ਸਰਸਾ (ਸੱਚ ਕਹੂੰ ਨਿਊਜ)। 94 ਸਾਲ ਦੇ ਅੰਤਰਰਾਸ਼ਟਰੀ ਯੋਗ ਖਿਡਾਰੀ ਤੇ ਬਜ਼ੁਰਗ ਐਥਲੀਟ ਡਾ. ਇਲਮ ਚੰਦ ਇੰਸਾਂ ਨੂੰ ਲਾਡਰ ਸ਼ਿਵਾ ਕਾਲਜ, ਸਰਸਾ ’ਚ 15 ਤੇ 16 ਅਗਸਤ ਨੂੰ ਜ਼ਿਲ੍ਹਾ ਸਰਸਾ ਯੋਗਾ ਆਸਣ ਸਪੋਰਟਸ ਐਸੋਸੀਏਸ਼ਨ ਸਰਸਾ ਵੱਲੋਂ ਕਰਵਾਏ 42ਵੀਂ ਸਬ ਜੂਨੀਅਰ ਤੇ ਜੂਨੀਅਰ ਹਰਿਆਣਾ ਸੂਬਾ ਯੋਗਾ ਆਸਣ ਸਪੋਰਟਸ ਚੈਂਪੀਅਨਸ਼ਿਪ ’ਚ ਯੋਗਾ ਆਸਣ ਤੇ ਯੋਗਾ ਡੈਮੋ ’ਚ ਸ਼ਾਨਦਾਰ ਪ੍ਰਦਰਸ਼ਨ ਲਈ ਸਨਮਾਨਿਤ ਕੀਤਾ ਗਿਆ ਇਸ ਮੌਕੇ ਉਨ੍ਹਾਂ ਨੇ ਖੇਡ ਆਯੋਜਕਾਂ ਵੱਲੋਂ ਚੀਫ ਗੈਸਟ ਤੇ ਮੋਮੈਂਟੋ ਦੇ ਕੇ ਤੇ ਸ਼ਾਲ ਪਹਿਨਾ ਕੇ ਸਨਮਾਨਿਤ ਕੀਤਾ ਗਿਆ ਓਥੇ ਡਾ. ਇਲਮ ਚੰਦ ਇੰਸਾਂ ਨੇ ਆਪਣੀਆਂ ਸਾਰੀਆਂ ਪ੍ਰਾਪਤੀਆਂ ਦਾ ਸਿਹਰਾ ਡੇਰਾ ਸੱਚਾ ਸੌਦਾ ਦੇ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਦੀਆਂ ਪਵਿੱਤਰ ਸਿੱਖਿਆਵਾਂ ਨੂੰ ਦਿੱਤਾ  ਧਿਆਨ ਰਹੇ ਕਿ ਅੰਤਰਰਾਸ਼ਟਰੀ ਬਜ਼ੁਰਗ ਯੋਗ ਖਿਡਾਰੀ ਡਾ. ਇਲਮ ਚੰਦ ਇੰਸਾਂ ਵਰਤਮਾਨ ’ਚ ਡੇਰਾ ਸੱਚਾ ਸੌਦਾ ’ਚ ਸਥਿਤ ਸ਼ਾਹ ਸਤਿਨਾਮ ਜੀ ਪੂਰਾ ਕਲੋਨੀ ’ਚ ਰਹਿ ਰਹੇ ਹਨ ਖੇਡਣ ਤੋਂ ਪਹਿਲਾਂ ਉਹ 16 ਸਾਲ ਤੱਕ ਸਕੂਲ ’ਚ ਪ੍ਰਿੰਸੀਪਲ ਦੀਆਂ ਸੇਵਾਵਾਂ ਦੇ ਚੁੱਕੇ ਹਨ।

ਇਹ ਵੀ ਪੜ੍ਹੋ : Government Brijindra College: ਸਰਕਾਰੀ ਬਰਜਿੰਦਰਾ ਕਾਲਜ ’ਚ ਸੋਲਿਡ ਵੇਸਟ ਮੈਨੇਜਮੈਂਟ ਸਬੰਧੀ ਸੈਮੀਨਾਰ ਤੇ ਲੇਖ ਲਿਖਣ ਮੁਕਾਬਲੇ

ਯੋਗ ਦੀ ਸ਼ੁਰੂਆਤ ਉਨ੍ਹਾਂ ਨੇ ਸੰਨ 2000 ’ਚ ਕੀਤੀ ਉਸ ਸਮੇਂ ਤੋਂ ਜਿਸ ਵੀ ਮੁਕਾਬਲੇ ’ਚ ਖੇਡਣ ਜਾਂਦੇ ਹਨ, ਓਥੋਂ ਤਮਗਾ ਲੈ ਕੇ ਹੀ ਵਾਪਸ ਆਉਂਦੇ ਹਨ ਐਥਲੀਟ ਇਲਮ ਚੰਦ ਇੰਸਾਂ ਹੁਣ ਤੱਕ 550 ਤੋਂ ਜ਼ਿਆਦਾ ਤਮਗੇ ਜਿੱਤ ਚੁੱਕੇ ਹਨ, ਜਿਸ ’ਚ 113 ਅੰਤਰਰਾਸ਼ਟਰੀ, 259 ਰਾਸ਼ਟਰੀ ਤੇ ਹੋਰ ਸਟੇਟ, ਜ਼ਿਲ੍ਹਾ, ਪੇਂਡੂ ਪੱਧਰ ’ਤੇ ਤਮਗਾ ਆਪਣੇ ਨਾਂਅ ਕਰ ਚੁੱਕੇ ਹਨ ਸੰਨ 2000 ’ਚ ਇਲਮ ਚੰਦ ਇੰਸਾਂ ਕਾਫੀ ਬਿਮਾਰੀ ਸਨ, ਚੱਲ-ਫਿਰ ਨਹੀਂ ਸਕਦੇ ਸਨ ਪਰਿਵਾਰ ਇਨ੍ਹਾਂ ਨੂੰ ਮੰਜੇ ’ਤੇ ਡੇਰਾ ਸੱਚਾ ਸੌਦਾ ਲੈ ਕੇ ਆਇਆ ਤੇ ਪੂਜਨੀਕ ਗੁਰੂ ਜੀ ਨਾਲ ਮੁਲਾਕਾਤ ਕਰਵਾਈ ਤੇ ਉਨ੍ਹਾਂ ਆਪਣੀਆਂ ਸਰੀਰਕ ਪ੍ਰੇਸ਼ਾਨੀਆਂ ਬਾਰੇ ਚਰਚਾ ਕੀਤੀ ਤਾਂ ਪੂਜਨੀਕ ਗੁਰੂ ਜੀ ਨੇ ਉਨ੍ਹਾਂ ਨੂੰ ਕਸਰਤ ਅਤੇ ਯੋਗ ਕਰਨ ਦੀ ਸਲਾਹ ਦਿੱਤੀ ਪੂਜਨੀਕ ਗੁਰੂ ਜੀ ਦੀ ਪ੍ਰੇਰਨਾ ਨਾਲ ਇਲਮ ਚੰਦ ਇੰਸਾਂ ਨੇ ਪੂਰੀ ਲਗਨ ਅਤੇ ਦ੍ਰਿੜ ਸ਼ਕਤੀ ਨਾਲ ਯੋਗ ਕਰਨਾ ਸ਼ੁਰੂ ਕਰ ਦਿੱਤਾ ਕੁਝ ਦਿਨਾਂ ’ਚ ਹੀ ਉਹ ਸਰੀਰਕ ਤੌਰ ’ਤੇ ਫਿੱਟ ਹੋ ਗਏ, ਸਗੋਂ 2002 ਤੱਕ ਉਨ੍ਹਾਂ ਨੇ ਵੈਟਰਨ ਖੇਡਾਂ ’ਚ ਭਾਗ ਲੈਣਾ ਸ਼ੁਰੂ ਕਰ ਦਿੱਤਾ ਤੇ ਉਨ੍ਹਾਂ ਦੀ ਸਖਤ ਮਿਹਨਤ ਦੀ ਬਦੌਲਤ ਥੋੜੇ੍ਹ ਸਾਲਾਂ ’ਚ ਹੀ ਤਮਗੇ ਆਉਣੇ ਸ਼ੁਰੂ ਹੋ ਗਏ।

DA News Punjab: ਚੰਡੀਗੜ੍ਹ (ਅਸ਼ਵਨੀ ਚਾਵਲਾ)। ਮਹਿੰਗਾਈ ਭੱਤੇ ਨੂੰ ਲੈ ਕੇ ਹੁਣ ਸਰਕਾਰੀ ਕਰਮਚਾਰੀਆਂ ਨੂੰ ਸਮਝਾਉਂਦੇ ਹੋਏ ਸਮਝੌਤੇ ਲਈ ‘ਸੌਦਾ’ ਤੈਅ ਕਰਨ ਦੀ ਜਿੰਮੇਵਾਰੀ ਪੰਜਾਬ ਦੇ ਮੁੱਖ ਸਕੱਤਰ ਕੇ. ਏ. ਪੀ. ਸਿਨਹਾ ਨੂੰ ਸੌਂਪ ਦਿੱਤੀ ਗਈ ਹੈ ਤੇ ਜਲਦ ਹੀ ਕਰਮਚਾਰੀ ਯੂਨੀਅਨ ਲੀਡਰਾਂ ਨਾਲ ਮੁੱਖ ਸਕੱਤਰ ਕੇ. ਏ. ਪੀ. ਸਿਨਹਾ ਵੱਲੋਂ ਗੱਲਬਾਤ ਕਰਦੇ ਹੋਏ ਵਿਚਕਾਰਲਾ ਰਸਤਾ ਕੱਢਣ ਦੀ ਕੋਸ਼ਿਸ਼ ਕੀਤੀ ਜਾਏਗੀ, ਜਿਸ ਨਾਲ ਪੰਜਾਬ ਸਰਕਾਰ ’ਤੇ ਸਿੱਧਾ ਤੇ ਇਕੱਠਾ ਬੋਝ ਵੀ ਨਾ ਪਵੇ ਤੇ ਦੂਜੇ ਪਾਸੇ ਕਰਮਚਾਰੀਆਂ ਨੂੰ ਵੀ ਮਹਿੰਗਾਈ ਭੱਤੇ ਦਾ ਕੁਝ ਨਾ ਕੁਝ ਮਿਲਣਾ ਸ਼ੁਰੂ ਹੋ ਜਾਵੇ।

ਪੰਜਾਬ ਸਰਕਾਰ ਕਿਸੇ ਵੀ ਹਾਲਤ ’ਚ ਦੋ ਹਜ਼ਾਰ ਕਰੋੜ ਰੁਪਏ ਦੇਣ ਨੂੰ ਤਿਆਰ ਨਹੀਂ ਹੈ ਪਰ ਸ਼ੁਰੂਆਤ ’ਚ ਦੋ ਹਜ਼ਾਰ ਕਰੋੜ ਰੁਪਏ ਦੀ ਅਦਾਇਗੀ ਕਰਨ ਲਈ ਵੀ ਤਿਆਰੀ ਹੋ ਰਹੀ ਹੈ, ਜਿਸ ਨੂੰ ਕਿ ਪਹਿਲੀ ਕਿਸ਼ਤ ਦੇ ਰੂਪ ’ਚ ਦਿੱਤਾ ਜਾ ਸਕਦਾ ਹੈ ਹਾਲਾਂਕਿ ਇਸ ਸਬੰਧੀ ਆਖ਼ਰੀ ਫੈਸਲਾ ਕਰਮਚਾਰੀਆਂ ਯੂਨੀਅਨ ਨਾਲ ਮੀਟਿੰਗ ਤੋਂ ਬਾਅਦ ਹੀ ਹੋਏਗਾ। ਮਹਿੰਗਾਈ ਭੱਤੇ ਨੂੰ ਲੈ ਕੇ ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ਵੱਲੋਂ ਦਿੱਤੇ ਗਈ ਸਮਾਂ ਸੀਮਾ ਖ਼ਤਮ ਹੋਣ ਤੋਂ ਬਾਅਦ ਹੁਣ ਪੰਜਾਬ ਸਰਕਾਰ ਕਾਫ਼ੀ ਜ਼ਿਆਦਾ ਚਿੰਤਾ ’ਚ ਹੈ ਕਿ ਅਗਲਾ ਕਦਮ ਕੀ ਚੁੱਕਿਆ ਜਾਵੇ?

Read Also : ਭਾਰੀ ਮੀਂਹ ਨਾਲ ਚੰਡੀਗੜ੍ਹ ਤੇ ਮੁਹਾਲੀ ਦੀਆਂ ਸੜਕਾਂ ਬਣੀਆਂ ਸਮੁੰਦਰ

ਪੰਜਾਬ ਸਰਕਾਰ ਨੂੰ ਇਸ ਸਮੇਂ ਅਗਲੇ ਕਦਮ ਬਾਰੇ ਸਭ ਤੋਂ ਜਿਆਦਾ ਡਰ ਹੈ ਕਿ ਜੇਕਰ ਸੁਪਰੀਮ ਕੋਰਟ ਉਹ ਚਲੇ ਜਾਂਦੇ ਹਨ ਅਤੇ ਓਥੇ ਉਨ੍ਹਾਂ ਨੂੰ ਰਾਹਤ ਨਹੀਂ ਮਿਲਦੀ ਹੈ ਤਾਂ ਕੀ ਹੋਏਗਾ ਤੇ ਉਸ ਸਥਿਤੀ ’ਚ ਉਹ ਬੁਰੀ ਤਰ੍ਹਾਂ ਫ਼ਸ ਵੀ ਸਕਦੇ ਹਨ। ਇਸ ਲਈ ਸੁਪਰੀਮ ਕੋਰਟ ਜਾਣ ਦੀ ਥਾਂ ’ਤੇ ਪੰਜਾਬ ਸਰਕਾਰ ਵੱਲੋਂ ਕਰਮਚਾਰੀ ਯੂਨੀਅਨਾਂ ਨਾਲ ਗੱਲਬਾਤ ਕਰਨ ਦਾ ਹੀ ਰਾਹ ਖੋਲ੍ਹਣ ਦਾ ਫੈਸਲਾ ਕੀਤਾ ਗਿਆ ਹੈ। 

ਪੰਜਾਬ ਦੇ ਮੁੱਖ ਮੰਤਰੀ ਭਗਵੰਤ ਮਾਨ ਵੱਲੋਂ ਇਨ੍ਹਾਂ ਕਰਮਚਾਰੀ ਯੂਨੀਅਨਾਂ ਨੂੰ 27 ਅਗਸਤ ਦੀ ਮੀਟਿੰਗ ਦਿੱਤੀ ਗਈ ਹੈ ਪਰ ਇਸ ਮੀਟਿੰਗ ਤੋਂ ਪਹਿਲਾਂ ਹੀ ਕਰਮਚਾਰੀ ਯੂਨੀਅਨਾਂ ਨੂੰ ਪੰਜਾਬ ਸਰਕਾਰ ਗੱਲਬਾਤ ਰਾਹੀਂ ਸੌਦਾ ਤੈਅ ਕਰਨਾ ਚਾਹੁੰਦੀ ਹੈ ਤਾਂਕਿ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਮੀਟਿੰਗ ’ਚ ਕਿਸੇ ਵੀ ਤਰ੍ਹਾਂ ਦਾ ਕੋਈ ਵਿਵਾਦ ਹੋਣ ਦੀ ਥਾਂ ’ਤੇ ਪਹਿਲਾਂ ਹੀ ਸਾਰਾ ਕੁਝ ਤੈਅ ਕਰਦੇ ਹੋਏ ਮੌਕੇ ’ਤੇ ਮੁੱਖ ਮੰਤਰੀ ਵੱਲੋਂ ਐਲਾਨ ਕੀਤਾ ਜਾਵੇ। 

ਇਸ ਲਈ ਬਕਾਇਦਾ ਮੁੱਖ ਸਕੱਤਰ ਕੇ. ਏ. ਪੀ. ਸਿਨਹਾ ਦੀ ਡਿਊਟੀ ਲਗਾਈ ਗਈ ਹੈ। ਸਿਨਹਾ ਵੱਲੋਂ ਅੱਜ ਭਲਕ ’ਚ ਕਰਮਚਾਰੀ ਯੂਨੀਅਨਾਂ ਨਾਲ ਰਾਬਤਾ ਕਾਇਮ ਕਰਦੇ ਹੋਏ ਮੀਟਿੰਗ ਲਈ ਸੱਦਿਆ ਜਾਏਗਾ ਤੇ ਉਨ੍ਹਾਂ ਨਾਲ ਇਸ ਮੀਟਿੰਗ ’ਚ ਖ਼ਜਾਨਾ ਵਿਭਾਗ ਦੇ ਉੱਚ ਅਧਿਕਾਰੀ ਵੀ ਮੌਜ਼ੂਦ ਰਹਿਣਗੇ। ਮੁੱਖ ਸਕੱਤਰ ਵੱਲੋਂ ਮੀਟਿੰਗਾਂ ਰਾਹੀਂ ਸਾਰਾ ਕੁਝ ਤੈਅ ਹੋਣ ਤੋਂ ਬਾਅਦ ਖ਼ਜਾਨਾ ਮੰਤਰੀ ਹਰਪਾਲ ਸਿੰਘ ਚੀਮਾ ਨਾਲ ਮੀਟਿੰਗ ਕਰਵਾਈ ਜਾਏਗੀ ਤੇ ਹਰਪਾਲ ਸਿੰਘ ਚੀਮਾ ਵੱਲੋਂ ਇਸ ਗੱਲ ਦੀ ਸੰਤੁਸ਼ਟੀ ਕਰ ਲਈ ਜਾਏਗੀ ਕਿ ਸਾਰਾ ਕੁਝ ਠੀਕ ਤਰੀਕੇ ਨਾਲ ਤੈਅ ਹੋ ਗਿਆ ਹੈ। ਇਸ ਤੋਂ ਬਾਅਦ ਕਰਮਚਾਰੀ ਯੂਨੀਅਨ ਦੇ ਕੁਝ ਲੀਡਰਾਂ ਨੂੰ ਮੁੱਖ ਮੰਤਰੀ ਭਗਵੰਤ ਮਾਨ ਨਾਲ ਮੀਟਿੰਗ ਲਈ ਲਿਜਾਇਆ ਜਾਏਗਾ। 

ਹਾਈ ਕੋਰਟ ’ਚ ਪੁੱਜੇ ਕਰਮਚਾਰੀ, ਆਦੇਸ਼ਾਂ ਦੀ ਉਲੰਘਣਾ ਦਾ ਦੋਸ਼ 

ਪੰਜਾਬ ਅਤੇ ਹਰਿਆਣਾ ਹਾਈ ਕੋਰਟ ’ਚ ਇੱਕ ਵਾਰ ਫਿਰ ਤੋਂ ਸਰਕਾਰੀ ਕਰਮਚਾਰੀ ਪੁੱਜ ਗਏ ਹਨ ਤੇ ਉਨ੍ਹਾਂ ਵੱਲੋਂ ਹਾਈ ਕੋਰਟ ਦੇ ਡਬਲ ਬੈਂਚ ਵੱਲੋਂ ਦਿੱਤੇ ਗਏ ਆਦੇਸ਼ਾਂ ਨੂੰ ਲਾਗੂ ਨਹੀਂ ਕਰਨ ਤੇ ਆਦੇਸ਼ਾਂ ਦੀ ਉਲੰਘਣਾ ਕਰਨ ਦਾ ਦੋਸ਼ ਲਾਇਆ ਹੈ। ਹੁਣ ਇਸ ਮਾਮਲੇ ’ਚ ਅੱਜ-ਭਲਕ ਹਾਈ ਕੋਰਟ ’ਚ ਸੁਣਵਾਈ ਹੋਏਗੀ, ਜਿੱਥੇ ਕਿ ਸਰਕਾਰ ਨੂੰ ਜਵਾਬ ਦੇਣਾ ਵੀ ਔਖਾ ਹੋ ਜਾਣਾ ਹੈ ਕਿਉਂਕਿ ਪੰਜਾਬ ਸਰਕਾਰ ਨੂੰ ਮਹਿੰਗਾਈ ਭੱਤੇ ਦੇ ਬਕਾਏ ਨੂੰ ਦੇਣ ਲਈ ਹਾਈ ਕੋਰਟ ਵੱਲੋਂ 15 ਦਿਨਾਂ ਦਾ ਹੀ ਸਮਾਂ ਦਿੱਤਾ ਗਿਆ ਸੀ।

ਸਰਕਾਰੀ ਕਰਮਚਾਰੀ ਯੂਨੀਅਨਾਂ ਨੇ ਮਹਿੰਗਾਈ ਭੱਤੇ ਲਈ ਪੰਜਾਬ ਸਰਕਾਰ ਨਾਲ ਆਰ-ਪਾਰ ਦੀ ਲੜਾਈ ਸ਼ੁਰੂ ਕਰਨ ਲਈ ਪੰਜਾਬ ਭਰ ਦੇ ਸਰਕਾਰੀ ਦਫ਼ਤਰਾਂ ’ਚ ਜਾ ਕੇ ਮੀਟਿੰਗਾਂ ਕਰਨ ਦਾ ਫੈਸਲਾ ਕਰ ਲਿਆ ਗਿਆ ਹੈ। ਇਸ ਲਈ ਕਰਮਚਾਰੀ ਯੂਨੀਅਨਾਂ ਦੇ ਲੀਡਰਾਂ ਵੱਲੋਂ 15-15 ਦਿਨਾਂ ਦੀ ਛੁੱਟੀ ਲੈਂਦੇ ਹੋਏ ਪੰਜਾਬ ਦੇ ਸਾਰੇ ਜ਼ਿਲ੍ਹਿਆਂ ’ਚ ਸਰਕਾਰੀ ਕਰਮਚਾਰੀਆਂ ਨਾਲ ਮੀਟਿੰਗਾਂ ਕਰਨ ਦਾ ਪ੍ਰੋਗਰਾਮ ਵੀ ਬਣਾ ਲਿਆ ਗਿਆ ਹੈ। ਇਨ੍ਹਾਂ ਮੀਟਿੰਗਾਂ ’ਚ ਫੈਸਲਾ ਕੀਤਾ ਜਾਏਗਾ ਕਿ 27 ਅਗਸਤ ਨੂੰ ਪੰਜਾਬ ਭਰ ਦੇ ਸਾਰੇ ਸਰਕਾਰੀ ਦਫ਼ਤਰ ਬੰਦ ਰਹਿੰਦੇ ਹੋਏ ਹਰ ਜ਼ਿਲੇ੍ਹ ’ਚ ਵੱਡੇ ਪੱਧਰ ’ਤੇ ਪ੍ਰਦਰਸ਼ਨ ਕਰਨ ਤਾਂਕਿ ਸਰਕਾਰ ਨੂੰ ਸਰਕਾਰੀ ਕਰਮਚਾਰੀਆਂ ਤੇ ਪੈਨਸ਼ਨਰਾਂ ਦੀ ਤਾਕਤ ਦਾ ਅਹਿਸਾਸ ਹੋ ਜਾਵੇ।

