Inspirational Story: ਭਾਰਤ ਵਿੱਚ ਤੈਰਾਕੀ ਇੱਕ ਪੁਰਾਤਨ ਕਲਾ ਵਜੋਂ ਮਾਣਿਆ ਜਾਂਦਾ ਹੈ। ਇਸ ਦਾ ਵਰਣਨ ਸਾਡੇ ਧਾਰਮਿਕ ਗ੍ਰੰਥਾਂ ਵਿੱਚ ਵੀ ਮਿਲਦਾ ਹੈ। ਆਧੁਨਿਕ ਸਮੇਂ ਵਿੱਚ ਤੈਰਾਕੀ ਇੱਕ ਖੇਡ ਵਜੋਂ ਪ੍ਰਸਿੱਧ ਹੈ। ਇਹ ਇੱਕ ਅਜਿਹੀ ਖੇਡ ਹੈ ਜੋ ਸਿਹਤ ਦੇ ਨਜ਼ਰੀਏ ਤੋਂ ਸਭ ਤੋਂ ਵਧੀਆ ਮੰਨੀ ਜਾਂਦੀ ਹੈ। ਤੈਰਾਕੀ ਵਿੱਚ ਭਾਰਤ ਦੀ ਮੌਜ਼ੂਦਾ ਸਥਿਤੀ ਅੰਤਰਰਾਸ਼ਟਰੀ ਪੱਧਰ ’ਤੇ ਵਿਕਾਸਸ਼ੀਲ ਅਵਸਥਾ ਵਿੱਚ ਹੈ। ਭਾਰਤੀ ਔਰਤਾਂ ਵੀ ਤੇਜ਼ੀ ਨਾਲ ਇਸ ਖੇਤਰ ਵਿੱਚ ਅੱਗੇ ਵਧ ਰਹੀਆਂ ਹਨ। ਭਾਰਤੀ ਲੜਕੀਆਂ ਨੂੰ ਤੈਰਾਕੀ ਵਿੱਚ ਆਉਣ ਦਾ ਹੌਸਲਾ ਜਿਨ੍ਹਾਂ ਮਹਿਲਾ ਤੈਰਾਕਾਂ ਤੋਂ ਮਿਲਿਆ ਹੈ, ਉਨ੍ਹਾਂ ਵਿੱਚ ਬੁਲਾ ਚੌਧਰੀ ਦਾ ਨਾਂਅ ਪ੍ਰਮੁੱਖ ਹੈ।

ਇਹ ਖਬਰ ਵੀ ਪੜ੍ਹੋ : Seed Bill 2026: ਨਵਾਂ ਬੀਜ ਬਿੱਲ 2026, ਬੀਜ ਦੀ ਕੁਆਲਿਟੀ ਲਈ ਨਵੀਂ ਦਿਸ਼ਾ

ਬੁਲਾ ਚੌਧਰੀ ਦਾ ਜਨਮ 2 ਜਨਵਰੀ 1970 ਨੂੰ ਹੁਗਲੀ, ਪੱਛਮੀ ਬੰਗਾਲ ਵਿੱਚ ਹੋਇਆ ਸੀ। ਸਿਰਫ਼ ਦੋ ਸਾਲਾਂ ਦੀ ਉਮਰ ਤੋਂ ਹੀ ਉਨ੍ਹਾਂ ਦੀ ਤੈਰਾਕ ਵਜੋਂ ਯਾਤਰਾ ਸ਼ੁਰੂ ਹੋ ਗਈ ਸੀ, ਜਦੋਂ ਉਨ੍ਹਾਂ ਦੇ ਪਿਤਾ ਨੇ ਉਨ੍ਹਾਂ ਨੂੰ ਪਹਿਲੀ ਵਾਰ ਹੁਗਲੀ ਨਦੀ ਦੇ ਕੰਢੇ ਲੈ ਕੇ ਗਏ ਸਨ। ਪੰਜ ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੂੰ ਇੱਕ ਸਵਿਮਿੰਗ ਅਕੈਡਮੀ ਵਿੱਚ ਦਾਖਲ ਕਰਵਾਇਆ ਗਿਆ ਸੀ। 9 ਸਾਲ ਦੀ ਉਮਰ ਵਿੱਚ ਉਹ ਭਾਗੀਰਥੀ ਨਦੀ ਪਾਰ ਕਰਕੇ ਪਹਿਲੀ ਵਾਰ ਚਰਚਾ ਵਿੱਚ ਆਈਆਂ ਸਨ। ਉਹ ਇਹ ਨਦੀ ਪਾਰ ਕਰਨ ਵਾਲੀ ਸਭ ਤੋਂ ਛੋਟੀ ਉਮਰ ਦੀ ਤੈਰਾਕ ਬਣੀਆਂ ਸਨ। 1979 ਵਿੱਚ ਆਪਣੀ ਪਹਿਲੀ ਰਾਸ਼ਟਰੀ ਮੁਕਾਬਲੇ ਵਿੱਚ ਉਨ੍ਹਾਂ ਨੇ ਛੇ ਸੋਨੇ ਦੇ ਤਮਗੇ ਜਿੱਤੇ ਸਨ।

