ਨਵੀਂ ਦਿੱਲੀ (ਸੱਚ ਕਹੂੰ ਨਿਊਜ਼/ਹਿੰ.ਸ.)। ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਨੇ ਵੀਰਵਾਰ ਨੂੰ ਸਾਲ 2022 ਦੇ ਕੋਇੰਬਟੂਰ ਬੰਬ ਧਮਾਕੇ ਮਾਮਲੇ ’ਚ ਅੱਤਵਾਦੀ ਫੰਡਿੰਗ ਜਾਂਚ ਸਬੰਧ ’ਚ ਚੇਨਈ, ਕੋਇੰਬਟੂਰ, ਹੈਦਰਾਬਾਦ ਤੇ ਮੁੰਬਈ ’ਚ 16 ਥਾਵਾਂ ’ਤੇ ਇੱਕੋ ਸਮੇਂ ਛਾਪੇਮਾਰੀ ਕੀਤੀ। ਜਾਂਚ ’ਚ ਖੁਲਾਸਾ ਹੋਇਆ ਕਿ ਧਮਾਕੇ ਦੇ ਮੁਲਜ਼ਮ ਨੇ ਜਾਅਲੀ ਕੋਵਿਡ-19 ਟੀਕਾ ਸਰਟੀਫਿਕੇਟ ਘੁਟਾਲੇ ਰਾਹੀਂ ਤੇ ਕੋਵਾਈ ਅਰਬੀ ਕਾਲਜ ਦੇ ਨਾਮ ’ਤੇ ਚੰਦਾ ਤੇ ਜਾਅਲੀ ਨਿਵੇਸ਼ਾਂ ਰਾਹੀਂ ਫੰਡ ਇਕੱਠਾ ਕਰਕੇ ਅੱਤਵਾਦੀ ਗਤੀਵਿਧੀਆਂ ਨੂੰ ਵਿੱਤ ਪ੍ਰਦਾਨ ਕੀਤਾ। ਈਡੀ ਨੇ ਦੱਸਿਆ ਕਿ ਮਨੀ ਲਾਂਡਰਿੰਗ ਰੋਕਥਾਮ ਐਕਟ (ਪੀਐਮਐਲਏ) ਤਹਿਤ ਇਹ ਕਾਰਵਾਈ ਰਾਸ਼ਟਰੀ ਜਾਂਚ ਏਜੰਸੀ (ਐਨਆਈਏ) ਦੀਆਂ ਵੱਖ-ਵੱਖ ਐਫਆਈਆਰ ਆਧਾਰ ’ਤੇ ਸ਼ੁਰੂ ਕੀਤੀ ਗਈ ਜਾਂਚ ਦੇ ਹਿੱਸੇ ਵਜੋਂ ਕੀਤੀ ਜਾ ਰਹੀ ਹੈ। ਜਾਂਚ ਏਜੰਸੀ ਦੇ ਅਨੁਸਾਰ, ਸਾਲ 2022 ’ਚ ਕੋਇੰਬਟੂਰ ਦੇ ਸੰਗਮੇਸ਼ਵਰ ਮੰਦਰ ਨੇੜੇ ਆਤਮਘਾਤੀ ਕਾਰ ਬੰਬ ਧਮਾਕਾ ਜਮੇਸ਼ਾ ਮੁਬੀਨ ਤੇ ਉਸਦੇ ਸਾਥੀਆਂ ਵੱਲੋਂ ਕੀਤਾ ਗਿਆ ਸੀ। ਇਹ ਹਮਲਾ ਵਿਸਫੋਟਕਾਂ ਨਾਲ ਭਰੀ ਇੱਕ ਸ਼ੋਧੀ ਹੋਈ ਮਾਰੂਤੀ ਕਾਰ ਦੀ ਵਰਤੋਂ ਕਰਕੇ ਕੀਤਾ ਗਿਆ ਸੀ।

Read Also : Punjab Health News: ਫਰੀਦਕੋਟ ’ਚ ਡੇਂਗੂ ਖਿਲਾਫ਼ ਵੱਡੀ ਮੁਹਿੰਮ, 25 ਥਾਵਾਂ ਤੋਂ ਲਾਰਵਾ ਨਸ਼ਟ

