ਦਿੱਲੀ ਨੂੰ ਹਥਿਆਰ ਨਹੀਂ, ਸੁਹਿਰਦਤਾ ਚਾਹੀਦੀ ਐ

Delhi Violence | ਦਿੱਲੀ ਵਿੱਚ ਪਿਛਲੇ ਕੁੱਝ ਦਿਨਾਂ ਤੋਂ ਜੋ ਹਾਲਾਤ ਬਣੇ ਹਨ, ਉਹ ਨਾ ਸਿਰਫ਼ ਤ੍ਰਾਸਦੀਪੂਰਨ ਅਤੇ ਸ਼ਰਮਨਾਕ ਹਨ, ਸਗੋਂ ਭਾਰਤ ਦੀ ਸੰਸਕ੍ਰਿਤੀ ਅਤੇ ਏਕਤਾ ਨੂੰ ਧੁੰਦਲਾ ਕਰਨ ਵਾਲੇ ਹਨ। ਇੰਗਲੈਂਡ ਅਤੇ ਸਕਾਟਲੈਂਡ ਦੀ ਦੋ ਹਫ਼ਤੇ ਦੀ ਯਾਤਰਾ ਤੋਂ ਦਿੱਲੀ ਪਰਤਣ ‘ਤੇ ਜੋ ਹਿੰਸਾ, ਸਾੜ-ਫੂਕ, ਤਬਾਹੀ ਦੇ ਹਾਲਾਤ ਦੇਖਣ ਨੂੰ ਮਿਲੇ, ਉਸ ਤੋਂ ਮਨ ਬਹੁਤ ਦੁਖੀ ਹੋਇਆ, ਉਂਜ ਇਨ੍ਹਾਂ ਭਿਆਨਕ ਅੱਤਿਆਚਾਰਾਂ, ਤੋੜ-ਭੰਨ੍ਹ ਅਤੇ ਹਿੰਸਾ ਦੇ ਹਾਲਾਤਾਂ ਤੋਂ ਸਾਰੇ ਬਹੁਤ ਦੁਖੀ ਹਨ।

ਇਨ੍ਹਾਂ ਵਿਡੰਬਨਾਪੂਰਨ ਹਾਲਾਤਾਂ ਨੇ ਹੁਣ ਇੱਕ ਅਜਿਹਾ ਰੰਗ ਲੈ ਲਿਆ ਹੈ ਕਿ ਇਸਦਾ ਹੱਲ ਕਰਨਾ ਔਖਾ ਹੋ ਗਿਆ ਹੈ। ਸੀਏਏ ਅਰਥਾਤ ਨਾਗਰਿਕਤਾ ਸੋਧ ਕਾਨੂੰਨ ਦੇ ਨਾਂਅ ‘ਤੇ ਦਿੱਲੀ ਦੇ ਕੁੱਝ ਇਲਾਕਿਆਂ ਵਿੱਚ ਫਿਰਕੂ ਹਿੰਸਾ ਦਾ ਤਾਂਡਵ ਹੋਇਆ ਹੈ, ਉਸ ਨਾਲ ਭਾਰਤ ਦਾ ਸਿਰ ਸਮੁੱਚੀ ਦੁਨੀਆ ਵਿੱਚ ਸ਼ਰਮ ਨਾਲ ਨੀਵਾਂ ਹੋ ਗਿਆ ਹੈ। ਕਿਉਂਕਿ ਇੱਕ ਪਾਸੇ ਭਾਰਤ ਯਾਤਰਾ ‘ਤੇ ਆਏ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਭਾਰਤ ਦੀ ਧਾਰਮਿਕ ਵਿਭਿੰਨਤਾ ਵਿੱਚ ਬਣੀ ਇਸ ਰਾਸ਼ਟਰ ਦੀ ਮਜ਼ਬੂਤੀ ਦਾ ਬਖਿਆਨ ਕਰਦੇ ਹਨ ਅਤੇ ਦੂਜੇ ਪਾਸੇ ਅਸੀਂ ਭਾਰਤੀ ਧਾਰਮਿਕ ਵਿਭਿੰਨਤਾ ਨੂੰ ਵਿਚ-ਵਿਚਾਲੇ ਲਿਆ ਕੇ ਹੀ ਆਪਸ ਵਿੱਚ ਲੜ ਰਹੇ ਹਾਂ,