ਜਾਲਨਾ। ਕੇਂਦਰ ਸਰਕਾਰ ਦੀ ਇੱਕ ਯੋਜਨਾ ਦਾ ਲਾਭ ਉਠਾਉਂਦੇ ਹੋਏ, ਜਾਲਨਾ ਜ਼ਿਲ੍ਹੇ ਦੇ ਅੰਤਰਵਾਲਾ ਪਿੰਡ ਦੇ ਕਿਸਾਨ ਸੰਤਾਜੀ ਭੋਇਟ ਨੇ ਮੌਸਮੀ ਦੀ ਖੇਤੀ ਸ਼ੁਰੂ ਕਰ ਦਿੱਤੀ ਹੈ। ਇਸ ਯੋਜਨਾ ਤਹਿਤ ਸਹਾਇਤਾ ਨਾਲ ਵਿਕਸਤ ਕੀਤਾ ਗਿਆ। ਉਸਦਾ ਬਾਗ਼ ਹੁਣ ਪੈਦਾ ਕਰ ਰਿਹਾ ਹੈ ਤੇ ਚੰਗੀ ਆਮਦਨ ਪੈਦਾ ਕਰ ਰਿਹਾ ਹੈ। ਹਾਲਾਂਕਿ ਇਸ ਸਾਲ ਬਹੁਤ ਜ਼ਿਆਦਾ ਬਾਰਿਸ਼ ਤੇ ਅਣਜਾਣ ਕੀੜਿਆਂ ਦੇ ਹਮਲੇ ਨੇ ਇਲਾਕੇ ਦੇ ਬਾਗਾਂ ਨੂੰ ਨੁਕਸਾਨ ਪਹੁੰਚਾਇਆ, ਫਿਰ ਵੀ ਸੰਤਾਜੀ ਭੋਇਟ ਬਾਰਿਸ਼ ਤੋਂ ਪਹਿਲਾਂ ਮੌਸਮੀ ਦੀ ਵਾਢੀ ਕਰਨ ’ਚ ਕਾਮਯਾਬ ਰਿਹਾ ਤੇ ਆਪਣੀ ਉਪਜ ਦੀ ਚੰਗੀ ਕੀਮਤ ਹਾਸਲ ਕੀਤੀ। ਕਿਸਾਨ ਦਾ ਕਹਿਣਾ ਹੈ ਕਿ ਸਰਕਾਰੀ ਯੋਜਨਾ ਦੀ ਮਦਦ ਤੋਂ ਬਿਨਾਂ, ਉਸ ਲਈ ਇੰਨਾ ਵੱਡਾ ਬਾਗ਼ ਉਗਾਉਣਾ ਆਸਾਨ ਨਹੀਂ ਸੀ। Farmer Success Story

ਜਦੋਂ ਸੰਤਾਜੀ ਭੋਇਟ ਨੂੰ ਇਸ ਯੋਜਨਾ ਬਾਰੇ ਪਤਾ ਲੱਗਾ, ਤਾਂ ਉਸਨੇ ਜਾਲਨਾ ਦੇ ਬਲਾਕ ਵਿਕਾਸ ਅਧਿਕਾਰੀ (ਘਾਟ ਵਿਕਾਸ ਅਧਿਕਾਰੀ) ਨੂੰ ਨਿਰਧਾਰਤ ਫਾਰਮੈਟ ’ਚ ਮੌਸਮੀ ਦੀ ਖੇਤੀ ਲਈ ਅਰਜ਼ੀ ਦਿੱਤੀ। ਅਰਜ਼ੀ ਦੇ ਨਾਲ, ਉਸਨੇ ਸਕੀਮ ਦੇ ਤਹਿਤ ਕੰਮ ਦੀ ਬੇਨਤੀ ਕਰਨ ਵਾਲਾ ਇੱਕ ਪੱਤਰ, ਗ੍ਰਾਮ ਪੰਚਾਇਤ ਦੇ ਗ੍ਰਾਮ ਸਭਾ ਦੇ ਮਤੇ ਦੀ ਇੱਕ ਕਾਪੀ, ਆਪਣਾ ਆਧਾਰ ਕਾਰਡ, ਬੈਂਕ ਪਾਸਬੁੱਕ ਤੇ ਹੋਰ ਜ਼ਰੂਰੀ ਦਸਤਾਵੇਜ਼ ਗ੍ਰਾਮ ਸੇਵਕ ਨੂੰ ਸੌਂਪੇ। ਨਿਰਧਾਰਤ ਪ੍ਰਕਿਰਿਆਵਾਂ ਨੂੰ ਪੂਰਾ ਕਰਨ ਤੋਂ ਬਾਅਦ, ਉਸਨੇ ਯੋਜਨਾ ਦੇ ਲਾਭ ਹਾਸਲ ਕੀਤੇ ਤੇ ਆਪਣੇ ਖੇਤ ’ਚ ਮੌਸਮੀ ਦਾ ਬਾਗ਼ ਲਾਉਣਾ ਸ਼ੁਰੂ ਕਰ ਦਿੱਤਾ। ਇਸ ਯੋਜਨਾ ਰਾਹੀਂ, ਸੰਤਾਜੀ ਭੋਇਟੇ ਨੇ ਆਪਣੇ ਫਾਰਮ ’ਤੇ 600 ਮੌਸਮੀ ਦੇ ਦਰੱਖਤ ਲਗਾਏ। ਇਸ ਬਾਗ਼ ਵਿੱਚ ਟੋਏ ਪੁੱਟਣ ਤੋਂ ਲੈ ਕੇ ਲਾਉਣਾ, ਖਾਦ ਪਾਉਣਾ ਤੇ ਨਦੀਨ ਕੱਢਣ ਤੱਕ ਕਈ ਕੰਮ ਸ਼ਾਮਲ ਸਨ। ਉਸਨੂੰ 600 ਪੌਦਿਆਂ ਲਈ ਪ੍ਰਤੀ ਪੌਦਾ 40 ਰੁਪਏ ਦੀ ਦਰ ਨਾਲ ਸਕੀਮ ਤਹਿਤ ਸਬਸਿਡੀ ਵੀ ਮਿਲੀ।

ਇਹ ਵੀ ਪੜ੍ਹੋ : Iron Deficiency: ਸਰੀਰ ’ਚ ਆਇਰਨ ਦੀ ਕਮੀ ਨੂੰ ਨਾ ਕਰੋ ਨਜ਼ਰਅੰਦਾਜ਼, ਵੱਧ ਸਕਦੈ ਅਨੀਮੀਆ ਦਾ ਖਤਰਾ

ਇਸ ਨਾਲ ਬਾਗ਼ ਸਥਾਪਤ ਕਰਨ ਦੀ ਲਾਗਤ ਘੱਟ ਗਈ ਤੇ ਉਸਨੂੰ ਆਪਣੀ ਜ਼ਮੀਨ ’ਤੇ ਲੰਬੇ ਸਮੇਂ ਦੀ ਆਮਦਨ ਦਾ ਇੱਕ ਵਾਧੂ ਸਰੋਤ ਵਿਕਸਤ ਕਰਨ ’ਚ ਮਦਦ ਮਿਲੀ। ਸੰਤਾਜੀ ਭੋਇਟੇ ਨੇ ਦੱਸਿਆ ਕਿ ਪਿਛਲੇ ਦੋ ਸਾਲਾਂ ਤੋਂ, ਬਾਗ਼ ਹਰ ਸਾਲ ਲਗਭਗ 3 ਟਨ ਮੌਸਮੀ ਦਾ ਉਤਪਾਦਨ ਕਰਦਾ ਹੈ, ਜਿਸ ਨਾਲ ਉਸਨੂੰ ਚੰਗੀ ਆਮਦਨ ਹੁੰਦੀ ਹੈ। ਇਸ ਸਾਲ, ਉਸਨੂੰ ਲਗਭਗ 5 ਤੋਂ 6 ਟਨ ਪੈਦਾ ਹੋਣ ਦੀ ਉਮੀਦ ਸੀ। ਹਾਲਾਂਕਿ, ਇੱਕ ਅਣਜਾਣ ਕੀਟ ਦੇ ਹਮਲੇ ਤੇ ਬਹੁਤ ਜ਼ਿਆਦਾ ਬਾਰਿਸ਼ ਨੇ ਬਾਗ਼ ਨੂੰ ਕਾਫ਼ੀ ਨੁਕਸਾਨ ਪਹੁੰਚਾਇਆ। ਇਸ ਦੇ ਬਾਵਜੂਦ, ਉਸਨੂੰ ਬਾਰਿਸ਼ ਤੋਂ ਪਹਿਲਾਂ ਮੌਸਮੀ ਦੀ ਕਟਾਈ ਤੋਂ ਕਾਫ਼ੀ ਆਮਦਨ ਹੋਈ। ਸੰਤਾਜੀ ਭੋਇਟੇ ਕਹਿੰਦੇ ਹਨ ਕਿ ਮੌਸਮ ਅਤੇ ਕੀੜਿਆਂ ਕਾਰਨ ਹੋਏ ਨੁਕਸਾਨ ਦੇ ਬਾਵਜੂਦ, ਉਸਦੇ ਬਾਗ਼ ਤੋਂ ਆਮਦਨ ਉਸਦੇ ਲਈ ਕਾਫ਼ੀ ਲਾਭਦਾਇਕ ਸਾਬਤ ਹੋ ਰਹੀ ਹੈ। Farmer Success Story

ਉਸਨੇ ਕਿਸਾਨਾਂ ਦੇ ਹਿੱਤ ’ਚ ਲਾਗੂ ਕੀਤੀਆਂ ਗਈਆਂ ਯੋਜਨਾਵਾਂ ਲਈ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਤੇ ਕੇਂਦਰ ਸਰਕਾਰ ਦਾ ਧੰਨਵਾਦ ਕੀਤਾ। ਉਸਨੇ ਕਿਹਾ ਕਿ ਸਰਕਾਰ ਦੀ ਇਸ ਯੋਜਨਾ ਨੇ ਉਸਨੂੰ ਆਪਣਾ ਬਾਗ਼ ਸਥਾਪਤ ਕਰਨ ’ਚ ਮਦਦ ਕੀਤੀ, ਤੇ ਹੁਣ ਉਸਨੂੰ ਇਸ ਤੋਂ ਨਿਯਮਤ ਆਮਦਨ ਹੋ ਰਹੀ ਹੈ। ਉਸਨੇ ਹੋਰ ਕਿਸਾਨਾਂ ਨੂੰ ਅਜਿਹੀਆਂ ਯੋਜਨਾਵਾਂ ਬਾਰੇ ਸਿੱਖਣ ਅਤੇ ਆਪਣੀ ਯੋਗਤਾ ਅਨੁਸਾਰ ਇਹਨਾਂ ਦਾ ਲਾਭ ਉਠਾਉਣ ਦੀ ਅਪੀਲ ਕੀਤੀ। ਉਸਦੇ ਅਨੁਸਾਰ, ਸਰਕਾਰੀ ਸਹਾਇਤਾ, ਸਖ਼ਤ ਮਿਹਨਤ ਤੇ ਸਹੀ ਖੇਤੀ ਵਿਕਲਪਾਂ ਦੀ ਚੋਣ ਕਿਸਾਨਾਂ ਦੀ ਆਮਦਨ ਵਧਾਉਣ ’ਚ ਮਹੱਤਵਪੂਰਨ ਭੂਮਿਕਾ ਨਿਭਾ ਸਕਦੀ ਹੈ। ਮੌਸਮੀ ਦੀ ਖੇਤੀ ਲਾਭਦਾਇਕ ਸਾਬਤ ਹੋਈ ਹੈ, ਤੇ ਹੋਰ ਕਿਸਾਨ ਵੀ ਉਪਲਬਧ ਸਰਕਾਰੀ ਯੋਜਨਾਵਾਂ ਦਾ ਲਾਭ ਉਠਾ ਕੇ ਆਪਣੀਆਂ ਖੇਤੀਬਾੜੀ ਗਤੀਵਿਧੀਆਂ ਨੂੰ ਮਜ਼ਬੂਤ ​​ਕਰ ਸਕਦੇ ਹਨ।

Welfare Work: ਹਨੁਮਾਨਗੜ੍ਹ (ਸੱਚ ਕਹੂੰ ਨਿਊਜ਼/ਹਰਦੀਪ ਸਿੰਘ)। ਸੱਚੇ ਰੂਹਾਨੀ ਰਹਿਬਰ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਦੀਆਂ ਪਵਿੱਤਰ ਸਿੱਖਿਆਵਾਂ ਤੋਂ ਪੇ੍ਰਰਿਤ ਹੋ ਕੇ ਡੇਰਾ ਸੱਚਾ ਸੌਦਾ ਦੇ ਸੇਵਾਦਾਰ ਸਮਾਜ਼ ਭਲਾਈ ਦੇ ਕਾਰਜ਼ਾ ’ਚ ਜ਼ਰੂਰਤਮੰਦ ਪਰਿਵਾਰਾਂ ਦੀ ਮੱਦਦ ਲਈ ਅੱਗੇ ਆ ਰਹੇ ਹਨ। ਇਸੇ ਲੜੀ ’ਚ ਬਲਾਕ ਹਨੁਮਾਨਗੜ੍ਹ ਦੇ ਸੇਵਾਦਾਰਾਂ ਨੇ ਇੱਕ ਜ਼ਰੂਰਤਮੰਦ ਪਰਿਵਾਰ ਦੀ ਧੀ ਦੇ ਵਿਆਹ ’ਚ ਸਹਿਯੋਗ ਕਰਕੇ ਮਾਨਵਤਾ ਦੀ ਮਿਸਾਲ ਪੇਸ਼ ਕੀਤੀ। ਜਾਣਕਾਰੀ ਮੁਤਾਬਕ ਵਾਰਡ ਨੰਬਰ ਇੱਕ, ਚੱਕ 13 ਐਚਐਮਐਚ, ਅਮਰਪੁਰਾ ਥੇੜੀ ਵਾਸੀ ਗੁਰਮੇਲ ਸਿੰਘ ਦੀ ਬੇਟੀ ਰੇਸ਼ਮਾ ਦਾ ਵਿਆਹ ਸ਼ੁੱਕਰਵਾਰ ਨੂੰ ਹੋਣਾ ਸੀ। Welfare Work

ਪਰਿਵਾਰ ਦੀ ਆਰਥਿਕ ਸਥਿਤੀ ਕਮਜ਼ੋਰ ਹੋਣ ਕਾਰਨ ਵਿਆਹ ’ਚ ਬੇਟੀ ਨੂੰ ਘਰੇਲੂ ਜ਼ਰੂਰਤ ਦਾ ਸਾਮਾਨ ਦੇਣਾ ਮੁਸ਼ਕਲ ਸੀ। ਪਰਿਵਾਰ ਨੇ ਆਪਣੀ ਸਥਿਤੀ ਡੇਰਾ ਸੱਚਾ ਸੌਦਾ ਸੇਵਾਦਾਰ ਇੰਦਰਸੈਨ ਇੰਸਾਂ ਨੂੰ ਦੱਸੀ। ਇੰਦਰਸੈਨ ਇੰਸਾਂ ਨੇ ਬਲਾਕ ਦੇ ਸੱਚੇ ਨਿਮਰ ਸੇਵਾਦਾਰਾਂ ਤੇ ਸੱਚੀ ਸੇਵਾ ਸਮਿਤੀ ਦੇ ਸੇਵਾਦਾਰਾਂ ਨੂੰ ਪਰਿਵਾਰ ਦੀ ਸਥਿਤੀ ਨਾਲ ਜਾਣੂ ਕਰਵਾਇਆ। ਇਸ ਤੋਂ ਬਾਅਦ ਬਲਾਕ ਦੇ ਜ਼ਿੰਮੇਵਾਰਾਂ, ਸਾਧ-ਸੰਗਤ ਤੇ ਸੇਵਾਦਾਰਾਂ ਨੇ ਆਪਸੀ ਸਹਿਯੋਗ ਨਾਲ ਪਰਿਵਾਰ ਦੀ ਮੱਦਦ ਕਰਨ ਦਾ ਫੈਸਲਾ ਕੀਤਾ। ਸੇਵਾਦਾਰਾਂ ਨੇ ਬੇਟੀ ਦੇ ਵਿਆਹ ’ਚ ਭੇਂਟ ਕਰਨ ਲਈ ਘਰੇਲੂ ਜ਼ਰੂਰਤ ਦਾ ਸਾਮਾਨ ਇੱਕਠਾ ਕੀਤਾ।

ਇਹ ਵੀ ਪੜ੍ਹੋ : Body Donation Punjab : ਅਮਰੀਕ ਇੰਸਾਂ ਬਲਾਕ ਅਜਰੌਰ ਦੇ ਪਹਿਲੇ ਸਰੀਰਦਾਨੀ ਬਣੇ

ਵਿਆਹ ਲਈ ਭੇਂਟ ਕੀਤਾ ਜ਼ਰੂਰਤ ਦਾ ਸਾਮਾਨ | Welfare Work

ਸੇਵਾਦਾਰ ਗੁਰਮੇਲ ਸਿੰਘ ਦੇ ਨਿਵਾਸ ਸਥਾਨ ’ਤੇ ਪਹੁੰਚੇ ਤੇ ਪਰਿਵਾਰ ਨੂੰ ਵਿਆਹ ਲਈ ਘਰੇਲੂ ਸਮਾਨ ਭੇਂਟ ਕੀਤਾ। ਇਸ ਵਿੱਚ ਬੈੱਡ, ਗੱਦੇ, ਸਿਲਾਈ ਮਸ਼ੀਨ, ਪ੍ਰੈੱਸ, ਰਜਾਈਆਂ, ਗੱਦੈਲੇ, ਦਰੀਆਂ, ਖੇਸ, ਸੂਟ, ਭਾਂਡੇ ਤੇ ਤੋਹਫੇ ਦੀਆਂ ਚੀਜ਼ਾਂ ਸਮੇਤ ਹੋਰ ਘਰੇਲੂ ਜ਼ਰੂਰਤ ਦਾ ਸਾਮਨ ਸ਼ਾਮਲ ਸੀ। ਸਾਮਾਨ ਮਿਲਣ ’ਤੇ ਗੁਰਮੇਲ ਸਿੰਘ ਦੇ ਪਰਿਵਾਰ ਦੇ ਚਿਹਰੇ ’ਤੇ ਖੁਸ਼ੀ ਸਾਫ ਨਜ਼ਰ ਆਈ। ਪਰਿਵਾਰ ਨੇ ਸੇਵਾਦਾਰਾਂ ਦਾ ਧੰਨਵਾਦ ਕਰਦੇ ਹੋਏ ਉਨ੍ਹਾਂ ਨੂੰ ਸੇਵਾ ਦੀ ਪ੍ਰੇਰਨਾ ਦੇਣ ਵਾਲੇ ਪੂਜਨੀਕ ਗੁਰੂ ਜੀ ਦਾ ਵੀ ਧੰਨਵਾਦ ਕੀਤਾ। ਨਾਲ ਹੀ ਮੌਕੇ ’ਤੇ ਪਹੁੰਚੇ ਪਿੰਡ ਦੇ ਹੋਰ ਮੁੱਖ ਵਾਸੀਆਂ ਨੇ ਵੀ ਸੇਵਾਦਾਰਾਂ ਦੇ ਇਸ ਸੇਵਾ ਕਾਰਜ਼ ਦੀ ਸ਼ਲਾਘਾ ਕੀਤੀ। Welfare Work

ਸੇਵਾਦਾਰਾਂ ਨੇ ਮਿਲਕੇ ਨਿਭਾਈ ਜ਼ਿੰਮੇਵਾਰੀ

ਇਸ ਸੇਵਾ ਕਾਰਜ਼ ’ਚ ਸੱਚੇ ਨਿਮਰ ਸੇਵਾਦਾਰ ਸੁਮਨ ਕਾਮਰਾ ਇੰਸਾਂ, ਹਿਮਾਂਸ਼ੂ ਇੰਸਾਂ, ਪਾਰੂਲ ਇੰਸਾਂ, ਸੁਖਚੰਦ ਇੰਸਾਂ, ਸੱਚੀ ਸੇਵਾ ਸਮਿਤੀ ਦੇ ਸੇਵਾਦਾਰ ਸੁਰੇਸ਼ ਮਰੇਜਾ ਇੰਸਾਂ, ਅਸ਼ੋਕ ਮਦਾਨ ਇੰਸਾਂ, ਗੌਰਵ ਛਾਬੜਾ ਇੰਸਾਂ, ਗੋਪਾਲ ਡੋਡਾ ਇੰਸਾਂ, ਰਵਿੰਦਰ ਫਤਿਹਗੜਿ੍ਹਆ ਇੰਸਾਂ, ਬਲਾਕ ਪ੍ਰੇਮੀ ਸੇਵਕ ਗਿਰਧਾਰੀਲਾਲ ਇੰਸਾਂ ਸਮੇਤ ਹੋਰ ਸੇਵਾਦਾਰਾਂ ਤੇ ਸਾਧ-ਸੰਗਤ ਦਾ ਸਹਿਯੋਗ ਰਿਹਾ। ਸੇਵਾਦਾਰਾਂ ਨੇ ਕਿਹਾ ਕਿ ਜ਼ਰੂਰਤਮੰਦ ਪਰਿਵਾਰਾਂ ਦੀ ਮੱਦਦ ਕਰਨ ਸਮਾਜ ਪ੍ਰਤੀ ਆਪਣੀ ਜ਼ਿੰਮੇਵਾਰੀ ਨਿਭਾਉਣ ਦਾ ਇੱਕ ਤਰੀਕਾ ਹੈ। ਅਜਿਹੇ ਸੇਵਾ ਕਾਰਜ਼ਾਂ ’ਚ ਜ਼ਰੂਰਤਮੰਦ ਪਰਿਵਾਰਾਂ ਨੂੰ ਮੱਦਦ ਮਿਲਦੀ ਹੈ ਤੇ ਸਮਾਜ਼ ’ਚ ਸਹਿਯੋਗ ਤੇ ਮਾਨਵਤਾ ਦੀ ਭਾਵਨਾ ਮਜ਼ਬੂਤ ਹੁੰਦੀ ਹੈ।