ਜੋ ਕਿ ਪਾਬੰਦੀਸ਼ੁਦਾ ਅੱਤਵਾਦੀ ਸੰਗਠਨ ਇਸਲਾਮਿਕ ਸਟੇਟ ਆਫ ਇਰਾਕ ਐਂਡ ਸੀਰੀਆ (ਆਈਐਸਆਈਐਸ) ਤੋਂ ਪ੍ਰੇਰਿਤ ਇੱਕ ਅੱਤਵਾਦੀ ਹਮਲੇ ਦੇ ਹਿੱਸੇ ਵਜੋਂ ਕੀਤਾ ਗਿਆ ਸੀ। ਈਡੀ ਦੀ ਜਾਂਚ ’ਚ ਖੁਲਾਸਾ ਹੋਇਆ ਹੈ ਕਿ ਮੁਲਜ਼ਮਾਂ ਨੇ ਅੱਤਵਾਦੀ ਗਤੀਵਿਧੀਆਂ ਲਈ ਫੰਡ ਇਕੱਠਾ ਕਰਨ ਲਈ ਦੋ ਮੁੱਖ ਤਰੀਕਿਆਂ ਦੀ ਵਰਤੋਂ ਕੀਤੀ। ਪਹਿਲਾ, ਕੋਵਿਡ-19 ਮਹਾਂਮਾਰੀ ਦੌਰਾਨ, ਨਕਲੀ ਟੀਕਾ ਸਰਟੀਫਿਕੇਟ ਬਣਾਉਣ ਲਈ ਰੈਕੇਟ ਚਲਾਇਆ ਗਿਆ ਸੀ, ਜਿਸ ਰਾਹੀਂ ਟੀਕਾਕਰਨ ਕੀਤੇ ਬਿਨਾਂ ਸਰਟੀਫਿਕੇਟ ਮੰਗਣ ਵਾਲੇ ਲੋਕਾਂ ਤੋਂ ਪੈਸੇ ਇਕੱਠੇ ਕੀਤੇ ਗਏ। ਦੂਜਾ, ਕੋਵਾਈ ਅਰਬੀ ਕਾਲਜ ਦੇ ਨਾਂਅ ’ਤੇ ਦਾਨ ਤੇ ਧੋਖਾਧੜੀ ਵਾਲੇ ਨਿਵੇਸ਼ ਇਕੱਠੇ ਕੀਤੇ ਗਏ ਸਨ। ਜਾਂਚ ਅਨੁਸਾਰ, ਇਹ ਸੰਸਥਾ ਨੌਜਵਾਨਾਂ ਦੇ ਕੱਟੜਪੰਥੀਕਰਨ ’ਚ ਸਰਗਰਮੀ ਨਾਲ ਸ਼ਾਮਲ ਸੀ। ਈਡੀ ਨੇ ਦੱਸਿਆ ਕਿ ਬੰਬ ਧਮਾਕੇ ਮਾਮਲੇ ’ਚ 12 ਮੁਲਜ਼ਮ, ਜਿਨ੍ਹਾਂ ’ਚ ਆਤਮਘਾਤੀ ਹਮਲਾਵਰ ਜਮੇਸ਼ਾ ਮੁਬੀਨ ਵੀ ਸ਼ਾਮਲ ਹੈ, ਨੇ ਕੋਵਾਈ ਅਰਬੀ ਕਾਲਜ ’ਚ ਆਨਲਾਈਨ ਜਾਂ ਆਫਲਾਈਨ ਪੜ੍ਹਾਈ ਕੀਤੀ ਸੀ। ਜਾਂਚ ਅਨੁਸਾਰ, ਕਾਲਜ ਦੇ ਡਾਇਰੈਕਟਰ, ਜਮੀਲ ਬਾਸ਼ਾ ਨੇ ਇਨ੍ਹਾਂ ਨੌਜਵਾਨਾਂ ਨੂੰ ਸਲਾਹ ਦਿੱਤੀ, ਜੋ ਸਲਾਫੀ-ਜੇਹਾਦੀ ਵਿਚਾਰਧਾਰਾ ਤੋਂ ਪ੍ਰਭਾਵਿਤ ਹੋਏ ਤੇ ਆਈਐਸਆਈਐਸ ਸਮਰਥਨ ’ਚ ਅੱਤਵਾਦੀ ਹਮਲੇ ਕਰਨ ਦੀ ਸਾਜ਼ਿਸ਼ ਰਚੀ। ਈਡੀ ਨੇ ਕਿਹਾ ਕਿ ਮਾਮਲੇ ’ਚ ਹੋਰ ਜਾਂਚ ਜਾਰੀ ਹੈ। Coimbatore Blast