ਜ਼ਹਿਰ ਘੋਲ ਰਹੇ ਹਾਂ, ਇੱਕ-ਦੂਜੇ ਨੂੰ ਮਰਨ-ਮਾਰਨ ‘ਤੇ ਤੁਲੇ ਹਾਂ। ਇਹ ਸਿਰਫ ਪਾਗਲਪਣ ਹੈ, ਹਿੰਸਾ ਹੈ, ਜੋ ਹਰ ਸੂਰਤ ਵਿੱਚ ਬੰਦ ਹੋ ਜਾਣਾ ਚਾਹੀਦਾ ਹੈ। ਅਜਿਹਾ ਨਹੀਂ ਕਿ ਇਸ ਮੁਸ਼ਕਿਲ ਤੋਂ ਜਟਿਲ ਹੁੰਦੇ ਔਖੇ ਹਲਾਤਾਂ ਦਾ ਹੱਲ ਸੰਭਵ ਨਹੀਂ, ਬਿਲਕੁਲ ਸੰਭਵ ਹੈ, ਪਰ ਇਸ ਲਈ ਜ਼ਰੂਰਤ ਹੈ ਕਿ ਸਾਨੂੰ ਸੋਚ ਨੂੰ ਸੌੜੇਪਣ ਅਤੇ ਫਿਰਕੂਵਾਦ ਤੋਂ ਬਾਹਰ ਲਿਆਉਣ ਹੋਵੇਗਾ। ਅਹਿੰਸਕ ਤਰੀਕਿਆਂ ਨੂੰ ਅਪਣਾਉਣਾ ਹੋਵੇਗਾ।

ਵਿਚਾਰਯੋਗ ਹੈ ਕਿ ਜਿਸ ਜ਼ਿੰਦਗੀ ਲਈ ਸੰਘਰਸ਼, ਹਿੰਸਾ ਅਤੇ ਦੰਗੇ ਫੈਲਾ ਰਹੇ ਹਾਂ, ਉਹੀ ਖਤਮ ਹੋ ਗਈ ਤਾਂ ਫਿਰ ਸੰਘਰਸ਼ ਅਤੇ ਸੌੜਾਪਣ ਕਿਸ ਲਈ? ਇਨ੍ਹੀਂ ਦਿਨੀਂ ਅਜਿਹੀਆਂ-ਅਜਿਹੀਆਂ ਅਫਵਾਹਾਂ ਫੈਲਾਈਆਂ ਜਾ ਰਹੀਆਂ ਹਨ, ਜਿਨ੍ਹਾਂ ਨਾਲ ਦੋਵਾਂ ਪੱਖਾਂ, ਸਗੋਂ ਸਾਡੀਆਂ ਰਾਜਨੀਤਿਕ ਪਾਰਟੀਆਂ ਦੇ ਅੰਦਰ ਇੱਕ-ਦੂਜੇ ਦੇ ਪ੍ਰਤੀ ਨਫ਼ਰਤ ਪੈਦਾ ਹੋ ਰਹੀ ਹੈ ਅਤੇ ਇਹ ਦੇਸ਼ ਲਈ ਕਦੇ ਵੀ ਠੀਕ ਨਹੀਂ ਹੈ। ਬੀਤਿਆ ਪੰਦਰਵਾੜਾ ਦਿੱਲੀ ਦੇ ਇਤਿਹਾਸ ਵਿੱਚ ਕਾਲੇ ਪੰਦਰਵਾੜੇ ਦੇ ਰੂਪ ਵਿੱਚ ਯਾਦ ਰਹੇਗਾ, ਕਿਉਂਕਿ ਇਸ ਸਮੇਂ ਨਾਲ ਜੁੜੀਆਂ ਹਨ ਹਿੰਸਕ ਵਾਰਦਾਤਾਂ, ਨਿਰਦੋਸ਼ ਲੋਕਾਂ ਦੀਆਂ ਚੀਕਾਂ, ਰਾਸ਼ਟਰੀ ਸੰਪੱਤੀ ਦਾ ਤਬਾਹੀ ਭਰਿਆ ਦੌਰ, ਫਿਰਕੂ ਦੰਗੇ, ਸਾੜ-ਫੂਕ, ਡਰ ਅਤੇ ਭੈਅ ਦੀਆਂ ਭਿਆਨਕਤਾਵਾਂ, ਭਾਰਤ ਦੀ ਅਨੇਕਤਾ ਵਿੱਚ ਏਕਤਾ ਦੀ ਸੰਸਕ੍ਰਿਤੀ ਅਤੇ ਉਸਦੇ ਆਦਰਸ਼ਾਂ ਦੇ ਘਾਣ ਦੀਆਂ ਤ੍ਰਾਸਦੀਪੂਰਨ ਘਟਨਾਵਾਂ।

ਦਿੱਲੀ ਅਮਨ-ਚੈਨ, ਫਿਰਕੂ ਸੁਹਿਰਦਤਾ ਅਤੇ ਸਹਿ-ਜੀਵਨ ਦੀ ਸਾਂਝੀ ਸੰਸਕ੍ਰਿਤੀ ਦਾ ਸ਼ਹਿਰ ਰਿਹਾ ਹੈ। ਅਜਿਹੇ ਵਿੱਚ, ਮੌਜੂਦਾ ਹਾਲਾਤ ਦੇ ਪਿੱਛੇ ਪੁਲਿਸ, ਰਾਜਨੀਤਿਕ ਪਾਰਟੀਆਂ ਅਤੇ ਸਰਕਾਰ ਦੀ ਕੀ ਭੂਮਿਕਾ ਰਹੀ, ਇਸ ‘ਤੇ ਤਾਂ ਸਵਾਲ ਉੱਠਦੇ ਰਹਿਣਗੇ, ਪਰ ਜੇਕਰ ਕਿਤੇ ਹਿੰਸਾ ਹੁੰਦੀ ਹੈ, ਲੋਕਾਂ ਦੀ ਜਾਨ ਜਾਂਦੀ ਹੈ ਅਤੇ ਸ਼ਹਿਰ ਵਿੱਚ ਆਮ ਜਿੰਦਗੀ ਪ੍ਰਭਾਵਿਤ ਹੁੰਦੀ ਹੈ, ਤਾਂ ਯਕੀਨਨ ਕਾਨੂੰਨ-ਵਿਵਸਥਾ ਅਤੇ ਪ੍ਰਸ਼ਾਸਨ ‘ਤੇ ਸਵਾਲ ਖੜ੍ਹੇ ਹੁੰਦੇ ਹਨ।