1984 ਵਿੱਚ ਬੁਲਾ ਚੌਧਰੀ ਨੇ 100 ਮੀਟਰ ਬਟਰਫਲਾਈ ਇਵੈਂਟ ਵਿੱਚ ਰਾਸ਼ਟਰੀ ਰਿਕਾਰਡ ਬਣਾਇਆ। 1986 ਵਿੱਚ ਸਿਓਲ ਵਿੱਚ ਹੋਏ ਏਸ਼ੀਆਈ ਖੇਡਾਂ ਵਿੱਚ ਬੁਲਾ ਨੇ 100 ਮੀਟਰ ਅਤੇ 200 ਮੀਟਰ ਬਟਰਫਲਾਈ ਵਿੱਚ ਰਿਕਾਰਡ ਤੋੜੇ। 1989 ਵਿੱਚ, 19 ਸਾਲ ਦੀ ਉਮਰ ਵਿੱਚ ਉਹ ਇੰਗਲਿਸ਼ ਚੈਨਲ (ਇੰਗਲੈਂਡ ਤੋਂ ਫਰਾਂਸ) ਤੈਰਨ ਵਾਲੀ ਪਹਿਲੀ ਏਸ਼ੀਆਈ ਔਰਤ ਬਣੀਆਂ, ਜਿਸ ਨੂੰ ਉਨ੍ਹਾਂ ਨੇ ਲਗਭਗ 10-11 ਘੰਟਿਆਂ ਵਿੱਚ ਪੂਰਾ ਕੀਤਾ। ਉਨ੍ਹਾਂ ਨੇ 1999 ਵਿੱਚ ਇਹ ਕਾਰਨਾਮਾ ਦੁਬਾਰਾ ਕੀਤਾ। ਬੁਲਾ ਨੇ 1991 ਵਿੱਚ ਸ੍ਰੀਲੰਕਾ ਵਿੱਚ ਹੋਈਆਂ ਦੱਖਣੀ ਏਸ਼ੀਆਈ ਖੇਡਾਂ ਵਿੱਚ 50 ਮੀ., 100 ਮੀ. ਫਰੀਸਟਾਈਲ ਅਤੇ 100 ਮੀ., 200 ਮੀਟਰ ਬਟਰਫਲਾਈ ਵਿੱਚ ਸੋਨੇ ਦੇ ਤਮਗੇ ਜਿੱਤੇ ਸਨ। ਬੁਲਾ ਚੌਧਰੀ ਨੇ 1996 ਵਿੱਚ 81 ਕਿਲੋਮੀਟਰ ਦੀ ਮੁਰਸ਼ਿਦਾਬਾਦ ਲੰਬੀ ਦੂਰੀ ਦੀ ਤੈਰਾਕੀ ਜਿੱਤੀ।

