
ਸੂਰਿਆ ਕੁਮਾਰ ਯਾਦਵ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਨੇ ਏਸ਼ੀਆ ਕੱਪ ’ਚ ਆਪਣੀ ਅਜੇਤੂ ਲੜੀ ਨੂੰ ਬਰਕਰਾਰ ਰੱਖਿਆ, ਅੱਠ ਦਿਨਾਂ ’ਚ ਦੂਜੀ ਵਾਰ ਰਵਾਇਤੀ ਵਿਰੋਧੀ ਪਾਕਿਸਤਾਨ ਨੂੰ ਹਰਾਇਆ। ਗਰੁੱਪ ਪੜਾਅ ਤੋਂ ਬਾਅਦ, ਭਾਰਤ ਨੇ ਸੁਪਰ 4 ’ਚ ਪਾਕਿਸਤਾਨ ਨੂੰ ਛੇ ਵਿਕਟਾਂ ਨਾਲ ਹਰਾਇਆ, ਤੇ ਮੈਚ ਆਪਣੇ ਨਾਂਅ ਕੀਤਾ। ਭਾਰਤ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਸਾਹਿਬਜ਼ਾਦਾ ਫਰਹਾਨ ਦੇ ਅਰਧ ਸੈਂਕੜੇ ਦੀ ਬਦੌਲਤ ਪਾਕਿਸਤਾਨ ਨੇ 20 ਓਵਰਾਂ ’ਚ ਪੰਜ ਵਿਕਟਾਂ ’ਤੇ 171 ਦੌੜਾਂ ਬਣਾਈਆਂ। ਜਵਾਬ ’ਚ, ਅਭਿਸ਼ੇਕ ਸ਼ਰਮਾ ਤੇ ਸ਼ੁਭਮਨ ਗਿੱਲ ਨੇ ਪਹਿਲੀ ਵਿਕਟ ਲਈ ਸੈਂਕੜੇ ਦੀ ਸਾਂਝੇਦਾਰੀ ਕਰਦੇ ਹੋਏ ਭਾਰਤ ਨੂੰ ਮਜ਼ਬੂਤ ਸ਼ੁਰੂਆਤ ਦਿੱਤੀ। ਭਾਰਤ ਨੇ 18.5 ਓਵਰਾਂ ’ਚ ਚਾਰ ਵਿਕਟਾਂ ’ਤੇ 174 ਦੌੜਾਂ ਬਣਾ ਕੇ ਮੈਚ ਆਪਣੇ ਨਾਂਅ ਕਰ ਲਿਆ।