ਜਾਹਿਰ-ਜਿਹੀ ਗੱਲ ਹੈ ਕਿ ਜੇਕਰ ਤੁਸੀਂ ਦੋ ਗੁੱਟਾਂ ਨੂੰ ਇੱਕ-ਦੂਜੇ ਦੇ ਆਹਮੋ-ਸਾਹਮਣੇ ਆਉਣ ਦੀ ਇਜ਼ਾਜਤ ਦੇਵੋਗੇ, ਉਨ੍ਹਾਂ ਨੂੰ ਭੜਕਾਊ ਨਾਅਰੇ ਲਾਉਣ, ਭਾਸ਼ਣ ਦੇਣ ਦੀ ਛੋਟ ਦੇਵੋਗੇ ਅਤੇ ਪਥਰਾਅ ਕਰਨ ਦਿਓਗੇ, ਤਾਂ ਹਿੰਸਾ, ਈਰਖ਼ਾ ਅਤੇ ਨਫਰਤ ਵਧੇਗੀ ਹੀ।

ਅਸੀ ਕਿਵੇਂ ਭੁਲਾ ਸਕਾਂਗੇ ਕਿ ਫਿਰਕੂਵਾਦ ਦੇ ਨਾਂਅ ‘ਤੇ ਘੋਲੇ ਜਹਿਰ ਵਿੱਚ ਕਿੰਨਾ ਕੁੱਝ ਅਸੀਂ ਗੁਆ ਦਿੱਤਾ। ਸੀਏਏ ਦਾ ਮੁੱਦਾ ਪੂਰੀ ਤਰ੍ਹਾਂ ਕਾਨੂੰਨੀ ਹੈ ਅਤੇ ਇਸਦਾ ਫੈਸਲਾ ਦੇਸ਼ ਦਾ ਸੁਪਰੀਮ ਕੋਰਟ ਹੀ ਕਰੇਗਾ। ਸਵਾਲ ਹਿੰਦੂ ਜਾਂ ਮੁਸਲਮਾਨ ਦਾ ਨਹੀਂ ਸਗੋਂ ‘ਨਾਗਰਿਕ’ ਦਾ ਹੈ। ਇਸ ਲਈ ਇਸਦੇ ਵਿਰੋਧ ਜਾਂ ਸਮੱਰਥਨ ਵਿੱਚ ਫਿਰਕੂਵਾਦੀ ਭਾਵਨਾ ਦਾ ਆਉਣਾ ਅਣ-ਉਚਿਤ ਕਿਹਾ ਜਾਵੇਗਾ। ਪਰ ਆਪਣੇ ਸਵਾਰਥਾਂ ਲਈ ਕਈ ਰਾਜਨੀਤਿਕ ਪਾਰਟੀਆਂ ਨੇ ਅਣ-ਉਚਿਤ ਨੂੰ ਉਚਿਤ ਬਣਾ ਕੇ ਭੋਲ਼ੇ-ਭਾਲੇ ਲੋਕਾਂ ਦੇ ਗਲੇ ਉਤਾਰ ਦਿੱਤਾ, ਇਸ ਲਈ ਇਸਨੂੰ ਲੈ ਕੇ ਧਰਮ ਦੇ ਆਧਾਰ ‘ਤੇ ਗੋਲਬੰਦੀ ਪੂਰੀ ਤਰ੍ਹਾਂ ਨਾ-ਮੰਨਣਯੋਗ ਹੀ ਕਹੀ ਜਾਵੇਗੀ।

ਇਸਦੀ ਵਜ੍ਹਾ ਨਾਲ ਭਾਰਤ ਦੇ ਨਾਗਰਿਕ ਫਿਰਕੂਵਾਦੀ ਖੇਮਿਆਂ ਵਿੱਚ ਨਹੀਂ ਵੰਡਣੇ ਚਾਹੀਦੈ, ਕਿਉਂਕਿ ਕਥਿਤ ਕੱਟੜ ਫਿਰਕੂਵਾਦੀ ਤਾਕਤਾਂ ਦੀਆਂ ਹਿੰਸਕ ਵਾਰਦਾਤਾਂ ਸਹੀ ਹੱਲ ਨਾ ਹੋ ਕੇ, ਸਮੱਸਿਆ ਨੂੰ ਹੋਰ ਜ਼ਿਆਦਾ ਫੈਲਾ ਦੇਣਗੀਆਂ।