ਉਨ੍ਹਾਂ ਨੇ ਸਟਰੇਟ ਆਫ ਜਿਬਰਾਲਟਰ (2000), ਟਾਇਰਹੇਨੀਅਨ ਸਮੁੰਦਰ (2001), ਕੈਟਾਲੀਨਾ ਚੈਨਲ (2002), ਟੋਰੋਨੀਓਸ ਗਲਫ (2002), ਕੁੱਕ ਸਟਰੇਟ (2003), ਪਾਲਕ ਸਟਰੇਟ (2004, ਸ੍ਰੀਲੰਕਾ ਤੋਂ ਭਾਰਤ ਤੱਕ ਲਗਭਗ 14 ਘੰਟਿਆਂ ਵਿੱਚ), ਅਤੇ ਕੇਪ ਟਾਊਨ ਦੇ ਨੇੜੇ ਇੱਕ ਚੈਨਲ (2005) ਪਾਰ ਕੀਤੇ। 2005 ਵਿੱਚ, ਉਹ ਪੰਜ ਮਹਾਂਦੀਪਾਂ ਵਿੱਚ ਸਮੁੰਦਰੀ ਚੈਨਲਾਂ ਨੂੰ ਤੈਰ ਕੇ ਪਾਰ ਕਰਨ ਵਾਲੀ ਦੁਨੀਆਂ ਦੀ ਪਹਿਲੀ ਔਰਤ ਬਣੀਆਂ, ਜਿਸ ਕਰਕੇ ਉਨ੍ਹਾਂ ਨੂੰ ‘ਸੱਤ ਸਮੁੰਦਰ’ ਜਿੱਤਣ ਵਾਲੀ ਦਾ ਨਾਂਅ ਮਿਲਿਆ। ਬੁਲਾ ਚੌਧਰੀ ਨੂੰ ਸਮੁੰਦਰੀ ਪਾਣੀ ਨਾਲ ਐਲਰਜ਼ੀ ਸੀ। ਡਾਕਟਰਾਂ ਨੇ ਕਈ ਵਾਰ ਉਨ੍ਹਾਂ ਨੂੰ ਤੈਰਾਕੀ ਛੱਡਣ ਦੀ ਸਲਾਹ ਦਿੱਤੀ, ਪਰ ਡਾਕਟਰਾਂ ਦੀ ਸਲਾਹ ਅਤੇ ਬੁਲਾ ਦੀ ਸਰੀਰਕ ਕਮਜ਼ੋਰੀ ਉਨ੍ਹਾਂ ਦੇ ਦ੍ਰਿੜ੍ਹ ਸੰਕਲਪ ਅੱਗੇ ਕਮਜ਼ੋਰ ਪੈ ਗਈ। Inspirational Story

ਸਮੁੰਦਰੀ ਪਾਣੀ ਨਾਲ ਐਲਰਜੀ ਹੋਣ ਦੇ ਬਾਵਜੂਦ ਜੋ ਉਪਲੱਬਧੀਆਂ ਉਨ੍ਹਾਂ ਨੇ ਹਾਸਲ ਕੀਤੀਆਂ, ਉਸ ਲਈ ਉਨ੍ਹਾਂ ਨੂੰ ‘ਸਮੁੰਦਰਾਂ ਦੀ ਰਾਣੀ’ ਅਤੇ ‘ਭਾਰਤੀ ਜਲਪਰੀ’ ਵੀ ਕਿਹਾ ਜਾਂਦਾ ਹੈ। ਤੈਰਾਕੀ ਵਿੱਚ ਬੁਲਾ ਚੌਧਰੀ ਨੂੰ ਉਨ੍ਹਾਂ ਦੇ ਯੋਗਦਾਨ ਲਈ 1990 ਵਿੱਚ ਅਰਜੁਨ ਅਵਾਰਡ, 2002 ਵਿੱਚ ਤੇਨਜ਼ਿੰਗ ਨੋਰਗੇ ਨੈਸ਼ਨਲ ਐਡਵੈਂਚਰ ਅਵਾਰਡ ਅਤੇ 2009 ਵਿੱਚ ਪਦਮਸ਼੍ਰੀ ਸਨਮਾਨ ਦਿੱਤਾ ਗਿਆ। ਤੈਰਾਕੀ ਤੋਂ ਸੰਨਿਆਸ ਲੈਣ ਤੋਂ ਬਾਅਦ ਉਨ੍ਹਾਂ ਨੇ ਰਾਜਨੀਤੀ ਵਿੱਚ ਵੀ ਕਦਮ ਰੱਖਿਆ ਸੀ। ਫਿਲਹਾਲ ਉਹ ਨੌਜਵਾਨਾਂ ਨੂੰ ਤੈਰਾਕੀ ਦੀ ਕਲਾ ਸਿਖਾਉਂਦੀਆਂ ਹਨ। ਬੁਲਾ ਚੌਧਰੀ ਦੀ ਯਾਤਰਾ ਤੈਰਾਕੀ ਵਿੱਚ ਕਰੀਅਰ ਬਣਾਉਣ ਵਾਲੇ ਨੌਜਵਾਨਾਂ ਲਈ ਪ੍ਰੇਰਨਾਦਾਇਕ ਹੈ।