Saint Dr. MSG: 15 ਅਗਸਤ ਦੇ ਦਿਨ ਦਾ ਜਿੱਥੇ ਭਾਰਤ ਦੇ ਇਤਿਹਾਸ ਵਿੱਚ ਬਹੁਤ ਮਹੱਤਵ ਹੈ ਕਿਉਂਕਿ ਇਸ ਦਿਨ ਭਾਰਤ ਗੁਲਾਮੀ ਦੀਆ ਜੰਜੀਰਾਂ ਤੋਂ ਮੁਕਤ ਹੋਇਆ ਅਤੇ ਭਾਰਤ ਵਾਸੀਆਂ ਨੇ ਅਜ਼ਾਦੀ ਦੀ ਫਿਜ਼ਾ ਦਾ ਅਨੰਦ ਮਾਣਿਆ ਉੱਥੇ ਹੀ ਇਹ ਮੁਕੱਦਸ ਦਿਨ ਰੂਹਾਨੀਅਤ ਵਿੱਚ ਵੀ ਉੱਚ ਦਰਜੇ ਦਾ ਸਥਾਨ ਰੱਖਦਾ ਹੈ ਇਸ ਦਿਨ (15 ਅਗਸਤ 1967) ਨੂੰ ਦੁਨੀਆ ਨੂੰ ਰੂਹਾਨੀਅਤ ਦੀ ਉਹ ਜੋਤ ਮਿਲੀ ਜਿਸ ਨੇ ਸੰਸਾਰ ਵਿੱਚ ਅਗਿਆਨਤਾ, ਅੰਧਵਿਸ਼ਵਾਸ, ਜਾਤਪਾਤ, ਨਫ਼ਰਤ ਭਰੀ ਸੰਪਰਦਾਇਕਤਾ ਦੇ ਹਨ੍ਹੇਰੇ ਨੂੰ ਖ਼ਤਮ ਕਰਕੇ ਇਨਸਾਨੀਅਤ ਦਾ ਅਜਿਹਾ ਪ੍ਰਕਾਸ਼ ਕੀਤਾ ਜਿਸ ਨਾਲ ਸਮੁੱਚੀ ਮਾਨਵਤਾ ਦਾ ਕਲਿਆਣ ਹੋ ਰਿਹਾ ਹੈ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਨੇ 15 ਅਗਸਤ 1967 ਨੂੰ ਸ੍ਰੀ ਗੁਰੂਸਰ ਮੋਡੀਆ ਜ਼ਿਲ੍ਹਾ ਸ੍ਰੀ ਗੰਗਾਨਗਰ (ਰਾਜਸਥਾਨ) ਦੀ ਪਵਿੱਤਰ ਧਰਤੀ ’ਤੇ ਪੂਜਨੀਕ ਪਿਤਾ ਨੰਬਰਦਾਰ ਮੱਘਰ ਸਿੰਘ ਜੀ ਅਤੇ ਪੂਜਨੀਕ ਮਾਤਾ ਨਸੀਬ ਕੌਰ ਜੀ ਦੇ ਘਰ ਅਵਤਾਰ ਧਾਰਨ ਕੀਤਾ ਆਪ ਜੀ ਆਪਣੇ ਮਾਤਾ-ਪਿਤਾ ਦੀ ਇਕਲੌਤੀ ਸੰਤਾਨ ਹਨ ਪੂਜਨੀਕ ਬਾਪੂ ਜੀ ਪਿੰਡ ਦੇ ਨੰਬਰਦਾਰ ਅਤੇ ਬਹੁਤ ਵੱਡੇ ਜ਼ਿੰਮੀਦਾਰ ਸਨ। Saint Dr. MSG

ਘਰ ਵਿੱਚ ਦੁਨਿਆਵੀ ਚੀਜ ਦੀ ਕੋਈ ਘਾਟ ਨਹੀਂ ਸੀ ਬਹੁਤ ਵੱਡਾ ਘਰਾਣਾ, ਖੁੱਲ੍ਹੀ ਜਮੀਨ ਜਾਇਦਾਦ, ਹਰ ਸੁਖ ਸਹੂਲਤ ਦੇ ਸਾਧਨ ਮੌਜੂਦ ਸਨ ਪਰ ਇੰਨੇ ਵੱਡੇ ਘਰਾਣੇ ’ਚ ਜੇਕਰ ਕੋਈ ਘਾਟ ਸੀ ਤਾਂ ਉਹ ਸੀ ਖਾਨਦਾਨ ਦੇ ਵਾਰਿਸ ਦੀ ਘਰ ਵਿੱਚ ਸਭ ਕੁਝ ਸੀ ਪਰ ਔਲਾਦ ਨਾ ਹੋਣ ਦੀ ਚਿੰਤਾ ਆਦਰਯੋਗ ਬਾਪੂ ਜੀ ਅਤੇ ਮਾਤਾ ਜੀ ਨੂੰ ਸਤਾਉਂਦੀ ਰਹਿੰਦੀ ਪੂਜਨੀਕ ਬਾਪੂ ਜੀ ਦਾ ਪਿੰਡ ਦੇ ਸੰਤ ਤ੍ਰਿਵੈਣੀ ਦਾਸ ਜੀ ਨਾਲ ਬਹੁਤ ਸਹਿਚਾਰ ਸੀ ਬਾਪੂ ਜੀ ਨੇ ਆਪਣੀ ਚਿੰਤਾ ਉਨ੍ਹਾਂ ਅੱਗੇ ਜਾਹਿਰ ਕੀਤੀ ਤਾਂ ਉਨ੍ਹਾਂ ਨੇ ਪੂਰਾ ਹੌਸਲਾ ਦਿੰਦੇ ਹੋਏ ਕਿਹਾ ਤੁਸੀਂ ਫਿਕਰ ਨਾ ਕਰੋ ਆਪ ਜੀ ਦੇ ਘਰ ਕੋਈ ਆਮ ਬੱਚਾ ਜਨਮ ਨਹੀਂ ਲਵੇਗਾ ਸਮਾਂ ਆਉਣ ’ਤੇ ਖੁਦ ਪਰਮ ਪਿਤਾ ਪਰਮਾਤਮਾ ਆਪਣਾ ਸਵਰੂਪ ਤੁਹਾਡੇ ਘਰ ਭੇਜੇਗਾ।

18 ਸਾਲ ਦੀ ਲੰਬੀ ਉਡੀਕ ਤੋਂ ਬਾਅਦ ਆਪ ਜੀ ਨੇ ਪੂਜਨੀਕ ਮਾਤਾ-ਪਿਤਾ ਜੀ ਦੇ ਘਰ ਇਕਲੌਤੀ ਔਲਾਦ ਦੇ ਰੂਪ ’ਚ ਅਵਤਾਰ ਧਾਰਨ ਕੀਤਾ ਜਦੋਂ ਆਪ ਜੀ 4-5 ਸਾਲ ਦੇ ਸਨ ਤਾਂ ਸੰਤ ਤ੍ਰਿਵੈਣੀ ਦਾਸ ਜੀ ਨੇ ਆਪ ਜੀ ਦੇ ਪਵਿੱਤਰ ਕਰ ਕਮਲਾਂ ਤੋਂ ਕਹੀਂ ਦਾ ਟੱਕ ਲਵਾ ਕੇ ਪਿੰਡ ਵਿੱਚ ਬਣਨ ਵਾਲੀ ਪਾਣੀ ਦੀ ਡਿੱਗੀ ਦਾ ਮਹੂਰਤ ਕਰਵਾਇਆ ਅਤੇ ਕਿਹਾ ਇਨ੍ਹਾਂ (ਪੂਜਨੀਕ ਹਜੂਰ ਪਿਤਾ ਜੀ) ਬਾਰੇ ਅਜੇ ਤੁਹਾਨੂੰ ਕੁਝ ਵੀ ਪਤਾ ਨਹੀਂ, ਸਮਾਂ ਆਉਣ ’ਤੇ ਪਤਾ ਚੱਲੇਗਾ ਕਿ ਇਹ ਕਿੰਨੀ ਮਹਾਨ ਹਸਤੀ ਹਨ ਪੂਜਨੀਕ ਬਾਪੂ ਜੀ ਆਪ ਜੀ ਨਾਲ ਬਹੁਤ ਪਿਆਰ ਸਤਿਕਾਰ ਕਰਦੇ ਆਪ ਜੀ ਦੀ ਕਹੀ ਕੋਈ ਗੱਲ ਨਹੀਂ ਮੋੜਦੇ ਸਨ ਪਿਆਰ ਇੰਨਾ ਕਿ ਆਪ ਜੀ ਨੂੰ ਮੋਢਿਆਂ ’ਤੇ ਬਿਠਾ ਕੇ ਖੇਤ ਲੈ ਜਾਂਦੇ।

ਇਹ ਵੀ ਪੜ੍ਹੋ : Tree Plantation: ਪੂਜਨੀਕ ਗੁਰੂ ਸੰਤ ਡਾ. ਐੱਮਐੱਸਜੀ ਦੇ ਅਵਤਾਰ ਦਿਵਸ ’ਤੇ ਧਰਤੀ ਨੂੰ ਹਰਿਆਲੀ ਦਾ ਤੋਹਫਾ

ਸਤਿਗੁਰੂ ਨਾਲ ਮਿਲਾਪ

ਪੂਜਨੀਕ ਗੁਰੂ ਜੀ ਨੇ 5-6 ਸਾਲ ਦੀ ਉਮਰ ਵਿੱਚ ਹੀ ਪੂਜਨੀਕ ਪਰਮ ਪਿਤਾ ਸ਼ਾਹ ਸਤਿਨਾਮ ਸਿੰਘ ਜੀ ਮਹਾਰਾਜ ਤੋਂ ਨਾਮ ਦੀ ਅਨਮੋਲ ਦਾਤ ਪ੍ਰਾਪਤ ਕੀਤੀ ਆਪ ਜੀ ਆਦਰਯੋਗ ਬਾਪੂ ਜੀ ਨਾਲ ਡੇਰਾ ਸੱਚਾ ਸੌਦਾ ਸ਼ਾਹ ਮਸਤਾਨਾ-ਸ਼ਾਹ ਸਤਿਨਾਮ ਜੀ ਧਾਮ ਸਰਸਾ ਆਏ ਜਦੋਂ ਪੂਜਨੀਕ ਪਰਮ ਪਿਤਾ ਸ਼ਾਹ ਸਤਿਨਾਮ ਸਿੰਘ ਜੀ ਮਹਾਰਾਜ ਤੇਰਾਵਾਸ ’ਚੋਂ ਨਾਮ ਸ਼ਬਦ ਵਾਲੇ ਪੰਡਾਲ ’ਚ ਬਿਰਾਜਮਾਨ ਹੋਏ ਤਾਂ ਆਪ ਜੀ ਨੂੰ ਅਵਾਜ ਦੇ ਕੇ ਅੱਗੇ ਬੁਲਾਇਆ ‘ਕਾਕਾ ਅੱਗੇ ਆ ਜਾ’ ਆਪਣੇ ਪਾਸ ਬਿਠਾ ਕੇ ਆਪ ਜੀ ਨੂੰ ਭਰਪੂਰ ਪਿਆਰ ਦਿੱਤਾ ਤੇ ਨਾਮ ਦੀ ਅਨਮੋਲ ਦਾਤ ਦਿੱਤੀ ਆਪ ਜੀ ਨੇ 7-8 ਸਾਲ ਦੀ ਉਮਰ ਵਿੱਚ ਟ੍ਰੈਕਟਰ ਚਲਾਉਣਾ ਸ਼ੁਰੂ ਕਰ ਦਿੱਤਾ ਸੀ।

ਉਨ੍ਹਾਂ ਦਿਨਾਂ ਵਿੱਚ ਕਿਸੇ ਖਾਸ ਘਰ ਕੋਲ ਹੀ ਟ੍ਰੈਕਟਰ ਹੁੰਦਾ ਸੀ ਇਸੇ ਉਮਰੇ ਹੀ ਆਪ ਜੀ ਨੇ ਖੇਤੀ ਸਾਂਭ-ਸੰਭਾਲ ਦਾ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਇਸ ਤੋਂ ਪਹਿਲਾਂ ਪੂਜਨੀਕ ਬਾਪੂ ਜੀ ਅਪਣੀ ਜਮੀਨ ਠੇਕੇ ’ਤੇ ਦਿੰਦੇ ਸਨ ਆਪ ਜੀ ਦੇ ਕਹਿਣ ’ਤੇ ਪੂਜਨੀਕ ਬਾਪੂ ਜੀ ਨੇ ਆਪ ਜੀ ਨੂੰ ਖੇਤੀ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਉਸ ਸਾਲ ਵਰਖਾ ਸਹੀ ਸਮੇਂ ’ਤੇ ਹੋਈ ਤੇ ਛੋਲਿਆਂ ਦੀ ਭਰਪੂਰ ਫਸਲ ਹੋਈ 9 ਸਾਲ ਦੀ ਉਮਰ ’ਚ ਆਪ ਜੀ ਨੇ ਖੇਤੀਬਾੜੀ ਦੇ ਨਾਲ-ਨਾਲ ਖੇਤੀ ਦਾ ਹਿਸਾਬ-ਕਿਤਾਬ (ਆੜ੍ਹਤੀਆ ਨਾਲ ਲੈਣ-ਦੇਣ) ਵੀ ਸੰਭਾਲ ਲਿਆ।

ਇਤਿਹਾਸਕ ਪਲ : ਪਵਿੱਤਰ ਗੁਰਗੱਦੀ ਦੀ ਬਖਸ਼ਿਸ਼ | Saint Dr. MSG

ਰੂਹਾਨੀਅਤ ਵਿੱਚ ਪਵਿੱਤਰ ਗੁਰਗੱਦੀ ਦੀ ਬਖਸ਼ਿਸ਼ ਇੱਕ ਅਹਿਮ ਸਥਾਨ ਰੱਖਦੀ ਹੈ ਸਤਿਗੁਰੂ ਨੇ ਸਤਿਗੁਰੂ ਨੂੰ ਜਾਹਰ ਕਰਨਾ ਹੁੰਦਾ ਹੈ  ਪੂਜਨੀਕ ਪਰਮ ਪਿਤਾ ਸ਼ਾਹ ਸਤਿਨਾਮ ਸਿੰਘ ਜੀ ਮਹਾਰਾਜ ਨੇ ਹਜੂਰ ਪਿਤਾ ਜੀ ਨੂੰ ਨਾਮ ਸ਼ਬਦ ਦੀ ਅਨਮੋਲ ਦਾਤ ਬਖਸ਼ਣ ਮੌਕੇ ਅਥਾਹ ਪਿਆਰ ਬਖਸ਼ਦੇ ਹੋਏ ਆਪਣੇ ਕੋਲ ਬਿਠਾ ਕੇ, ਗੱਲਾਂ ਬਾਤਾਂ ਕਰਕੇ ਉਸੇ ਦਿਨ ਤੋਂ ਹੀ ਆਪਣਾ ਵਾਰਿਸ ਬਣਾ ਲਿਆ ਸੀ 23 ਸਤੰਬਰ 1990 ਨੂੰ ਪੂਜਨੀਕ ਪਰਮ ਪਿਤਾ ਸ਼ਾਹ ਸਤਿਨਾਮ ਸਿੰਘ ਜੀ ਮਹਾਰਾਜ ਨੇ ਆਪ ਜੀ (ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ) ਨੂੰ ਸਾਧ-ਸੰਗਤ ਦੇ ਸਾਹਮਣ ਆਪਣੇ ਨਾਲ ਸਟੇਜ ’ਤੇ ਬਿਰਾਜਮਾਨ ਕਰਕੇ ਆਪ ਜੀ ਨੂੰ ਗੁਰਗੱਦੀ ਬਖਸ਼ਿਸ਼ ਕੀਤੀ।

ਸਾਧ-ਸੰਗਤ ਨੂੰ ਬਚਨ ਫ਼ਰਮਾਏ, ‘‘ਅੱਜ ਤੋਂ ਇਹ ਸਾਡਾ ਹੀ ਰੂਪ ਹਨ, ਜੋ ਜੀਵ ਇੰਨ੍ਹਾਂ ਨਾਲ ਪ੍ਰੇਮ ਕਰੇਗਾ, ਇੰਨ੍ਹਾਂ ਦਾ ਹੁਕਮ ਮੰਨੇਗਾ, ਇੰਨ੍ਹਾਂ ’ਤੇ ਵਿਸ਼ਵਾਸ ਕਰੇਗਾ ਉਹ ਮੰਨੋ ਸਾਡਾ ਹੁਕਮ ਮੰਨੇਗਾ’’ ਪੂਰੀ ਸਾਧ-ਸੰਗਤ ਨੂੰ ਪਰਮ ਪਿਤਾ ਜੀ ਦਾ ਗੁਰਗੱਦੀ ਰਸਮ ਦਾ ਪਵਿੱਤਰ ਹੁਕਮਨਾਮਾ ਪੜ੍ਹ ਕੇ ਸੁਣਾਇਆ ਗਿਆ ਪੂਜਨੀਕ ਪਰਮ ਪਿਤਾ ਜੀ ਨੇ ਆਪ ਜੀ ਨੂੰ ਆਪਣਾ ਰੂਪ ਬਖਸ਼ਿਆ ਅਤੇ ਬਚਨ ਫ਼ਰਮਾਏ, ‘‘ਅਸੀਂ ਸਾਂ, ਅਸੀਂ ਹਾਂ, ਅਸੀਂ ਹੀ ਰਹਾਂਗੇ’’ ਪੂਜਨੀਕ ਪਰਮ ਪਿਤਾ ਜੀ ਅਤੇ ਹਜੂਰ ਪਿਤਾ ਜੀ ਲੱਗਭੱਗ ਸਵਾ ਸਾਲ ਇਕੱਠੇ ਸਟੇਜ ’ਤੇ ਬਿਰਾਜਮਾਨ ਹੁੰਦੇ ਰਹੇ ਆਪਣੇ ਮੁਰਸ਼ਿਦੇ ਕਾਮਲ ਪਰਮ ਪਿਤਾ ਸ਼ਾਹ ਸਤਿਨਾਮ ਸਿੰਘ ਜੀ ਦਾ ਪਵਿੱਤਰ ਨਾਮ ਅਤੇ ਪ੍ਰਭੂ ਪਰਮਾਤਮਾ ਨੂੰ ਮਿਲਣ ਦਾ ਤਰੀਕਾ ਦੁਨੀਆ ਦੇ ਕੋਨੇ-ਕੋਨੇ ਵਿੱਚ ਪੁੱਜੇ।

ਸੰਸਾਰ ਵਿੱਚੋਂ ਜਾਤੀ ਪ੍ਰਥਾ ਅੰਧਵਿਸ਼ਵਾਸ, ਸੰਪਰਦਾਇਕਤਾ, ਨਫਰਤ, ਨਸ਼ਾ ਰੂਪੀ ਕੋਹੜ ਖਤਮ ਹੋਵੇ ਇਹੀ ਆਪ ਜੀ ਦਾ ਨਿਸ਼ਾਨਾ ਹੈ ਆਪ ਜੀ ਨੇ ਸਾਢੇ ਸੱਤ ਕਰੋੜ ਤੋਂ ਵੱਧ ਜੀਵਾਂ ਦੀਆਂ ਬੁਰਾਈਆਂ, ਨਸ਼ੇ ਆਦਿ ਛੁਡਵਾ ਕੇ ਪਰਮਾਤਮਾ ਦੇ ਨਾਮ ਨਾਲ ਜੋੜਨ ਦਾ ਤਰੀਕਾ ਦੱਸਿਆ ਆਪ ਜੀ ਨੇ ਕੰਨਿਆ ਭਰੂਣ ਹੱਤਿਆ, ਵੇਸਵਾਪੁਣਾ, ਸਮਲਿੰਗਤਾ, ਦਾਜ ਪ੍ਰਥਾ ਆਦਿ ਬੁਰਾਈਆਂ ਵਿਰੁੱਧ ਅਜਿਹੀ ਜਨ ਚੇਤਨਾ ਲਹਿਰ ਚਲਾਈ ਜਿਸ ਦਾ ਪ੍ਰਭਾਵ ਦੁਨੀਆ ਦੇ ਕੋਨੇ-ਕੋਨੇ ਵਿੱਚ ਪਿਆ ਆਪ ਜੀ ਦਾ ਹਰ ਪਲ ਮਾਨਵਤਾ ਭਲਾਈ ਨੂੰ ਸਮਰਪਿਤ ਹੈ ਇਸ ਧਰਤੀ ’ਤੇ ਰਹਿੰਦਿਆਂ ਮਨੁੱਖ ਦਾ ਜੀਵਨ ਸੁਖੀ ਅਤੇ ਖੁਸ਼ਹਾਲ ਹੋਵੇ, ਇਸ ਲਈ ਆਪ ਜੀ ਨੇ 176 ਮਾਨਵਤਾ ਭਲਾਈ ਕਾਰਜ ਚਲਾਏ ਹਨ ਜਿਵੇਂ ਲੋੜਵੰਦਾਂ ਲਈ ਫੂਡ ਬੈਂਕ, ਕਲਾਥ ਬੈਂਕ, ਬਿਮਾਰਾਂ ਦਾ ਇਲਾਜ, ਗਰੀਬ ਜ਼ਰੂਰਤਮੰਦਾਂ ਨੂੰ ਮਕਾਨ ਬਣਾਕੇ ਦੇਣਾ, ਖੂਨਦਾਨ, ਦਿਹਾਂਤ ਉਪਰੰਤ ਅੱਖਾਂ ਦਾਨ-ਸਰੀਰ ਦਾਨ, ਬੂਟੇ ਲਾਉਣ, ਸਫਾਈ ਅਭਿਆਨ, ਨਸ਼ਾ ਛਡਵਾਉਣ ਲਈ ਡੈੱਪਥ ਮੁਹਿੰਮ ਆਦਿ। Saint Dr. MSG