ਸਮਝਣ ਦੀ ਲੋੜ ਹੈ ਕਿ ਦਿੱਲੀ ਦੇ ਨਕਸ਼ੇ ‘ਤੇ ਜੋ ਫਿਰਕੂ ਹਿੰਸਾ ਅਤੇ ਦੰਗਿਆਂ ਦੇ ਜੋ ਅਰਾਜਕ ਅਤੇ ਹਮਲਾਵਰ ਦੌਰ ਦੇਖਣ ਨੂੰ ਮਿਲ ਰਹੇ ਹਨ ਉਸਦੇ ਪਿੱਛੇ ਕਈ ਤਰ੍ਹਾਂ ਦੇ ਸ਼ਰਾਰਤੀ ਦਿਮਾਗ ਅਤੇ ਖਤਰਨਾਕ ਵਿਚਾਰ ਹਨ। ਪੂਰੇ ਦੇਸ਼ ਨੇ ਉਹ ਵੀਡੀਓ ਵੇਖੀ ਜਿਸ ਵਿੱਚ ਸੁਪਰੀਮ ਕੋਰਟ ਦੁਆਰਾ ਵਾਰਤਾਕਾਰ ਨਿਯੁਕਤ ਕੀਤੇ ਜਾਣ ਦੇ ਨਾਲ ਤੀਸਤਾ ਸੀਤਲਵਾੜ ਆਪਣੇ ਸਾਥੀਆਂ ਨਾਲ ਉੱਥੇ ਔਰਤਾਂ ਨੂੰ ਟਰੇਨਿੰਗ ਦੇ ਰਹੀ ਸਨ ਕਿ ਤੁਹਾਨੂੰ ਕਿਸ ਸਵਾਲ ਦਾ ਕੀ ਜਵਾਬ ਦੇਣਾ ਹੈ ਅਤੇ ਆਪਣੇ ਵੱਲੋਂ ਕੀ ਸਵਾਲ ਕਰਨਾ ਹੈ ਜਾਂ ਸ਼ਰਤਾਂ ਰੱਖਣੀਆਂ ਹਨ।

ਉਸ ਵੀਡੀਓ ਨੇ ਸ਼ਾਹੀਨ ਬਾਗ ਦੇ ਪਿੱਛੇ ਛਿਪੇ ਚਿਹਰੇ ਨੂੰ ਉਜਾਗਰ ਕਰ ਦਿੱਤਾ ਸੀ। ਇਹ ਸਿੱਧੇ-ਸਿੱਧੇ ਵਾਰਤਾਕਾਰਾਂ ਨੂੰ ਅਸਫਲ ਕਰਨ ਦੀ ਸਾਜਿਸ਼ ਸੀ। ਅਜਿਹੀਆਂ ਅਨੇਕਾਂ ਸਾਜਿਸ਼ਾਂ ਅਨੇਕਾਂ ਪੱਧਰਾਂ ‘ਤੇ ਹੋ ਰਹੀਆਂ ਹਨ, ਹਰ ਗਲੀ-ਮੁਹੱਲੇ ਵਿੱਚ Àੁੱਠਿਆ ਤੂਫਾਨ ਹੈ, ਜਿਸਦੇ ਦਿੱਲੀ ਦੀ ਜੀਵਨਸ਼ੈਲੀ ਅਸਤ-ਵਿਅਸਤ ਹੋ ਗਈ ਹੈ।

ਧਰਮ ਨਿਰਪੱਖ ਭਾਰਤ ਦੀ ਅਖੰਡਤਾ ਅਤੇ ਏਕਤਾ ਦਾਅ ‘ਤੇ ਲੱਗ ਗਈ ਹੈ। ਇਸ ਤਰ੍ਹਾਂ ਦਿੱਲੀ ਨੂੰ ਵੰਡਣ ਦੀ ਪੀੜ ਕਿੰਨੀ ਖਤਰਨਾਕ ਅਤੇ ਅਸਹਿ ਹੋ ਸਕਦੀ ਹੈ, ਇਹ ਭਾਰਤ ਵਾਸੀਆਂ ਲਈ ਅਣਜਾਣੀ ਵੀ ਨਹੀਂ ਹੈ। ਅਜਿਹੇ ਸਮੇਂ ਵਿੱਚ ਦਿੱਲੀ ਦੀ ਸੁਰੱਖਿਆ ਅਤੇ ਸਾਂਝੀ ਸੰਸਕ੍ਰਿਤੀ ਨੂੰ ਬਣਾਈ ਰੱਖਣ ਲਈ ਸਹੀ ਸਮੇਂ ‘ਤੇ ਸਹੀ ਫ਼ੈਸਲਾ ਲੈਣ ਵਾਲੇ ਦੂਰਦਰਸ਼ੀ, ਸਮਝਦਾਰ ਅਤੇ ਸੱਚੇ ਅਤੇ ਸਖ਼ਤ ਭਾਰਤਵਾਸੀ ਦੀ ਜ਼ਰੂਰਤ ਹੈ ਜੋ ਨਾ ਹਥਿਆਰ ਦੀ ਭਾਸ਼ਾ ਵਿੱਚ ਸੋਚਦਾ ਹੋਵੇ, ਨਾ ਸੱਤਾ ਦੀ ਭਾਸ਼ਾ ਵਿੱਚ ਬੋਲਦਾ ਹੋਵੇ ਅਤੇ ਨਾ ਹੀ ਸਵਾਰਥ ਦੀ ਤੱਕੜੀ ਵਿੱਚ ਸਾਰਿਆਂ ਨੂੰ ਤੋਲਦਾ ਹੋਵੇ।

