10 ਮਈ ਨੂੰ ਵੋਟਿੰਗ, 13 ਤਰੀਕ ਨੂੰ ਨਤੀਜੇ
Haryana Elections: (ਅਸ਼ਵਨੀ ਚਾਵਲਾ) ਚੰਡੀਗੜ੍ਹ। ਹਰਿਆਣਾ ਵਿੱਚ ਸਥਾਨਕ ਸੰਸਥਾਵਾਂ ਲਈ ਚੋਣਾਂ ਦਾ ਅਧਿਕਾਰਤ ਤੌਰ ’ਤੇ ਐਲਾਨ ਕਰ ਦਿੱਤਾ ਗਿਆ ਹੈ। ਰਾਜ ਚੋਣ ਕਮਿਸ਼ਨ ਨੇ ਸੋਨੀਪਤ, ਅੰਬਾਲਾ ਅਤੇ ਪੰਚਕੂਲਾ ਨਗਰ ਨਿਗਮਾਂ ਸਮੇਤ ਸੱਤ ਸ਼ਹਿਰੀ ਸਥਾਨਕ ਸੰਸਥਾਵਾਂ ਵਿੱਚ ਚੋਣਾਂ ਦੀ ਵਿਉਂਤਬੰਦੀ ਜਾਰੀ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ, ਕਈ ਪੰਚਾਇਤਾਂ ਅਤੇ ਵਾਰਡਾਂ ਵਿੱਚ ਖਾਲੀ ਅਸਾਮੀਆਂ ਲਈ ਉਪ-ਚੋਣਾਂ ਕਰਵਾਈਆਂ ਜਾਣਗੀਆਂ।

ਇਹ ਵੀ ਪੜ੍ਹੋ: Fraud Alert: 47.2 ਲੱਖ ਰੁਪਏ ਦੇ ਸਾਈਬਰ ਨਿਵੇਸ਼ ਘਪਲੇ ਦਾ ਪਰਦਾਫਾਸ਼

ਮੁੱਖ ਦਫ਼ਤਰ ਵਿਖੇ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਚੋਣ ਤਰੀਕਾਂ ਦਾ ਐਲਾਨ ਕਰਦੇ ਹੋਏ, ਰਾਜ ਚੋਣ ਕਮਿਸ਼ਨਰ ਦੇਵੇਂਦਰ ਸਿੰਘ ਕਲਿਆਣ ਨੇ ਕਿਹਾ ਕਿ ਵੋਟਾਂ 10 ਮਈ ਨੂੰ ਪੈਣਗੀਆਂ, ਜਿਸਦੇ ਨਤੀਜੇ 13 ਮਈ ਨੂੰ ਇੱਕੋ ਸਮੇਂ ਐਲਾਨੇ ਜਾਣਗੇ। ਸਾਰੀਆਂ ਚੋਣਾਂ ਇਲੈਕਟ੍ਰੋਨਿਕ ਵੋਟਿੰਗ ਮਸ਼ੀਨਾਂ ਦੀ ਵਰਤੋਂ ਕਰਕੇ ਕੀਤੀਆਂ ਜਾਣਗੀਆਂ। ਚੋਣ ਪ੍ਰੋਗਰਾਮ ਦੇ ਅਨੁਸਾਰ, ਇੱਕ ਨੋਟੀਫਿਕੇਸ਼ਨ ਜਲਦੀ ਹੀ ਜਾਰੀ ਕੀਤਾ ਜਾਵੇਗਾ ਅਤੇ ਉਮੀਦਵਾਰ 21 ਅਪ੍ਰੈਲ ਤੋਂ 25 ਅਪਰੈਲ ਤੱਕ ਨਾਮਜ਼ਦਗੀ ਪੱਤਰ ਜਮਾਂ ਕਰਵਾ ਸਕਣਗੇ। ਪੜਤਾਲ ਦੀ ਆਖਰੀ ਮਿਤੀ 27 ਅਪਰੈਲ ਹੈ, ਅਤੇ ਵਾਪਸੀ ਦੀ ਆਖਰੀ ਮਿਤੀ 28 ਅਪ੍ਰੈਲ ਹੈ। ਚੋਣ ਨਿਸ਼ਾਨ ਵੀ ਉਸੇ ਦਿਨ ਅਲਾਟ ਕੀਤੇ ਜਾਣਗੇ। ਜੇਕਰ ਦੁਬਾਰਾ ਵੋਟਿੰਗ ਦੀ ਲੋੜ ਪੈਂਦੀ ਹੈ, ਤਾਂ 12 ਮਈ ਨੂੰ ਸਵੇਰੇ 8 ਵਜੇ ਤੋਂ ਸ਼ਾਮ 6 ਵਜੇ ਤੱਕ ਵੋਟਿੰਗ ਹੋਵੇਗੀ।

ਇਸ ਚੋਣ ਵਿੱਚ, ਵੋਟਰ ਸਿੱਧੇ ਤੌਰ ’ਤੇ ਨਗਰ ਨਿਗਮਾਂ ਵਿੱਚ ਮੇਅਰਾਂ ਅਤੇ ਨਗਰ ਕੌਂਸਲਾਂ ਅਤੇ ਨਗਰ ਪਾਲਿਕਾਵਾਂ ਵਿੱਚ ਚੇਅਰਮੈਨ ਅਤੇ ਪ੍ਰਧਾਨਾਂ ਦੀ ਚੋਣ ਕਰਨਗੇ। ਇਹ ਚੋਣਾਂ ਸੋਨੀਪਤ, ਅੰਬਾਲਾ ਅਤੇ ਪੰਚਕੂਲਾ ਨਗਰ ਨਿਗਮਾਂ ਦੇ ਨਾਲ-ਨਾਲ ਰਿਵਾੜੀ ਨਗਰ ਪ੍ਰੀਸ਼ਦ ਅਤੇ ਧਾਰੂਹੇੜਾ, ਸਾਂਪਲਾ ਅਤੇ ਉਕਲਾਨਾ ਨਗਰ ਪਾਲਿਕਾਵਾਂ ਵਿੱਚ ਹੋਣਗੀਆਂ। ਇਨਾਂ ਸਾਰੀਆਂ ਸਥਾਨਕ ਸੰਸਥਾਵਾਂ ਦੀ ਮਿਆਦ ਪਹਿਲਾਂ ਹੀ ਖਤਮ ਹੋ ਚੁੱਕੀ ਹੈ, ਜਿਸ ਕਾਰਨ ਇਨਾਂ ਚੋਣਾਂ ਦੀ ਜ਼ਰੂਰਤ ਹੈ।