ਕੁਦਰਤੀ ਆਫਤਾਂ ’ਚ  ਕੀਤੀ ਬੇਮਿਸਾਲ ਮੱਦਦ

ਆਪ ਜੀ ਦੇ ਪਵਿੱਤਰ ਦਿਸ਼ਾ-ਨਿਰਦੇਸ਼ਾਂ ਵਿੱਚ ‘ਸ਼ਾਹ ਸਤਿਨਾਮ ਜੀ ਗ੍ਰੀਨ ਐੱਸ ਵੈੱਲਫੇਅਰ ਕਮੇਟੀ ਦਾ ਗਠਨ ਸੰਨ 2001 ਵਿੱਚ ਕੀਤਾ ਗਿਆ ਇਸ ਕਮੇਟੀ ਦੇ ਮੈਂਬਰਾਂ (ਸੇਵਾਦਾਰਾਂ) ਨੂੰ ਰਾਹਤ ਤੇ ਬਚਾਅ ਕਾਰਜਾਂ ਲਈ ਪੂਰੀ ਤਰ੍ਹਾਂ ਸਿਖਲਾਈ ਦਿੱਤੀ ਜਾਂਦੀ ਹੈ ਜਿਵੇਂ ਡੁੱਬ ਦਿਆਂ ਨੂੰ ਬਚਾਉਣ, ਅੱਗ ’ਚ ਘਿਰੇ ਵਿਅਕਤੀਆਂ ਨੂੰ ਬਾਹਰ ਕੱਢਣ, ਭੂਚਾਲ, ਸੁਨਾਮੀ ਤੇ ਹੜ੍ਹ ਤੋਂ ਬਚਾਉਣ ਆਦਿ ਹੈ 2001 ਦੇ ਗੁਜਰਾਤ ’ਚ ਆਏ ਭੂਚਾਲ, 2004 ਵਿੱਚ ਅੰਡੇਮਾਨ ਤੇ ਨਿਕੋਬਾਰ ’ਚ ਆਈ ਸੁਨਾਮੀ, 2004 ਦੇ ਬਿਹਾਰ ਦੇ ਹੜ੍ਹ, 2005 ਦੇ ਜੰਮੂ-ਕਸ਼ਮੀਰ ’ਚ ਆਏ ਭੂਚਾਲ, 2006 ’ਚ ਬਾੜਮੇਰ ’ਚ ਪਏ ਸੋਕੇ, 2008 ’ਚ ਓਡੀਸ਼ਾ ’ਚ ਆਏ ਹੜ੍ਹ, 2009 ਵਿੱਚ ਇਟਲੀ ’ਚ ਆਏ ਭੂਚਾਲ, 2012 ’ਚ ਫਿਜੀ ’ਚੇ ਆਏ ਹੜ੍ਹ।

2012 ’ਚ ਦਾਰਜੀÇਲੰਗ ’ਚ ਲੱਗੀ ਅੱਗ, 2015 ’ਚ ਨੇਪਾਲ ’ਚ ਆਏ ਭੂਚਾਲ, 2015 ’ਚ ਸਰਸਾ ’ਚ ਘੱਗਰ ਨਦੀ ’ਚ ਆਏ ਹੜ੍ਹ, 2024 ’ਚ ਹਿਮਾਚਲ ’ਚ ਆਏ ਹੜ੍ਹ, 2025 ’ਚ ਪੰਜਾਬ ਹੜ੍ਹਾਂ ਦੌਰਾਨ ਇਸ ਕਮੇਟੀ ਦੇ ਮੈਂਬਰਾਂ ਨੇ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਦੇ ਦਿਸ਼ਾ-ਨਿਰਦੇਸ਼ਾਂ ਅਨੁਸਾਰ ਮਾਨਵਤਾ ਦੀ ਭਲਾਈ ਲਈ ਜੋ ਕੰਮ ਕੀਤੇ ਉਹ ਆਪਣੇ ਆਪ ’ਚ ਬੇਮਿਸਾਲ ਹਨ ਸਾਡਾ ਭਾਰਤ ਦੇਸ਼ ਸਾਫ-ਸੁਥਰਾ ਹੋਵੇ ਕੋਈ ਵਿਦੇਸ਼ੀ ਸਾਡੇ ਦੇਸ਼ ਨੂੰ ਡਰਟੀ ਇੰਡੀਆ ਨਾ ਕਹੇ ਇਸ ਲਈ ਪੂਜਨੀਕ ਗੁਰੂ ਜੀ ਨੇ ਸਫਾਈ ਮੁਹਿੰਮ ਦੀ ਸ਼ੁਰੂਆਤ ਕੀਤੀ ‘ਹੋ ਪ੍ਰਿਥਵੀ ਸਾਫ਼, ਮਿਟੇ ਰੋਗ ਅਭਿਸ਼ਾਪ’ ਮੁਹਿੰਮ ਤਹਿਤ 36 ਸਫਾਈ ਮਹਾ ਅਭਿਆਨ ਚਲਾ ਕੇ ਸ਼ਹਿਰਾਂ ਤੇ ਮਹਾਂ ਨਗਰਾਂ ਦੀ ਸਫਾਈ ਕੀਤੀ ਆਪ ਜੀ ਦੇ ਮਾਨਵਤਾ ਭਲਾਈ ਕਾਰਜਾਂ ਕਰਕੇ ਆਪ ਜੀ ਦੇ ਨਾਂਅ ਕਈ ਵਿਸ਼ਵ ਰਿਕਾਰਡ ਹਨ।

ਹਰ ਪਾਸੇ  ਸਫਲਤਾ-ਸਰਵ ਕਲਾ ਸੰਪੂਰਨ

ਆਪ ਜੀ ਨੇ ਸਕੂਲੀ ਸਿੱਖਿਆ ਆਪਣੇ ਪਿੰਡ ਦੇ ਸਕੂਲ ਤੋਂ ਪ੍ਰਾਪਤ ਕੀਤੀ ਜਿੱਥੇ ਆਪ ਜੀ ਪੜ੍ਹਾਈ ’ਚ ਮੋਹਰੀ ਰਹਿੰਦੇ ਉੱਥੇ ਹੀ ਆਪ ਜੀ ਖੇਡਾਂ ਵਿੱਚ ਵੀ ਆਪਣੀ ਟੀਮ ਦੀ ਬਤੌਰ ਕਪਤਾਨ ਅਗਵਾਈ ਕਰਦੇ ਆਪ ਜੀ ਨੇ 32 ਨੈਸ਼ਨਲ ਖੇਡਾਂ ਖੇਡੀਆਂ ਆਪ ਜੀ ਆਪਣੇ ਖਿਡਾਰੀ ਸਾਥੀਆਂ ਦੀ ਸਿਰਫ ਖੇਡਣ ਅਤੇ ਅਗਵਾਈ ’ਚ ਹੀ ਨਾ ਸਿਰਫ ਸਹਾਇਤਾ ਕਰਦੇ ਸਗੋਂ ਖੁਰਾਕ, ਆਰਥਿਕ ਅਤੇ ਖੇਡਾਂ ਦਾ ਸਮਾਨ ਲਿਆਉਣ ’ਚ ਵੀ ਵਿੱਤੀ ਸਹਾਇਤਾ ਕਰਦੇ ਆਪ ਜੀ ਘਰੇਲੂ ਜ਼ਿੰਮੇਵਾਰੀਆਂ ਨਿਭਾਉਂਦੇ ਹੋਏ ਡੇਰਾ ਸੱਚਾ ਸੌਦਾ ਵਿਖੇ ਚੱਲ ਰਹੀ ਸੇਵਾ ਵਿੱਚ ਵਧ-ਚੜ੍ਹ ਕੇ ਹਿੱਸਾ ਲੈਂਦੇ ਆਪ ਜੀ ਦਾ ਵੱਡਾ ਘਰ ਹੋਣ ਕਰਕੇ ਕਈ ਵਾਰ ਨਾਲ ਵਾਲੇ ਸੇਵਾਦਾਰ ਆਪ ਜੀ ਨੂੰ ਹੱਥੀਂ ਸੇਵਾ ਕਰਨ ਦੀ ਬਜਾਏ ਸੇਵਾ ਦੀ ਨਿਗਰਾਨੀ ਕਰਨ ਲਈ ਕਹਿੰਦੇ ਪਰ ਆਪ ਜੀ ਹਮੇਸ਼ਾ ਹੱਥੀ ਸੇਵਾ ਜਿਵੇਂ ਭਾਰਾ ਸਮਾਨ, ਕਣਕ ਦੀਆਂ ਬੋਰੀਆਂ ਆਦਿ ਚੁੱਕਣ ਨੂੰ ਤਰਜੀਹ ਦਿੰਦੇ ਅਤੇ ਆਪਣੀ ਜੀਪ ਸਮਾਨ ਢੋਹਣ ਲਈ ਦੇ ਦਿੰਦੇ ਅਤੇ ਨਾਲ ਵਾਲੇ ਸੇਵਾਦਾਰਾਂ ਦਾ ਚਾਹ ਪਾਣੀ ਦਾ ਪ੍ਰਬੰਧ ਵੀ ਆਪਣੇ ਖਰਚ ’ਤੇ ਕਰਦੇ।

ਭਲਾਈ ਦੇ ਕਦਮ, ਬਣੇ ਵਿਸ਼ਵ ਰਿਕਾਰਡ

ਸਰਵਕਲਾਂ ਸੰਪੂਰਨ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਇੱਕ ਅਧਿਆਤਮਕ ਗੁਰੂ, ਸਮਾਜ ਸੁਧਾਰਕ, ਲੇਖਕ ਅਤੇ ਮਾਨਵਤਾ ਦੇ ਰਖਵਾਲੇ ਹਨ ਆਪ ਜੀ ਨੂੰ ਵਾਤਾਵਰਨ, ਸਿੱਖਿਆ, ਸਿਹਤ, ਕਲਾ, ਸੰਗੀਤ, ਯੋਗਾ, ਨਸ਼ਾ ਮੁਕਤੀ, ਸਫਾਈ ਅਭਿਆਨ ਦੇ ਬੇਮਿਸਾਲ ਯੋਗਦਾਨ ਲਈ ਰਾਸ਼ਟਰੀ ਅਤੇ ਅੰਤਰ ਰਾਸ਼ਟਰੀ ਸੰਸਥਾਵਾਂ ਨੇ ਅਨੇਕ ਪੁਰਸਕਾਰ ਅਤੇ ਉਪਾਧੀਆਂ ਭੇਂਟ ਕੀਤੀਆਂ ਹਨ ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਨੂੰ ਉਨ੍ਹਾਂ ਦੀਆਂ ਮਨੁੱਖੀ ਭਲਾਈ ਸੇਵਾਵਾਂ ਲਈ ਹੁਣ ਤੱਕ ਪੰਜ ਮਾਨਕ ਡਾਕਟਰੇਟ ਉਪਾਧੀਆਂ ਦਿੱਤੀਆਂ ਗਈਆਂ ਹਨ ਸਯੁੰਕਤ ਰਾਸ਼ਟਰ ਸੰਘ ਵਿਸ਼ਵ ਭਰ ਦੀਆਂ ਸਮਾਜ ਸੇਵੀ ਸੰਸਥਾਵਾਂ ਨੂੰ ਮਾਰਗਦਰਸ਼ਨ ਤੇ ਸਮਰਥਨ ਪ੍ਰਦਾਨ ਕਰਦਾ ਹੈ ਸ਼ਾਹ ਸਤਿਨਾਮ ਜੀ ਗ੍ਰੀਨ ਐੱਸ ਵੈੱਲਫੇਅਰ ਕਮੇਟੀ ਨੂੰ ਪੂਜਨੀਕ ਗੁਰੂ ਜੀ ਦੇ ਪਵਿੱਤਰ ਦਿਸ਼ਾ-ਨਿਰਦੇਸ਼ਾਂ ਤਹਿਤ 176 ਮਾਨਵਤਾ ਭਲਾਈ ਕਾਰਜਾਂ ਦੇ ਸੰਚਾਲਨ ਲਈ ਸਯੁੰਕਤ ਰਾਸ਼ਟਰ ਸੰਘ (ਯੂਐੱਨਓ) ਦੁਆਰਾ ਸਪੈਸ਼ਲ ਕੋਨਸੱਲਟਿਸ ਸਟੇਟਸ (ਵਿਸ਼ੇਸ਼ ਸਲਾਹਕਾਰ ਦਰਜਾ) ਪ੍ਰਦਾਨ ਕੀਤਾ ਗਿਆ ਆਪ ਜੀ ਦੁਆਰਾ ਦੇਸ਼ ਭਗਤੀ ਪ੍ਰਤੀ ਅਤੇ ਨਸ਼ਿਆ ਵਿਰੁੱਧ ਗਾਏ ਗੀਤ ਨੌਜਵਾਨਾਂ ਦੀ ਪਸੰਦ ਬਣੇ।

ਪੂਜਨੀਕ ਗੁਰੂ ਸੰਤ ਡਾ. ਗੁਰਮੀਤ ਰਾਮ ਰਹੀਮ ਸਿੰਘ ਜੀ ਇੰਸਾਂ ਦੀ ਰਹਿਨੁਮਾਈ ’ਚ ਡੇਰਾ ਸੱਚਾ ਸੌਦਾ ਮਾਨਵਤਾ ਭਲਾਈ ਦੇ ਕੰਮਾਂ ’ਚ ਨਵੇਂ ਮੀਲ ਪੱਥਰ ਸਥਾਪਿਤ ਕਰ ਰਿਹਾ ਹੈ ਆਪ ਜੀ ਦੇ ਅਵਤਾਰ ਦਿਹਾੜੇ ’ਤੇ ਪੂਜਨੀਕ ਗੁਰੂ ਜੀ ਦੇ ਚਰਨਾਂ ’ਚ ਲੱਖ-ਲੱਖ ਸਿਜਦਾ।

-ਡਾ. ਰਾਜਿੰਦਰ ਸਿੰਘ ਭਾਈਰੂਪਾ, ਬਠਿੰਡਾ

• 22 ਗਿੰਨੀਜ਼ ਬੁੱਕ ਆਫ ਰਿਕਾਰਡਜ਼,
• 45 ਏਸ਼ੀਆ ਬੁੱਕ ਆਫ ਰਿਕਾਰਡਜ਼, 
• 9 ਇੰਡੀਆ ਬੁੱਕ ਆਫ ਰਿਕਾਰਡਜ਼, 
• 3 ਲਿਮਕਾ ਬੁੱਕ ਆਫ ਰਿਕਾਰਡਜ਼,
• 2 ਅਸਮ ਬੁੱਕ ਆਫ਼ ਰਿਕਾਰਡ

Independence Day: ਹਰ ਸਾਲ 15 ਅਗਸਤ ਨੂੰ ਭਾਰਤ ਇੱਕ ਨਵੇਂ ਉਤਸ਼ਾਹ ਆਪਣੀ ਆਜ਼ਾਦੀ ਦਾ ਜਸ਼ਨ ਮਨਾਉਂਦਾ ਹੈ। ਲਾਲ ਕਿਲੇ ਤੋਂ ਲੈ ਕੇ ਪਿੰਡ ਦੀ ਸੱਥ ਤੱਕ, ਤਿਰੰਗੇ ਦਾ ਮਾਣ ਤੇ ਗੌਰਵ ਆਪਣੀ ਪੂਰੀ ਆਭਾ ਨਾਲ ਲਹਿਰਾਉਂਦਾ ਹੈ। ਇਹ ਦਿਨ ਸਿਰਫ ਇੱਕ ਕੌਮੀ ਤਿਉਹਾਰ ਨਹੀਂ, ਸਗੋਂ ਉਨ੍ਹਾਂ ਲੱਖਾਂ ਸ਼ਹੀਦਾਂ ਦੀ ਕੁਰਬਾਨੀ ਦੀ ਯਾਦ ਦਿਵਾਉਂਦਾ ਹੈ ਜਿਨ੍ਹਾਂ ਨੇ ਸਾਨੂੰ ਇਹ ਅਨਮੋਲ ਆਜ਼ਾਦੀ ਦਿਵਾਈ।

ਜਿਵੇਂ-ਜਿਵੇਂ ਸਾਲ ਬੀਤਦੇ ਹਨ, ਇੱਕ ਸਵਾਲ ਅਕਸਰ ਲੋਕਾਂ ਦੇ ਮਨ ਵਿੱਚ ਉਲਝਣ ਪੈਦਾ ਕਰ ਦਿੰਦਾ ਹੈ ਕਿ ਇਸ ਵਾਰ ਅਸੀਂ ਕਿਹੜਾ ਆਜ਼ਾਦੀ ਦਿਵਸ ਮਨਾ ਰਹੇ ਹਾਂ ? ਆਓ, ਅਸੀਂ ਤੁਹਾਨੂੰ ਆਸਾਨ ਭਾਸ਼ਾ ’ਚ ਇਸ ਸਵਾਲ ਦਾ ਸਹੀ ਜਵਾਬ ਦਿੰਦੇ ਹਾਂ।

ਤੁਹਾਡੇ ਦਿਮਾਗ ਦੀ ਸਭ ਤੋਂ ਵੱਡੀ ਉਲਝਣ

ਜ਼ਿਆਦਾਤਰ ਲੋਕ ਇਹ ਗਲਤੀ ਕਰਦੇ ਹਨ ਕਿ ਉਹ ਮੌਜ਼ੂਦਾ ਸਾਲ (2026) ’ਚੋਂ 1947 ਨੂੰ ਘਟਾ ਕੇ ਸਿੱਧਾ ਆਜ਼ਾਦੀ ਦਿਵਸ ਦੀ ਗਿਣਤੀ ਕੱਢ ਲੈਂਦੇ ਹਨ। ਇਸ ਗਣਨਾ ਅਨੁਸਾਰ, 2026 - 1947 = 79 ਹੁੰਦਾ ਹੈ, ਅਤੇ ਉਹ ਇਸ ਨੂੰ 79ਵਾਂ ਆਜ਼ਾਦੀ ਦਿਵਸ ਸਮਝ ਲੈਂਦੇ ਹਨ, ਪਰ ਇਹ ਤਰੀਕਾ ਸਹੀ ਨਹੀਂ ਹੈ।

ਜੀ ਹਾਂ, ਕਿਸੇ ਵੀ ਵਰ੍ਹੇਗੰਢ ਜਾਂ ਦਿਵਸ ਦੀ ਗਿਣਤੀ ਉਸ ਦੇ ਪਹਿਲੇ ਦਿਨ ਤੋਂ ਹੀ ਸ਼ੁਰੂ ਹੁੰਦੀ ਹੈ। 15 ਅਗਸਤ 1947 ਨੂੰ ਭਾਰਤ ਆਜ਼ਾਦ ਹੋਇਆ। ਇਸੇ ਦਿਨ ਅਸੀਂ ਆਪਣਾ ਪਹਿਲਾ ਆਜ਼ਾਦੀ ਦਿਵਸ ਮਨਾਇਆ। ਇਹ ਸਾਡੀ ਆਜ਼ਾਦੀ ਦੀ ਸ਼ੁਰੂਆਤ ਸੀ, ਪਹਿਲਾ ਕਦਮ ਸੀ।

ਇਸ ਦੇ ਬਿਲਕੁਲ ਇੱਕ ਸਾਲ ਬਾਅਦ, 15 ਅਗਸਤ 1948 ਨੂੰ ਅਸੀਂ ਦੂਜਾ ਆਜ਼ਾਦੀ ਦਿਵਸ ਮਨਾਇਆ। ਇਸ ਦਿਨ ਸਾਡੀ ਆਜ਼ਾਦੀ ਨੂੰ ਇੱਕ ਸਾਲ ਪੂਰਾ ਹੋ ਚੁੱਕਾ ਸੀ। ਇਸੇ ਲੜੀ ਨੂੰ ਅੱਗੇ ਤੋਰਦੇ ਹੋਏ ਸਾਲ 2025 ’ਚ ਦੇਸ਼ ਨੇ ਆਜ਼ਾਦੀ ਦੇ 78 ਸਾਲ ਪੂਰੇ ਹੋਣ ’ਤੇ 79ਵਾਂ ਆਜ਼ਾਦੀ ਦਿਵਸ ਮਨਾਇਆ ਸੀ।

79ਵਾਂ ਜਾਂ 80ਵਾਂ ਆਜ਼ਾਦੀ ਦਿਵਸ?