ਭਾਈਚਾਰਕ ਏਕਤਾ ਅਤੇ ਸੁਹਿਰਦਤਾ ਦੀ ਪੂਜਾ ਨਹੀਂ, ਉਸ ਲਈ ਕਸੌਟੀ ਚਾਹੀਦੀ ਹੈ। ਏਕਤਾ ਅਤੇ ਅਖੰਡਤਾ ਦਾ ਆਦਰਸ਼ ਸ਼ਬਦਾਂ ਵਿੱਚ ਹੀ ਨਾ ਉੱਤਰੇ, ਜੀਵਨ ਦਾ ਲਾਜ਼ਮੀ ਹਿੱਸਾ ਬਣੇ। ਉਨ੍ਹਾਂ ਨੂੰ ਸਿਰਫ ਕੱਪੜਿਆਂ ਵਾਂਗ ਨਾ ਪਹਿਨਿਆ ਜਾਵੇ ਨਹੀਂ ਤਾਂ ਪਾੜ ਜਾਣ ‘ਤੇ ਇਹ ਆਦਰਸ਼ ਵੀ ਲੀਰਾਂ ਕਹਾਉਣਗੇ, ਅਜਿਹਾ ਦੇਖਣ ਅਤੇ ਕਰਨ ਲਈ ਅਨੇਕਾਂ ਲੋਕਾਂ ਦੇ ਮਨਸੂਬਿਆਂ ਨੂੰ ਵੀ ਨਾਕਾਮ ਕਰਨਾ ਹੋਵੇਗਾ।

ਕਿਉਂਕਿ ਕੋਈ ਵੀ ਦੇਸ਼ ਸਿਰਫ਼ ਵੱਡੀਆਂ-ਵੱਡੀਆਂ ਫੌਜਾਂ ਅਤੇ ਆਧੁਨਿਕ ਜੰਗੀ ਸਾਜੋ-ਸਾਮਾਨ ਰੱਖਣ ਨਾਲ ਹੀ ਮਜਬੂਤ ਨਹੀਂ ਹੁੰਦਾ ਸਗੋਂ ਨਾਗਰਿਕਾਂ ਦੇ ਭਾਈਚਾਰੇ ਅਤੇ ਏਕਤਾ ਨਾਲ ਮਜਬੂਤ ਹੁੰਦਾ ਹੈ। ਇਸ ਲਈ ਹਰ ਨਾਗਰਿਕ ਦਾ ਪਹਿਲਾ ਫਰਜ਼ ਹੈ ਕਿ ਉਹ ਇਸ ਦਿੱਲੀ ਵਿੱਚ ਫੈਲੇ ਪਾਗਲਪਣ ਨੂੰ ਆਪਣੀ ਹੈਸੀਅਤ ਮੁਤਾਬਕ ਖਤਮ ਕਰਨ ਦਾ ਪ੍ਰਣ ਲਵੇ, ਦਿੱਲੀ ਨੂੰ ਕਲੰਕਿਤ ਨਾ ਹੋਣ ਦਿਓ।
ਲਲਿਤ ਗਰਗ

