Reunited With Family: (ਨਰੇਸ਼ ਕੁਮਾਰ) ਸੰਗਰੂਰ। ਸ਼ਾਹ ਸਤਿਨਾਮ ਜੀ ਗ੍ਰੀਨ ਐੱਸ ਵੈਲਫੇਅਰ ਕਮੇਟੀ ਬਲਾਕ ਸੰਗਰੂਰ ਦੇ ਸੇਵਾਦਾਰਾਂ ਵੱਲੋਂ ਮਾਨਸਿਕ ਪੱਖੋਂ ਪਰੇਸ਼ਾਨ ਇੱਕ ਵਿਅਕਤੀ ਦੀ ਸਾਂਭ-ਸੰਭਾਲ ਕਰਕੇ ਉਸਨੂੰ ਉਸਦੇ ਇਲਾਕੇ ਤੱਕ ਪਹੁੰਚਾਉਣ ਦਾ ਉਪਰਾਲਾ ਕੀਤਾ ਗਿਆ।  ਇਸ ਸਬੰਧੀ ਰਿਟਾਇਰਡ ਇੰਸਪੈਕਟਰ ਜੁਗਰਾਜ ਸਿੰਘ ਸੰਗਰੂਰ ਨੇ ਦੱਸਿਆ ਕਿ ਇੱਕ ਬਜ਼ੁਰਗ ਵਿਅਕਤੀ ਤਰਸਯੋਗ ਹਾਲਤ ਵਿੱਚ ਘਰਾਚੋਂ ਇਲਾਕੇ ਦੇ ਪਿੰਡਾਂ ਵਿੱਚ ਘੁੰਮ ਰਿਹਾ ਸੀ।

ਇਹ ਵੀ ਪੜ੍ਹੋ: Fake Medicine: ਸਰਕਾਰ ਨੇ ਨਕਲੀ ਦਵਾਈਆਂ ਦੇ ਰੈਕੇਟ ਵਿਰੁੱਧ ਕੀਤੀ ਵੱਡੀ ਕਾਰਵਾਈ ਕੀਤੀ

ਟੀਮ ਵੱਲੋਂ ਉਸਦੀ ਸਾਂਭ-ਸੰਭਾਲ ਕਰਦਿਆਂ ਉਸਨੂੰ ਐਮਐਸਜੀ ਡੇਰਾ ਸੱਚਾ ਸੌਦਾ ਤੇ ਮਾਨਵਤਾ ਭਲਾਈ ਕੇਂਦਰ ਸੰਗਰੂਰ ਵਿਖੇ ਲਿਆਂਦਾ ਗਿਆ। ਇੱਥੇ ਉਸਨੂੰ ਚਾਹ-ਪਾਣੀ ਅਤੇ ਖਾਣਾ ਖੁਆਇਆ ਗਿਆ। ਉਸ ਸਮੇਂ ਵਿਅਕਤੀ ਦੀ ਮਾਨਸਿਕ ਹਾਲਤ ਠੀਕ ਨਾ ਹੋਣ ਕਾਰਨ ਉਸਨੂੰ ਸਾਂਭ-ਸੰਭਾਲ ਲਈ ਬਿਰਧ ਆਸ਼ਰਮ ਬਡਰੁੱਖਾ ਵਿਖੇ ਦਾਖਲ ਕਰਵਾਇਆ ਗਿਆ। ਕੁਝ ਸਮੇਂ ਬਾਅਦ ਹਾਲਤ ਵਿੱਚ ਸੁਧਾਰ ਆਉਣ ’ਤੇ ਪੁੱਛਗਿੱਛ ਦੌਰਾਨ ਉਸਨੇ ਆਪਣਾ ਨਾਮ ਲੱਛਮੀ ਨਰਾਇਣ ਪੁੱਤਰ ਸੁਰੇਸ਼ ਚੰਦ ਮਈਆ ਅਤੇ ਵਾਸੀ ਦਮੋਦਰਪੁਰ, ਜ਼ਿਲ੍ਹਾ ਮਧੂਬਨੀ, ਬਿਹਾਰ ਦੱਸਿਆ।

ਟੀਮ ਵੱਲੋਂ ਪਿੰਡ ਦੇ ਸਰਪੰਚ ਨਾਲ ਸੰਪਰਕ ਕੀਤਾ ਗਿਆ, ਜਿਸ ਨੇ ਦੱਸਿਆ ਕਿ ਲੱਛਮੀ ਨਰਾਇਣ ਕਰੀਬ 10 ਸਾਲ ਤੋਂ ਪਿੰਡ ਤੋਂ ਲਾਪਤਾ ਹੈ ਅਤੇ ਉਹ ਕੁਆਰਾ ਹੈ। ਇਸ ਦੌਰਾਨ ਬਿਹਾਰ ਨਾਲ ਸਬੰਧਤ ਰੰਜਣ ਯਾਦਵ ਅਤੇ ਕ੍ਰਿਸ਼ਨਾ ਯਾਦਵ ਉੱਥੇ ਆਪਣੇ ਚਾਚਾ ਕਮਲੇਸ਼ਵਰੀ ਨੂੰ ਲੈਣ ਲਈ ਪਹੁੰਚੇ। ਉਨ੍ਹਾਂ ਨੇ ਲੱਛਮੀ ਨਰਾਇਣ ਨੂੰ ਆਪਣੇ ਇਲਾਕੇ ਦਾ ਦੱਸਦਿਆਂ ਉਸਨੂੰ ਆਪਣੇ ਨਾਲ ਘਰ ਪਹੁੰਚਾਉਣ ਦੀ ਗੱਲ ਕਹੀ। ਲੱਛਮੀ ਨਰਾਇਣ ਨੇ ਵੀ ਉਨ੍ਹਾਂ ਨੂੰ ਪਛਾਣਦਿਆਂ ਉਨ੍ਹਾਂ ਨਾਲ ਜਾਣ ਲਈ ਸਹਿਮਤੀ ਪ੍ਰਗਟਾਈ। ਟੀਮ ਵੱਲੋਂ ਉਨ੍ਹਾਂ ਦੀ ਸਹਿਮਤੀ ਨਾਲ ਰੇਲ ਟਿਕਟ ਅਤੇ ਰਸਤੇ ਦੇ ਖਰਚੇ ਦਾ ਪ੍ਰਬੰਧ ਕੀਤਾ ਗਿਆ। ਇਸ ਤੋਂ ਬਾਅਦ ਉਸਨੂੰ ਕਾਰ ਰਾਹੀਂ ਜਾਖਲ ਰੇਲਵੇ ਸਟੇਸ਼ਨ ਪਹੁੰਚਾ ਕੇ ਰੇਲ ਰਾਹੀਂ ਉਸਦੇ ਇਲਾਕੇ ਵੱਲ ਰਵਾਨਾ ਕੀਤਾ ਗਿਆ। ਇਸ ਸੇਵਾ ਕਾਰਜ ਵਿੱਚ ਪ੍ਰੇਮੀ ਦਿਕਸ਼ਾਂਤ ਇੰਸਾਂ, ਸਤਪਾਲ ਇੰਸਾਂ, ਡਾ. ਜਗਦੀਸ਼ ਇੰਸਾਂ ਘਰਾਚੋਂ ਅਤੇ ਬਿਰਧ ਆਸ਼ਰਮ ਬਡਰੁੱਖਾ ਦੇ ਪ੍ਰਬੰਧਕਾਂ ਦਾ ਵੀ ਵਿਸ਼ੇਸ਼ ਯੋਗਦਾਨ ਰਿਹਾ।