ਇਹ ਬਿਲਕੁਲ ਉਸੇ ਤਰ੍ਹਾਂ ਹੈ ਜਿਵੇਂ ਤੁਸੀਂ ਆਪਣਾ ਪਹਿਲਾ ਜਨਮ ਦਿਨ ਉਸ ਵੇਲੇ ਮਨਾਉਂਦੇ ਹੋ ਜਦੋਂ ਤੁਸੀਂ ਇੱਕ ਸਾਲ ਦੇ ਹੋ ਜਾਂਦੇ ਹੋ, ਨਾ ਕਿ ਜਨਮ ਵਾਲੇ ਦਿਨ। ਜਨਮ ਦਾ ਦਿਨ ਤੁਹਾਡਾ ਪਹਿਲਾ ਦਿਨ ਹੁੰਦਾ ਹੈ, ਪਰ ਪਹਿਲਾ ਜਨਮ ਦਿਨ ਸਾਲ ਪੂਰਾ ਹੋਣ ’ਤੇ ਆਉਂਦਾ ਹੈ। ਬਿਲਕੁਲ ਇਸੇ ਤਰ੍ਹਾਂ, 15 ਅਗਸਤ 1947 ਭਾਰਤ ਦੀ ਆਜ਼ਾਦੀ ਦਾ ਪਹਿਲਾ ਦਿਨ ਸੀ ਅਤੇ 15 ਅਗਸਤ 2026 ਨੂੰ ਅਸੀਂ ਆਜ਼ਾਦੀ ਦੇ 79 ਸਾਲ ਪੂਰੇ ਕਰ ਰਹੇ ਹਾਂ ਜਿਸ ਦਾ ਮਤਲਬ ਹੈ ਕਿ ਇਹ ਸਾਡਾ 80ਵਾਂ ਆਜ਼ਾਦੀ ਦਿਵਸ ਹੋਵੇਗਾ।

ਉਜਾੜੇ ਤੋਂ ਤਰੱਕੀ ਵੱਲ ਵਧਦੇ ਕਦਮ

ਸਾਡਾ 80ਵਾਂ ਆਜ਼ਾਦੀ ਦਿਵਸ ਸਿਰਫ ਇੱਕ ਗਿਣਤੀ ਨਹੀਂ ਹੈ, ਸਗੋਂ ਇਹ ਪਿਛਲੇ 79 ਸਾਲਾਂ ਦੇ ਸਫਰ ਦੀ ਕਹਾਣੀ ਹੈ। ਇਹ ਕਹਾਣੀ ਉਸ ਨਵਜਾਤ ਰਾਸ਼ਟਰ ਦੀ ਹੈ, ਜਿਸ ਨੇ ਵੰਡ ਦਾ ਸੰਤਾਪ ਹੰਢਾਇਆ ਤੇ ਫਿਰ ਵੀ ਇੱਕ ਮਜ਼ਬੂਤ ਲੋਕਤੰਤਰ ਦੀ ਨੀਂਹ ਰੱਖੀ। ਇਹ ਕਹਾਣੀ ਕਿਸਾਨੀ ਤੋਂ ਲੈ ਕੇ ਪੁਲਾੜ ਤੱਕ ਦੀ ਤਰੱਕੀ ਦੀ ਹੈ, ਜਿੱਥੇ ਅਸੀਂ ਉਜਾੜੇ ਤੋਂ ਤਰੱਕੀ ਤੱਕ ਦਾ ਸਫਰ ਤੈਅ ਕੀਤਾ।

ਇਹ ਦਿਨ ਸਾਨੂੰ ਉਨ੍ਹਾਂ ਆਜ਼ਾਦੀ ਘੁਲਾਟੀਆਂ ਦੀ ਯਾਦ ਦਿਵਾਉਂਦਾ ਹੈ, ਜਿਨ੍ਹਾਂ ਨੇ ਮਹਾਤਮਾ ਗਾਂਧੀ ਦੇ ਅਹਿੰਸਕ ਅੰਦੋਲਨ ਤੋਂ ਲੈ ਕੇ ਸ. ਭਗਤ ਸਿੰਘ, ਚੰਦਰਸ਼ੇਖਰ ਆਜ਼ਾਦ ਅਤੇ ਸੁਭਾਸ਼ ਚੰਦਰ ਬੋਸ ਵਰਗੇ ਕ੍ਰਾਂਤੀਕਾਰੀਆਂ ਦੀ ਬਾਹਦੁਰੀ ਦੀਆਂ ਕਹਾਣੀਆਂ ਤੱਕ, ਹਰ ਰਸਤੇ ’ਤੇ ਆਪਣੀ ਜਾਨ ਦੀ ਬਾਜ਼ੀ ਲਾਈ। ਇਹ ਦਿਨ ਸਾਨੂੰ ਸਾਡੇ ਸੰਵਿਧਾਨ ਨਿਰਮਾਤਾਵਾਂ ਦੀ ਦੂਰਦਰਸ਼ਤਾ ਦੀ ਯਾਦ ਦਿਵਾਉਂਦਾ ਹੈ ਜਿਨ੍ਹਾਂ ਨੇ ‘ਇੱਕ ਭਾਰਤ, ਸ੍ਰੇਸ਼ਠ ਭਾਰਤ’ ਦਾ ਸੁਪਨਾ ਦੇਖਿਆ ਸੀ।

Read Also : ਬਲਾਕ ਮਲੋਟ ਦੀ ਸਾਧ-ਸੰਗਤ ਨੇ ਬੂਟੇ ਲਾ ਕੇ ਮਨਾਇਆ ਪੂਜਨੀਕ ਗੁਰੂ ਜੀ ਦਾ ਪਵਿੱਤਰ ਅਵਤਾਰ ਦਿਹਾੜਾ

ਚੰਡੀਗੜ੍ਹ (ਅਸ਼ਵਨੀ ਚਾਵਲਾ)। ਪੰਜਾਬ ’ਚ ਸਤੰਬਰ ਮਹੀਨੇ ਦਰਮਿਆਨ ਹੋਣ ਵਾਲੀਆਂ ਖੇਡਾਂ ਵਤਨ ਪੰਜਾਬ ਦੀਆਂ ’ਚ ਭਾਗ ਲੈਣ ਵਾਲੇ ਖਿਡਾਰੀਆਂ ਨੂੰ ਦਿੱਤੇ ਜਾਣ ਵਾਲੇ ਖਾਣੇ ਦੀ ਸਰਕਾਰੀ ਥਾਲੀ ’ਚੋਂ ਕੁਆਲਿਟੀ ਖ਼ਾਲੀ ਰਹਿ ਸਕਦੀ ਹੈ, ਕਿਉਂਕਿ ਪੰਜਾਬ ਸਰਕਾਰ ਦੇ ਖੇਡ ਵਿਭਾਗ ਵੱਲੋਂ ਪ੍ਰਤੀ ਖਿਡਾਰੀ ਨਾਸ਼ਤੇ ਤੋਂ ਲੈ ਕੇ ਦੁਪਹਿਰ ਦੇੇ ਖ਼ਾਣੇ ਤੱਕ ਦਾ ਇੰਤਜ਼ਾਮ ਕਰਨ ਲਈ ਸਿਰਫ਼ 100 ਰੁਪਏ ਦਾ ਹੀ ਬਜਟ ਰੱਖਿਆ ਹੈ। ਇਸ 100 ਰੁਪਏ ਦੇ ਬਜਟ ਨਾਲ ਖਿਡਾਰੀਆਂ ਨੂੰ ਇੱਕ ਸਮੇਂ ਦਾ ਚੰਗਾ ਖਾਣਾ ਨਹੀਂ ਮਿਲ ਸਕਦਾ ਹੈ ਤਾਂ ਪੰਜਾਬ ਸਰਕਾਰ ਦਾ ਖੇਡ ਵਿਭਾਗ ਇਸ 100 ਰੁਪਏ ’ਚ ਸਵੇਰ ਦੇ ਨਾਸ਼ਤੇ ਸਣੇ ਦੁਪਹਿਰ ਨੂੰ ਖਾਣੇ ’ਚ ਤਿੰਨ ਸਬਜ਼ੀਆਂ ’ਚ ਮਟਰ-ਪਨੀਰ ਤੱਕ ਮੰਗ ਰਿਹਾ ਹੈ।

Read Also : ਵਿਦਿਆਰਥੀਆਂ ਦੀ ਸ਼ਾਨ ਤੋਂ ਵੱਡਾ ਕੁਝ ਨਹੀਂ, ਵਿਵਸਥਾ ਨੂੰ ਬਦਲਣਾ ਪਵੇਗਾ

ਇਸ ਦੇ ਨਾਲ ਹੀ ਖਿਡਾਰੀਆਂ ਨੂੰ ਫਿਲਟਰ ਪਾਣੀ ਵੀ ਠੇਕੇਦਾਰ ਨੂੰ ਹੀ ਮੁਹੱਈਆ ਕਰਵਾਉਣ ਪਏਗਾ, ਜਿਸ ਤੋਂ ਸਾਫ਼ ਹੈ ਕਿ ਖਿਡਾਰੀਆਂ ਦੇ ਖਾਣੇ ’ਚ ਕੁਆਲਿਟੀ ਨਾਲ ਸਮਝੌਤਾ ਹੋਣ ਦੇ ਆਸਾਰ ਬਣ ਸਕਦੇ ਹਨ ਜਾਂ ਫਿਰ ਕੋਈ ਚਮਤਕਾਰੀ ਠੇਕੇਦਾਰ ਹੀ ਇਸ ਤਰ੍ਹਾਂ ਦੀ ਸਰਵਿਸ ਲੱਖਾਂ ਖਿਡਾਰੀਆਂ ਨੂੰ ਦੇ ਸਕਦਾ ਹੈ। ਇਸ ਸਾਰੇ ਮਾਮਲੇ ’ਚ ਪੰਜਾਬ ਸਰਕਾਰ ਪੂਰੀ ਤਰ੍ਹਾਂ ਸਪੱਸ਼ਟ ਹੈ ਕਿ ਉਨ੍ਹਾਂ ਵੱਲੋਂ 100 ਰੁਪਏ ਤੋਂ ਜਿਆਦਾ ਇੱਕ ਵੀ ਪੈਸਾ ਨਹੀਂ ਦਿੱਤਾ ਜਾਏਗਾ, ਜਦੋਂ ਕਿ ਇਸ ਤੋਂ ਘੱਟ ਲੈਣ ਵਾਲੇ ਠੇਕੇਦਾਰ ਦਾ ਸਰਕਾਰ ਵੱਲੋਂ ਵਿਸ਼ੇਸ਼ ਸਵਾਗਤ ਕੀਤਾ ਜਾਏਗਾ।

Read Also : ਪੰਜਾਬ ਦੀ ਡਰਾਫਟ ਵੋਟਰ ਸੂਚੀ ਜਾਰੀ, ਆਪਣਾ ਨਾਂਅ ਇਸ ਤਰ੍ਹਾਂ ਕਰੋ ਚੈਕ, ਜੇਕਰ ਨਹੀਂ ਤਾਂ ਇਸ ਤਰ੍ਹਾਂ ਕਰਵਾਓ ਸ਼ਾਮਲ

ਜਾਣਕਾਰੀ ਅਨੁਸਾਰ ਪੰਜਾਬ ਸਰਕਾਰ ਦੇ ਖੇਡ ਵਿਭਾਗ ਵੱਲੋਂ ਖੇਡਾਂ ਵਤਨ ਪੰਜਾਬ ਦੀਆਂ 3 ਸਤੰਬਰ ਤੋਂ 15 ਸਤੰਬਰ ਤੱਕ ਬਲਾਕ ਪੱਧਰ ’ਤੇ ਪੰਜਾਬ ਭਰ ’ਚ ਕਰਵਾਈਆਂ ਜਾ ਰਹੀਆਂ ਹਨ ਇਨ੍ਹਾਂ ਖੇਡਾਂ ’ਚ ਵੱਡੇ ਪੱਧਰ ’ਤੇ ਸ਼ਹਿਰਾਂ ਤੇ ਪਿੰਡਾਂ ਦੇ ਖਿਡਾਰੀ ਭਾਗ ਲੈਣਗੇ। ਖੇਡਾਂ ਵਤਨ ਪੰਜਾਬ ਦੀਆਂ ਇਨ੍ਹਾਂ 12 ਦਿਨਾਂ ’ਚ ਭਾਗ ਲੈਣ ਵਾਲੇ ਖਿਡਾਰੀਆਂ ਦੀ ਨਾਸ਼ਤੇ ਤੇ ਦੁਪਹਿਰ ਦੇ ਖਾਣੇ (ਡਾਇਟ) ਨੂੰ ਲੈ ਕੇ ਖੇਡ ਵਿਭਾਗ ਵੱਲੋਂ ਇੰਤਜ਼ਾਮ ਕੀਤਾ ਜਾ ਰਿਹਾ ਹੈ। 

ਵਿਭਾਗ ਵੱਲੋਂ ਹਰ ਖਿਡਾਰੀਆਂ ਨੂੰ ਚਾਹ ਨਾਸ਼ਤੇ ’ਚ ਸਵੇਰੇ ਇੱਕ ਕੱਪ ਚਾਹ ਤੇ ਮੱਠੀ ਦੇ ਨਾਲ ਦੋ ਕੇਲੇ ਦਿੱਤੇ ਜਾਣਗੇ ਤੇ ਦੁਪਹਿਰ ਦੇ ਖਾਣੇ ’ਚ ਸਲਾਦ, ਪਨੀਰ ਦੀ ਕੋਈ ਵੀ ਇੱਕ ਸਬਜ਼ੀ, ਦਾਲ ਜਾਂ ਫਿਰ ਰਾਜਮਾਂਹ, ਮਿਕਸ ਵੈਜ, 200 ਗ੍ਰਾਮ ਦਹੀ, ਤੰਦੂਰੀ ਫੁੱਲਕੇ ਤੇ ਚੌਲਾਂ ਦਾ ਇੰਤਜ਼ਾਮ ਕੀਤਾ ਜਾ ਰਿਹਾ ਹੈ। ਇਸ ਨਾਲ ਹੀ ਖਿਡਾਰੀਆਂ ਨੂੰ ਰੋਟੀ ਖਿਵਾਉਣ ਮੌਕੇ ਟੈਂਟ ਕੁਰਸੀ, ਭਾਂਡੇ ਤੇ ਹਰ ਤਰ੍ਹਾਂ ਦੇ ਇੰਤਜ਼ਾਮ ਕਰਨ ਲਈ ਠੇਕੇਦਾਰਾਂ ਦੀ ਭਾਲ ਕੀਤੀ ਜਾ ਰਹੀ ਹੈ। 

ਸਭ ਤੋਂ ਹੈਰਾਨੀ ਵਾਲੀ ਗੱਲ ਇਹ ਹੈ ਕਿ ਇਸ ਸਾਰੇ ਇੰਤਜ਼ਾਮ ਲਈ ਪ੍ਰਤੀ ਖਿਡਾਰੀ 100 ਰੁਪਏ ਤੈਅ ਕੀਤਾ ਗਿਆ ਹੈ। ਜੇਕਰ 500 ਖਿਡਾਰੀ ਭਾਗ ਲੈਂਦਾ ਹੈ ਤਾਂ ਠੇਕੇਦਾਰ ਨੂੰ 50 ਹਜ਼ਾਰ ਹੀ ਮਿਲਣਗੇ ਤੇ ਇਸ ਵਿੱਚ ਹੀ ਹਰ ਤਰ੍ਹਾਂ ਦਾ ਇੰਤਜ਼ਾਮ ਕਰਨਾ ਪਏਗਾ, ਜਿਸ ਕਾਰਨ ਹੀ ਇਹ ਸਵਾਲ ਉੱਠ ਰਿਹਾ ਹੈ ਕਿ ਇੰਨੇ ਘੱਟ ਪੈਸੇ ’ਚ ਕੀ ਕੋਈ ਠੇਕੇਦਾਰ ਖਿਡਾਰੀਆਂ ਨੂੰ ਕੁਆਲਿਟੀ ਖਾਣਾ ਦੇ ਸਕੇਗਾ। ਸਵੇਰ ਦੇ ਨਾਸ਼ਤੇ ਤੋਂ ਲੈ ਕੇ ਦੁਪਹਿਰ ਦੇ ਖਾਣੇ ਤੱਕ ਜੇਕਰ 100 ਰੁੁਪਏ ’ਚ ਇੰਤਜ਼ਾਮ ਨਹੀਂ ਹੋ ਸਕਦਾ ਹੈ ਤਾਂ ਫਿਰ ਕੁਆਲਿਟੀ ’ਤੇ ਇਸ ਦਾ ਅਸਰ ਪੈਣਾ ਸਾਫ਼ ਦਿਖਾਈ ਦੇ ਸਕਦਾ ਹੈ ਤੇ ਇਹ ਵੱਡੇ ਪੱੱਧਰ ’ਤੇ ਸਵਾਲ ਵੀ ਖੜ੍ਹਾ ਹੋ ਰਿਹਾ ਹੈ।

ਕਿਵੇਂ ਲਿਆ ਗਿਆ ਫੈਸਲਾ ਕੀਤਾ ਜਾਏਗਾ ਚੈੱਕ : ਵਰੁਨ ਰੂਜ਼ਮ

ਖੇਡ ਵਿਭਾਗ ਦੇ ਸਕੱਤਰ ਵਰੁਨ ਰੂਜ਼ਮ ਨੇ ਕਿਹਾ ਕਿ ਉਨ੍ਹਾਂ ਨੂੰ ਇਸ ਫੈਸਲੇ ਬਾਰੇ ਪੂਰੀ ਜਾਣਕਾਰੀ ਨਹੀਂ ਹੈ ਕਿ ਖਿਡਾਰੀਆਂ ਦੀ ਖਾਣੇ ਲਈ 100 ਰੁਪਏ ਪ੍ਰਤੀ ਦਿਨ ਕਿਵੇਂ ਤੈਅ ਕੀਤਾ ਗਿਆ ਹੈ, ਕਿਉਂਕਿ ਬੀਤੇ ਦਿਨੀਂ ਹੀ ਵਿਭਾਗ ਦਾ ਚਾਰਜ ਲਿਆ ਹੈ ਪਰ ਖਿਡਾਰੀਆ ਦੇ ਖਾਣੇ ਦੀ ਕੁਆਲਿਟੀ ਨਾਲ ਕੋਈ ਸਮਝੌਤਾ ਨਹੀਂ ਹੋਣ ਦਿੱਤਾ ਜਾਏਗਾ, ਇਸ ਲਈ ਉਹ 100 ਰੁਪਏ ਪ੍ਰਤੀ ਦਿਨ ਡਾਈਟ ਦੇ ਫੈਸਲੇ ਆਪਣੇ ਪੱਧਰ ’ਤੇ ਚੈੱਕ ਕਰਵਾਉਣਗੇ।

ਫ਼ਰੀਦਕੋਟ (ਗੁਰਪ੍ਰੀਤ ਪੱਕਾ)। ਕੋਵਿਡ-19 ਲਾਕਡਾਊਨ ਨੇ ਜਿੱਥੇ ਕਰੋੜਾਂ ਬੱਚਿਆਂ ਦੀ ਪੜ੍ਹਾਈ ਨੂੰ ਪ੍ਰਭਾਵਿਤ ਕੀਤਾ, ਉੱਥੇ ਪੰਜਾਬ ਦੇ ਫਰੀਦਕੋਟ ਜ਼ਿਲ੍ਹੇ ਦੇ ਕੋਟਕਪੂਰਾ ਵਾਸੀ ਪ੍ਰਭਜੋਤ ਸਿੰਘ ਨੇ ਇਸ ਸੰਕਟ ਨੂੰ ਮੌਕੇ ’ਚ ਬਦਲ ਦਿੱਤਾ। ਮਹਿਜ਼ 13 ਸਾਲ ਦੀ ਉਮਰ ’ਚ ਸੀਮਤ ਸਾਧਨਾਂ ਬਾਵਜੂਦ ਆਨਲਾਈਨ ਸਿੱਖਣਾ ਸ਼ੁਰੂ ਕਰਨ ਵਾਲੇ ਪ੍ਰਭਜੋਤ ਅੱਜ ‘ਬ੍ਰਿਲੀਅੰਟ ਪੀ’ ਨਾਮਕ ਮੁਫ਼ਤ ਸਿੱਖਿਆ ਪਹਿਲਕਦਮੀ ਦੇ ਸੰਸਥਾਪਕ ਹਨ। ਇਹ ਮੰਚ ਦੇਸ਼-ਵਿਦੇਸ਼ ਦੇ ਹਜ਼ਾਰਾਂ ਵਿਦਿਆਰਥੀਆਂ ਨੂੰ ਆਰਟੀਫਿਸ਼ੀਅਲ ਇੰਟੈਲੀਜੈਂਸ (ਏਆਈ), ਪ੍ਰੋਗਰਾਮਿੰਗ, ਗ੍ਰਾਫਿਕ ਡਿਜ਼ਾਈਨਿੰਗ, ਵੀਡੀਓ ਐਡਿਟਿੰਗ, ਵੈੱਬਸਾਈਟ ਡਿਵੈਲਪਮੈਂਟ ਤੇ ਹੋਰ ਰੋਜ਼ਗਾਰਮੁਖੀ ਡਿਜੀਟਲ ਹੁਨਰ ਮੁਫ਼ਤ ਸਿਖਾ ਰਿਹਾ ਹੈ। ਇਸ ਸਮੇਂ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ ਵਿੱਚ ਬੀਟੈਕ ਦੀ ਪੜ੍ਹਾਈ ਕਰ ਰਹੇ ਪ੍ਰਭਜੋਤ ਸਿੰਘ ਦੀ ਕਹਾਣੀ ਸੰਘਰਸ਼, ਦ੍ਰਿੜ੍ਹ ਇਰਾਦੇ ਤੇ ਸਮਾਜਿਕ ਸਰੋਕਾਰ ਦੀ ਪ੍ਰੇਰਣਾਦਾਇਕ ਮਿਸਾਲ ਹੈ।