ਹੋਰ ਅਪਡੇਟ ਹਾਸਲ ਕਰਨ ਲਈ ਸਾਨੂੰ Facebook ਅਤੇ Twitter ‘ਤੇ ਫਾਲੋ ਕਰੋ।

Delhi Violence | ਜ਼ਖਮੀਆਂ ਦਾ ਇਲਾਜ ਮੁਫ਼ਤ ‘ਚ ਕੀਤਾ ਜਾ ਰਿਹਾ ਹੈ : ਕੇਜਰੀਵਾਲ

ਨਵੀਂ ਦਿੱਲੀ। ਦਿੱਲੀ ਹਿੰਸਾ (Delhi Violence) ਸਬੰਧੀ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਵੱਲੋਂ ਵੀਰਵਾਰ ਭਾਵ ਅੱਜ ਪ੍ਰੈੱਸ ਕਾਨਫਰੰਸ ਕੀਤੀ। ਉਨ੍ਹਾਂ ਨੇ ਕਿਹਾ ਕਿ ਪਿਛਲੇ ਦਿਨੀਂ ਦਿੱਲੀ ‘ਚ ਹੋਈ ਹਿੰਸਾ ‘ਚ ਹਿੰਦੂ ਅਤੇ ਮੁਸਲਮਾਨ ਦੋਵਾਂ ਦਾ ਨੁਕਸਾਨ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਹਿੰਸਾ ‘ਚ ਮਰਨ ਵਾਲਿਆਂ ਦੇ ਪਰਿਵਾਰਾਂ ਨੂੰ 10-10 ਲੱਖ ਰੁਪਏ ਦਾ ਮੁਆਵਜ਼ਾ ਮਿਲੇਗਾ। ਉਨ੍ਹਾਂ ਇਹ ਵੀ ਕਿਹਾ ਕਿ ਹਸਪਤਾਲ ‘ਚ ਜ਼ਖਮੀਆਂ ਦਾ ਇਲਾਜ ਮੁਫ਼ਤ ‘ਚ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਹਿੰਸਾ ਦੇ ਦੋਸ਼ੀਆਂ ਨੂੰ ਸਖਤ ਸਜ਼ਾ ਦਿਉ, ਦੇਸ਼ ਦੀ ਸੁਰੱਖਿਆ ਨਾਲ ਸਿਆਸਤ ਕਰਨਾ ਬੰਦ ਕਰੋ। ਤਾਹਿਰ ਹੁਸੈਨ ‘ਤੇ ਬੋਲਦਿਆਂ ਕੇਜਰੀਵਾਲ ਨੇ ਕਿਹਾ ਕਿ ਜੇਕਰ ਦੰਗਿਆਂ ‘ਚ ਕੋਈ ਆਮ ਆਦਮੀ ਪਾਰਟੀ (ਆਪ) ਦਾ ਸ਼ਾਮਲ ਹੋਵੇ, ਤਾਂ ਉਸ ਨੂੰ ਦੋਗੁਣੀ ਸਜ਼ਾ ਮਿਲੇ। ਉਨ੍ਹਾਂ ਕਿਹਾ ਕਿ ਦਿੱਲੀ ਸਰਕਾਰ ਵੱਲੋਂ ਜੋ ਕਦਮ ਚੁੱਕੇ ਜਾ ਸਕਦੇ ਹਨ। Delhi Violence

ਹੋਰ ਅਪਡੇਟ ਹਾਸਲ ਕਰਨ ਲਈ ਸਾਨੂੰ Facebook ਅਤੇ Twitter ‘ਤੇ ਫਾਲੋ ਕਰੋ।

Delhi Violence

ਦਿੱਲੀ ਹਿੰਸਾ:  ਪੰਜਾਬ ਦੇ 15 ਜ਼ਿਲ੍ਹਿਆਂ ‘ਚ 46 ਥਾਵਾਂ ‘ਤੇ ਸਾੜੀਆਂ ਕੇਂਦਰ ਸਰਕਾਰ ਦੀਆਂ ਅਰਥੀਆਂ

ਬਠਿੰਡਾ, (ਸੁਖਜੀਤ ਮਾਨ) ਨਾਗਰਿਕਤਾ ਸੋਧ ਕਾਨੂੰਨ ਦੇ ਮਾਮਲੇ ‘ਚ ਦਿੱਲੀ ‘ਚ ਹੋਏ ਦੰਗਿਆਂ ਕਾਰਨ ਲੋਕਾਂ ‘ਚ ਰੋਹ ਫੈਲ ਗਿਆ ਹੈ ਇਸ ਰੋਹ ਦੇ ਚਲਦਿਆਂ ਅੱਜ ਅੱਜ ਪੰਜਾਬ ਦੀਆਂ 14 ਜਨਤਕ ਜਥੇਬੰਦੀਆਂ ਦੇ ਸੱਦੇ  ‘ਤੇ ਪੰਜਾਬ ਦੇ 15 ਜਿਲ੍ਹਿਆਂ ‘ਚ 46 ਥਾਵਾਂ ‘ਤੇ ਆਰਐਸਐਸ ਤੇ ਭਾਜਪਾ ਹਕੂਮਤ ਦੀਆਂ ਅਰਥੀਆਂ ਸਾੜਕੇ ਤਿੱਖੇ ਰੋਹ ਦਾ ਪ੍ਰਗਟਾਵਾ ਕੀਤਾ ਗਿਆ। ਇਹ ਅਰਥੀਆਂ ਅੱਜ ਜ਼ਿਲ੍ਹਾ ਹੈਡਕੁਆਰਟਰ ਬਠਿੰਡਾ ਤੋਂ ਇਲਾਵਾ, ਬਰਨਾਲਾ, ਮਾਨਸਾ, ਸੰਗਰੂਰ, ਫਰੀਦਕੋਟ, ਸ੍ਰੀ ਮੁਕਤਸਰ ਸਾਹਿਬ, ਮੋਗਾ, ਲੁਧਿਆਣਾ, ਤਰਨਤਾਰਨ, ਜਲੰਧਰ, ਪਟਿਆਲਾ, ਫਾਜਲਿਕਾ ਤੇ ਫਿਰੋਜਪੁਰ, ਅੰਮ੍ਰਿਤਸਰ, ਗੁਰਦਾਸਪੁਰ ਤੋਂ ਇਲਾਵਾ 46 ਪਿੰਡਾਂ , ਕਸਬਿਆਂ ‘ਚ ਸਾੜੀਆਂ ਗਈਆਂ

ਭਾਕਿਯੂ ਉਗਰਾਹਾਂ ਦੇ ਸੂਬਾ ਆਗੂ ਜੋਗਿੰਦਰ ਸਿੰਘ ਉਗਰਾਹਾਂ ਤੋਂ ਇਲਾਵਾ ਰਾਜਵਿੰਦਰ ਸਿੰਘ ਤੇ ਬੂਟਾ ਸਿੰਘ ਬੁਰਜ ਗਿੱਲ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਕੱਲ੍ਹ 27 ਫਰਵਰੀ ਨੂੰ ਵੀ ਇਹ ਪ੍ਰਦਰਸ਼ਨ ਜਾਰੀ ਰਹਿਣਗੇ। ਵੱਖ-ਵੱਖ ਥਾਵਾਂ ‘ਤੇ ਜੁੜੇ ਇਕੱਠਾਂ ਨੂੰ ਸੰਬੋਧਨ ਕਰਦਿਆਂ ਬੁਲਾਰਿਆਂ ਨੇ ਆਖਿਆ ਕਿ ਮੋਦੀ ਹਕੂਮਤ ਵੱਲੋਂ ਸੀ.ਏ.ਏ., ਐਨ.ਆਰ.ਸੀ. ਤੇ ਐਨ.ਪੀ.ਆਰ. ਰਾਹੀਂ ਲੋਕਾਂ ਦੇ ਨਾਗਰਿਕਤਾ ਸਬੰਧੀ ਹੱਕਾਂ ‘ਤੇ ਬੋਲੇ ਹਮਲੇ ਖਿਲਾਫ ਦਿਨੋ-ਦਿਨ ਵਧ ਰਹੀ ਸਾਂਤਮਈ ਵਿਰੋਧ ਲਹਿਰ ਨੂੰ ਸੱਟ ਮਾਰਨ ਲਈ ਭਾਜਪਾ ਤੇ ਆਰ ਐਸ ਐਸ ਵੱਲੋਂ ਗਿਣੀ ਮਿਥੀ ਸਾਜਿਸ ਤਹਿਤ ਦਿੱਲੀ ‘ਚ ਫਿਰਕੂ ਹਿੰਸਾ ਭੜਕਾਈ ਗਈ ਹੈ।

Delhi Violence | ਉਹਨਾਂ ਆਖਿਆ ਕਿ ਭਾਜਪਾ ਦੇ ਇੱਕ ਆਗੂ ਵੱਲੋਂ ਉੱਚ ਪੁਲਿਸ ਅਧਿਕਾਰੀਆਂ ਦੀ ਹਾਜਰੀ ‘ਚ ਭੜਕਾਊ ਭਾਸ਼ਣ ਦੇਣ ਨਾਲ ਹਿੰਸਾ ਭੜਕਾ ਕੇ ਦਰਜਨ ਤੋਂ ਵੱਧ  ਕਤਲ, ਸੈਂਕੜੇ ਲੋਕਾਂ ਦੇ ਗੰਭੀਰ ਜਖਮੀ ਹੋਣ ਅਤੇ ਕਰੋੜਾਂ ਦੀ ਸੰਪਤੀ ਅੱਗ ਦੀ ਭੇਂਟ ਚੜ੍ਹਾਉਣ ਦੇ ਬਾਵਜੂਦ ਪੁਲਿਸ ਵੱਲੋਂ ਉਸ ਆਗੂ ਸਮੇਤ ਹਿੰਸਾ ਕਰਨ ਵਾਲੇ ਦੋਸ਼ੀਆਂ ਨੂੰ ਅਜੇ ਤੱਕ ਵੀ ਗ੍ਰਿਫਤਾਰ ਨਾ ਕਰਨ ਤੋਂ ਸਾਬਿਤ ਹੁੰਦਾ ਹੈ ਕਿ ਪੂਰੀ ਹਕੂਮਤੀ ਮਸ਼ੀਨਰੀ ਹੀ ਮੁਸਲਮਾਨਾਂ ਖਿਲਾਫ ਹਿੰਸਾ ਭੜਕਾਉਣ ਲਈ ਜਿੰਮੇਵਾਰ ਹੈ।