ਬਚਪਨ ’ਚ ਮਾਤਾ-ਪਿਤਾ ਨੂੰ ਗੁਆਉਣ ਤੋਂ ਬਾਅਦ ਉਨ੍ਹਾਂ ਦਾ ਪਾਲਣ-ਪੋਸ਼ਣ ਮਾਮਾ-ਮਾਮੀ ਨੇ ਕੀਤਾ। ਕੋਵਿਡ ਕਾਲ ਦੌਰਾਨ ਜਦੋਂ ਉਨ੍ਹਾਂ ਕੋਲ ਆਪਣਾ ਮੋਬਾਈਲ ਫੋਨ ਜਾਂ ਲੈਪਟਾਪ ਤੱਕ ਨਹੀਂ ਸੀ, ਉਸ ਸਮੇਂ ਵੀ ਸਿੱਖਣ ਦਾ ਜਜ਼ਬਾ ਘੱਟ ਨਹੀਂ ਹੋਇਆ। ਸੁਕੀਰਤ ਟਰੱਸਟ ਤੇ ਐਜੂਕੇਟ ਪੰਜਾਬ ਪ੍ਰਾਜੈਕਟ ਦੇ ਸਹਿਯੋਗ ਨਾਲ ਉਨ੍ਹਾਂ ਨੂੰ ਪਹਿਲਾਂ ਮੋਬਾਈਲ ਤੇ ਬਾਅਦ ’ਚ ਲੈਪਟਾਪ ਮਿਲਿਆ। ਇਸੇ ਦੌਰਾਨ ਉਨ੍ਹਾਂ ਨੇ ਸੰਕਲਪ ਲਿਆ ਕਿ ਜੋ ਗਿਆਨ ਉਨ੍ਹਾਂ ਨੂੰ ਮਿਲਿਆ ਹੈ, ਉਹ ਆਰਥਿਕ ਤੌਰ ’ਤੇ ਕਮਜ਼ੋਰ ਵਿਦਿਆਰਥੀਆਂ ਤੱਕ ਮੁਫ਼ਤ ਪਹੁੰਚਾਉਣਗੇ। ਪ੍ਰਭਜੋਤ ਦੱਸਦੇ ਹਨ ਕਿ ਲਾਕਡਾਊਨ ਦੌਰਾਨ ਉਨ੍ਹਾਂ ਨੂੰ ਮਹਿਸੂਸ ਹੋਇਆ ਕਿ ਹਜ਼ਾਰਾਂ ਵਿਦਿਆਰਥੀ ਸਿਰਫ਼ ਸਾਧਨਾਂ ਦੀ ਘਾਟ ਕਾਰਨ ਆਨਲਾਈਨ ਸਿੱਖਿਆ ਤੋਂ ਵਾਂਝੇ ਰਹਿ ਗਏ। ਜ਼ਿਆਦਾਤਰ ਪਲੇਟਫਾਰਮ ਮਹਿੰਗੇ ਸਨ ਤੇ ਪੇਂਡੂ ਪਰਿਵਾਰ ਉਨ੍ਹਾਂ ਦੀ ਫੀਸ ਭਰਨ ਦੇ ਸਮਰੱਥ ਨਹੀਂ ਸਨ। ਇਸੇ ਸੋਚ ਤੋਂ ਸਾਲ 2020 ’ਚ ‘ਬ੍ਰਿਲੀਅੰਟ’ ਦੀ ਸ਼ੁਰੂਆਤ ਕੀਤੀ ਗਈ, ਜਿਸ ਦਾ ਉਦੇਸ਼ ਸਿੱਖਿਆ ਨੂੰ ਹਰ ਕਿਸੇ ਲਈ ਆਸਾਨ ਅਤੇ ਪਹੁੰਚਯੋਗ ਬਣਾਉਣਾ ਸੀ। Prabhjot AI Education

ਅੱਜ ‘ਬ੍ਰਿਲੀਅੰਟ ਪੀ’ ਸਿਰਫ਼ ਇੱਕ ਆਨਲਾਈਨ ਲਰਨਿੰਗ ਪਲੇਟਫਾਰਮ ਨਹੀਂ, ਸਗੋਂ ਵਾਲੰਟੀਅਰਾਂ ਤੇ ਵਿਦਿਆਰਥੀਆਂ ਦਾ ਇੱਕ ਸਰਗਰਮ ਸਿੱਖਿਆ ਭਾਈਚਾਰਾ ਬਣ ਚੁੱਕਾ ਹੈ। ਇੱਥੇ ਪਾਇਥਨ, ਜਾਵਾ, ਏਆਈ, ਗ੍ਰਾਫਿਕ ਡਿਜ਼ਾਈਨਿੰਗ, ਵੀਡੀਓ ਐਡਿਟਿੰਗ, ਗੂਗਲ ਵਰਕਸਪੇਸ, ਫਰੈਂਚ ਸਮੇਤ ਕਈ ਵਿਸ਼ਿਆਂ ਦੇ ਮੁਫ਼ਤ ਕੋਰਸ ਕਰਵਾਏ ਜਾਂਦੇ ਹਨ। ਵਿਦਿਆਰਥੀਆਂ ਨੂੰ ਸਿਰਫ਼ ਸਿਖਲਾਈ ਹੀ ਨਹੀਂ, ਸਗੋਂ ਲਾਈਵ ਮੈਂਟਰਸ਼ਿਪ, ਪ੍ਰਾਜੈਕਟ ਆਧਾਰਿਤ ਸਿੱਖਿਆ, ਮੁਕਾਬਲੇ, ਇੰਟਰਨਸ਼ਿਪ ਤੇ ਕਰੀਅਰ ਮਾਰਗਦਰਸ਼ਨ ਦੇ ਮੌਕੇ ਵੀ ਦਿੱਤੇ ਜਾਂਦੇ ਹਨ। ਸਭ ਤੋਂ ਖਾਸ ਗੱਲ ਇਹ ਹੈ ਕਿ ਇਸ ਪੂਰੀ ਪਹਿਲਕਦਮੀ ਨਾਲ ਜੁੜੇ ਮੈਂਟਰ ਤੇ ਟੀਮ ਮੈਂਬਰ ਵਾਲੰਟੀਅਰ ਵਜੋਂ ਸੇਵਾ ਕਰ ਰਹੇ ਹਨ ਤੇ ਕਿਸੇ ਕਿਸਮ ਦੀ ਫੀਸ ਨਹੀਂ ਲਈ ਜਾਂਦੀ। ਪ੍ਰਭਜੋਤ ਅਨੁਸਾਰ ਉਨ੍ਹਾਂ ਦਾ ਟੀਚਾ ਸਿਰਫ਼ ਵਿਦਿਆਰਥੀਆਂ ਨੂੰ ਪੜ੍ਹਾਉਣਾ ਨਹੀਂ, ਸਗੋਂ ਉਨ੍ਹਾਂ ਨੂੰ ਆਤਮਨਿਰਭਰ ਬਣਾਉਣਾ ਹੈ। ਉਨ੍ਹਾਂ ਦੱਸਿਆ ਕਿ ‘ਬ੍ਰਿਲੀਅੰਟ ਪੀ’ ਨਾਲ ਜੁੜ ਕੇ ਹੁਣ ਤੱਕ 1,000 ਤੋਂ ਵੱਧ ਨੌਜਵਾਨ ਸਿਖਲਾਈ ਪ੍ਰਾਪਤ ਕਰ ਚੁੱਕੇ ਹਨ। ਇਨ੍ਹਾਂ ਵਿੱਚੋਂ ਕਈ ਨੌਜਵਾਨਾਂ ਨੇ ਫ੍ਰੀਲਾਂਸਿੰਗ ਸ਼ੁਰੂ ਕੀਤੀ, ਕੁਝ ਨੇ ਆਪਣੇ ਸਟਾਰਟਅੱਪ ਸਥਾਪਿਤ ਕੀਤੇ, ਜਦਕਿ ਕਈ ਵਿਦਿਆਰਥੀਆਂ ਨੂੰ ਰੋਜ਼ਗਾਰ ਦੇ ਮੌਕੇ ਵੀ ਮਿਲੇ ਹਨ।

ਇਹ ਵੀ ਪੜ੍ਹੋ : Faridkot News: ਸੁਤੰਤਰਤਾ ਦਿਵਸ ਦੇ ਮੱਦੇਨਜ਼ਰ ਫ਼ਰੀਦਕੋਟ ਪੁਲਿਸ ਵੱਲੋਂ ਸਖ਼ਤ ਸੁਰੱਖਿਆ ਪ੍ਰਬੰਧ, ਤਿੰਨਾਂ ਸ਼ਹਿਰਾਂ ’ਚ ਫਲੈਗ ਮਾਰਚ

ਇਹ ਉਪਲਬਧੀਆਂ ਹੀ ਉਨ੍ਹਾਂ ਨੂੰ ਅੱਗੇ ਵਧਣ ਲਈ ਪ੍ਰੇਰਿਤ ਕਰਦੀਆਂ ਹਨ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਦੇ ਪਲੇਟਫਾਰਮ ਤੋਂ ਸਿੱਖਿਆ ਹਾਸਲ ਕਰਕੇ ਕਈ ਨੌਜਵਾਨ ਡਿਜ਼ਾਈਨਿੰਗ ਦੇ ਖੇਤਰ ਵਿੱਚ ਆਪਣਾ ਰੋਜ਼ਗਾਰ ਸਥਾਪਿਤ ਕਰ ਚੁੱਕੇ ਹਨ। ਪ੍ਰਭਜੋਤ ਨੇ ਦੱਸਿਆ ਕਿ ਭਵਿੱਖ ਵਿੱਚ ‘ਬ੍ਰਿਲੀਅੰਟ ਪੀ’ ਨੂੰ ਹੋਰ ਮਜ਼ਬੂਤ ਬਣਾਉਣ ਲਈ ਆਫਲਾਈਨ ਲਰਨਿੰਗ ਦੀ ਸਹੂਲਤ ਵਾਲੀ ਮੋਬਾਈਲ ਐਪ, ਖੇਤਰੀ ਭਾਸ਼ਾਵਾਂ ’ਚ ਸਿੱਖਿਆ ਸਮੱਗਰੀ, ਤਜਰਬੇਕਾਰ ਮੈਂਟਰਾਂ ਦਾ ਵੱਡਾ ਨੈੱਟਵਰਕ ਤੇ ਪੇਂਡੂ ਤੇ ਵੰਚਿਤ ਭਾਈਚਾਰਿਆਂ ਤੱਕ ਸਿੱਖਿਆ ਪਹੁੰਚਾਉਣ ਦੀ ਦਿਸ਼ਾ ’ਚ ਕੰਮ ਕੀਤਾ ਜਾ ਰਿਹਾ ਹੈ। ਪ੍ਰਭਜੋਤ ਦਾ ਮੰਨਣਾ ਹੈ ਕਿ ਤਕਨਾਲੋਜੀ ਉਦੋਂ ਹੀ ਸਾਰਥਕ ਹੈ, ਜਦੋਂ ਇਸ ਦਾ ਲਾਭ ਸਮਾਜ ਦੇ ਆਖਰੀ ਵਿਅਕਤੀ ਤੱਕ ਪਹੁੰਚੇ। ਉਨ੍ਹਾਂ ਦਾ ਸੰਦੇਸ਼ ਹੈ ਕਿ ‘ਛੋਟੀ ਸ਼ੁਰੂਆਤ ਕਰਨ ਤੋਂ ਕਦੇ ਨਾ ਡਰੋ। ਜੇ ਸਿੱਖਣ ਤੇ ਦੂਜਿਆਂ ਨੂੰ ਅੱਗੇ ਵਧਾਉਣ ਦਾ ਜਜ਼ਬਾ ਹੋਵੇ ਤਾਂ ਸੀਮਤ ਸਾਧਨ ਵੀ ਵੱਡੀ ਸਫਲਤਾ ਦਾ ਰਸਤਾ ਬਣ ਸਕਦੇ ਹਨ।” ਇੱਕ ਛੋਟੇ ਸ਼ਹਿਰ ਦੇ ਕਿਸ਼ੋਰ ਵੱਲੋਂ ਸ਼ੁਰੂ ਕੀਤਾ ਗਿਆ ਇਹ ਮਿਸ਼ਨ ਅੱਜ ਹਜ਼ਾਰਾਂ ਨੌਜਵਾਨਾਂ ਲਈ ਉਮੀਦ ਦੀ ਨਵੀਂ ਕਿਰਨ ਬਣ ਚੁੱਕਾ ਹੈ। ਪ੍ਰਭਜੋਤ ਸਿੰਘ ਦੀ ਕਹਾਣੀ ਸਾਬਤ ਕਰਦੀ ਹੈ ਕਿ ਉਮਰ ਨਹੀਂ, ਸਗੋਂ ਸੋਚ, ਹੌਸਲਾ ਤੇ ਸਮਰਪਣ ਹੀ ਅਸਲ ਅਗਵਾਈ ਦੀ ਪਛਾਣ ਹੁੰਦੇ ਹਨ।

15 ਅਗਸਤ ਹਰ ਭਾਰਤੀ ਲਈ ਮਾਣ ਅਤੇ ਸਨਮਾਨ ਦਾ ਪ੍ਰਤੀਕ ਹੈ। 1947 'ਚ ਇਸ ਦਿਨ ਭਾਰਤ ਨੂੰ ਬ੍ਰਿਟਿਸ਼ ਸ਼ਾਸਨ ਤੋਂ ਆਜ਼ਾਦੀ ਮਿਲੀ ਸੀ। ਦੇਸ਼ ਦੀ ਆਜ਼ਾਦੀ ਦੀ ਯਾਦ ਵਿੱਚ ਹਰ ਸਾਲ 15 ਅਗਸਤ ਨੂੰ ਆਜ਼ਾਦੀ ਦਿਵਸ ਮਨਾਇਆ ਜਾਂਦਾ ਹੈ। ਇਸ ਮੌਕੇ ’ਤੇ ਪ੍ਰਧਾਨ ਮੰਤਰੀ ਲਾਲ ਕਿਲ੍ਹੇ ਦੀ ਫਸੀਲ ਤੋਂ ਤਿਰੰਗਾ ਲਹਿਰਾਉਂਦੇ ਹਨ। ਇਸ ਤੋਂ ਇਲਾਵਾ ਸਕੂਲਾਂ, ਕਾਲਜਾਂ, ਸਰਕਾਰੀ ਸੰਸਥਾਵਾਂ ਅਤੇ ਹੋਰ ਕਈ ਸੰਗਠਨਾਂ ਵਿੱਚ ਝੰਡਾ ਲਹਿਰਾਉਣ ਦੀਆਂ ਰਸਮਾਂ ਹੁੰਦੀਆਂ ਹਨ। ਬਹੁਤ ਸਾਰੇ ਲੋਕ ਆਪਣੇ ਘਰਾਂ ’ਤੇ ਰਾਸ਼ਟਰੀ ਝੰਡਾ ਵੀ ਲਹਿਰਾਉਂਦੇ ਹਨ।

Read Also : 39 ਕਰੋੜ ਦੀ ਡਰੱਗਜ਼ ਜ਼ਬਤ, ਦੋ ਤਸਕਰ ਗ੍ਰਿਫ਼ਤਾਰ

ਤਿਰੰਗਾ ਰਾਸ਼ਟਰ ਦੇ ਸਨਮਾਨ, ਮਾਣ ਅਤੇ ਮਾਣ ਦਾ ਪ੍ਰਤੀਕ ਹੈ। ਇਸ ਲਈ, ਰਾਸ਼ਟਰੀ ਝੰਡਾ ਲਹਿਰਾਉਂਦੇ ਸਮੇਂ ਭਾਰਤ ਦੇ ਝੰਡਾ ਜ਼ਾਬਤੇ ਦੇ ਨਿਯਮਾਂ ਦੀ ਪਾਲਣਾ ਕਰਨਾ ਬਹੁਤ ਜ਼ਰੂਰੀ ਹੈ। ਆਓ ਸਮਝੀਏ ਕਿ ਘਰ, ਸਕੂਲ ਜਾਂ ਕਿਸੇ ਵੀ ਸੰਸਥਾ ਵਿੱਚ ਤਿਰੰਗਾ ਲਹਿਰਾਉਂਦੇ ਸਮੇਂ ਕਿਹੜੇ ਨੁਕਤਿਆਂ ਨੂੰ ਧਿਆਨ ਵਿੱਚ ਰੱਖਣਾ ਚਾਹੀਦਾ ਹੈ ਅਤੇ ਕਿਹੜੀਆਂ ਗਲਤੀਆਂ ਤੋਂ ਬਚਣਾ ਚਾਹੀਦਾ ਹੈ।

ਤਿਰੰਗਾ ਲਹਿਰਾਉਂਦੇ ਸਮੇਂ ਇਹਨਾਂ ਗੱਲਾਂ ਨੂੰ ਧਿਆਨ ਵਿੱਚ ਰੱਖੋ:

ਸਹੀ ਮਾਪ: ਰਾਸ਼ਟਰੀ ਝੰਡਾ ਆਇਤਾਕਾਰ ਹੋਣਾ ਚਾਹੀਦਾ ਹੈ, ਜਿਸ ਦੀ ਲੰਬਾਈ-ਚੌੜਾਈ ਅਨੁਪਾਤ 3:2 ਹੋਣਾ ਚਾਹੀਦਾ ਹੈ।
ਸਹੀ ਰੰਗ ਕ੍ਰਮ: ਤਿਰੰਗੇ ਵਿੱਚ ਉੱਪਰ ਕੇਸਰੀ, ਵਿਚਕਾਰ ਚਿੱਟਾ ਅਤੇ ਹੇਠਾਂ ਹਰਾ ਹੋਣਾ ਚਾਹੀਦਾ ਹੈ। 24 ਸਪੋਕਸ ਵਾਲਾ ਨੀਲਾ ਅਸ਼ੋਕ ਚੱਕਰ ਚਿੱਟੇ ਪੱਟੀ ਦੇ ਕੇਂਦਰ ਵਿੱਚ ਸਥਿਤ ਹੈ।
ਝੰਡਾ ਸਾਫ਼ ਦਿਖਾਈ ਦੇਣਾ ਚਾਹੀਦਾ ਹੈ: ਤਿਰੰਗਾ ਅਜਿਹੀ ਜਗਾ ’ਤੇ ਲਹਿਰਾਇਆ ਜਾਣਾ ਚਾਹੀਦਾ ਹੈ ਜਿੱਥੇ ਇਹ ਸਾਫ਼ ਦਿਖਾਈ ਦੇਵੇ ਅਤੇ ਹੋਰ ਵਸਤੂਆਂ ਜਾਂ ਝੰਡਿਆਂ ਦੁਆਰਾ ਧੁੰਦਲਾ ਨਾ ਹੋਵੇ।
ਝੰਡਾ ਸਾਫ਼ ਅਤੇ ਚੰਗੀ ਹਾਲਤ ਵਿੱਚ ਹੋਣਾ ਚਾਹੀਦਾ ਹੈ: ਰਾਸ਼ਟਰੀ ਝੰਡਾ ਗੰਦਾ, ਫਟਿਆ ਜਾਂ ਖਰਾਬ ਨਹੀਂ ਹੋਣਾ ਚਾਹੀਦਾ। ਲਹਿਰਾਉਣ ਲਈ ਹਮੇਸ਼ਾ ਚੰਗੀ ਹਾਲਤ ਵਿੱਚ ਸਾਫ਼ ਤਿਰੰਗਾ ਵਰਤੋ।
ਸਿਰਫ਼ ਪ੍ਰਵਾਨਿਤ ਸਮੱਗਰੀ ਦੀ ਵਰਤੋਂ ਕਰੋ: ਰਾਸ਼ਟਰੀ ਝੰਡਾ ਹੱਥ ਨਾਲ ਕੱਤਿਆ ਜਾਂ ਹੱਥ ਨਾਲ ਬੁਣਿਆ ਹੋਇਆ ਸੂਤੀ, ਖਾਦੀ, ਦੇ ਨਾਲ-ਨਾਲ ਮਸ਼ੀਨ ਨਾਲ ਬਣੀ ਸੂਤੀ, ਪੋਲਿਸਟਰ ਅਤੇ ਹੋਰ ਮਨਜ਼ੂਰ ਸਮੱਗਰੀ ਤੋਂ ਬਣਾਇਆ ਜਾ ਸਕਦਾ ਹੈ।
ਰੋਜ਼ਾਨਾ ਲਹਿਰਾਇਆ ਜਾ ਸਕਦਾ ਹੈ: ਆਮ ਨਾਗਰਿਕ, ਨਿੱਜੀ ਸੰਸਥਾਵਾਂ ਅਤੇ ਵਿਦਿਅਕ ਸੰਸਥਾਵਾਂ ਹੁਣ ਐਤਵਾਰ ਅਤੇ ਜਨਤਕ ਛੁੱਟੀਆਂ ਸਮੇਤ ਸਾਰੇ ਦਿਨਾਂ ’ਤੇ ਤਿਰੰਗਾ ਲਹਿਰਾ ਸਕਦੀਆਂ ਹਨ, ਬਸ਼ਰਤੇ ਕਿ ਉਹ ਨਿਰਧਾਰਤ ਨਿਯਮਾਂ ਦੀ ਪਾਲਣਾ ਕਰਨ। ਇਹ ਯਕੀਨੀ ਬਣਾਓ ਕਿ ਤਿਰੰਗਾ ਜ਼ਮੀਨ ਜਾਂ ਪਾਣੀ ਨੂੰ ਨਾ ਛੂਹੇ: ਲਹਿਰਾਉਣ ਅਤੇ ਉਤਾਰਨ ਦੌਰਾਨ ਖਾਸ ਧਿਆਨ ਰੱਖੋ ਤਾਂ ਜੋ ਇਹ ਯਕੀਨੀ ਬਣਾਇਆ ਜਾ ਸਕੇ ਕਿ ਰਾਸ਼ਟਰੀ ਝੰਡਾ ਜ਼ਮੀਨ, ਫਰਸ਼ ਜਾਂ ਪਾਣੀ ਦੇ ਸੰਪਰਕ ਵਿੱਚ ਨਾ ਆਵੇ।
ਇਸ ਨੂੰ ਸਤਿਕਾਰ ਨਾਲ ਉਤਾਰੋ ਅਤੇ ਸਟੋਰ ਕਰੋ: ਤਿਰੰਗਾ ਉਤਾਰਦੇ ਸਮੇਂ ਸਾਵਧਾਨੀ ਵਰਤੋ। ਇਸ ਨੂੰ ਹੌਲੀ-ਹੌਲੀ ਅਤੇ ਸਤਿਕਾਰ ਨਾਲ ਹੇਠਾਂ ਕਰੋ, ਇਸ ਨੂੰ ਸਹੀ ਢੰਗ ਨਾਲ ਤੈਅ ਕਰੋ, ਅਤੇ ਇਸਨੂੰ ਸੁਰੱਖਿਅਤ ਜਗਾ ’ਤੇ ਰੱਖੋ।

ਤਿਰੰਗਾ ਨਾਲ ਇਹਨਾਂ ਗਲਤੀਆਂ ਤੋਂ ਬਚੋ

ਤਿਰੰਗਾ ਉਲਟਾ ਨਾ ਲਹਿਰਾਓ: ਭਗਵਾਂ ਪੱਟੀ ਹਮੇਸ਼ਾ ਉੱਪਰ ਅਤੇ ਹਰੀ ਪੱਟੀ ਹੇਠਾਂ ਹੋਣੀ ਚਾਹੀਦੀ ਹੈ। ਇਸ ਨੂੰ ਉਲਟਾ ਲਹਿਰਾਉਣਾ ਰਾਸ਼ਟਰੀ ਝੰਡੇ ਦਾ ਅਪਮਾਨ ਮੰਨਿਆ ਜਾਂਦਾ ਹੈ।
ਇਸ ਨੂੰ ਜ਼ਮੀਨ ’ਤੇ ਜਾਂ ਪਾਣੀ ਵਿੱਚ ਨਾ ਰੱਖੋ: ਤਿਰੰਗਾ ਜ਼ਮੀਨ, ਫਰਸ਼ ਜਾਂ ਪਾਣੀ ’ਤੇ ਡਿੱਗਣ ਜਾਂ ਖਿੱਚੇ ਜਾਣ ਤੋਂ ਰੋਕੋ।
ਇਸ ਨੂੰ ਸਜਾਵਟ ਲਈ ਨਾ ਵਰਤੋ: ਰਾਸ਼ਟਰੀ ਝੰਡੇ ਨੂੰ ਸਜਾਵਟੀ ਵਸਤੂ ਵਜੋਂ ਨਹੀਂ ਵਰਤਿਆ ਜਾਣਾ ਚਾਹੀਦਾ। ਇਸ ਨੂੰ ਕੱਪੜਿਆਂ, ਗੱਦੀਆਂ, ਮੇਜ਼ ਕੱਪੜਿਆਂ ਜਾਂ ਹੋਰ ਵਸਤੂਆਂ ’ਤੇ ਇਸ ਤਰੀਕੇ ਨਾਲ ਵਰਤਣ ਤੋਂ ਬਚੋ ਜੋ ਝੰਡੇ ਦੀ ਸ਼ਾਨ ਨੂੰ ਠੇਸ ਪਹੁੰਚਾਉਂਦਾ ਹੈ।
ਇਸ ਦੀ ਵਰਤੋਂ ਵਸਤੂਆਂ ਨੂੰ ਢੱਕਣ ਲਈ ਨਾ ਕਰੋ: ਰਾਸ਼ਟਰੀ ਝੰਡੇ ਦੀ ਵਰਤੋਂ ਕਿਸੇ ਵੀ ਵਸਤੂ ਨੂੰ ਢੱਕਣ ਲਈ ਨਹੀਂ ਕੀਤੀ ਜਾਣੀ ਚਾਹੀਦੀ, ਸਿਵਾਏ ਨਿਯਮਾਂ ਦੁਆਰਾ ਵਿਸ਼ੇਸ਼ ਤੌਰ ’ਤੇ ਆਗਿਆ ਦਿੱਤੇ ਗਏ ਹਾਲਾਤਾਂ ਦੇ, ਜਿਵੇਂ ਕਿ ਰਾਜ ਜਾਂ ਫੌਜੀ ਅੰਤਿਮ ਸੰਸਕਾਰ।
ਇਸ ਨੂੰ ਕਿਸੇ ਹੋਰ ਝੰਡੇ ਦੇ ਹੇਠਾਂ ਨਾ ਰੱਖੋ: ਤਿਰੰਗੇ ਨੂੰ ਕਿਸੇ ਹੋਰ ਝੰਡੇ ਦੇ ਹੇਠਾਂ ਨਹੀਂ ਲਹਿਰਾਇਆ ਜਾਣਾ ਚਾਹੀਦਾ ਜਾਂ ਇਸ ਤਰੀਕੇ ਨਾਲ ਨਹੀਂ ਰੱਖਿਆ ਜਾਣਾ ਚਾਹੀਦਾ ਜੋ ਇਸ ਦੀ ਸ਼ਾਨ ਜਾਂ ਪ੍ਰਮੁੱਖਤਾ ਨੂੰ ਘਟਾਉਂਦਾ ਹੈ।
ਤਿਰੰਗੇ ’ਤੇ ਨਾ ਲਿਖੋ: ਰਾਸ਼ਟਰੀ ਝੰਡੇ ’ਤੇ ਕੋਈ ਸੁਨੇਹਾ, ਨਾਮ, ਨਾਅਰਾ, ਚਿੱਤਰ ਜਾਂ ਨਿਸ਼ਾਨ ਨਾ ਲਿਖੋ ਜਾਂ ਛਾਪੋ।
ਝੰਡੇ ਦੇ ਚਿੰਨ੍ਹ ਨੂੰ ਕਮਰ ਦੇ ਹੇਠਾਂ ਨਾ ਪਹਿਨੋ: ਰਾਸ਼ਟਰੀ ਝੰਡੇ ਨਾਲ ਜੁੜੇ ਬੈਜ ਜਾਂ ਝੰਡੇ ਦੇ ਪਿੰਨ ਦੀ ਵਰਤੋਂ ਕਰਦੇ ਸਮੇਂ ਝੰਡੇ ਦੀ ਸ਼ਾਨ ਬਣਾਈ ਰੱਖੋ; ਉਨ੍ਹਾਂ ਨੂੰ ਕਮਰ ਦੇ ਹੇਠਾਂ ਨਹੀਂ ਪਹਿਨਣਾ ਚਾਹੀਦਾ।

ਤਿਰੰਗੇ ਦਾ ਨਿਰਾਦਰ ਕਰਨ ਦੇ ਗੰਭੀਰ ਨਤੀਜੇ ਹੋ ਸਕਦੇ ਹਨ

ਜਾਣਬੁੱਝ ਕੇ ਰਾਸ਼ਟਰੀ ਝੰਡੇ ਦਾ ਨਿਰਾਦਰ ਕਰਨਾ, ਨੁਕਸਾਨ ਪਹੁੰਚਾਉਣਾ, ਪਾੜਨਾ ਜਾਂ ਸਾੜਨਾ ਕਾਨੂੰਨ ਦੁਆਰਾ ਸਜ਼ਾਯੋਗ ਹੋ ਸਕਦਾ ਹੈ। ਇਹ ਹਰੇਕ ਨਾਗਰਿਕ ਦੀ ਜ਼ਿੰਮੇਵਾਰੀ ਹੈ ਕਿ ਉਹ ਰਾਸ਼ਟਰੀ ਸਨਮਾਨ ਦੇ ਅਪਮਾਨ ਰੋਕਥਾਮ ਐਕਟ, 1971 ਅਤੇ ਸੰਬੰਧਿਤ ਨਿਯਮਾਂ ਦੇ ਅਨੁਸਾਰ ਰਾਸ਼ਟਰੀ ਝੰਡੇ ਦੀ ਸ਼ਾਨ ਨੂੰ ਬਣਾਈ ਰੱਖੇ। ਆਜ਼ਾਦੀ ਦਿਵਸ ’ਤੇ ਤਿਰੰਗੇ ਦੇ ਸਨਮਾਨ ਨੂੰ ਕਾਇਮ ਰੱਖੋ

15 ਅਗਸਤ ਨੂੰ ਘਰ, ਸਕੂਲ ਜਾਂ ਕਿਸੇ ਵੀ ਜਨਤਕ ਸਥਾਨ ’ਤੇ ਤਿਰੰਗਾ ਲਹਿਰਾਉਣਾ ਹਰੇਕ ਭਾਰਤੀ ਲਈ ਮਾਣ ਦਾ ਪਲ ਹੈ। ਹਾਲਾਂਕਿ ਰਾਸ਼ਟਰੀ ਝੰਡੇ - ਜੋ ਕਿ ਰਾਸ਼ਟਰ ਦੇ ਮਾਣ ਦਾ ਪ੍ਰਤੀਕ ਹੈ - ਨੂੰ ਸਤਿਕਾਰ ਅਤੇ ਦੇਖਭਾਲ ਨਾਲ ਪੇਸ਼ ਕਰਨਾ ਵੀ ਓਨਾ ਹੀ ਮਹੱਤਵਪੂਰਨ ਹੈ। ਇਸ ਲਈ ਝੰਡਾ ਲਹਿਰਾਉਣ ਤੋਂ ਪਹਿਲਾਂ ਆਪਣੇ ਆਪ ਨੂੰ ਪ੍ਰੋਟੋਕੋਲ ਤੋਂ ਜਾਣੂ ਕਰਵਾਉਣਾ ਯਕੀਨੀ ਬਣਾਓ ਅਤੇ ਤਿਰੰਗੇ ਦਾ ਸਤਿਕਾਰ ਕਰਨ ਬਾਰੇ ਦੂਜਿਆਂ ਵਿੱਚ ਜਾਗਰੂਕਤਾ ਪੈਦਾ ਕਰੋ।

ਖ਼ਤਰਨਾਕ ਸ਼ੇ੍ਰਣੀ ਵਿੱਚ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਲਈ 3 ਸਾਲਾਂ ਸਮਾਂ ਸੀਮਾ ਤੈਅ

ਚੰਡੀਗੜ੍ਹ (ਅਸ਼ਵਨੀ ਚਾਵਲਾ)। ਪੰਜਾਬ ਸਰਕਾਰ ਵੱਲੋਂ ਪੰਜਾਬ ਭਰ ਵਿੱਚ ਠੇਕੇਦਾਰਾਂ ਅਧੀਨ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਨੂੰ ਫਾਇਦਾ ਦੇਣ ਦੇ ਮਕਸਦ ਨਾਲ ਅੱਜ ਠੇਕੇਦਾਰੀ ਸਿਸਟਮ ਨੂੰ ਹੀ ਖ਼ਤਮ ਕਰਨ ਦੀ ਨੀਂਹ ਰੱਖ ਦਿੱਤੀ ਜਾਏਗੀ। ਪੰਜਾਬ ਭਰ ਵਿੱਚ ਠੇਕੇਦਾਰਾਂ ਅਧੀਨ ਕੰਮ ਕਰਨ ਵਾਲੇ 25 ਹਜ਼ਾਰ ਦੇ ਲਗਭਗ ਮੁਲਾਜ਼ਮਾਂ ਨੂੰ ਸਰਕਾਰ ਅਧੀਨ ਲੈ ਕੇ ਆਉਣ ਲਈ ਵਿਧਾਨ ਸਭਾ ਵਿੱਚ ਅਹਿਮ ਬਿੱਲ ਪੇਸ਼ ਕੀਤਾ ਜਾ ਰਿਹਾ ਹੈ, ਜਿਸ ਦੇ ਪਾਸ ਹੋਣ ਤੋਂ ਬਾਅਦ ਐਕਟ ਰੂਪ ਵਿੱਚ ਇਹ ਪੰਜਾਬ ਭਰ ਵਿੱਚ ਲਾਗੂ ਹੋ ਜਾਏਗਾ।

ਹਾਲਾਂਕਿ ਜਿਹੜੇ ਮੁਲਾਜ਼ਮ ਘੱਟ ਤੋਂ ਘੱਟ 5 ਸਾਲਾ ਠੇਕੇਦਾਰੀ ਸਿਸਟਮ ਰਾਹੀਂ ਸਰਕਾਰ ਵਿੱਚ ਕੰਮ ਕਰ ਰਹੇ ਹਨ, ਉਹਨਾਂ ਨੂੰ ਹੀ ਸਰਕਾਰ ਅਧੀਨ ਕੱਚੇ ਮੁਲਾਜ਼ਮ ਦੇ ਰੂਪ ਵਿੱਚ ਰੱਖਿਆ ਜਾਏਗਾ, ਬਾਕੀਆਂ ਨੂੰ ਇਸ ਲਈ ਵਿਚਾਰ ਨਹੀਂ ਕੀਤਾ ਜਾਏਗਾ ਹਾਲਾਂਕਿ ਜਿਹੜੇ ਮੁਲਾਜ਼ਮ ਖ਼ਤਰਨਾਕ ਕੰਮ ਕਰਨ ਦੀ ਸ਼ੇ੍ਰਣੀ ਵਿੱਚ ਆਉਂਦੇ ਹੋਏ ਉਹਨਾਂ ਲਈ ਇਹ ਸਮਾਂ ਸੀਮਾ 3 ਸਾਲ ਰੱਖੀ ਗਈ ਹੈ। 

ਜਾਣਕਾਰੀ ਅਨੁਸਾਰ ਪੰਜਾਬ ਵਿੱਚ ਠੇਕੇਦਾਰਾਂ ਅਧੀਨ ਪੰਜਾਬ ਸਰਕਾਰ ਦੇ ਵੱਖ-ਵੱਖ ਅਦਾਰਿਆਂ ਵਿੱਚ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਦੀ ਲੰਬੀ ਮੰਗ ਚਲਦੀ ਆ ਰਹੀ ਸੀ ਕਿ ਉਹਨਾਂ ਨੂੰ ਠੇਕੇਦਾਰੀ ਸਿਸਟਮ ਤੋਂ ਆਜ਼ਾਦ ਕਰਵਾਇਆ ਜਾਵੇ, ਕਿਉਂਕਿ ਸਰਕਾਰ ਵੱਲੋਂ ਮਿਲਣ ਵਾਲੀ ਤਨਖ਼ਾਹ ਵਿੱਚੋਂ ਵੱਡੇ ਪੱਧਰ ’ਤੇ ਕਟੌਤੀ ਠੇਕੇਦਾਰ ਵੱਲੋਂ ਹੀ ਕਰ ਲਈ ਜਾਂਦੀ ਹੈ ਅਤੇ 8 ਤੋਂ 12 ਘੰਟਿਆਂ ਤੱਕ ਕੰਮ ਕਰਨ ਦੇ ਬਾਵਜੂਦ ਵੀ ਉਹਨਾਂ ਨੂੰ ਭਰ ਪੇਟ ਰੋਟੀ ਜਿੰਨਾ ਪੈਸਾ ਨਹੀਂ ਮਿਲ ਰਿਹਾ ਹੈ। ਇਨ੍ਹਾਂ ਠੇਕੇਦਾਰਾਂ ਅਧੀਨ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਦੀ ਮੰਗ ਨੂੰ ਮਨਜ਼ੂਰ ਕਰਦੇ ਹੋਏ ਪੰਜਾਬ ਸਰਕਾਰ ਵੱਲੋਂ ਪੰਜਾਬ ਰਾਜ ਆਊਟਸੋਰਸਡ ਪਰਸੋਨਲ ਬਿੱਲ 2026 ਸੋਮਵਾਰ 10 ਅਗਸਤ ਨੂੰ ਪੰਜਾਬ ਵਿਧਾਨ ਸਭਾ ਵਿੱਚ ਪੇਸ਼ ਕੀਤਾ ਜਾ ਰਿਹਾ ਹੈ। 

ਇਸ ਬਿੱਲ ਰਾਹੀਂ ਉਹਨਾਂ ਮੁਲਾਜ਼ਮਾਂ ਨੂੰ ਪੰਜਾਬ ਸਰਕਾਰ ਵਿੱਚ ਕੱਚੇ ਮੁਲਾਜ਼ਮ ਵਜੋਂ ਰੱਖਿਆ ਜਾਏਗਾ, ਜਿਹੜੇ ਠੇਕੇਦਾਰੀ ਸਿਸਟਮ ਰਾਹੀਂ ਹੀ ਕੰਮ ਕਰ ਰਹੇ ਸਨ। ਸ਼ੁਰੂਆਤੀ ਪੜਤਾਲ ਦੌਰਾਨ 5 ਸਾਲ ਤੋਂ ਲੰਬੇ ਸਮੇਂ ਤੋਂ 25 ਹਜ਼ਾਰ ਦੇ ਲਗਭਗ ਮੁਲਾਜ਼ਮ ਠੇਕੇਦਾਰਾਂ ਅਧੀਨ ਕੰਮ ਕਰ ਰਹੇ ਹਨ ਅਤੇ ਇਨ੍ਹਾਂ ਨੂੰ ਲਾਭ ਮਿਲੇਗਾ। ਇਸ ਲਿਸਟ ਵਿੱਚ ਬਿਜਲੀ ਵਿਭਾਗ, ਫਾਇਰਮੈਨ ਅਤੇ ਸੀਵਰ ਮੁਲਾਜ਼ਮ ਵੀ ਸ਼ਾਮਲ ਹਨ, ਜਿਨ੍ਹਾਂ ਨੂੰ ਦੋ ਸਾਲਾਂ ਦੀ ਤੈਅ ਸਮੇਂ ਤੋਂ ਛੋਟ ਦਿੰਦੇ ਹੋਏ ਤਿੰਨ ਸਾਲਾਂ ਦਾ ਕਾਰਜਕਾਲ ਹੀ ਦਿਖਾਉਣਾ ਪਏਗਾ। 

ਇਸ ਨਵੀਂ ਵਿਵਸਥਾ ਵਿੱਚ ਠੇਕੇਦਾਰ ਵੱਲੋਂ ਲਿਆ ਜਾਣ ਵਾਲਾ ਕਮਿਸ਼ਨ ਅਤੇ ਹਰ ਤਰ੍ਹਾਂ ਦੀ ਕਟੌਤੀ ਬੰਦ ਹੋ ਜਾਏਗੀ, ਜਿਸ ਨਾਲ ਕੱਚੇ ਮੁਲਾਜ਼ਮਾਂ ਨੂੰ ਤਨਖਾਹ ਦੇ ਰੂਪ ਵਿੱਚ ਫਾਇਦਾ ਹੋਏਗਾ। ਪੰਜਾਬ ਸਰਕਾਰ ਵੱਲੋਂ ਤੈਅ ਤਨਖ਼ਾਹ ਇਨ੍ਹਾਂ ਨੂੰ ਦਿੱਤੀ ਜਾਏਗੀ ਅਤੇ ਉਸ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਕਟੌਤੀ (ਈਪੀਐੱਸ/ਪੀਐੱਫ ਨੂੰ ਛੱਡ ਕੇ) ਨਹੀਂ ਹੋਏਗੀ।

ਬੈਂਕ ਸਟੇਟਮੈਂਟ ਦਾ ਦੇਣਾ ਪਏਗਾ ਰਿਕਾਰਡ, ਨਗਦ ਤਨਖ਼ਾਹ ਨਹੀਂ ਹੋਏਗੀ ਮਨਜ਼ੂਰ

ਠੇਕੇਦਾਰੀ ਸਿਸਟਮ ਤੋਂ ਸਰਕਾਰ ਵਿੱਚ ਕੱਚੇ ਮੁਲਾਜ਼ਮ ਵਜੋਂ ਟਰਾਂਸਫ਼ਰ ਹੋਣ ਵਾਲੇ ਹਰ ਮੁਲਾਜ਼ਮ ਨੂੰ ਰਿਕਾਰਡ ਦੇ ਰੂਪ ਵਿੱਚ ਹਾਜ਼ਰੀ ਰਜਿਸਟਰ ਤੋਂ ਇਲਾਵਾ ਆਪਣੀ ਬੈਂਕ ਸਟੇਟਮੈਂਟ ਵੀ ਦਿਖਾਉਣੀ ਪਏਗੀ। ਬੈਂਕ ਸਟੇਟਮੈਂਟ ਵਿੱਚ ਹਰ ਮਹੀਨੇ ਦੀ ਤਨਖ਼ਾਹ ਸ਼ਾਮਲ ਹੋਣਾ ਜ਼ਰੂਰੀ ਹੈ। ਬੈਂਕ ਵਿੱਚ ਆਈ ਤਨਖ਼ਾਹ ਨੂੰ ਹੀ ਰਿਕਾਰਡ ਵਿੱਚ ਕਾਰਜ ਰੂਪ ਵਿੱਚ ਦੇਖਿਆ ਜਾਏਗਾ, ਜਦੋਂ ਕਿ ਨਗਦ ਤਨਖ਼ਾਹ ਲੈਣ ਵਾਲੇ ਮੁਲਾਜ਼ਮਾਂ ਦਾ ਕਾਰਜ ਕਾਲ ਨਹੀਂ ਮੰਨਿਆ ਜਾਏਗਾ। 

ਚੰਡੀਗੜ੍ਹ (ਅਸ਼ਵਨੀ ਚਾਵਲਾ)। ਕਾਂਗਰਸ ਪਾਰਟੀ ’ਚ ਅਨੁਸ਼ਾਸਨਹੀਣਤਾ ਪਹਿਲੀ ਵਾਰ ਆਪਣੀ ਹਰ ਹੱਦ ਨੂੰ ਪਾਰ ਕਰਦੀ ਨਜ਼ਰ ਆ ਰਹੀ ਹੈ, ਕਿਉਂਕਿ ਇਸ ਤੋਂ ਪਹਿਲਾਂ ਸੂਬਾ ਪ੍ਰਧਾਨ ਜਾਂ ਫਿਰ ਕਾਂਗਰਸ ਦੇ ਹੀ ਮੁੱਖ ਮੰਤਰੀ ਖ਼ਿਲਾਫ਼ ਗੁੱਟਬਾਜ਼ੀ ਜਰੂਰ ਹੋਈ ਸੀ ਪਰ ਪਾਰਟੀ ਦੇ ਅੰਦਰ ਬੈਠ ਕੇ ਹੀ ਜਿਆਦਾਤਰ ਬਿਆਨਬਾਜ਼ੀ ਹੁੰਦੀ ਰਹੀ ਹੈ ਪਰ ਪਹਿਲੀ ਵਾਰ ਕਾਂਗਰਸ ਪਾਰਟੀ ਦੇ ਪ੍ਰੋਗਰਾਮਾਂ ’ਚ ਲਗਾਤਾਰ ਇਸ ਤਰੀਕੇ ਸੂਬਾ ਪ੍ਰਧਾਨ ਦਾ ਨਾ ਸਿਰਫ਼ ਵਿਰੋਧ ਹੋ ਰਿਹਾ ਹੈ, ਸਗੋਂ ਮੌਕੇ ’ਤੇ ਹਾਜ਼ਰ ਕਾਂਗਰਸ ਇੰਚਾਰਜ਼ ਖ਼ਿਲਾਫ਼ ਹੀ ‘ਗੋ ਬੈਕ’ ਤੱਕ ਦਾ ਨਾਅਰੇ ਲੱਗਦੇ ਨਜ਼ਰ ਆ ਰਹੇ ਹਨ।