ਉਹਨਾਂ ਦੋਸ਼ ਲਾਇਆ ਕਿ ਸੋਸਲ ਮੀਡੀਆ ‘ਤੇ ਦਿੱਲੀ ਪੁਲਿਸ ਦੇ ਜਵਾਨ ਮੁਸਲਿਮ ਨੌਜਵਾਨਾਂ ਨੂੰ ਡਾਂਗਾਂ ਮਾਰਦੇ ਹੋਏ ਅਜਾਦੀ ਦੇ ਨਾਅਰਿਆਂ ਬਾਰੇ ਨਿਹੋਰੇ ਮਾਰਦੇ ਹੋਏ ਪੁਲਿਸ ਦੀ ਭੂਮਿਕਾ ਨੂੰ ਜੱਗ ਜਾਹਰ ਕਰ ਰਹੇ ਹਨ। ਬੁਲਾਰਿਆਂ ਨੇ ਕਿਹਾ ਕਿ ਭਾਜਪਾ ਵੱਲੋਂ ਸ਼ਾਹੀਨ ਬਾਗ ‘ਚ ਚੱਲਦੇ ਧਰਨੇ ਨੂੰ ਲੋਕਾਂ ਲਈ ਮੁਸੀਬਤ ਤੇ ਦੇਸ਼ ਵਿਰੋਧੀ ਕਾਰਵਾਈ ਵਜੋਂ ਉਭਾਰਕੇ ਸੁਪਰੀਮ ਕੋਰਟ ਰਾਹੀਂ ਧਰਨਾ ਚਕਾਉਣ ਦੀ ਚਾਲ ਅਸਫਲ ਹੁੰਦੀ ਦਿਸਣ ਕਾਰਨ ਕੇਂਦਰੀ ਹਕੂਮਤ ਹਿੰਸਾ ਭੜਕਾਉਣ ‘ਤੇ ਉੱਤਰ ਆਈ ਹੈ।

ਉਹਨਾਂ ਮੰਗ ਕੀਤੀ ਕਿ ਭੜਕਾਊ ਭਾਸ਼ਣ ਦੇਣ ਵਾਲੇ ਭਾਜਪਾ ਆਗੂ ਸਮੇਤ ਹਿੰਸਾ ਕਰਨ ਵਾਲੇ ਸਾਰੇ ਦੋਸੀਆਂ ‘ਤੇ ਕੇਸ ਦਰਜ ਕਰਕੇ ਤਰੁੰਤ ਗ੍ਰਿਫਤਾਰ ਕੀਤਾ ਜਾਵੇ, ਦੋਸੀਆਂ ਦਾ ਸਾਥ ਦੇਣ ਵਾਲੇ ਪੁਲਿਸ ਅਧਿਕਾਰੀਆਂ ‘ਤੇ ਸਖਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ, ਮੁਸਲਮਾਨਾਂ ਦੇ ਜਾਨ ਮਾਲ ਦੀ ਰਾਖੀ ਕੀਤੀ ਜਾਵੇ ਅਤੇ ਲੋਕ ਮਾਰੂ ਹਕੂਮਤੀ ਨੀਤੀਆਂ ਵਿਰੁੱਧ ਲੋਕਾਂ ਦੇ ਸੰਘਰਸ਼ ਕਰਨ ਦੇ ਜਮਹੂਰੀ ਹੱਕ ਨੂੰ ਪੁਗਾਉਣ ਦੀ ਗਰੰਟੀ ਕੀਤੀ ਜਾਵੇ ।

Delhi Violence | ਉਹਨਾਂ ਐਲਾਨ ਕੀਤਾ ਕਿ 8 ਮਾਰਚ ਨੂੰ ਕੌਮਾਂਤਰੀ ਔਰਤ ਦਿਹਾੜੇ ਮੌਕੇ ਮਲੇਰਕੋਟਲਾ ਵਿਖੇ ਔਰਤਾਂ ਦਾ ਸੂਬਾ ਪੱਧਰੀ ਰੋਸ ਪ੍ਰਦਰਸ਼ਨ ਕਰਕੇ ਸੰਘਰਸ਼ ਨੂੰ ਅੱਗੇ ਵਧਾਇਆ ਜਾਵੇਗਾ। ਅੱਜ ਦੇ ਇਕੱਠਾਂ ਨੂੰ  ਸੁਖਦੇਵ ਸਿੰਘ ਕੋਕਰੀ ਕਲਾਂ, ਲਖਵਿੰਦਰ ਸਿੰਘ, ਜਗਮੋਹਣ ਸਿੰਘ ਜੋਰਾ ਸਿੰਘ ਨਸਰਾਲੀ ,ਹਰਿੰਦਰ ਕੌਰ ਬਿੰਦੂ, ਕੰਵਲਪ੍ਰੀਤ ਸਿੰਘ ਪੰਨੂ ਅਸਵਨੀ ਘੁੱਦਾ, ਸੁਰਿੰਦਰ ਸਿੰਘ, ਰਛਪਾਲ ਸਿੰਘ, ਛਿੰਦਰਪਾਲ ਸਿੰਘ, ਹੁਸ਼ਿਆਰ ਸਿੰਘ ਸਲੇਮਗੜ੍ਹ, ਲਛਮਣ ਸਿੰਘ ਸੇਵੇਵਾਲਾ, ਸਿੰਗਾਰਾ ਸਿੰਘ ਮਾਨ, ਮਨਜੀਤ ਸਿੰਘ ਧਨੇਰ, ਹਰਜਿੰਦਰ ਸਿੰਘ ਤੇ ਹਰਸਾ ਸਿੰਘ ਆਦਿ ਆਗੂਆਂ ਨੇ  ਸੰਬੋਧਨ ਕੀਤਾ।

ਹੋਰ ਅਪਡੇਟ ਹਾਸਲ ਕਰਨ ਲਈ ਸਾਨੂੰ Facebook ਅਤੇ Twitter ‘ਤੇ ਫਾਲੋ ਕਰੋ।