ਪੰਜਾਬ ’ਚ ਇਸ ਤਰੀਕੇ ਨਾਲ ਹੋ ਰਹੇ ਹਰ ਜ਼ਿਲ੍ਹੇ ’ਚ ਵਿਰੋਧ ਨੂੰ ਦੇਖ ਕੇ ਦਿੱਲੀ ਤੱਕ ਕਾਂਗਰਸ ਹਾਈ ਕਮਾਨ ਪਰੇਸ਼ਾਨ ਹੈ ਕਿ ਹੁਣ ਇਸ ਸਥਿਤੀ ’ਚੋਂ ਕਿਵੇਂ ਬਾਹਰ ਆਇਆ ਜਾਵੇ। 

Read Also : ਮੋਦੀ ਸਰਕਾਰ ਦੇ ਦਬਾਅ ਹੇਠ ਪੇਪਰ ਲੀਕ ਅਤੇ ਈ-20 ਖ਼ਿਲਾਫ਼ ਉੱਠ ਰਹੀ ਆਵਾਜ਼ ਨੂੰ ਦਬਾ ਰਿਹਾ ਮੇਟਾ: ਕੇਜਰੀਵਾਲ

ਦੂਜੇ ਪਾਸੇ ਕਾਂਗਰਸ ਇੰਚਾਰਜ਼ ਭੁਪੇਸ਼ ਬਘੇਲ ਵੀ ਇਸ ਗੁੱਟਬਾਜ਼ੀ ਨੂੰ ਕੰਟਰੋਲ ਕਰਨ ’ਚ ਅਸਫ਼ਲ ਹੁੰਦੇ ਨਜ਼ਰ ਆ ਰਹੇ ਹਨ ਤਾਂ ਹੁਣ ਉਨ੍ਹਾਂ ਵੱਲੋਂ ਵਿਰੋਧ ਪ੍ਰਦਰਸ਼ਨ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕਰਨ ਦੀ ਗੱਲ ਆਖੀ ਜਾ ਰਹੀ ਹੈ। 

ਜਾਣਕਾਰੀ ਅਨੁਸਾਰ ਪੰਜਾਬ ਕਾਂਗਰਸ ਕਮੇਟੀ ਦੇ ਪ੍ਰਧਾਨਗੀ ਦੀ ਸੀਟ ’ਤੇ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਨੂੰ ਕਾਇਮ ਰੱਖਣ ਦਾ ਫੈਸਲਾ ਕਰਨ ਤੋਂ ਬਾਅਦ ਕਾਂਗਰਸ ਹਾਈ ਕਮਾਨ ਨੂੰ ਹੀ ਪੰਜਾਬ ’ਚ ਆਪਣੀ ਪਾਰਟੀ ’ਚ ਅੰਦਰੂਨੀ ਗੁੱਟਬਾਜ਼ੀ ਤੇ ਵਿਰੋਧ ਦਾ ਵੱਡੇ ਪੱਧਰ ’ਤੇ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੰਜਾਬ ’ਚ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਹਰ ਜ਼ਿਲ੍ਹੇ ’ਚ ਪਹੁੰਚ ਕਰਦੇ ਹੋਏ ਬੂਥ ਪੱਧਰ ’ਤੇ ਪਾਰਟੀ ਨੂੰ ਤਾਕਤਵਰ ਬਣਾਉਣ ਦਾ ਸੂਬਾ ਕਾਂਗਰਸ ਨੇ ਪ੍ਰੋਗਰਾਮ ਬਣਾਇਆ ਸੀ ਤਾਂ ਕਾਂਗਰਸ ਹਾਈ ਕਮਾਨ ਨੇ ਇਹਨਾਂ ਸਾਰੇ ਪ੍ਰੋਗਰਾਮਾਂ ’ਚ ਕਾਂਗਰਸ ਇੰਚਾਰਜ਼ ਭੁਪੇਸ਼ ਬਘੇਲ ਨੂੰ ਭੇਜਣ ਦਾ ਫੈਸਲਾ ਲਿਆ ਤਾਂਕਿ ਉਨ੍ਹਾਂ ਦੀ ਮੌਜ਼ੂਦਗੀ ’ਚ ਕਾਂਗਰਸ ਦੀ ਗੁੱਟਬਾਜ਼ੀ ਬਾਹਰ ਨਾ ਆਵੇ ਤੇ ਨਰਾਜ਼ ਆਗੂਆਂ ਨੂੰ ਸ਼ਾਂਤ ਵੀ ਕੀਤਾ ਜਾ ਸਕੇ। 

ਭੁਪੇਸ਼ ਬਘੇਲ ਦੇ ਪੰਜਾਬ ’ਚ ਪੁੱਜਣ ਤੋਂ ਬਾਅਦ ਜਿਹੜੇ ਵੀ ਜ਼ਿਲੇ੍ਹ ’ਚ ਪ੍ਰੋਗਰਾਮ ਹੋ ਰਿਹਾ ਹੈ, ਉੱਥੇ ਭਾਰੀ ਹੰਗਾਮਾ ਹੋਣ ਦੇ ਨਾਲ ਅਮਰਿੰਦਰ ਸਿੰਘ ਰਾਜਾ ਵੜਿੰਗ ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ। ਲਗਾਤਾਰ ਅਨੁਸ਼ਾਸਨ ਤੋੜਦੇ ਹੋਏ ਚਰਨਜੀਤ ਸਿੰਘ ਚੰਨੀ ਦੇ ਹੱਕ ’ਚ ਨਾਅਰੇਬਾਜ਼ੀ ਕੀਤੀ ਜਾ ਰਹੀ ਹੈ ਵੀਰਵਾਰ ਨੂੰ ਲੁਧਿਆਣਾ ਵਿਖੇ ਹੋਏ ਪ੍ਰੋਗਰਾਮ ’ਚ ਪਹਿਲੀ ਵਾਰ ਕਾਂਗਰਸ ਇੰਚਾਰਜ਼ ਭੁਪੇਸ਼ ਬਘੇਲ ਦੇ ਹੀ ‘ਗੋ ਬੈਕ’ ਦੇ ਨਾਅਰੇ ਲੱਗ ਗਏ, ਜਿਸ ਨੂੰ ਦੇਖ ਕੇ ਹਰ ਕੋਈ ਹੈਰਾਨ ਕਿ ਪਹਿਲੀ ਵਾਰ ਕਾਂਗਰਸ ਪਾਰਟੀ ਦੇ ਇੰਚਾਰਜ਼ ਨਾਲ ਇਸ ਤਰੀਕੇ ਦੀ ਅਨੁਸ਼ਾਸਨਹੀਣਤਾ ਹੋਈ ਹੋਵੇ। ਲੁਧਿਆਣਾ ਵਿਖੇ ਖ਼ਰਾਬ ਹੋਏ ਮਾਹੌਲ ਤੋਂ ਬਾਅਦ ਦਿੱਲੀ ’ਚ ਇਸ ਦੀ ਸੂਚਨਾ ਵੀ ਦੇ ਦਿੱਤੀ ਗਈ ਹੈ ਪਰ ਕਾਂਗਰਸ ਹਾਈ ਕਮਾਨ ਵੱਲੋਂ ਵੀ ਇਸ ਸਮੇਂ ਕੋਈ ਵੱਡਾ ਫੈਸਲਾ ਨਹੀਂ ਕੀਤਾ ਜਾ ਰਿਹਾ।

ਕਾਂਗਰਸ ਦੀ ਗੁੱਟਬਾਜ਼ੀ ਦਾ ਸਿੱਧਾ ਫਾਇਦਾ ਆਮ ਆਦਮੀ ਪਾਰਟੀ ਨੂੰ  ਪੰਜਾਬ ਵਿਧਾਨ ਸਭਾ ਚੋਣਾਂ ’ਚ ਸਭ ਤੋਂ ਵੱਡੀ ਟੱਕਰ ਕਾਂਗਰਸ ਤੇ ਆਮ ਆਦਮੀ ਪਾਰਟੀ ’ਚ ਹੀ ਮੰਨੀ ਜਾ ਰਹੀ ਹੈ ਪਰ ਬੀਤੇ 30 ਦਿਨਾਂ ’ਚ ਕਾਂਗਰਸ ਪਾਰਟੀ ’ਚ ਜਿਸ ਤਰੀਕੇ ਦੀ ਅਨੁਸ਼ਾਸਨਹੀਣਤਾ ਤੇ ਗੁੱਟਬਾਜ਼ੀ ਚੱਲ ਰਹੀ ਹੈ, ਉਸ ਦਾ ਫਾਇਦਾ ਸਿੱਧੇ ਤੌਰ ’ਤੇ ਆਮ ਆਦਮੀ ਪਾਰਟੀ ਨੂੰ ਹੋ ਰਿਹਾ ਹੈ, ਕਿਉਂਕਿ ਕਾਂਗਰਸ ਪਾਰਟੀ ’ਚ ਚੱਲ ਰਹੇ ਆਪਸੀ ਕਲੇਸ਼ ਨੂੰ ਦੇਖਦੇ ਹੋਏ ਵੋਟਰ ਕਾਂਗਰਸ ਪਾਰਟੀ ਤੋਂ ਦੂਰੀ ਬਣਾ ਸਕਦਾ ਹੈ ਤਾਂ ਕਾਂਗਰਸ ਪਾਰਟੀ ਦਾ ਵਰਕਰ ਵੀ ਹੌਂਸਲਾ ਛੱਡ ਰਿਹਾ ਹੈ, ਜਿਸ ਕਾਰਨ ਹੀ ਆਮ ਆਦਮੀ ਪਾਰਟੀ ਕਾਫ਼ੀ ਜਿਆਦਾ ਖ਼ੁਸ਼ ਹੈ, ਕਿਉਂਕਿ ਇਸ ਤਰ੍ਹਾਂ ਦੇ ਮਾਹੌਲ ’ਚ ਉਹ ਕਾਫ਼ੀ ਜਿਆਦਾ ਚੰਗੀ ਸਥਿਤੀ ’ਚ ਪਹੁੰਚ ਸਕਦੇ ਹਨ।

ਹੰਗਾਮਾ ਕਰਨ ਵਾਲੇ ਕਾਂਗਰਸੀਆਂ ਖ਼ਿਲਾਫ਼ ਕੀਤੀ ਜਾਏਗੀ ਕਾਰਵਾਈ: ਭੁਪੇਸ਼ ਬਘੇਲ 

ਕਾਂਗਰਸ ਪਾਰਟੀ ਦੇ ਇੰਚਾਰਜ਼ ਭੁਪੇਸ਼ ਬਘੇਲ ਨੇ ਵੀ ਕਿਹਾ ਹੈ ਕਿ ਇਸ ਤਰੀਕੇ ਦੀ ਅਨੁਸ਼ਾਸਨਹੀਣਤਾ ਨੂੰ ਬਰਦਾਸ਼ਤ ਕਰਨਾ ਮੁਸ਼ਕਿਲ ਹੈ ਤੇ ਜਿਹੜੇ ਵੀ ਕਾਂਗਰਸ ਦੇ ਲੀਡਰ ਇਸ ਤਰ੍ਹਾਂ ਦੀ ਅਨੁਸ਼ਾਸਨਹੀਣਤਾ ਕਰ ਰਹੇ ਹਨ, ਉਨ੍ਹਾਂ ਖ਼ਿਲਾਫ਼ ਸਖਤ ਤੋਂ ਸਖਤ ਕਾਰਵਾਈ ਕੀਤੀ ਜਾਏਗੀ। ਉਨ੍ਹਾਂ ਅੱਗੇ ਕਿਹਾ ਕਿ ਹੁਣ ਤੱਕ ਉਹ ਸਿਰਫ਼ ਚੁੱਪ ਸਨ ਪਰ ਹੁਣ ਕਾਰਵਾਈ ਕਰਨ ਤੋਂ ਪਿੱਛੇ ਨਹੀਂ ਹਟਣਗੇ।

Punjab Education News: ਚੰਡੀਗੜ੍ਹ (ਅਸ਼ਵਨੀ ਚਾਵਲਾ)। ਪੰਜਾਬ ਸਰਕਾਰ ਵੱਲੋਂ ਸਿੱਖਿਆ ਖੇਤਰ ਵਿੱਚ ਸਿੱਖਿਆ ਕ੍ਰਾਂਤੀ ਦੇ ਕੀਤੇ ਜਾ ਰਹੇ ਦਾਅਵਿਆਂ ’ਤੇ ਹੁਣ ਸਿੱਖਿਆ ਵਿਭਾਗ ਨੇ ਹੀ ਆਪਣੇ ਅੰਕੜਿਆਂ ਨੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਪਿਛਲੇ ਸਾਢੇ ਚਾਰ ਸਰਕਾਰੀ ਸਾਲਾਂ ਦੌਰਾਨ  ਸੱਤ ਸਕੂਲ ਬੰਦ ਹੋ ਗਏ ਹਨ, ਜਦੋਂ ਕਿ ਇਸ ਦੇ ਮੁਕਾਬਲੇ ਸਿਰਫ਼ 2 ਸਕੂਲ ਹੀ ਨਵੇਂ ਤਿਆਰ ਕੀਤੇ ਗਏ ਹਨ। ਇਨ੍ਹਾਂ ਅੰਕੜਿਆਂ ਨੂੰ ਪੰਜਾਬ ਵਿਧਾਨ ਸਭਾ ਵਿੱਚ ਪੇਸ਼ ਕੀਤਾ ਗਿਆ ਹੈ। ਇੱਕ ਹੋਰ ਵੀ ਖ਼ੁਲਾਸਾ ਹੋਇਆ ਹੈ ਕਿ ਪਿਛਲੇ ਸਾਢੇ ਚਾਰ ਸਾਲ ਦੌਰਾਨ ਛੇ ਲੱਖ ਤੋਂ ਜ਼ਿਆਦਾ ਵਿਦਿਆਰਥੀ ਹੀ ਸਰਕਾਰੀ ਸਕੂਲਾਂ ਵਿੱਚ ਘੱਟ ਗਏ ਹਨ।

 ਪੰਜਾਬ ਵਿਧਾਨ ਸਭਾ ਵਿੱਚ ਸਕੂਲ ਸਿੱਖਿਆ ਮੰਤਰੀ ਹਰਜੋਤ ਸਿੰਘ ਬੈਂਸ ਵੱਲੋਂ ਦਿੱਤੇ ਲਿਖਤੀ ਜਵਾਬ ਮੁਤਾਬਕ 16 ਮਾਰਚ 2022 ਤੋਂ 28 ਜੁਲਾਈ 2026 ਤੱਕ ਪੂਰੇ ਪੰਜਾਬ ਵਿੱਚ ਸਿਰਫ਼ ਇੱਕ ਪ੍ਰਾਇਮਰੀ ਅਤੇ ਇੱਕ ਮਿਡਲ ਸਕੂਲ, ਭਾਵ ਕੁੱਲ ਦੋ ਨਵੇਂ ਸਰਕਾਰੀ ਸਕੂਲ ਖੋਲ੍ਹੇ ਗਏ ਹਨ। ਇਸ ਦੇ ਉਲਟ ਇਸੇ ਸਮੇਂ ਦੌਰਾਨ 6 ਪ੍ਰਾਇਮਰੀ ਅਤੇ 1 ਮਿਡਲ ਸਕੂਲ ਸਮੇਤ ਕੁੱਲ 7 ਸਰਕਾਰੀ ਸਕੂਲ ਬੰਦ ਕਰ ਦਿੱਤੇ ਗਏ।

Read Also : ਸਾਢੇ 4 ਸਾਲਾਂ ‘ਚ 68 ਹਜ਼ਾਰ ਤੋਂ ਵੱਧ ਸਰਕਾਰੀ ਨੌਕਰੀਆਂ, 1.83 ਲੱਖ ਕਰੋੜ ਦੇ ਨਿਵੇਸ਼ ਨਾਲ 6.36 ਲੱਖ ਪ੍ਰਾਈਵੇਟ ਨੌਕਰੀਆਂ ਦੇ ਮੌਕੇ ਪੈਦਾ ਕੀਤੇ: ਨੌਜਵਾਨਾਂ ਲਈ ਸਾਜ਼ਗਾਰ ਮਾਹੌਲ ਸਿਰਜ ਰਹੀ ਹੈ ਮਾਨ ਸਰਕਾਰ: ਅਮਨ ਅਰੋੜਾ

ਪੰਜਾਬ ਸਰਕਾਰ ਦੇ ਰਿਕਾਰਡ ਮੁਤਾਬਕ ਇਸ ਅਰਸੇ ਦੌਰਾਨ ਸਿਰਫ਼ 5 ਹਾਈ ਸਕੂਲਾਂ ਨੂੰ ਸੀਨੀਅਰ ਸੈਕੰਡਰੀ ਸਕੂਲਾਂ ਵਿੱਚ ਅਪਗ੍ਰੇਡ ਕੀਤਾ ਗਿਆ, ਪਰ ਨਵੇਂ ਸਕੂਲ ਖੋਲ੍ਹਣ ਦੇ ਮਾਮਲੇ ਵਿੱਚ ਤਸਵੀਰ ਕਾਫ਼ੀ ਫਿੱਕੀ ਨਜ਼ਰ ਆਉਂਦੀ ਹੈ। ਵਿਰੋਧੀ ਧਿਰ ਹੁਣ ਇਸ ਨੂੰ ਸਰਕਾਰ ਦੇ ਵੱਡੇ-ਵੱਡੇ ਦਾਅਵਿਆਂ ਅਤੇ ਜ਼ਮੀਨੀ ਹਕੀਕਤ ਵਿਚਕਾਰ ਦਾ ਫਰਕ ਦੱਸ ਰਹੀ ਹੈ। ਵਿਧਾਨ ਸਭਾ ਵਿੱਚ ਕਾਂਗਰਸ ਦੇ ਵਿਧਾਇਕ ਅਵਤਾਰ ਹੈਨਰੀ ਜੂਨੀਅਰ ਇਸ ਮਾਮਲੇ ਵਿੱਚ ਸਰਕਾਰ ਨੂੰ ਘੇਰਦੇ ਹੋਏ ਸੁਆਲ ਵੀ ਕੀਤਾ ਕਿ ਹੁਣ ਤਾਂ ਖ਼ੁਦ ਸਰਕਾਰ ਦਾ ਰਿਕਾਰਡ ਹੀ ਵਿਧਾਨ ਸਭਾ ਵਿੱਚ ਪੇਸ਼ ਹੈ ਤਾਂ ਸਰਕਾਰ ਕਿਵੇਂ ਆਖ ਸਕਦੀ ਹੈ ਕਿ ਪੰਜਾਬ ਵਿੱਚ ਸਿੱਖਿਆ ਦੀ ਕ੍ਰਾਂਤੀ ਆਈ ਹੋਈ ਹੈ।  

ਇਥੇ ਹੀ ਸਭ ਤੋਂ ਵੱਡੀ ਚਿੰਤਾ ਦਾ ਵਿਸ਼ਾ ਸਰਕਾਰੀ ਸਕੂਲਾਂ ਵਿੱਚ ਵਿਦਿਆਰਥੀਆਂ ਦੀ ਲਗਾਤਾਰ ਘਟ ਰਹੀ ਗਿਣਤੀ ਹੈ। ਮਾਰਚ 2022 ਵਿੱਚ ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿੱਚ ਕੁੱਲ 29 ਲੱਖ 62 ਹਜ਼ਾਰ 378 ਵਿਦਿਆਰਥੀ ਪੜ੍ਹ ਰਹੇ ਸਨ, ਜਦਕਿ ਜੁਲਾਈ 2026 ਤੱਕ ਇਹ ਗਿਣਤੀ ਘਟ ਕੇ 23 ਲੱਖ 64 ਹਜ਼ਾਰ 76 ਰਹਿ ਗਈ। ਅਰਥਾਤ ਸਾਢੇ ਚਾਰ ਸਾਲਾਂ ਵਿੱਚ ਕਰੀਬ 5 ਲੱਖ 98 ਹਜ਼ਾਰ 302 ਵਿਦਿਆਰਥੀਆਂ ਦੀ ਕਮੀ ਦਰਜ ਕੀਤੀ ਗਈ। ਪ੍ਰਾਇਮਰੀ ਤੋਂ ਲੈ ਕੇ ਸੀਨੀਅਰ ਸੈਕੰਡਰੀ ਪੱਧਰ ਤੱਕ ਹਰ ਵਰਗ ਵਿੱਚ ਵਿਦਿਆਰਥੀਆਂ ਦੀ ਗਿਣਤੀ ਘਟੀ ਹੈ। ਇਹ ਅੰਕੜੇ ਉਸ ਵੇਲੇ ਸਾਹਮਣੇ ਆਏ ਹਨ, ਜਦੋਂ ਪੰਜਾਬ ਸਰਕਾਰ ਸਿੱਖਿਆ ਖੇਤਰ ਵਿੱਚ ਕੀਤੇ ਸੁਧਾਰਾਂ ਅਤੇ ਸਰਕਾਰੀ ਸਕੂਲਾਂ ਦੇ ਵਿਕਾਸ ਨੂੰ ਆਪਣੀ ਵੱਡੀ ਉਪਲਬਧੀ ਵਜੋਂ ਪੇਸ਼ ਕਰਦੀ ਰਹੀ ਹੈ।